Troa Xome La Ita Ne Thup Celë e 5 Eiperem Me Wiike Cili
Loi E Tro Sa Maca Hnyawa Troa Xome “La Taua Ne La Ua”
“Xomejë . . . la taua ne la Ua, ene la wesi ula i Akötesie.”—EFE. 6:17.
1, 2. Tro sa xemine tune kaa la aqane sipo ixatua enehila göi troa cainöjëne la Baselaia?
AME la Iesu a öhne la etrune la aja ka eje thene la ka ala nyimu ngöne la götrane la ua, tre, öni nyidrëti jë hi kowe la itretre drei nyidrë, ka hape: “Atraqate la meledrai, nge xalaithe hi la angete troa menue; celë hi mate xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë.” Hetrenyi mina fe la ketre ewekë hna kuca hnei Iesu. Ame la kola ase qaja la itre trenge ithanata cili hnei Iesu, hnei “nyidë [hna] hëne la angete dei nyidë” me upi angatr troa cainöj, maine pena troa ‘menue’ (Mat. 9:35-38; 10:1, 5) Thupene lai, hnei Iesu “hna iëne la ite xa ate ala köniate nge luepi [semitre], me upi angate isa ala lue” matre troa hane xome fe la huliwa cili.—Luka 10:1, 2.
2 Ame mina fe enehila, nyimutre la itre götrane gaa aja ka ixatua matre troa cainöjëne la Baselaia. Kola e la 17 000 000 la etrune la itre atr e cailo fen ka hane sine la Drai Ne Amekunën ne lo macatre ne huliwa 2009. Hna e hi la sevene milio la etrun la Itretre Anyipicine i Iehova asë, ngo hna sasaithe lai hnene la etrune la itre atr ka sine la Drai Ne Amekunën, ala treene lao milio. Nyipici laka, elehmedrë hë la itre hlapa hna troa menuën. (Ioane 4:34, 35) Qa ngöne lai, loi e tro sa thith me sipo ka troa ixatua troa menue. Ngo nemene la aqane tro sa ujë thenge la itre thithi cili? Loi e tro sa thele troa itretre cainöj ka maca ngöne la easa catre cainöjëne la Baselaia me inine la itre atr.—Mat. 28:19, 20; Mar. 13:10.
3. Kola xatua së tune kaa hnene la uati hmitrötre i Akötresie troa maca ngöne la hna cainöj?
3 Hnene lo hna cinyihan hnapan hna qejepengöne la ixatua ne la uati hmitrötre ngöne la easa “qaja la wesi ula i Akötesie hnene la cat.” (Ite Hu. 4:31) Ijije mina fe tro la ua cili a xatua së troa itretre cainöj ka maca hnyawa. Ame la ketre aqane tro sa maca ngöne la huliwa ne cainöj, tre, ene la troa xome hnyawa la jia ne huliwa ka sisitria hnei Iehova hna hamë së, ene la Wesi Ula i Nyidrë, lo Tusi Hmitrötr. Celë hi thangane la emenene la uati hmitrötre lai. (2 Tim. 3:16) Qaathei Akötresie la maca ka ej e hnine ej. Qa ngöne lai, maine tro sa qejepengöne hnyawa la nyipici qa hnine la Tusi Hmitrötr, easë hi lai a nue la uati hmitrötr troa eatrongë së. Qëmekene tro sa ce wange la aqane troa ujë tune lai, loi e tro sa pane mekune hnyawa la emenen la Wesi Ula.
‘Ka Men La Wesi Ula i Akötresie’
4. Nemene la aqane tro la maca qa hnine la Tusi Hmitrötr a saze la mele ne la atr?
4 Drei la emenen la Wesi Ula i Akötresie, maine maca i Nyidrëti pena! (Heb. 4:12) Ame ngöne la götrane la ua, tre, ka idrei catre kö la maca ne la Tusi Hmitrötr hune la taua hna kuca hnei atr; ke, kösë ej a thupaluëne la itre june la ngönetrei me itre xëtren. Kola ketr la hni ne la atr hnene la nyipici qa hnine la Tusi Hmitrötr, nge eje fe a löthe la itre mekune me aliene hni angeic uti hë la kola fe amamane la nyipi pengö i angeic. Ka hetre mene ne la nyipici kowe la atr, nge kola saze la mele i angeic. (E jë la Kolose 3:10.) Nyipici, ijije tro la Wesi Ula i Akötresie a saze la mele ne la nöjei atr!
