Elehmedrë Hë La Hlapa Troa Menuën
1. Nemene la huliwa ka sisitria hna nyiqaane hë?
1 Thupene la hnei Iesu hna cainöj kowe la ketre föe ne Samaria, öni nyidrëti jë hi kowe la itretre drei nyidrë, ka hape: “Goeëne jë nyipunie, mate öhnejë la hna eënyi, elehmedë hë e troa menu.” (Ioane 4:35, 36) Ase hë nyiqaane la huliwa ne menue ngöne la götrane la ua, nge hnei Iesu hna ahnithe amë laka, tro ha kökötr e cailo fen la huliwa cili. Iesu pala hi a hnehengazone qa koho hnengödrai la huliwa ne menue cili. (Mat. 28:19, 20) Nemene la itre ithuemacanyi ka amamane laka, kola kökötre nyimenyime la huliwa cili ngöne la hneijine së?
2. Nemene la hna amamane hnene la aqane kökötre la huliwa ne menue e cailo fen asë?
2 Ketre Huliwa Ne Menue Hna Xom e Cailo Fen Asë: Ame ngöne lo macatre ne huliwa 2009, hna elë la etrune la itretre cainöj e cailo fen koi 3.2 koi 100. Ame ngöne la itre nöj hna wathebone troa cainöje ngön, tre, kolo mina fe a elë la etrun la itretre cainöj, 14 koi 100. Ame pala hi ngöne la macatre cili, tre, ase hë sasaith lo sevene milio nge sin lao atr ka inine la Tusi Hmitrötr: ka tru catre kö la etrune lo itre ka ini tus ngöne lo macatre 2009 hune la etrune la itretre cainöj; ketre, ase hnyawa ha sasaith la etrune lo itre ka ini tusi lo macatre 2008. Pine laka saqe hi kökötre la huliwa ngöne la itre nöje ka nyimutre, ene pe nyimutre la itre ka ajane troa hane sine la ini ne Gileada göi troa mesinare. Ketre, kola wawene la huliwa ngöne la itre nöj gaa nyimu qene hlapa hna ithanatan. Kola mama hnyawa laka, Iehova a akökötrene la huliwa ne cainöj ngöne la ijine kola nyipune la menue. (Is. 60:22) Hapeue la itre “hlapa” ngöne la götran hne së hna cainöje ngön, easë kö a goeën aloine itre ej?
3. Nemene la mekuna ne la itre xan göne la huliwa ne menue hna kuca ngöne la götrane hnei angatr hna cainöje ngön?
3 Hnë Tro Epuni a Menue: Kola qaja hnene la itre xan, ka hape, “Thaa wawene hnyawa kö la huliwa ne cainöj ngöne la götrane hnenge hna cainöje ngön.” Nyipici laka ame la itre xaa götrane hna cainöj, pëkö wene ne la hna huliwa, nge ame itre xaa götran, tre, ej a wawene hnyawa. Haawe, hnene la itre xaa hlue i Iehova hna mekune, ka hape, ase hë la menue ngöne la itre götrane cili, nge kolo pëhë enehila a troa wange la itre xan. Hapeu, ka meköti kö la mekune cili?
4. Nemene la thiina ka lolo nyine tro sa xom thatraqane la huliwa ne cainöje së, nge pine nemen?
4 Ame la hneijine menu, tre, tru catre la huliwa, matre enije ju hi së qaane lo kola nyiqaan uti hë la kola fenesi menuëne la hlapa. Kola mama la enyipiewekëne me enyimenyimene la huliwa cili ngöne la trenge ewekë hna qaja hnei Iesu, kola hape: “Atraqate la meledrai, nge xalaithe hi la angete troa menue. Celë hi mate xëwejë nyipunie kowe la Joxu ne la meledrai, matre upepi la angete troa menue kowe la meledrai i anganyidë.” (Mat. 9:37, 38) Iehova la Joxu ne la meledrai, nge hnëqa i Nyidrë la troa axeciëne la ijine memine la götrane hnë troa menue ngön. (Ioane 6:44; 1 Kor. 3:6-8) Nemene fe la hnëqa së? Kola sa hnei Tusi Hmitrötr, ka hape: “E hmakanyi traneju la ite feja i ’ö, nge e heji the shawa kö la iwanakoime i ’ö.” (Ate cai. 11:4-6) Nyipici, ame ngöne la ijine kola tru la huliwa, tre thaa ijine tro kö lai a mano!
