Troa Xome La Ita Ne Thup Celë e 13 Semitrepa Me Wiike Cili

Catre Jë Ngöne La Huliwa Ne Menue Ka Sisitria Ngöne La Götrane La Ua

“Catejë troa huliwa i Joxu pala hi.”—1 KOR.15:58.

1. Nemene huliwa la hnei Iesu hna könë itretre drei nyidrë troa kuca?

AME ngöne lo Iesu a trongëne la nöje Samaria ngöne lo pune lo macatre 30 M.K., hnei nyidrëti hna pane mano hmekune la ketre tim ezine la traon, hna hape, Sikara. Ame e cili, hnei nyidrëti hna qaja kowe la itretre drei nyidrë, ka hape: “Goeënejë nyipunie, mate öhnejë la hna eënyi, elehmedë hë e troa menu.” (Ioane 4:35) Thaa Iesu kö a qaja la kola eëny me menuën la ketre hlapa, ngo nyidrëti pe a qaja la troa menue ngöne la götrane la ua, ene la huliwa ne troa icasinekeune la itre atr ka hni ka meköt nge ka ajane troa nyihlue i Iesu. Nyipici laka, nyidrëti hi lo a könën la itretre drei nyidrë troa hane catre sine la huliwa ne menue cili. Atraqatre la huliwa nyine troa kuca nge xoxopatre hi la ijine hna nue matre umuthe pi la huliwa!

2, 3. (a) Nemene la ka amamane laka, easa melëne la hneijine menue? (b) Nemene la hna troa ithanatane hnene la hna cinyihane

² Sisitria catre ngöne la hneijine së enehila, la aliene la trenge ewekë i Iesu göne la huliwa ne menue. Easa melëne la ketre hneijin ne mele së ka ceitu memine la ketre hlapa, laka, “elehmedë hë e troa menu.” Ame ngöne la nöjei macatre, kola e la itre milio la itre atr ka kapa la ihë celë, ene la troa kapa la itre nyipici ka hamë mel, nge traqa koi itre thauzan la itre ka xötrei xome la bapataiso. Hnëqa së troa catre huliwa ngöne la ijine menue ka sisitria celë, nge hna elemekene hnene la Joxu ne la meledrai, ene Iehova Akötresie. Haawe, nyipunieti kö a “cate troa huliwa” ngöne la ijine menue cili?—1 Kor. 15:58.

³ Ame ngöne lo köni macatre nge sin ne cainöje Iesu e celë fen, hnei nyidrëti hna hnëkëne la itretre drei nyidrë troa xome hnyawa la hnëqa i angatr, ene la troa hane menue. Tro la hna cinyihane celë a ithanatane la köni ini ka sisitria hna hamëne hnei Iesu kowe la itretre drei nyidrë. Köni ini lai ka troa amamane la köni thiina ka sisitria nyine tro sa eëne ngöne la easa xome la huliwa ne troa icasinekeune la itretre drei Iesu enehila. Loi e tro sa wange trongëne la köni thiina cili.

Nyipi Ewekë Catre La Hni Ka Ipië

4. Hnei Iesu hna qeje pengöne tune kaa la enyipiewekëne la troa hni ka ipië?

⁴ Pane mekune jë së la ewekë ka traqa: Kola iwesitrë hnene la itretre drei Iesu hnene la hna pi atre, ka hape, drei la ka tru e angatr. Kola mama hnyawa ngöne la itre qëmeke i angatr la aqane wesitre i angatr, me aqane imethinë i angatr. Celë hi kepine matre hnei Iesu hna hëne la ketre nekönatr me ami nyën e nyipi angatr. Öni nyidrëti e wanga atrune la nekönatr, ka hape: “Ame la ate aconyi angeice kö [maine, “ame la atr ka aipië angeice kö,” Byington] tune la nekönate celë, te, tro angeic’ a tru ngöne la baselaia ne hnengödrai.” (E jë la Mataio 18:1-4.) Nyipi ewekë troa trotrohnine hnene la itretre drei Iesu laka, tro ha atrunyi angatr, e hnei angatre hna pane aconyi angatre kö qëmekene la itre xan, ngo thaa hnene kö la hna mekune tune la fen, laka, atr ka tru la atre trene men me trena mo, me ka cilëne la ketre göhnë ka tru ngöne la nöj. Tro hë Iehova a amanathithine la itretre drei Iesu memine la huliwa i angatr, e eje thei angatre la hni ka ipië.

