Troa Hnime La Atre Lapa Easenyi Së, Kola Hapeue Lai?
“Tro eö a hnime la ate lapa eashenyi ‘ö tui eö hi.”—MATAIO 22:39.
1. Tro sa amamane tune kaa ka hape, easa hnimi Akötresie?
NEMENE la hnei Iehova hna thele thene la itre atr ka thili koi Nyidrë? Hnei Iesu hna sa jëne la ketre hnepe ithanata ka ijije hi, nge ka hmaloi troa trotrohnin, ngo ka jui catr. Öni nyidrëti ka hape, ame la wathebo ka sisitria catr, tre, ene la troa hnimi Iehova hnene la hni së, me u së, me mekuna së, me trengecatre së ka pexej. (Mataio 22:37; Mareko 12:30) Tune la hne së hna ce wange hë ngöne lo hna cinyihane hnapan, ame la ihnimi së koi Iehova, tre, kola hape, troa drengethenge Nyidrë me trongëne hnyawa la itre wathebo i Nyidrë; easë hi lai a olene la aqane hnimi së hnei Nyidrë. Ame koi itre ka hni koi Akötresie, thaa ketre ehnefe ka tru kö la troa kuca la aja i Nyidrë; ngo ka thue nyine madrine i angatre pe.—Salamo 40:8; 1 Ioane 5:2, 3.
2, 3. Pine nemen matre loi e tro sa wanga atrune hnyawa la hna amekötin, ene la troa hnime la atre lapa easenyi së, nge nemene la itre hnying hne së hna troa xom?
2 Hnei Iesu hna qaja ka hape, ame la hnaaluene wathebo ka tru, tre, ka ce tro memine la hnapan: kola hape: “Tro eö a hnime la ate lapa eashenyi ‘ö tui eö hi.” (Mataio 22:39) Easë a troa pane wanga atrune hnyawa la wathebo celë, nge hetre nyipi kepin matre easa troa pane ithanatane lai. Ame ngöne la hneijine hne së hna melën enehila, tre, tru catre la itre atr ka sipu hnimi angatre kö, nge ka iaö la aqane ihnimi angatr. Hnei Paulo aposetolo hna qejepengöne la “ite drai hnapin” me cinyihane kowe la itre atr ka pëkö ihnimikeu, ngo ka sipu hnimi angatre kö, maine hnimi manie pena maine ajane pena la itre nyine madrin. Nyimutre fe la itre atr ka “tha hnimi sinen.” (2 Timoteo 3:1-4) Hna ahnithe hnei Keriso Iesu ka hape: “Ala nyimu . . . angete iwanaxoeë, me imethinë. . . . Tro ha nanazije la ihnimi ne la ka ala nyimu, ngöne laka troa mana la ngazo.”—Mataio 24:10, 12.
3 Ngo easa öhne e celë laka, thaa hnei Iesu kö hna qaja ka hape, tro ha nanazije la ihnimi ne la nöjei atr. Ka hetrenyi pala hi ekö nge tro pala hi a hetrenyi fe enehila la itre atr ka eëne la pengöne ihnimi cili hna thele the së hnei Iehova; nge meköti la troa hni koi Nyidrë. Ame kowe la itre ka hnimi Iehova hnyawa, tre, angatr a thele troa hnime la itre xan tune la aqane hnimi angatr hnei Iehova. Matre drei la atre lapa easenyi së hne së hna troa hnim? Tune kaa la aqane tro sa amamane la ihnimi së kowe la itre atr ka lapa easenyi së? Tro la Tusi Hmitrötr a xatua së troa sa la itre hnyinge ka nyipi ewekë celë.
Drei La Atre Lapa Easenyi Ni?
4. Thenge la hna qaja ngöne Levitiko mekene 19, drei la hnene la itretre Iudra hna troa hnim?
4 Ame la Iesu a qaja kowe la Faresaio ka hape ame la troa hnime la atr tune la easa sipu hnimi së kö, tre, celë hi hnaaluene wathebo ka tru, ke nyidrëti hi lai a amexeje hnyawa lo wathebo hna hamën koi Isaraela. Hna fejane la wathebo cili ngöne Levitiko 19:18. Eje mina fe ngöne lai mekene 19 la ewekë hna amekötine koi angetre Iudra, laka, tro angatr a xome la itre xaa atr e tröne la angetre Isaraela, ceitune me itre atr ka tui angatre hi. Önine la xötre 34, ka hape: “Ame la ate ne la kete nöj’ a lapa thei nyipunie, te, tro ha tune la ate ne la nöje koi nyipunie, nge qâ i ‘ö troa hnimi angeice tui ‘ö hi; ke ite tenyiwa nyipunie ngöne la nöje Aigupito.” Haawe, kola mama hnyawa laka, nyipi ewekë troa hnime fe la itre xaa atr e tröne lo angetre Iudra, memine lo itre ka hane kapa ha la hmi i angetre Iudra.