5. Nemene la aqane eatrongë së hnei Tusi Hmitrötr, nge nemene la thangane lai?
5 Ketre, pëkö sane la inamacane ka ej e hnine la Tusi Hmitrötr. Hetrenyi la itre mekune nyine ixatua ka amamane kowe la itre atr la aqane troa mele ngöne la fene celë ka ngazo. Nyipici laka, Wesi Ula i Akötresie a thinane la gojenyi së enehila, ngo eje mina fe a canga amamane la itre jë së elany. (Sal. 119:105) Ketre ixatua lai ka tru ngöne la easa cile kowe la itre jol maine pena ngöne la easa troa iëne la itre enehmu së, me itre nyine iamadrinë, me huliwa së me iheetre së, me itre xaa ewekë ju kö. (Sal. 37:25; Ite edomë13:20; Ioane 15:14; 1 Tim. 2:9) Maine tro sa trongëne la itre trepene meköti ne la Wesi Ula i Akötresie, tro hë lai a aijijë së troa lapa loi me nöjei atr asë. (Mat. 7:12; Fil. 2:3, 4) Hnene laka hna thinane hnyawa la jë së, ene pe ijiji së hë troa atrehmekune la itre thangane elany la itre mekun hne së hna axeciën. (1 Tim. 6:9) Ketre, hna ahnithe amë hnene la itre Hna Cinyihan la aja i Akötresie kowe la itre drai elany, nge eje mina fe a xatua së troa mele thenge la aja cili. (Mat. 6:33; 1 Ioane 2:17, 18) Drei la mele ka lolo hna troa melëne hnene la atr ka nue la itre trepene meköti Akötresie troa eatrongë angeic!
6. Kola mama tune kaa la emenen la jia ne isi së ene la Tusi Hmitrötr, ngöne la isi së ngöne la götrane la ua?
6 Pane mekune jë fe së la emenen la jia ne isi së ene la Tusi Hmitrötr, ngöne la isi ka eje ngöne la götrane la ua. Hnei Paulo hna hëne la maca ka eje e hnine ej, ka hape, “taua ne la Ua.” (E jë la Efeso 6:12, 17.) Maine tro sa tro fë hnyawa la maca cili, haawe, ijije hi troa thapa la itre atr qa ngöne la musi Satana. Thaa ketre taua kö lai ka troa humu atr, ngo eje pe a troa amelen. Haawe, troa tune kaa matre catre xome hnyawa pala hi hne së la taua cili, ene la Wesi Ula i Akötresie?
Xome Hnyawa Jë La Wesi Ula i Akötresie
7. Pine nemen matre nyipi ewekë tro sa inine troa xome hnyawa “la taua ne la Ua?”
7 Troa atreine isi fë hnyawa hnene la sooc la itre jia ne isi angeic, e hnei angeic hna inine troa huliwane itre ej, me majemine xome itre ej. Ceitune hi lai memine la aqane troa xome “la taua ne la Ua” ngöne la isi së ngöne la götrane la ua. Qa ngöne lai, hnei Paulo hna cinyihan, ka hape: “Catejë eö mate amamai ’ö kö laka hna kapa aloine hnei Akötesie, nge ate kuci huliwa ka pë nyine ahmahman, kola thawa hnyawa la wesi ula ka nyipici.”—2 Tim. 2:15.
8, 9. Nemene la ka troa xatua së troa trotrohnine hnyawa la aliene la hna qaja hnei Tusi Hmitrötr? Hamëne jë la ketre ceitun.
