Loi e Tro Sa Hnime La Akötresie Atre Hnimi Së
“Tro eö a aja Joxu Akötresi ’ö hnene la hni ’ö ka pexej, me u i ’ö ka pexej, me mekune i’ ö ka pexej.”—MATAIO 22:37.
1, 2. Nemene la ka upe la itre Faresaio troa hnyingë Iesu la pengöne la wathebo ka tru ne la nojëi wathebo?
AME ngöne la hnedrai Iesu, ke ketre mekune caha hna isenyin hnene la itre Farasaio. Qa ngöne lo 600 lao wathebo hna cinyihane ngöne la Trenge Wathebo i Mose, nemene wathebo la ka sisitria catr? Hapeu, kolo ketre wathebo lai ka upi së troa hnëkëne la huuj? Eje hi lai laka ame la itre huuj, ke hna kuca nyine troa ietra pine la itre ngazo së nge matre troa olene mina fe koi Akötresie. Maine pena, kolo wathebo thatraqane lo itre nyine troa peritomon? Ketre wathebo lai ka nyipi ewekë catr, pine laka hna peritomone la nöjei trahmanyi asë ekö, nyine hatrene la isisinyikeu hnei Iehova hna kuca me Aberahama.—Genese 17:9-13.
2 Ketre, hna qaja hnene la itre ka lapa xome la hmi itre xötrapane ekö, ka hape, ame asë hi la itre wathebo hnei Iehova hna hamën, ka sisitria asë hi itre ej ngacama ame la itre xan ke thaa ka nyipi ewekë catre kö; ngazo pe e troa adraiëne la itre xan. Hnene la itre Faresaio hna mekune troa hnying me tupathi Iesu. Angatr a mekune ka hape, maine jë tro nyidrëti a qaja la ketre trenge ewekë ka troa athixötrë nyidrë. Ene pe easenyi Iesu jë hi hnene la ketre e angatr, me hnyingë nyidrë ka hape: “E ka la wathebo ka tru ne la nöjei wathebo?”—Mataio 22:34-36.
3. Nemene la aqane qejepengöne Iesu la wathebo ka sisitria ne la nöjei wathebo?
3 Sisitria catre koi së enehila la aqane sa hnei Iesu la hnying. Ngöne la Iesu a sa la hnying, hnei nyidrëti hna qaja la ketre ewekë ka sisitria catr nge ka tro pala hi a sisitria ngöne la nyipi hmi. Hnei Iesu hna e la xötr qa hnine la tusi Deuteronomi 6:5 me hape: “ ‘Qâ i’ö troa hni Iehova Akötesi’ö hnene la hni’ö ka pexej, me u i’ö ka pexej, me tenge cate i’ö ka pexej.’ Celë hi lai wathebo ka tru nge hnapane.” Ngacama hnene la faresaio hna hnying thatraqane la caasi hi la wathebo, ame pe, hnei Iesu hna qaja fe koi angeic la hnaaluen. Hnei nyidrëti hna e la xötr qa hnine la tusi Levitiko 19:18 me hape: “Ame la hnaaluen, te, tune mina hi, ka hape, ‘Tro eö a hnime la ate lapa eashenyi’ö tune lo eö hi.’ ” Thupene lai, hnei Iesu hna amamane laka, ame la lue wathebo cili ke lue ka sisitria catr ngöne la nyipi hmi. Canga trotrohnine hi nyidrëti laka, angatr a thele troa athixötrë nyidrë me uku nyidrëti troa pane e xötrëne la itre wathebo, thenge la isa enyipiewekëne itre ej; öni nyidrëti e qaja ka hape: “Ngöne la lue wathebo cili kola thipe la ite wathebo asë me nöjei perofeta.” (Mataio 22:37-40) Ngöne la ini celë, tro sa ce wang la wathebo ka tru ne la lue wathebo cili. Pine nemene matre tro sa hnimi Akötresie? Tune kaa la aqane tro sa amamane la ihnimi së koi Akötresie? Nge tune kaa la aqane tro sa eëne ej? Nyipi ewekë catr troa atre la itre mekune ka sa la itre hnying celë, ke maine easë a ajane troa amadrinë Iehova, loi e tro sa hnimi Nyidrë hnene la hni së ka pexej, me u së ka pexej, me mekuna së ka pexej.