5. Tune kaa la aqane trotrohnin la itretre Iudra la mekun, ene la troa hnime la atre lapa easenyi së?
5 Ngo isapengöne kö la aqane waiewekë ne la itre hene ne hmi ne Iudra ka mele ngöne lo hneijine i Iesu. Hnei angatr hna inine la itre xan la alien la hna hape “enehmu” me “ate lapa easenyi së”, laka, kola qaja hmekuje hi la itretre Iudra. Celë hi matre hna methinën la itre atr, e thaa angetre Iudra kö. Kola mekune hnene la itretre ini cili laka, ame la itre ka hmi koi Akötresie, tre tro angatr a methinën la itre atr ka thaa hane kö thilli koi Akötresie. Kola qaja hnene la ketre itus, ka hape, “Maine eje hi lai mekune ka hlemu ekö, haawe, thatreine kö troa paatre la imethinë thei angatr. Ngo kolo pe a sajuëne ej.”
6. Nemene la lue mekune hnei Iesu hna amexej ngöne lo Nyidrëti a ithanatane lo ihnimi kowe la atre lapa easenyi së?
6 Ame ngöne la cainöje i Iesu hune la wetr, hnei nyidrëti hna amexeje la jole celë, me köjane hnyawa la itre atr nyine troa hnim. Öni nyidrë: “Dengë hë nyipunie lo hna qaja, ka hape, “Hnimeju eö la ate lapa eashenyi ’ö, nge xelenejë la ithupëjia me eö; Ngo ini pe a qaja koi nyipunie, ka hape, Hnimeju la ite ithupëjia me nyipunie; nge thithi ju thatraqai angete qaqa me axösisi nyipunie; mate itete neköne nyipunie me Tetetro i nypunie e koho hnengödrai; ke anganyidë a axulune la jö i anganyidë hune la nöjei ka ngazo me ka loi, me upe la manie kowe la nöjei ka meköti me ka tha meköti kö.” (Mataio 5:43-45) Ame e celë, tre, Iesu a hamëne la lue mekun. Ame la hnapan, tre, ka ham Iehova, nge ka thiina ka lolo Nyidrë kowe la itre atr ka loi me ka ngazo. Ame la hnaaluen, tre, loi e tro sa xome la tulu i Nyidrë.
7. Nemene la ini hne së hna xom qa ngöne la ceitune la atre Samaria?
7 Ame la ketre ijin, hnene la ketre atre Iudra ka atrepengöne hnyawa la Wathebo hna hnyinge koi Iesu ka hape: “Drei la atre lapa easenyi ni?” Hnei Iesu hna sa me hamën la ketre ceitun ka qejepengöne la atre Samaria ka öhne la ketre trahmanyi ne Iudra; hnene la itre atrekënö hna lepe me kötre fë la itre ewekë i angeic. Ngacama ka imethinë la itretre Iudra me angetre Samaria, ngo hnene la atre Samaria hna peleth la itre eatr ne la trahmanyi ne Iudra, me tro sai angeic kowe la ketre hnë meköl matre troa mano fë la hna lep. Nemene la ini hne së hna kapa? Ame la troa hnime la atre lapa easenyi së, tre, ene la troa hnime la itre xaa atr, thaa ene hmekuje kö la itre ka ce hane ngönetrei me easë, maine ka ce nöje pena maine ka ce hmi me easë.—Luka 10:25, 29, 30, 33-37.