8 Nemene la ka troa xatua së troa ‘thawa hnyawa la Wesi Ula’ ngöne la huliwa ne cainöje së? Qëmekene tro sa ce thawa hnyawa la Tusi Hmitrötr me itre xan, nyipi ewekë tro sa pane trotrohnine hnyawa la aliene ej. Kolo lai a upi së troa wanga atrune hnyawa la itre xötr ka lapa xötreith la ketre xötr.
9 Nyipi ewekë tro sa wanga atrune la itre xötr ka lapa xötreith la ketre xötr, matre troa trotrohnine hnyawa la aliene ej. Drei la ketre ceitun ngöne la itre trenge ewekë i Paulo ngöne Galatia 5:13. Hnei nyidrëti hna cinyihan, ka hape: “Ange tejine fe, ase hë hë nyipunie kowe la hna nue gufan; the kuca kö la hna nue gufane nyine thatraqane la ngönetei, ngo inyihluekeuju ngöne la ihnim.” Nemene la aliene lai inuamacany hnei Paulo hna qaja e celë? Hapeu, nyidrëti kö a qaja la inuamacany qa ngöne la ngazo me mec, maine qa ngöne la itre ini ka thoi, maine qa ngöne la ketre ewekë pena? Kola mama ngöne la itre xötre ka lapa xötreith la xötre cili, laka, Paulo a qaja la pengöne inuamacany ‘qa ngöne la hnëjine ne la wathebo.’ (Gal. 3:13, 19-24; 4:1-5) Nyidrëti hi a qaja la inuamacanyi ka eje thene la itre Keresiano. Ame lo itre atr ka kapa hnyawa lai inuamacanyi cili, tre, angatre hë a inyihluekeu ngöne la ihnim. Ngo ame la itre ka thaa hane kö kapa lai, tre, angatre pala hi a iöni me iwesitrë.—Gal. 5:15.
10. Maine easa ajane troa trotrohnine hnyawa la aliene la Itre Hna Cinyihan, nemene la itre pengöne ithuemacanyi nyine tro sa wanga atrun, nge nemene la aqane tro sa hetrenyi itre ej?
10 Maine easa ajane troa trotrohnine hnyawa la aliene la ketre xötr, loi e tro sa wanga atrune la itre mekun hna hamën nyine ithuemacany, tune la atre cinyihane la tus, memine la ijine angeic a cinyihane ej, me itre ewekë ka traqa ngöne la ijine cili. Ketre ixatua fe koi së troa atre la kepin matre kola cinyihane la tusi cili, nge maine ijij, ka loi mina fe troa atre la itre hna majemine kuca hnene la itre atr ngöne la hneijine cili, memine la aqane ujë i angatr me itre pengöne aqane hmi angatr.a
11. Nemene la nyine tro sa thupën ngöne la easa qeje pengöne la Itre Hna Cinyihan?
11 Ame la aqane troa “thawa hnyawa la wesi ula ka nyipici,” tre, thaa ene hmekuje kö la troa atreine qeje pengöne hnyawa la itre nyipici qa hnine la Itre Hna Cinyihan. Loi e tro mina fe sa thupëne matre thaa tro kö sa xome la Tusi Hmitrötr, nyine troa ahmahmane la itre atr. Ngacama ijije tro sa xome la itre Hna Cinyihan matre troa isigöline la nyipici tui Iesu ngöne lo kola tupathi nyidrë hnei Diabolo, ngo thaa tro kö sa xome la Tusi Hmitrötr matre troa axouene maine ahmahmane la itre atr ka drei së, maine pena troa iele angatr troa kapa la itre ini hne së hna mejiune kow. (Deu. 6:16; 8:3; 10:20; Mat. 4:4, 7, 10) Loi e tro pe sa trongëne hnyawa la eamo hna hamëne hnei Peteru aposetolo, kola hape: “Ahmitötë Keriso Joxu e kuhu ite hni nyipunie; nge hnëkëne pala hi troa sa koi angat asëjëihë angete hnyingë nyipunie la pengöne la mejiune i nyipunie fë la menyike me qou.”—1 Pet. 3:15.
12, 13. Nemene la “ite hunapo ka cat” hna troa auligötrane hnene la nyipici ka ej e hnine la Wesi Ula i Akötresie? Hamëne jë la ketre ceitun.
