Xomihni Ahoeane Jë Së Ngöne La Huliwa Ne Cainöj
1. Hnei Iehova hna xomihni ahoeane tune kaa la itre atr?
1 Atraqatre la aqane xomihni ahoeane Akötresieti la itre atr. (Eso. 34:6; Sal. 106:41-45; 2 Pet. 3:9) Kola mama jëne la ketre ceitun la aqane xomihni ahoeane i Iehova, ngöne la huliwa ne cainöjëne la Baselaia e cailo fen. Traqa koi 2 000 lao macatre ne ce huliwa Iehova memine la itre atr, nge Nyidrëti pala hi a catre hëne koi Nyidrë la itre atr ka hni ka menyik. (Ioane 6:44) Tro sa xötrethenge tune kaa la aqane xomihni ahoeane i Iehova?
2. Easa xomihni ahoeane tune kaa ngöne la easa cainöj ngöne la ketre teritoar?
2 Cainöje Ngöne Itre Hnalapa Trootro: Maine “tha mano kö” së cainöj ngöne la itre götran hna mele ngön hnene la itre atr ka pëkö hni ne ajan, haawe, easë hi lai a nyitipune la aqane xomihni ahoeane i Iehova. (Ite hu. 5:42) Easa xomihni ahoean ngöne la kola tha semesine së, me hnyimasai së me icilekeu me easë. (Mar. 13:12, 13) Ketre, easa xomihni ahoean ngöne la kola catre troa fie la itre itine feja ne la nyipici, ngacama jole koi së troa öhne la itre atr ka hni ka ajan ngöne la itre hnalapa i angatr.
3. Pine nemen matre nyipi ewekë troa xomihni ahoean ngöne la kola iwai hmaca me ngöne la kola ini Tusi Hmitrötr memine la itre atr?
3 Itre Ini Tusi Hmitrötr: Ka nyipi ewekë la xomihni ahoean ngöne la kola traa feja. Ame la hne së hna atrein, tre, troa fie, ngo thatreine pëhë së troa aciane nyimenyimën. (Iako. 5:7) Ketre tune mina fe ngöne la götrane la ua, laka, nyimu ewekë nyine troa kuca matre troa kökötre trootro. (Mar. 4:28) Maine jë troa jole kowe la itre atr ka inine la Tusi Hmitrötr troa nuetrije la itre ini ka thoi qaathei hmi maine itre hna majemine kuca ka ifeketh me Tusi Hmitrötr. Tha loi kö tro sa anyimenyimën la itre atr ka ini tus troa saze. Nyipi ewekë tro sa xomihni ahoean me nue ijin kowe la Uati Hmitrötr troa huliwa ekuhu hni ne la hnainin.—1 Kor. 3:6, 7.
4. Nemene la aqane troa xatua së hnene la xomihni ahoean troa cainöje hnyawa kowe la itre sinee së ka tha ce hmi kö me easë?
4 Itre Sinee Së Ka Tha Ce Hmi Kö Me Easë: Ngacama ajane catre së troa hane atre la nyipici hnene la itre sine së ka tha ce hmi kö me easë, ngo loi e tro sa xomihni ahoean me treqene la ijine ka ijij troa ce thawa me angatr la lapaune së. Ketre thupëne kö së troa tru menu pala ha la itre ithuemacanyi hna hamëne koi angatr. (Ate cai. 3:1, 7) Loi e tro mina fe sa amamai tulu me catre troa ce thawa la lapaune së cememine la thiina ka menyik me hni ka metrötr. (1 Pet. 3:1, 15) Maine tro sa catre xomihni ahoean ngöne la huliwa ne cainöje së, tro ha hetre thangane la huliwa cili, nge tro ha madrine atraqatr la Tretretro së ekoho hnengödrai.