Enyipiewekëne La Ihnim
4, 5. (a) Pine nemene matre thaa sesëkötre kö lo Faresaio hnene la hna qaja hnei Iesu? (b) Nemene la ewekë ka tru alameken koi Akötresie hune la itre huuj?
4 Kösë lo thaa sesëkötre kö la Faresaio ka hnyinge koi Iesu, ngöne lo angeic a dreng la hnei nyidrëti hna sa, nge thaa ketre xou pena kö angeic. Atre hi angeic laka ame la ihnimi koi Akötresie, ke celë hi lai ketre ewekë ka sisitria ngöne la nyipi hmi, ngacama nyimutre la itre atr ka thaa melëne kö la thiina cili. Ngöne la itre sunago, hna majemine troa e gufane la ketre thithi qene heberu hna hëne ka hape Shema; eje fe e hnine la thithi cili la itre xötr hna xome qa hnine la tusi Deuteronomi 6:4-9, itre trenge ewekë hna xome hmaca hnei Iesu. Thenge la hna cinyihane hnine la tusi Mareko, önine jë hi lo Faresaio koi Iesu ka hape: “Ate ini fe, nyipici la hnei cilieti hna ulatin, laka casi anganyidë, nge pëkö kete; nge ame la troa aja nyidëti hnene la hni ka pexej, me mekune ka pexej, me u ka pexej, me tenge cate ka pexej; nge ame la troa hnime la ate lapa eashenyi tui angeice kö, te, nyipi ewekë lai hune la nöjei huje hna deuthe apexejen, me nöjei huj’asë.”—Mareko 12:32, 33.
5 Eje hi laka, maine hna amekötine hnene la Trenge Wathebo troa huuj, ngo ame la ka nyipi ewekë koi Akötresie, ke ene la aliene la itre hni ne la itre hlue i Nyidrë; ihnimi angatre koi Akötresie la ka upi angatr troa huuj. Sisitria kö koi Nyidrë la troa huujëne la ketre sisi cememine la ihnim me hni ka pexej, hune la troa hamën me huujën la itre thauzane lao mamoe trahmanyi ngo thaa qaa kö kuhu hni, maine itre wenene pena la hni ka ngazo. (Mika 6:6-8) Mekune hi së lo ketre sine föe ka pë ewekë hna goeën hnei Iesu ngöne Eneti Hmitrötr e Ierusalema. Ame la lue mani ka co hnei eahlo hna kuiën hnine la trengene mani, ke goi thaa ijije fe troa itöne la caa sisi. Ketre, ame la manie cili hna hamën cememine la hni ka hnimi Iehova, ke tru catre kö koi Nyidrë la alien’ej, hune la itre manie ka tru hna kuiën hnene la itre trena mo qa ngöne la tiqa angatr. (Mareko 12:41-44) Drei la ketre ithuecatr koi së troa atre laka ame la ka nyipi ewekë koi Iehova, ke, ene la tro sa amamane la ihnimi së, ngacama isapengöne la itre jol hne së hna melën!