Aliene La Hna Hape Troa Hnime La Atre Lapa Easenyi Së
8. Nemene la hna qaja hnei Levitiko mekene 19, göne la aqane troa amamane la ihnim?
8 Ame la troa hnime la atre lapa easenyi së, tune la troa hni koi Akötesie, tre, thaa ene hmekuje kö la troa hetrenyi la lue ihnimi cili ngöne la itre hni së, ngo loi e tro mina fe ej a mama hnene la itre huliwa. Ka lolo catr troa pane goeëne la itre mekune qëmeken me e thupene la ketre xötre ne Levitiko mekene 19; kola ithuecatr kowe la nöje i Akötresie troa hnime la itre ka lapa easenyi angatr tune lo angatre kö. Hna amekötine fe koi angetre Isaraela troa nue pe kowe la itre ka akötr me kowe la itre trehnyiwa, troa hane menu ngöne la itre ngon la hlapa. Pëkö göhnene la atrekënö, me iamenu maine troa mele thoi pena. Ame göi kootr, tre, thaa tro kö angetre Isaraela a iwangatrehmekunyi atr. Maine nyipi ewekë troa hajine la itre ka aja ihaji, ngo ame pe, loi e tro angatr a drengethenge la hna amekötine celë, kola hape: “The tro kö eö a methinën’ e kuhu hni ‘ö la tejine me eö.” Kolo asë hi a thipi la itre trenge wathebo celë memine la itre xane ju kö, hune la itre trenge ewekë hna hape: “Tro eö a hnime la ate lapa eashenyi ‘ö tune lo eö hi.”—Levitiko 19:9-11, 15, 17, 18.
9. Pine nemen matre Iehova a upe la itretre Isaraela troa ananyine la itre xaa nöj?
9 Maine nyipici laka tro angetre Isaraela a hnime la itre xaa atr, ngo tro fe angatr a lapa ananyine lo itre atr ka hmi kowe la itre haze ka thoi. Thaa tro pi kö angatr a ce mele memine la itre atr cili, wanga troa traqa la itre hulö me itre ethane ka ngazo kowe la mele i angatr; celë hi matre hnei Iehova hna hmekë angatr. Drei la ketre ceitun, hnei Iehova hna ahnithe göne la itre nöje hna troa thapa, ka hape: “The tro kö eö a ihamë föeë me angat, the tro kö eö a hamëne la nekö i ’ö jajinyi thatraqane nekö i ’ö trahmany. Ke tro angat’ a aukene la nekö i ’ö qa theng, mate nyi hluene la ite haze ; ame hna troa palulu la elëhni Iehova koi nyipunie.”—Deuteronomi 7:3, 4.
10. Nemene la nyine tro sa thupëne hnyawa?
10 Ketre tune mina fe la itre Keresiano laka, kola hmekë angatr matre thaa tro kö angatr a ce mel memine la itre atr ka troa ananazijën elanyi la lapaune i angatr. (1 Korinito 15:33) Hna ithuecatre koi së ka hape: “The isile menunekeu nyipunieti kö me angete tha lapaune kö,” ene lo itre ka thaa hane kö sine la ekalesia i Keresiano. (2 Korinito 6:14) Ketre, hna ithuecatre kowe la itre Keresiano troa faipoipo “göi Joxu hmekuje hi.” (1 Korinito 7:39) Ngo thaa tro pi kö sa methinën la itre atr ka thaa hane kö nyihlue i Iehova tu së. Hnei Keriso hna meci pine la itre atr ka ngazo, nge nyimutre la itre ka kuca la itre ewekë ka ngazo ekö, saze hë la itre aqane mele i angatr enehila, ene pe iloi fe hë angatr me Akötresie.—Roma 5:8; 1 Korinito 6:9-11.
11. Nemene la sipu aqane tro sa amamane hnyawa la ihnimi së kowe la itre atr ka thaa nyihlue i Iehova kö, nge pine nemen?
11 Maine easa ajan troa atre la aqane tro sa hane hnime la itre atr ka thaa hane kö nyihlue i Iehova Akötresie, haawe, nyipi ewekë catre tro sa xötrethenge la tulu i Nyidrë. Ngacama thaa ka hnime kö Nyidrëti la itre ewekë ka ngazo, ngo ame pe, tre, atraqatre la ihnimi Nyidrëti kowe la itre atr asë; kola mama lai ngöne la aqane aijijë angatr hnei Nyidrë troa hmaca qa ngöne la itre aqane ujë i angatr ka ngazo me hane kapa la mele ka thaa ase palua kö. (Ezekiela 18:23) Iehova a ajan “tro angatr’ asëjëihë a ietra.” (2 Peteru 3:9) Aja i Nyidrë tro “la nöjei ate asëjëihë a mele me wangate hmekune la nyipici.” (1 Timoteo 2:4) Celë hi kepine matre hnei Iesu hna upe la itretre drei nyidrë troa cainöj me xatuane me “inine la nöjei nöj’ asëjëihë.” (Mataio 28:19, 20) Ame la easa catre sin la huliwa cili, easë hi lai a amamane la ihnimi së koi Akötresie memine la itre atr ka lapa easenyi së, ene mina fe lo itre atr ka methinë së!