5, 6. Pine nemene matre nyipi ewekë tro sa hetrenyi la ipië, ngöne la easa xome la huliwa së ne menue? Qaja jë la ketre ceitun.

⁵ Ame enehila, nyimutre la itre atrene la fene celë ka nue la mele i angatr matre troa thele troa mus, me hetre mo, me cilëne la itre göhnë ka tru. Ame la pune lai, xoxopatre pe hi, maine pena, pë hë ijine tro angatr a sajuëne la itre aja i angatr ngöne la götrane la ua. (Mat. 13:22) Ngo ame la nöje i Iehova, angatre pe kö a madrine troa ‘aipië angatre kö’ qëmekene la itre xan, matre tro kö a kepe angatr me amanathithi angatr hnene la Joxu ne la meledrai.—Mat. 6:24; 2 Kor. 11:7; Fil. 3:8.

⁶ Tro sa pane ce wange la tulu i Francisco, ketre qatre thup ka lapa ngöne la götrane ahië ne Amerika. Ame lo thöthi petre kö angeic, hnei angeice hna nuetrije la ini ka tru ngöne université matre troa xome la huliwa ne pionie. Öni angeic e mekune hmaca, ka hape: “Ame lo eni a troa ikötresae, ijije hi tro ni a öhne la ketre huliwa ka troa aejëne hnyawa la itre ajang me itre aja ne la föeng ngöne la götrane la ngönetrei. Ngo hnei nyiho hna iëne troa ahmahloeëne la mele i nyiho, me sisedrëne pala hi la huliwa ne cainöje i nyiho ngöne la drai ka pexej. Ame hë thupene la nyiho a hetre nekönatr, hetre ejolene hë la mele i nyiho. Ngo hnei Iehova hna xatua nyiho troa acatrene la aja i nyiho, ene la troa ahmahloeëne la mele i nyiho.” Kola nyipune hnei Francisco, ka hape: “Traqa koi 30 nge sin lao macatre ne madrine ni troa xome la hnëqa ne qatre thup, memine la itre xaa hnëqa ka ketre pengön. Pëkö ketre ijine nyiho a ijigöi fë la aqane ahmahloeëne nyiho la mele i nyiho.”

7. Hane kö nyipunieti thele troa trongëne la eamo ngöne Roma 12:16? Nemene la thangane lai?

⁷ Maine tro sa thipetrije la “ite ewekë ka draië” ne la fene celë, me nue troa “e [së] hnei ite ewekë ka ipië,” haawe, tro hë sa kapa la itre manathith me itre hnëqa ngöne la huliwa ne menue.—Rom. 12:16; Mat. 4:19, 20; Luka 18:28-30.

Tro Ha Manathith La Atr Ka Catre Huliwa

8, 9. (a) Qaja jë la aliene la ceitune hnei Iesu hna hamën göne la itre talan. (b) Drei fe la itre atr hna troa ithuecatren hnene la ceitune celë?

⁸ Hetrenyi la ketre thiina nyine tro sa eën, matre tro sa catre troa xome hnyawa la huliwa ne menue. Hnei Iesu hna qeje pengöne la thiina cili ngöne la ceitun ne la itre talan.a Kola qaja la ketre trahmany ka troa tro ngöne la ketre nöj, ngo qëmekene lai, hnei nyidrëti hna pane ahnithe la itre ewekë i nyidrë kowe la köni hlu. Hna hamëne la faifi lao talan kowe la pane hlu; thupene lai, lue talan kowe la hnaaluene hlu, nge caa talane hi kowe la hnaakönin. Ame la kola tro hnene la maseta, hnene lo lue pane hlu hna canga tro troa “itö xan”. Ngo ame lo hnaakönine hlu, tre, ka “witi” angeic. Hnei angeice hna si hnaop me kelem la talane i angeic. Ame la kola bëeke hmaca hnene la maseta, hnei nyidrëti hna nyijune kowe lo lue pane hlue i nyidrë, hnene la hna acili nyidro “hune la ite ewekë ka nyimute.” Nge ame lo talan hna hamëne kowe lo hnaakönine hlu, tre, hnei nyidrëti hna thapa hmaca pe qaathei angeic, me upetriji angeice pi qa ngöne la hnalapa i nyidrë.—Mat. 25:14-30.