6. Nemene la hnei Paulo hna cinyihane göne la enyipiewekëne la troa ihnim?
6 Hnei Paulo aposetolo hna catre amexej la enyipiewekëne la troa ihnim ngöne la nyipi hmi. Öni nyidrëti e cinyihane ka hape: “Maine ini a ewekëne la ite hna ewekë ite ate, me ite angela, nge pëkö ihniming, cei tunge memine la fao ka ulil, me simebalo ka mexem. Nge maine ate perofeta ni, nge ateine la nöjei ewekë ka sihngöd, me nöjei inamacan’asë; nge maine hetenyi ni la lapaune mate ateine ni troa fejane la ite wet, ngo pëkö ihniming, hawe, tha nyipi ewekë kö ni. Nge maine ini a thawa la ite ewekënge koi ange pë ewekë, nge maine ini a hamëne la ngönetei nge mate deuthe tij, ngo pëkö ihniming, hawe, pëkö thangane koi ni.” (1 Korinito 13:1-3) Haawe, kola mama hnyawa ka hape, maine easa ajan troa amadrinë Akötresie, nyipi ewekë tro sa ihnimi ngöne la hmi së. Ngo, tune kaa la aqane tro sa amamane la ihnimi së koi Iehova?
Tune Kaa La Aqane Tro Sa Amamane La Ihnimi Së Koi Iehova
7, 8. Tune kaa la aqane tro sa amamane la ihnimi së koi Iehova?
7 Nyimutre la itre ka jelenyipicine laka ame la ihnim ke ketre aliene la hni hne së hna thatreine xomihnin; celë hi matre qaja jë lo edromë hna hape, “troa kei kowe la ihnim.” Ketre, ame la nyipi ihnimi ke, thaa ketre aliene hni menu kö. Eje a mama nge easa atreine troa qeje pengöne ej hnene la itre hne së hna kuca, ngo thaa qa ngöne kö la itre aliene hni së. Tusi Hmitrötr a qeje pengöne la ihnim ceitu memine “la gojenyi ka sisitia” nge ceitune me ketre ewekë hne së hna troa “xöte thenge.” (1 Korinito 12:31; 14:1) Kola ithuecatr kowe la itre Keresiano matre thaa tro hmekuje kö a ihnim “hnei aqane ewekë, me thinem, loi pe hnene la huliwa me nyipici.”—1 Ioane 3:18.
8 Kola upi së hnene la ihnimi së koi Akötresie troa amadri Nyidrë, me isigöline me sajuëne la musi Nyidrë, hnei hna qaja me hna kuca. Kola upi së fe troa thipetrije la fen memine la itre jë ne ej ka thaa ihmeku kö memine la aja i Akötresie. (1 Ioane 2:15, 16) Ame la itre ka hnimi Akötresie, ke, angatr a sisine la itre ewekë ka ngazo. (Salamo 97:10) Ame la troa hnimi Akötresie, tre, ene mina fe la troa hnime la itre ka lapa easenyi së, celë hi lai hne së hna troa ithanatane ngöne la ini ka troa xulu. Ketre, ame la kola hape troa hnimi Akötresie, ke, tro sa drengethenge Nyidrë. Öni Tusi Hmitrötr ka hape: “Dei lola aja (ihnimi) koi Akötesie, laka eësha denge thenge la ite wathebo i nyidë.”—1 Ioane 5:3.
9. Tune kaa la aqane amamane Iesu la ihnimi nyidrë koi Akötresie?
9 Hnei Iesu hna amamane hnyawa la aliene la hna hape, troa hnimi Akötresie. Hnene la ihnim matre nyidrëti a uti qa koho hnengödrai, me mele e celë fen ceitune me ketre atr. Kolo mina fe a upi nyidrëti hnene la ihnimi troa atrune la Tretretro i nyidrë, hnene la itre huliwa i nyidrë memine la itre ini hnei nyidrëti hna hamën. Hnene fe la ihnimi hna upi nyidrë, troa “denge thenge uti hë la mec.” (Filipi 2:8) Hnene la dengethenge cili, ketre hatrene la ihnimi nyidrë, hna aijijëne la itre atr ka qale koi Akötresie troa thiina ka meköti xajawai Nyidrë. Hna cinyihane hnei Paulo ka hape: “Ke ite ka ngazo hë la ka ala nyimu hnene la tha idei ne la ka cas (Adamu), tune lai troa jele mekötine la ka ala nyimu hnene la idei ne la ka cas (Iesu Keriso).”—Roma 5:19.