Ihnimi Së Kowe La Itre Trejine Me Easë
12. Nemene la hnei Ioane aposetolo hna cinyihane göne la aqane tro sa hnime la itre trejine me easë ngöne la ua?
12 Hna cinyihane hnei Paulo aposetolo ka hape: “Tro sha kuca la loi kowe la nöjei ate asëjëihë . . . ngo sisitia kowe la nöjei ate ne la lapa i angete lapaun.” (Galatia 6:10) Pine laka itre Keresiano së, haawe, nyipi ewekë tro sa amamane la ihnimi së kowe la itre atr ka ce lapaune me easë, ene lo itre trejine me easë ngöne la götrane la ua, itre trahmanyi me itre föe. Nemene la enyipiewekën la ihnimi cili? Hnei Ioane aposetolo hna amaman la etrune la mekune celë, me cinyihane ka hape: “Ate ihumuthi la ate methinëne la tejine me angeic . . . E öni kete ate, ka hape, Ini a aja Akötesie, ngo methinëne pe la tejine me angeic, angeice la ate thoi ; ke ame la ate tha hnime kö la tejine me angeice hnei angeice hna goeën, tha ‘teine kö angeice troa aja Akötesie lo hnei angeice hna tha goeën.” (1 Ioane 3:15; 4:20) Drei la itre trenge ithanata ka catr! Hnei Iesu Keriso hna qaja la lue hnëewekë hna hape “atre ihumuth” me “ate thoi” laka ka xulu qaathei Satana lo Diabolo. (Ioane 8:44) Pëkö ka ajan e easë troa hë së tune lai!
13. Tro sa amamane tune kaa la ihnimi së kowe la itre sine hmi së?
13 Ame la itre nyipi Keresiano, tre, hna “ini [angatr] hnei Akötesie troa ihnimikeun.” (1 Thesalonika 4:9) Loi e tro sa ihnim, thaa “hnei aqane ewekë, me thinem ; loi pe hnene la huliwa me nyipici.” (1 Ioane 3:18) Loi e troa “pë thoi ngön” la ihnimi së. (Roma 12:9) Kola upi së hnene la ihnimi troa menyike la itre thiina së, me utipin, me atreine nue la ngazo ne la itre xan, me xomihni ahoeany; ihnimi fe a xatua së matre thaa tro kö sa zalu, me pi draië, me pi tru, maine meku së ju hi. (1 Korinito 13:4, 5; Efeso 4:32) Kola upi së troa “inyi hluekeu.” (Galatia 5:13) Hnei Iesu hna ithuecatre kowe la itretre drei nyidrë troa ihnimikeu, tune lo aqane hnimi angatre hnei nyidrë. (Ioane 13:34) Qa ngöne lai, loi e troa ej e kuhu hni ne la itre Keresiano la ajane troa nue la mele i angatr kowe la itre sine hmi angatr, e pëkö xaa jëne mel kowe la itre trejine me angatr.
14. Tro sa amamane tune kaa la ihnimi së e hnine la fami?
14 Loi e troa mama hnyawa la ihnim thene la itre fami Keresiano, me ngöne mina fe la mele ne la lue trefën. Hnei Paulo hna qejepengöne la otrene ka acatrene la faipoipo, öni nyidrë: “Qâ ne la nöjei trahmanyi troa hnime la föe i angate tune la ite itei angate kö.” Öni nyidrëti fe: “Ame la ate hnime la föe i angeic, te kola hnimi angeice kö.” (Efeso 5:28) Kola amexeje hmaca hnei Paulo la eamo celë ngöne la Efeso 5:33. Ame la trahmanyi ka hnime la föe i angeic, tre, thaa tro kö angeic a xötrethenge la tulu ne lo angetre Isaraela ekö lo hneijine i Malaki, laka angatr a nyixetë trije la itre föi angatr. (Malaki 2:14) Troa nyihnyawa nyiidro. Troa hnimi nyiidro ceitune memine la aqane hnime Keriso la ekalesia. Haawe, tro fe hë la ihnimi a upe la föe troa metrötrëne la trahmanyi eahlo.—Efeso 5:25, 29-33.