⁹ Xecie hnyawa ha e kuhu hni së laka, easa ajane troa hane tune lo lue hlue ka catre huliwa ngöne lo ceitune i Iesu, me catre troa xome hnyawa la huliwa së, ene la troa inine la itre atr. Ngo nemene la nyine tro sa kuca, e traqa ju hë la itre jol nyi ifegone la etrune la huliwa hne së hna atreine eatrën enehila? Maine jë hnene la kola elë la thupene mo, ene pe nyipi ewekë troa aqeane la itre hawa ne tro sa huliwa catre kowe la maseta së matre troa sajuëne la itre aja ne la hnepe lapa së. Maine pena qatre hë së enehila nge paatre hë lo trenge catre së ekö ngöne lo easa thöth. Maine celë hi la ketre ewekë hne së hna melën, hetrenyi la ketre ithuemacany ka lolo ka troa xatua së ngöne lo lai ceitun ne la itre talan.

10. Kola mama tune kaa ngöne la ceitun ne la itre talan, laka, ka atreine tulu ewekë la maseta, nge pine nemene matre kolo lai a ithuecatre koi së?

¹⁰ Hanawange la thiina ne lo maseta ngöne lo ceitun; wanga atrehmekune hi nyidrë laka, isapengöne kö la itre hna atreine kuca hnene la itre hlue i nyidrë. Kola mama hnyawa lai ngöne la nyidrëti a isa thawa la itre talan “cei tune memine la hnei angate hna isa atein.” (Mat. 25:15) Nge eje hi laka, hnene lo hlue hnapan hna menuëne atrune hune lo hnaaluene hlu. Ngo hnene la maseta hna wanga atrunyi nyidroti asë pine la trengecatre hnei nyidroti hna kuca, me qeje nyidro ceitu me lue hlue “ka loi me nyipici,” nge hna ce amanathithi nyidro. (Mat. 25:21, 23) Ketre tune mina fe, atre hnyawa hi Iehova Akötresie, lo Joxu ne la meledrai, laka, hetrenyi la itre jole ka traqa koi së nge ka troa hetre ethan ngöne la itre ewekë hne së hna atreine kuca ngöne la huliwa i Nyidrë. Eje hi laka, tro Nyidrëti a wanga atrune la trenge catre hne së hna nue cememine la hni ka pexej matre troa nyihlue i Nyidrë, nge tro fe Nyidrëti a amanathithi së.—Mar. 14:3-9; e jë la Luka 21:1-4.

11. Hamëne jë la ketre ceitun ka amamane laka ngacama jol, ngo ijije hi tro sa kepe thangane ka loi qa ngöne la hne së hna catre huliwa.

¹¹ Kola amamane hnene la tulu i Selmira, ketre Keresiano föe ka mele e Berezil, laka, ame la troa catre huliwa koi Akötresie, tre, thaa kolo hmekuje kö ngöne la itre ijine kola tro loi la mele së. Kola e enehila la truedre lao macatre, thupene la hna kuqane la föi Selmira ngöne la ketre ijine kola atrekënö la hnalapa i nyidro, ene pe hiane caasine ju pëhë eahlo la köni nekö i eahlo thöth. Nyimutre la itre hawa hnei eahlo hna nue matre troa huliwa hnine la hnalapa ne la maseta, nge kucakuca catre fe eahlo hnene la hna xome la itre kar ka tiqa pala hi e nöjei drai. Ngacama kola melëne la itre jole cili, ngo hnei eahlo hna eköthe hnyawa la porogarame i eahlo, matre ijije troa xome la huliwa ne pionie lapaa. Hnene lo lue xaa nekö i eahlo jajiny hna hane xome pë hë e thupen la huliwa ne pionie. Öni eahlo, ka hape: “Ma ije macatre hë la, nge traqa ha koi truedre nge sine la etrune la itre atr ka ini Tusi Hmitrötr me eni, nge ketre angatre a hane nyi xaa atrene la ‘hnepe lapang.’ Ame pala hi enehila, hnimi ni catre hnei angatr, nge lolo la aqane imelekeu hun. Thaa ijije kö troa itöne la trenga mo cili.” Ka xecie hnyawa koi së laka, hnene la Joxu ne la meledrai hna amanathithine la trenge catre hna nue hnei Selmira!