10. Pine nemene matre kola upi së hnene la ihnimi së koi Akötresie troa drengthenge?
10 Tui Iesu, loi e tro fe sa amamane la ihnimi së hnene la hne së hna drengethenge Akötresie. Hna cinyihane hnei Ioane aposetolo lo atre drenge hna hnime hnei Iesu, ka hape: “Dei lola ihnimi, laka tro sha xöte thenge la ite wathebo i nyidë.” (2 Ioane 6) Ame la itre ka hnimi Iehova hnyawa, tre, angatr a catre thele la itre eamo i Nyidrë. Wangatrehmekune hi angatr laka, thaa ijiji angatre kö troa isa axeciëne hnyawa la itre mekun, angatre pe a mejiune kowe la inamacane i Akötresie me drengethenge la itre ewekë hnei Nyidrëti hna amekötine cememine la ihnim. (Ieremia 10:23) Ceitui angatr memine lo itre atr ka thiina ka loi ne Berea, itre ka kapa la wesi ula i Akötresie hnene “la hni ka ajan,” me thele o drai troa kuca la aja i Akötresie. (Ite Huliwa 17:11) Hnei angatr hna goeëne hnyawa la itre hna cinyihane hnine la Tusi Hmitrötr, matre troa trotrohnine hnyawa la aja i Akötresie. Celë hi trotrohnine lai ka xatua angatr, troa amamane la ihnimi angatr; nge kola mama la ihnimi cili ngöne la angatr a drengethenge hnyawa pala hi la itre hna amekötine hnei Akötresie.
11. Nemene la aliene la hna hape troa hnimi Akötresie hnene la hni së ka pexej, me mekuna së ka pexej, me u së ka pexej me trenge catre së ka pexej?
11 Tune la hna qaja hnei Iesu, ame la troa hnimi Akötresie, tre, ene la troa hnimi Nyidrë hnene la hni së ka pexej, me mekune së ka pexej, me u së ka pexej, me trenge catre së ka pexej. (Mareko 12:30) Qa kuhu hni la ihnimi cili, kola qaja la itre aliene hni së, me itre aja së, me itre mekuna së ka jui, nge eje fe a upi së troa catre amadrinë Iehova. Easë mina fe a amamane la ihnimi së koi Nyidrë hnene la itre mekune së. Thaa itre hlue ka thatre kö së; hne së hna thele troa atre Iehova, memine la itre thiina i Nydrë, me itre wathebo i Nyidrë, memine la itre aja i Nyidrë. Easa nue la u së, ene la mele së memine la nöjei hne së hna hetrenyi, matre troa nyi hlue i Nyidrë me atrunyi Nyidrë. Nge easë mina fe a xome la trenge catre së thatraqane lai.
Pine Nemene Matre Nyipi Ewekë Tro Sa Hnimi Iehova
12. Pine nemene matre Akötresieti a ajane tro sa hnimi Nyidrë?
12 Ame la ketre kepine matre loi e troa hetre ihnimi së koi Iehova, tre, ene laka, Nyidrëti a ajan tro sa eëne la itre thiina i Nyidrë. Akötresie la qaan la ihnim, nge Nyidrëti fe la tulu ne ihnim ka sisitria catr. Hna cinyihane hnei Ioane aposetolo, ka hape: “Akötesiteti la ihnim.” (1 Ioane 4:8) Pine laka, hna xupe la itre atr hnaiji Akötresie, haawe, eje ekuhu itre hni së la ihnim. Ejehi laka hna nyi trepene la musi Iehova hnene la ihnim. Nge ame la itre atr hnei Nyidrëti hna ajane troa lapa fene la musi Nyidrë, tre, ene lo itre ka nyipine la itre aqane xome Nyidrëti la meköt. Nyipici laka, nyipi ewekë catr la ihnim matre troa tingetinge me caas la nöjei hna xupe asë.