12 Maine troa sa thawa hnyawa la itre nyipici qa hnine la Wesi Ula i Akötresie, haawe, nemene hë la hnene ej hna troa eatrën? (E jë la 2 Korinito 10:4, 5.) Ijije tro la nyipici qa hnine la Tusi Hmitrötr a auligötrane “la ite hunapo ka cat,” tune la itre ini ka thoi me itre huliwa ka ngazo, me itre mekuna i atr. Loi e tro sa xome la Tusi Hmitrötr matre troa lepe apaatrene la itre ini “ka ifekethe memine la ate hmekunyi Akötesie.” Nge ijije tro sa xome la itre ini hna hamëne hnei Tusi Hmitrötr, nyine troa amekötine la aqane waiewekë ne la itre xaa atr matre troa ihmeku memine la nyipici.
13 Tro sa ce wange la tulu hna amë hnene la ketre qatre föe ka 93 lao macatre nge ka mele e Ëëd. Qaane lo eahlo a nekönatr, hna ini eahlo pala hi, ka hape, hetrenyi la hnaaluene mel, hna hëne ka hape réincarnation. Ame ngöne lo eahlo a nyiqaane ini Tusi Hmitrötr jëne la hna icinyanyikeu memine la nekö i eahlo trahmanyi ka mele ngöne la ketre nöj, tre, canga kapa ju hi eahlo la itre ini göi Iehova memine la itre ewekë hnei Nyidrëti hna thingehnaean. Ngo pine laka cile huti hnyawa e kuhu hni eahlo lo lai ini, ene laka hetrenyi la hnaaluene mel ngöne la ketre ngönetrei, ene pe jole koi eahlo troa kapa la ini hna hamëne hnene la nekö i eahlo, göne la pengöne la itre ka mec. Öni eahlo, ka hape: “Thatreine kö tro ni a trotrohnine la nyipici qa hnine la Tusi Hmitrötre i epun. Kola inine hnene la nöjei hmi asë, ka hape, hetrenyi la ketre ewekë e kuhu hni së ka mele pe ngöne la easa mec. Hnenge pala hi hna mekune laka, e meci hë la ketre atr, kola lö pi la ketre götrane i angeic thaa hna öhne kö hnei lue meke i atr, qa hnine la ngönetrei angeic me mele pe ngöne la itre xaa ngönetrei ne la itre xaa atr maine öni pena; kösë troa anyimua löth, 2 400 000 la etrun. Hnauëne laka thaa ka nyipici kö lai? Hapeu, ka tria la itre hmi?” Ijije kö tro la taua ne la ua a auligötrane la ini celë ka cile huti hnyawa e kuhu hni eahlo? Thupene la hnei eahlo hna sisedrëne la porotrik ngöne la mekune cili, hnei eahlo hna cinyanyine ngöne lo itre wiike thupen, ka hape: “Eni ha trotrohnine hnyawa enehila la nyipici göne la pengöne la mec. Atraqatre la madrineng troa atre laka, ame ngöne la ijine mele hmaca, tre, ijije tro ni a iöhnyi hmaca memine la itre sineng ka meci hë. Eni a mejiune me ajane troa canga traqa la Baselaia i Akötresie.”
Xomi Eje Jë Matre Troa Una Ielene La Itre Atr
14. Nemene la aliene la hna hape, troa una ielene la itre atr ka drei së?
14 Ame la aqane troa maca ngöne la hna cainöj, tre, thaa ene hmekuje kö la troa atreine xome hnyawa la itre xötre ne la Tusi Hmitrötr. Hnei Paulo hna cainöj me una “iele[n]” la itre atr; haawe, loi e tro mina fe sa ujë tune lai. (E jë la Ite Huliwa 19:8, 9; 28:23.) Ame la aliene la hna hape tro sa “ielen” la ketre atr, tre, kolo lai a hape, “hune hë së.” Ame lai atr hna una ielen, tre, “ka xecie hnyawa e kuhu hni angeice la ketre ewekë, nge angeic a mejiune [kow].” Ame ngöne la easa una ielene la ketre atr troa kapa la ketre ini qa hnine la Tusi Hmitrötr, tre, easa kuca matre troa ie la ini hne së hna hamën nge tro fe angeic a hane mejiune kow. Maine easa ajane fe troa traqa kowe lai, nyipi ewekë tro sa kuca matre xecie hnyawa kowe la ka drei së laka nyipici la hne së hna qaja. Hanawange la itre aqane troa kuca.