15. Ame ngöne la angatr a öhne la aqane ihnimi ne la itre trejin, nemene la hna qaja me kuca hnene la itre xaa atr?
15 Kola mama hnyawa laka ame la ihnimi celë, tre, eje hi la ka nyihatrene la itre nyipi Keresiano. Öni Iesu ka hape: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:35) Hnene la aqane ihnimikeu së, matre kola ea la itre atr kowe lo Akötresie hne së hna hnim me qaja atrunyi Nyidrë. Drei la ketre ceitun, hetrenyi la ketre rapor ka traqa qaa Afirik, kola qaja la ketre fami Temoë i Iehova ka mel e Mozaabik. “Tha hane kö huni öhne la ewekë ka tune la. Ame ngöne la hnaipajö, hna nyiqaane hnahna la enyi ka tru, nge thupene lai kola trotro la imani me malamala la itre wene tim. Hna ufe akeine la uma i eahun hna kuca hnei hainy, nge ame la ihune uma hna eköthe hnei fao, tre, hna ufe enyine fe. Ame ngöne la kola traqa la itre trejine qa ngöne la itre xaa ekalesia troa xatua huni troa acile hmaca la uma i eahun, ene pe kola hai hnene lai itre atr ka lapa ezi huni ka hape: ‘Ka lolo catr la hmi epun. Thaa hane kö huni kepe ixatua tune la, ngöne la itre uma hmitrötre hun.’ Hne huni hna fe la Tusi Hmitrötr me amamane la Ioane 13:34, 35. Nyimutre hë la itre atr ka lapa easenyi hun ka inine la Tusi Hmitrötr me eahuni enehila.”
Ihnimi Kowe La Itre Atr, Angatr Isa Alacaas
16. Nemene la eisapengönen la troa amamai ihnime jëne la ketre organizasio memine la troa hnime la itre atr isa ala caas?
16 Hmaloi kö e tro sa hnime la itre atr ka lapa easenyi së, ngöne la easa ce me angatr hnine la ketre gurup. Ngo ame la troa hnimi angatr isa ala caas, tre, ewekë ka nango jole pi hë. Drei la ketre ceitun, kola mama la ihnimi ne la itre xaa atr jëne la itre ahnahna hna ithingën kowe la itre organizasio ka hamë ixatua. Ketre mina, ka hmaloi catre la troa qaja ka hape easa hnime la atre easenyi së, hune la troa hnime la ketre sine huliwa së ka thaa nyipi së kö, maine ketre atr ka lapa ezi së, ngo ka xele pe ma wai së, maine ketre enehmu së hi ngo ka huliwa thoi koi së.
17, 18. Nemene la aqane amamane Iesu la ihnimi nyidrë kowe la itre atr, angatr isa ala caas, nge nemene la ka upi nyidrë troa kuca tune lai?
17 Pine laka hnei Iesu hna xome hnyawa la itre thiina i Akötresie, haawe, hnei nyidrëti hna hamëne la ketre tulu ka lolo catr ngöne la aqane troa hnime la itre atr, angatr isa alacaas. Ngacama hnei nyidrë hna traqa e celë fen troa köletrije la ngazo ne la itre atr, ngo ame pe, tre, hnei nyidrëti hna amamane la ihnimi nyidrë koi angatr isa ala caas; tune lo föe ka wezipo, memine lo atr ka lepera, me kowe la ketre nekönatr. (Mataio 9:20-22; Mareko 1:40-42; 7:26, 29, 30; Ioane 1:29) Ketre tu së mina fe, laka, troa mama la ihnimi së kowe la itre atr ngöne la aqane ujë së koi angatr isa alacaas, ene lo itre hne së hna öhne ngöne la nöjei drai.
18 Ngo thaa tro pi kö sa thëthëhmine laka, tro së lai a atreine hnime la itre atr, e hetre ihnimi së koi Akötresie. Ngacama hnei Iesu hna xatuane la itre ka puafala, me aloine la meci ne la itre atr, me ithuane la itre ka mecijiin, memine fe la troa inine la itre atr; ngo ame la ka upi nyidrë troa kuca la itre ewekë asë cili, tre, ene la aja ka eje thei nyidrë troa xatuane la itre atr troa iloi me Iehova. (2 Korinito 5:19) Hnei Iesu hna kuca la itre ewekë asë matre troa atrunyi Akötresie; hnei nyidrëti pala hi hna atrehmekune hnyawa laka, nyidrëti a nyitrenge ewekën me nyi iahnuene lo Akötresie hnei nyidrëti hna hnim. (1 Korinito 10:31) Maine tro sa xötrethenge la tulu i Iesu, ijije mina fe tro sa amamane la ihnimi së kowe la itre atr, nge ame ngöne la ketre götran, thaa easë kö a hane sin la fene i itre atr ka ngazo.