13. (a) Pine nemene matre kapa jë angetre Isaraela la hna amekötine celë, hna hape: “Aja Iehova jë Akötresi’ö”? (b) Pine nemene matre thaa sesëkötre kö së la Iehova a thele tro sa hnimi Nyidrë?
13 Ame la ketre kepine matre loi e troa hetre ihnimi së koi Iehova, tre, hnene laka, aqane tro hi së lai a amamane la hni ne ole së kowe la itre hnei Nyidrëti hna kuca koi së. Mekune hmaca jë së lo hnei Iesu hna qaja koi angetre Iuda; öni nyidrëti ka hape: “Tro eö a aja Joxu Akötesi’ö.” Thaa hna inine kö la itretre Iudra troa hnime la ketre Akötresie ka nanyi nge hna thatre. Angatre pe a troa hnime la ketre Akötresie ka amamane la ihnimi Nyidrëti koi angatr. Iehova, la Akötresi angatr. Nyidrëti hi lo atre thepe angatr qaa Aigupito me eatrongë angatr a tro Kanana, me thupë angatr, me sajuë angatr, me hnimi angatr, me haji angatr cememine la ihnim. Ame enehila, Iehova la Joxu së, Nyidrëti lo Atre hamëne la Hupuna i Nyidrë nyine thupene mele koi së, ene pe kola aijijë së troa hetrenyi la mele ka thaa ase palua kö. Celë hi matre thaa sesëkötre kö së la kola thele hnei Iehova tro pena së a hane hnimi Nyidrë! Easa hnimi Nyidrë, ke qa ngöne laka hnei Nyidrëti hna pane hnimi së; hna thele the së troa hnime la Akötresie ka hnimi së. Easa hnime la Atre “pane hnimi së.”—1 Ioane 4:19.
14. Nemene la eceitunen la ihnimi Iehova kowe la itre atr, memine la ihnimi ne la itre keme me thin kowe la itre neköi angatr?
14 Ceitune hi la ihnimi Iehova kowe la itre atr ne la fen asë, memine la ihnimi ne la itre keme me thine kowe la itre neköi angatr. Ngacama itre keme me thine ka ngazo angatr, ngo itre ka ihnim me ka catre huliwa angatr ngöne la itre macatre matre troa hiane la itre nekö i angatr. Kolo mina fe a nue hnene la itre keme me thin la mele i angatr, matre troa hetrune la itre nekönatr ngöne la götrane la ngönetrei me ngöne la itre xaa götrane ju kö. Hnene la itre keme me thine hna inin, me ithuecatr, me xomihnine ahoeane me hajine la itre nekö i angatr, pine laka, angatr a ajane tro la itre nekö i angatr a mele ka loi me madrin atraqatr. Nemene la hnei itre keme me thine hna thele pena ha thene la itre nekönatr? Angatr a ajane tro la itre neköi angatr a hnimi angatr me hni kowe la itre ini hnei angatr hna hamë nyudren nyine loi koi nyudren. Hapeu, tro kö sa sesëkötre la kola thele hnene la Tretretro së ka pexej e koho hnengödrai, tro sa amamane koi Nyidrëti la hni ne ole së kowe la nöjei hnei Nyidrëti hna kuca thatraqai së?