15. Tune kaa la aqane tro epuni a fe la Wesi Ula i Akötresie kowe la itre atr, me aciane thei angatr la metrötr kowe ej?
15 Amamane jë fe la Wesi Ula i Akötresie kowe la itre atr, me aciane thei angatr la metrötre kowe ej. Ame ngöne la epuni a xome la ketre xötr, amamane hnyawa jë la enyipiewekëne la troa atre la mekuna i Akötresie ngöne la ketre mekune hnei epuni hna ithanatan. Thupene la hna sa la hnyinge i epun hnene la atrene la hnalapa, maine jë tro epuni a qaja, ka hape, ‘Hanawange la mekuna i Akötresie ngöne la götrane cili.’ Maine tro pena epuni a hnying, ka hape, ‘Nemene la hnei Akötresie hna qaja ngöne la götrane cili?’ Maine tro sa ujë tune lai ngöne la easa hamëne la ketre xötr, haawe, easë hi lai a amamane hnyawa laka, qaathei Akötresie la Tusi Hmitrötr, nge easë mina fe a xatuane la atr ka drei së troa hneheene la ewekë cili. Eje hi laka, nyipi ewekë catre tro sa ujë tune lai ngöne la easa cainöj kowe la ketre atr ka lapaune koi Akötresie ngo ka thatre kö la itre ini hna hamëne hnei Tusi Hmitrötr.—Sal. 19:7-10.
16. Nemene la ka troa xatua epuni troa qeje pengöne hnyawa la itre xötr?
16 Thaa tro hmekuje kö a e la itre xötr, ngo loi e tro mina fe a qeje pengöne itre ej. Hnei Paulo hna majemine ‘seluthe me qaja amamane’ la itre ini hnei nyidrëti hna hamën. (Ite hu. 17:3) Nyimutre la itre mekun hna hamën hnene hi la ca xötr, celë hi kepin matre loi e tro epuni a wanga atrune hnyawa la itre xötrehnëewekë ka ihmeku memine la tane porotrike i epun. Maine jë tro epuni a amexeje hmaca la itre hnaewekë ka ihmeku memine lai mekune hna ithanatan, maine ijije pena tro epuni a hnying, matre tro angeic a ketre öhne la mekune ka sa la hnyinge i epuni e hnine lai xötr. Thupene lai, qeje pengöne jë la aliene lai götran ka sisitria ne la xötre cili. Ame hë ngöne la pun, xatuane jë la atr ka drei epuni troa wange la aqane tro angeic a trongëne la xötre cili ngöne la mele i angeic.
17. Ame ngöne la easa ithanatane la itre xötr ne la Tusi Hmitrötr, nemene la aqane tro sa kuca matre una ielene la itre atr?