12. Nemene la nyine troa kuca matre tro sa catre huliwa ngöne la hna cainöj?

¹² Ngacama troa sewe së enehila hnene la itre ejolene la mel troa catre cainöj, ngo tro pala kö sa thele troa akökötrene la aqane tro sa cainöj, ngöne la huliwa ne menue. Maine tro sa trongëne hnyawa la itre mekune nyine ixatua hna hamë së ngöne la Icasikeu Ne La Huliwa, haawe, tro hë sa amacane la aqane cainöje së, me tupathe la itre xaa aqane cainöj ka hnyipixe. (2 Tim. 2:15) Ketre, maine ijij, loi e tro sa eköthe hmaca la porogarame së maine nue pena la itre huliwa ka thaa nyipi ewekë kö, matre troa sajuëne la itre hna amekötine hnene la ekalesia göi cainöje trootro.—Kol. 4:5.

13. Maine easa ajane troa eëne me akökötrene la aqane catre huliwa së, haawe, nemene la ewekë ka sisitria nyine tro sa kuca?

¹³ Loi e tro sa lapa mekune laka, ame la easa catre huliwa, tre, thangane hi la etrune la ihnimi së me hni ne ole së koi Akötresie. (Sal. 40:8) Ame ngöne lo ceitune i Iesu, kola xouene la maseta hnene la hnaakönine hlu, ke, angeic a goeë nyidrë ceitu me ketre atr ka pi hun me ka thatreine tulu ewekë. Ene pe hnei angeice hna si hnaope me keleme la talane i angeic, ngo thaa hna huliwane ju kö matre troa akökötrene la itre ewekë ne la maseta i angeic. Maine easa ajane troa thipetrije la aqane ujë cili, nyipi ewekë tro sa eëne me akökötrene pala hi la ekeukawane la aqane imelekeu së memine la Joxu ne la meledrai, ene Iehova. Loi e tro sa xomi ijine troa inine me sine thele la itre thiina ka lolo i Nyidrë, tune la ihnim me xomihni ahoean, me ihnimi ipitö. Jëne tro hi lai a ketr la hni së me upi së troa kuca la hne së hna atrein ngöne la huliwa i Nyidrë.—Luka 6:45; Fil. 1:9-11.

“Hmitöteju Nyipunie”

14. Nemene la hna amekötine ka sisitria nyine troa eatrëne hnene la itre atr ka ajane troa troa menue?

¹⁴ Kola qaja hnei aposetolo Peteru la itre Hna Cinyihane qene Heberu, matre troa amamane la aqane tro Iehova a eatrëne la aja i Nyidrë kowe la itre hlue i Nyidrë e celë fen; öni angeic, ka hape: “Tro nyipunie a hmitöte ngöne la nöjei thina i nyipunie asë, tune la aqane hmitöte nyidëti ate hë nyipunie; ke ase hë cinyihan, ka hape, “Hmitöteju nyipunie; ke hmitöte ni.” (1 Pet. 1:15, 16; Lev. 19:2; Deu. 18:13) Kola wanga atrune hnene la trenge ewekë celë, laka, nyipi ewekë troa hmitrötre la angetre menue, ngöne la götrane la thiina me ngöne la götrane la ua. Ijije tro sa eatrëne la hna amekötine ka sisitria celë, hnene la hna canga eköthe amë la itre ewekë matre troa ahmitrötrë së. Tro ha eatre tune kaa lai? Hnene la ixatua hna hamëne hnene la Wesi Ula ne nyipici i Akötresie.