Aqane Troa Akökötrene La Ihnimi Së Koi Akötresie
15. Nemene la pane nyine troa kuca matre troa eëne la ihnimi së koi Akötresie?
15 Thaa hane pala kö së öhnyi Akötresie me hane drei Nyidrëti e ewekë. (Ioane 1:18) Ngo Nyidrëti a hë së troa hane acatrene la ihnimi së me aqane imelekeu së me Nyidrë. (Iakobo 4:8) Tro sa kuca tune kaa? Ame la pane nyine troa kuca matre tro sa hnim la ketre atr, tre, ene la tro sa thele troa atre pengöi angeic; ka jole catr koi së troa hetre ihnimi së kowe la ketre atr hne së hna thatre. Hnei Iehova hna hamëne la Wesi Ula i Nyidrë, ene la Tusi Hmitrötr, matre atreine së troa atrepengöi Nyidrë. Celë hi matre jëne la organizasio i Nyidrë, Iehova a ithuecatre koi së troa e pala hi la Tusi Hmitrötr. Tusi Hmitrötre hi la ka troa ini së troa atre pengöi Akötresie, itre thiina i Nyidrë, me itre aliene hni Nyidrë me itre mekune i Nyidrë, memine fe la itre aqane ujë me aqane imelekeu i Nyidrë memine la itre atr ngöne la itre macatre ka nyimutre. Ame ngöne la easa mekune thele la itre hna qaja e hnine la Tusi Hmitrötr, tre, kola kökötre la trotrohnine së göi Iehova, nge kola ketre kökötre mina fe la ihnimi së koi Nyidrë.—Roma 15:4.
16. Ngöne nemene la kola qaja ka hape maine tro sa thele mekune ngöne la huliwa ne cainöje i Iesu, haawe, tro ha kökötre la ihnimi së koi nyidrë?
16 Ame la ketre aqane troa akökötrene hnyawa la ihnimi së koi Iehova, tre, ene la troa thele mekune ngöne la mele i Iesu me ngöne la aqane cainöje i nyidrë. Nge pine laka, pexeje la aqane amamane nyidrë la itre thiina ne la Tretretro i nyidrë, ene pe öni nyidrëti jë hi, ka hape: “Ame la ate goeë ni, angeice fe a goeëne la Tetretro.” (Ioane 14:9) Hapeu, thaa hane kö ketr la itre hni së hnene la aqane utipine i Iesu, ngöne lo nyidrëti a amelene hmaca la neköne ka caas ne la ketre sine föe? (Luka 7:11-15) Hapeu, thaa enijëne kö la itre hni së la easa atre laka nyidrëti hi la Nekö i Akötresie, lo atr ka sisitria ne la fen asë, nge ka ipië me hnea la itre lue ca ne lo itretre drei nyidrë? (Ioane 13:3-5) Hapeu, ketre ithuecatre koi së la troa atre laka, ngacama atr ka sisitria nyidrë me ka inamacan hune la nöjei atr asë, ngo hnei nyidrëti hna nue së asë troa easenyi nyidrë, celë hi matre thaa xou menu kö la itre nekönatr troa tro koi nyidrë? (Mareko 10:13, 14) Ame ngöne la easa mekune hnyawa la itre ewekë cili cememine la hni ne ole, tro hë së a tune lo itre Keresiano hna cinyanyi kow hnei Peteru, ngöne lo nyidrëti a qaja ka hape: “Lo hnei nyipunie hna tha öhne (Iesu) ngo hna hni kow.” (1 Peteru 1:8) Pine laka kola kökötr la ihnimi së koi Iesu, eje hi lai laka, tro fe ha tru catre fe la ihnimi së koi Iehova.
17, 18. Nemene la itre hna amekötine hnei Iehova laka, maine tro sa sine thele itre ej, tro ha kökötre la ihnimi së koi Nyidrë?
