Thele Jë Troa Una Ielene La Itre Atr Ngöne La Aqane Hamë Ini Nyipunie
1. Kolo fe a hapeu la troa xome amacane la Wesi Ula i Akötresie ngöne la hna cainöj?
1 Tui Paulo, atrehmekune hi hnene la itretre cainöje ka maca, laka, ame la troa “thawa hnyawa la wesi ula ka nyipici,” tre, thaa kolo hmekuje kö a troa xome la itre xötr qa hnine la Tusi Hmitrötr. (2 Tim. 2:15) Tro sa una “ielen” tune kaa la itre atr ngöne la aqane hamë ini së, ngöne la easa xome la Wesi Ula i Akötresie matre troa ini angatr?—Ite hu. 28:23.
2. Tune kaa la aqane tro sa xatuane la itre atr troa metrötrëne hnyawa la Wesi Ula i Akötresie?
2 Nue Pi La Wesi Ula i Akötresie Troa Ithanata: Ame la ewekë hnapan, loi e tro sa ea la atr ka drei së kowe la Tusi Hmitrötr, matre troa aciane e kuhu hni angeic la metrötr kowe la inamacane i Akötresie ka eje e hnine ej. Maine jë tro la mejiune së kowe la Wesi Ula i Akötresie a uku angeic troa drenge hnyawa la kola e la ketre xötr. (Heb. 4:12) Maine jë tro hi sa qaja, ka hape: “Eni a mekune laka, loi e tro sa wange la mekuna i Akötresie ngöne la götrane cili. Hanawange la hna qaja hnene la Wesi Ula i Nyidrë.” Maine ijije hi, loi e tro sa e mekötine lai xötr hnine la Tusi Hmitrötr, matre troa nue ej troa ithanata.
3. Thupene la hna e la ketre xötr, tro sa xatuane tune kaa la atr ka drei së troa trotrohnine la aliene ej?
3 Ame la hnaaluen, loi e tro sa qeje pengöne hnyawa la xötr hne së hna xom. Nyimutre la itre atr ka qaja, ka hape, jole catre koi angatr troa trotrohnine la ketre xötr hnei angatre hna xötrei e. Celë hi matre, nyipi ewekë tro sa qeje pengöne la kepin matre hna xome la xötre cili ngöne la topike hna ce ithanatan. (Luka 24:26, 27) Loi e tro sa amamane hnyawa la itre hnepe hnëewekë ne la xötr ka sajuëne la mekune ka tru hna ithanatan. Ketre, ijije tro sa hnying matre troa wange maine trotrohnine hnyawa kö la atr ka drei së la mekune hne së hna ce ithanatan.—Ite edomë 20:5; Ite hu. 8:30.
4. Nemene la ewekë tixenuë nyine troa kuca matre troa una ielen la ketre atr ngöne la easa hamë ini?
4 Thele Ewekë Jë Jëne La Tusi Hmitrötr: Ame la hnaakönin, catre pi së troa ketr la mekun me hni ne la atr ka drei së. Loi e tro sa xatua angeice troa wange la aqane troa trongëne la xötre cili ngöne la mele i angeic. Maine tro sa thele ewekë jëne la itre Hna Cinyihan, haawe, tro hë lai a una ielen la ketre atr, me upi angeice troa saze la aqane waiewekë i angeic. (Ite hu. 17:2-4; 19:8) Drei la ketre ceitun, thupene la hne së hna e la Salamo 83:18, ijije tro sa ce thele ewekë me angeic ngöne la enyipiewekëne la troa atre la ëjene la ketre atr, matre troa eköthe la ketre aqane imelekeu ka lolo. Thupene lai, maine jë tro sa hnying, ka hape, “Hapeue la mekuna i nyipë, tro kö a hetre aliene la itre thithi nyipë ngöne la nyipëti a atre la ëje i Akötresie?” Ame la kola ce xome la xötre ngöne la mele ne la atr ka drei së, haawe, easë hi lai a amamane koi angeice la eloin ej. Tro la aqane una ielene së la itre atr ngöne la easa hamë ini qa hnine la Wesi Ula i Akötresie, a ea la itre atr ka hni ka ajan troa hmi koi Iehova ene la Akötresieti ka nyipici me ka shewengönie.—Iere. 10:10.