15. Nemene la thangane la nyipici qa hnine la Wesi Ula i Akötresie kowe la mele së?

¹⁵ Kola aceitunëne la Wesi Ula ne nyipici i Akötresie memine la tim hna xome troa apuloine la atr. Drei la ketre ceitun, hnei Paulo aposetolo hna cinyihan, laka xajawa i Akötresie, ka hmitrötr la ekalesia ne la itre Keresiano hna iën; ej a ceitu memine la ketre jajiny ka hmitrötr hna hnëkëne thatraqai Keriso, lo atre nyihnyawa ej “ngöne la timi hnene la tenge ewekë . . . , [ka] hmitöte me pë engazon.” (Efe. 5:25-27) Qëmekene lai, hnei Iesu hna hane cainöjëne la emenene la Wesi Ula i Akötresie memine la hnene ej hna atreine kuca matre troa ahmitrötrëne la atr. Ame ngöne la Iesu a ithanata kowe la itretre drei nyidrë, tre, öni nyidrë, ka hape: “Hmadradra nyipunie enehila hnene la tenge ewekë hnenge hna qaja koi nyipunie.” (Ioane 15:3) Haawe, hetre emenene hi la nyipici qa hnine la Wesi Ula i Akötresie, troa ahmitrötrëne la atr ngöne la götrane la thiina me ngöne la götrane la ua. Maine tro sa nue la nyipici Akötresie troa ahmitrötrë së ngöne la itre götrane cili, tre, tro hë Nyidrëti a kapa la aqane hmi së.

16. Nemene la aqane tro sa pë ethane pala hi ngöne la götrane la ua me ngöne la götrane la thiina?

¹⁶ Qa ngöne lai, maine easa ajane troa itretre ka troa menue ngöne la meledrai i Akötresie, loi e tro sa pane thele troa nuetrij asë qa ngöne la mele së la nöjei huliwa ka sis ngöne la götrane la thiina me ngöne la götrane la ua. Eje hi, maine easa ajane laka, ijije pala hi tro sa xome la hnëqa cili, nyipi ewekë tro sa amamai tulu ka lolo ngöne la aqane troa sajuëne la itre trepene meköti Iehova ngöne la götrane la thiina me götrane la ua. (E jë la 1 Peteru 1:14-16.) Nyipici laka easë asë hi a thele troa porope la ngönetrei së, ketre tune mina fe, easë pala hi a thele troa nue la Wesi Ula i Akötresie troa apuiloinyi së. Kolo lai a hape, loi e tro sa e la Tusi Hmitrötr me hane sine la itre icasikeu ne Keresiano. Nyipi ewekë mina fe tro sa catre trongëne la itre ini hnei Akötresieti hna amekunë së nyine thatraqane la mele së. Maine tro sa ujë tune lai, haawe, tro hë sa atreine cile kowe la itre hnepe ngazo së me thipetrije la itre iajojezi ne la fene celë.—Sal. 119:9; Iako. 1:21-25. Drei la kola akeukawane la hni së troa atre, laka, ijije tro mina fe a xatua së hnene la Wesi Ula ne nyipici Akötresie, troa “sië” së qa ngöne la ngazo!—1 Kor. 6:9-11.

17. Maine easa ajane troa pë ethane la mele së, nemene la eamo hnine la Tusi Hmitrötr nyine tro sa trongën?

¹⁷ Hapeu, easë kö a kapa hnyawa la aqane apuiloinyi së hnene la Wesi Ula i Akötresie? Drei la ketre ceitun, tune kaa la aqane ujë së ngöne la kola hmekë së göne la itre ethanyine la itre nyine iamadrinë ka ngazo ne la fene celë? (Sal. 101:3) Hapeu, easë kö a neëne troa ce sinee memine la itre sine ce ini me easë ka thatre Iehova kö? (1 Kor. 15:33) Hapeu, easë kö a catre cile kowe la itre hnepe kucakuca së ka apuingazonyi së xajawa i Iehova? (Kol. 3:5) Easë kö a ananyine la itre iwesitrë ne la itre ka kuci politik, memine la aqane pi isigöli nöje ne la itre atr ka itupath ngöne la itre elo?—Iako. 4:4.