Nemene La Aqane Tro Sa Hnime La Itre Atr Tu Së Kö?
19, 20. Nemene la aliene la hna hape troa hnime la itre atr asë tu së hi?
19 Hnei Iesu hna qaja ka hape: “Tro eö a hnime la ate lapa eashenyi ‘ö tune lo eö hi.” Loi e tro sa ketre thupëne hnyawa la mele së me tuluthe la aqane tro sa metrötrë së kö. Nyipici laka, e thaa kuca tune kö së lai, eje hi lai laka, ka gufa la trenge ewekë i Iesu koi së. Thaa tro kö a imenune la ihnimi celë memine lo ihnimi thoi, ene lo ihnimi hna qaja hnei Paulo aposetolo ngöne 2 Timoteo 3:2. Kolo pe a hetrenyi la ketre aqane waiewekë ka meköt, ngöne la aqane tro sa waipengö së. Hna qejepengöne la ihnimi cili hnene la ketre atr ka thele ewekë hnine la Tusi Hmitrötr; öni angeic ka hape kösë, “ketre aqane tro sa tulu ewekë ngöne la easa sipu hnimi së kö, matre thaa kolo kö a sasaithi tulu, ene pe qaja jë hi ka hape ‘Ka draië catre kö ni’ maine kolo pena a madrine troa akötr, matre qaja jë hi ka hape ‘ka pë hnënyengöne ni.’ ”
20 Ame la hna hape tro sa hnime la itre xan tune la aqane hnimi së hne së, tre, kolo lai a hape, tro sa goeën la itre xan tune la aqane ajane së troa goeë së hnei angatr; ketre tune mina fe laka, tro sa ce mele me angatr tune la aqane ajane së tro angatr a ce mele me easë. Hnei Iesu hna qaja ka hape: “Qa ngöne lai, ame la nöjei ewekë asëjëihë hnei nyipunie hna ajane troa kuca koi nyipunie hnei ite at, kuca jë lai koi angat.” (Mataio 7:12) Thaa Iesu kö la a qaja ka hape, troa lapa fë lo itre ngazo hna kuca ekö koi së hnene la itre xan, matre tro hmaca pena ha a të koi angatr. Ohea, loi e tro pe sa mekune la aja së, ene la aqane troa ujë koi së hnene la itre xan, nge thupene lai easa ujë pena thenge lai. Ketre, thaa Iesu kö la a qaja la itre trenge ewekë celë kowe hmekuje hi la itre enehmu së me itre trejine me easë ngöne la ua. Nyidrëti a xome la hnëewekë “at,” maine jë matre troa amamane laka loi e tro sa huliwa tune la kowe la itre atr asë, ene la nöjei atr hne së hna troa iöhnyi memin.
21. Nemene la hne së hna amamane ngöne la easë a hnime la itre xan?
21 Qa ngöne laka easë a hnime la itre atr easenyi së, haawe, kola sewe së matre thaa tro kö sa kuca la ngazo. Hna cinyihane hnei Paulo aposetolo ka hape: “Dei la, ka hape, The tro kö eö a kuci ngazo, The tro kö eö a ihumuth, The tro kö eö a ënö, The tro kö eö a meciun; nge maine hete kete wathebo, ej’ e hnine la tenge ewekë celë, hna hape, Tro eö a hnime la ate eashenyi ’ö tune lo eö hi. Ame la ihnim, tha ate angazone la ate easheny.” (Roma 13:9, 10) Troa upi së hnene la ihnimi troa thele la itre aqane troa kuca la loi kowe la itre xan. Maine tro sa hnime la itre atr, easë hi lai a amamane laka easë fe a hnime lo Atre xupe la atr hnaiji Nyidrë, ene Iehova Akötresie.—Genese 1:26.
Tro Epuni a Sa Tune Kaa?
• Drei la hne së hna troa hnim, nge pine nemen?
• Tro sa amamane tune kaa la ihnimi së kowe la itre atr ka thaa nyihlue i Iehova kö?
• Nemene la aqane qaja hnei Tusi Hmitrötr la aqane tro sa hnime la itre trejine me easë?
• Nemene la aliene la hna hape, tro sa hnime la atre easenyi së tu së hi?