17 Ame mina fe la ka troa akökötren la ihnimi së koi Akötresie, tre, ene la troa mekune thele la itre hna amekötine ka nyimutre hnei Nyidrëti hna eköth cememine la ihnim, matre tro sa mele madrin; kola qaja la emingömingöne la hnei Nyidrëti hna xup, memine la ehnyapane la nöjei pengöne xen hne së hna kapa, memine la itre enehmu së ka lolo nge ka ihnim, memine fe la itre xaa ewekë ju kö ka lolo ka hamë loi me madrine koi së. (Ite Huliwa 14:17) Eje hi lai laka, easa atre Akötresieti hnyawa pala hi, nge ketre kolo mina fe a mama hnyawa la itre kepine matre nyipi ewekë tro sa amamane la hni ne ole së kowe la etrune la ihnimi Nyidrë memine la aqane hame i Nyidrë ka thatrehmekun. Pane mekune jë fe lo nöjei ewekë hnei Iehova hna kuca koi së isa ala caas. Hapeu, easë kö a kapa laka nyipi ewekë catr troa hetrenyi the së la ihnimi së koi Nyidrë?
18 Ame la ketre ahnahna i Akötresieti koi së, tre, ene laka hnei Nyidrëti hna aijijë së tro ithanata me Nyidrë ngöne la nöjei ijin jëne la thith; nge atre hnyawa hi së laka tro Nyidrëti a drei së, ke, Nyidrëti hi lo “Ate shamatine la thith.” (Salamo 65:2) Hnei Iehova hna nue kowe la Hupuna i Nyidrë hnei Nyidrëti hna hnim, la hnëqa ne troa mus me troa amekötin. Ngo, thaa hnei Nyidrëti kö hna nue koi itre xan me kowe la Neköi Nyidrë, troa drenge la itre thith. Nyidrëti hmekuje kö la ka dreng la itre thithi së. Kola aeasenyi së hnyawa koi Iehova, hnene lai aqane sipu hnimi së hnei Nyidrë.
19. Nemene la itre hnei Iehova hna thingehnaean ka aeasenyi së koi Nyidrë?
19 Ame la easa mekune la itre hnei Iehova hna hnëkëne thatraqane la itre atr elany, ene pe easa easenyi hnyawa jë koi Nyidrë. Hnei Nyidrëti hna thingehnaeane laka tro Nyidrëti a apaatrene la itre akötr, memine la hace hni, memine la mec. (Hna Amamane 21:3, 4) Ame hë la kola pexeje la itre atr, pë hmaca kö ka troa hace hni, me kucakuca, maine akötre pena. Paatrë hë la jiin, me itre ka puafala memine fe la isi. (Salamo 46:9; 72:16) Tro ha paradraiso hmaca la fen (Luka 23:43) Thaa hnene kö laka hnëqa i Nyidrë la Iehova a hamëne la itre manathithi cili, ngo hnene laka Nyidrëti a hnimi së.
20. Nemene la hnei Mose hna qaja göne la itre manathithi hna troa kapa e hna hnimi Iehova?
20 Haawe, hetrenyi la itre kepin ka upi së troa hnime la Akötresi së me nue la ihnimi cili troa kökötr ekuhu itre hni së. Hapeu, tro kö nyipunie a thele troa acatrene pala hi la ihnimi nyipunieti koi Akötresie, me nue Nyidrë, Atre xupi së troa eatrongë së? Qanyi nyipunieti kö troa isa axecië mekun. Hnei Mose hna wanga atrehmekune la itre manathith hna kapa qa ngöne la hna eëne me akökötren la ihnimi së koi Iehova. Hnei Mose ekö hna qaja koi angetre Isaraela ka hape: “Iënejë la mele mate mele eö memine la ite matra i’ö; matre tro eö a hni Iehova Akötresi’ö, me denge thenge la aqane ula i nyidë, me fede koi nyidë, ke nyidëti la mele i’ö, nge ate amamane la ite drai’ö.”—Deuteronomi 30:19, 20.
Hapeu, Thaa Thëthëmine Kö Nyipunie?
• Pine nemene matre nyipi ewekë tro sa hnimi Iehova?
• Tune kaa la aqane tro sa amamane la ihnimi së koi Akötresie?
• Nemene la itre kepine ka aijijë së troa hetrenyi la ihnimi së koi Iehova?
• Tune kaa la aqane tro sa eëne la ihnimi së koi Akötresie?