18. Maine troa pë ethane la mele së ngöne la götrane la ua me ngöne la götrane la thiina, tre, tro lai a xatua së tune kaa troa maca ngöne la huliwa ne menue?

¹⁸ Maine tro sa nyipici ngöne la aqane idrengethenge së ngöne la itre götrane cili, eje hi lai laka tro hë sa kapa la itre manathithi ka tru. Ame lo Iesu a aceitunëne la itretre drei nyidrë hna iën memine la itre wapicine la ketre vin, öni nyidrëti, ka hape: “[Tretretrong] a xomepi la nöjei umene thenge ka tha wa kö; nge ame la nöjei ka wa, nyidëti a nyihnyawan, mate wa atrune pi.” (Ioane 15:2) Haawe, maine tro sa drengethenge la aqane nyihnyawa së hnene la tim, ene la nyipici qa hnine la Tusi Hmitrötr, tro hë sa wawene hnyawa.

Itre Manathithi Hna Troa Kapa Enehila Me Elanyi Fe

19. Hna amanathithine tune kaa la trenge catre ne la itretre drei Iesu ngöne la huliwa ne menue?

¹⁹ Ame lo itretre dreng ka kapa hnyawa la ini hna hamëne hnei Iesu, tre, hna acatrene pë hë la lapaune i angatr hnene la uati hmitrötr ngöne lo Penetekos 33 M.K. matre ijiji angatr troa anyipicine “uti hë la cane la fene hnengödrai.” (Ite hu. 1:8) Itre xan e angatr a sine la Lapa ne Xomi Meköt, itre xan a mesinare nge itre xane fe a xome la huliwa ne qatre thup ka iwai trootro; sisitria catre la huliwa hnei angatre hna kuca göi troa cainöjëne la maca ka loi “kowe la nöjei ate asëjëihë e celë fen.” (Kol. 1:23) Drei la itre manathithi hnei angatre hna kapa, memine la madrine hnei angatr hna tro fë kowe la itre xan!

20. (a) Nemene la itre manathithi hne së hna kapa qa ngöne la hna catre huliwa ngöne la ijine menue ngöne la götrane la ua? (b) Nemene hë la aja hnei nyipunieti hna thele troa eatrën?

²⁰ Eje hi laka, maine tro sa hni ka ipië me catre huliwa, me thele troa sajuëne la itre trepene meköti ne la Wesi Ula i Akötresie, tre, tro hë sa madrine troa kuca la hne së hna atrein ngöne la ketre ijine menue ka sisitria ngöne la götrane la ua, nge ka kökötre pala hi. Maine nyipici laka nyimutre la itre atr ka akötr me hleuhleu qa ngöne la hna nyinyape thele la itre mo me itre nyine iamadrinë ne la fene celë, ngo easë pe kö a troa melëne la nyipi madrin me mejihnin. (Sal. 126:6) Nge ame la ewekë ka sisitria catr, tre, ene laka “tha gufa kö la huliwa [së] kowe la Joxu.” (1 Kor. 15:58) Tro ha hamëne hnene la Joxu ne la meledrai, ene Iehova Akötresie, la itre manathithi ka epine palua, nyine june la ‘huliwa së memine la ihnimi hne së hna amamane kowe la atresiwa i Nyidrë.’—Heb. 6:10-12.

[Ithueamacany]

Hapeu, Mekune Pala Kö Nyipunie?

Ame la nyipunie a catre huliwa ngöne la ijine menue . . .

• pine nemene matre nyipi ewekë troa hetre hni ka ipië?

• nemene la nyine troa kuca matre atreine tro nyipunieti a inin me thele troa catre huliwa?

• pine nemene matre nyipi ewekë tro pala hi nyipunie a pë ethan ngöne la götrane la ua me ngöne la götrane la thiina?