17 Loi e eje the së la ajane troa ielene la itre atr ngöne la easa xome la itre xötr ne la Tusi Hmitrötr. Hnene la hnei Paulo hna qaja hnyawa la itre sipo i nyidrë nge meköti la aqane qaja i nyidrë, ene pe hnei nyidrëti hna atreine troa ‘ithanatane me angatr la itre Hna Cinyihan.’ (Ite hu. 17:2, 4) Tui nyidrë, catre pi së troa ketr la hni ne la itre atr ka drei së. ‘Jöe’ jë la itre ewekë ka ej e kuhu hni angatr, hnene la hna hnying, ke, kolo lai a wanga atrune la itre atr, angatr isa ala caas. (Ite edomë 20:5) Thaa tro pi kö sa qaja mekötin la itre trenge ewekë ka catr. Ngo loi pe troa nualai me meköti la itre mekune hne së hna hamën. Hetrenyi the së la itre nyine anyipicine itre ej. Tro mina fe sa xome la Wesi Ula i Akötresie matre troa nyitrepene la itre mekune hne së hna qaja. Ka lolo catre kö troa xome la ca xötr me qeje pengöne eje hnyawa, hune la troa e nyimenyimëne la luetre maine köni xötr pena. Maine tro pala hi sa anyipicine la itre mekune së, haawe, tro hë lai a ‘nyixane la inamacane kowe la ukeineqë së.’ (Ite edomë 16:23) Ame itre xaa ijin, maine jë nyipi ewekë tro sa thele mekun, me hamë itre xaa ithuemacany. Ame lo qatre föe hne së hna wange hë ka 93 lao macatre, tre, nyipi ewekë koi eahlo troa atre la kepin matre hna haöthe la fen hnene la ini, hna hape, thaa ka meci kö la u. Hnene laka trotrohnine hë eahlo la qaane la ini cili memine la aqane löthe la itre xaa hmi e cailo fen hnene ej, ene pe hna una iele eahlo troa kapa la ini hna hamëne hnei Tusi Hmitrötr ngöne la götrane cili.b
Catre Jë Troa Maca La Aqane Xome La Wesi Ula
18, 19. Pine nemen matre loi e tro sa catre troa maca ngöne la aqane xome së “la taua ne la Ua”?
18 Tusi Hmitrötr a qaja, ka hape: “Kola pate la pengöne la fen.” Ame la nöjei atr ka thiina ka ngazo, tre, angatre pala hi a tro catre kowe la ngazo. (1 Kor. 7:31; 2 Tim. 3:13) Celë hi kepin matre nyipi ewekë tro sa catre troa auligötrane “la ite hunapo ka cat” hnene la hna xome hnyawa “la taua ne la Ua, ene la wesi ula i Akötesie.”
19 Drei la manathithi ka tru troa hetrenyi la Wesi Ula i Akötresie ene la Tusi Hmitrötr, me tro fë la maca ka men ka eje e hnine ej matre troa lepe trije la itre ini ka thoi me ketr la hni ne la itre atr ka hni ka menyik! Pëkö ketre hunapo ka catre hune la maca cili. Qa ngöne lai, epi tro sa catre troa maca hnyawa ngöne la aqane xome së la taua ne la ua, ene la Tusi Hmitrötr, ngöne la huliwa hnei Akötresieti hna ahnithe koi së, ene la troa cainöjëne la Baselaia.
[Ithueamacany]
a Maine epuni a aja ithuemacany göne la itre ka cinyihane la Tusi Hmitrötr, me ijine cinyihan la itre itus, me itre ewekë ka traqa ngöne la kola cinyihane itre ej isa ala caas, ijije troa xatua epuni hnene la itre itusi celë, “Toute Écriture est inspirée de Dieu et utile,” Étude perspicace des Écritures, memine la itre hna cinyihan ngöne la La Tour de Garde, tune la “La Parole de Jéhovah est vivante.”
b Wange ju la boroshür hna hape, Nemene La Pengö Së Ngöne La Easë a Mec? götrane 5-16.
Nemene La Hnei Epuni Hna Inin?
• Nemene la ka amamane laka, hetre emenen la Wesi Ula i Akötresie?
• Nemene la aqane tro sa ‘thawa hnyawa la Wesi Ula ka nyipici’?
• Nemene la hna kuca hnene la maca ne la Tusi Hmitrötr göne la “ite hunapo ka cat”?
• Tro sa akökötrene tune kaa la atreine së troa una ielene la itre atr ngöne la easa cainöj?
[Hna eköhagen götran 2]
Troa Xome Tune Kaa La Wesi Ula i Akötresie Matre Troa Una Ielene La Itre Atr
▪ Aciane jë thei angatre la metrötre kowe la Tusi Hmitrötr
▪ Qeje pengöne jë la itre Hna Cinyihan
▪ Amamane jë ngöne la epuni a thele mekun, ka hape ka xecie hnyawa e kuhu hni epuni laka nyipici la hnei epuni hna inin, matre troa ketr la hni angatr