5. Pine nemene matre loi e tro pala hi sa catre cainöj, ngacama pëkö thangane hne së hna kapa ngöne la teritoare së?
5 Catre Jë Së Troa Xome La Huliwa Ne Menu: Ngacama hne së pala hi hna cainöj ngöne la teritoare së nge thaa semesine së kö hnene la itre atr, ngo hetrenyi kö la sipu kepin matre easa catr me nyimenyime xome la huliwa ne cainöj. (2 Tim. 4:2) Hnene la itre ewekë ka ngazo ka traqa e celë fen, ene pe kola saze la aqane ujë ne la itre atr ka nyimutre, me hane nyiqaane mekune hnyawa la pengöne la mele i angatr elany. Ame la kola tru trootro la itre thöth, tre, angatr a thele troa mele xetietë me ajane troa tingetinge la mekune i angatr. Maine jë troa ketr la itre xaa atr hnene la aqane cile huti së ngöne la huliwa. Eje hi, ame lo itre atr ka xele ma drei së ekö, tre, maine jë tro hë angatr a hane drei së elany. Nyipi ewekë mina fe tro sa cainöj kowe lo itre atr ka thipetrije la maca së.—Ezek. 2:4, 5; 3:19.
6. Maine jole koi së troa cainöj ngöne la teritoare së, nemene la ka troa xatua së troa eje pala hi the së la aja atraqatr?
6 Maine jole koi së troa cainöje ngöne la teritoare së, haawe, nemene la ka troa xatua së troa eje pala hi the së la aja atraqatr? Maine nyipici laka easë pala hi a cainöje ngöne itre hnalapa trootro, ngo loi e tro fe sa xome la itre xaa jëne cainöj, tune la troa cainöj ngöne la hna huliwa i maseta maine jëne telefone pena. Ketre, loi e tro fe sa xome la nöjei pengöne aqane nyiqaane ithanata matre troa nyiqaane porotrike memine la itre atr. Loi e tro fe sa saze la porogarame së me hane cainöje fe e jidr, maine e ketre ijine pena ka hmaloi koi së troa öhne la itre atr ngöne itre hnalapa i angatr. Maine jë, tro sa inine la ketre qene hlapa matre troa tro fë la maca ka loi kowe la itre xaa atr. Ijije mina fe tro sa xome la huliwa ne pionie lapaa matre troa akökötrene la huliwa ne cainöje së. Maine pena tro sa tro kowe la ketre nöje gaa aja ka troa menu. Maine meköti me lolo la aqane goeëne së la huliwa ne cainöj, haawe, tro hë sa catre troa xome hnyawa la huliwa ka sisitria cili.
7. Uti hë eue la tro sa catre xome la huliwa ne icasinekeune la itre atr?
7 Hnene laka hna nyifegone hi la ijine tro la itre ka eëny a jele me xawane la itre koko, haawe, thaa mano kö angatr maine huli hmitre pena ngöne la huliwa, ngo angatr a thele troa fenesi me menuëne asë la hlapa. Ketre tune mina fe la huliwa ne menu ngöne la götrane la ua, laka, nyipi ewekë catre tro sa hane ujë tune lai. Uti hë eue la tro sa catre xome la huliwa ne icasinekeune la itre atr? Ngöne la hneijine la “pune la fene hnengödrai” nge uti hë la “pun.” (Mat. 24:14; 28:20) Tune la Hlue i Iehova ka sisitria, easë mina fe a ajane troa afenesine la huliwa hna ahnithe koi së. (Ioane 4:34; 17:4) Haawe, epi tro pala hi sa xome hnyawa uti hë la pun la huliwa ne cainöje së cememine la aja atraqatr, me madrin me thiina ka loi. (Mat. 24:13) Thaa fenesi pala kö la huliwa ne menu!
[Iatr ne la götran 2]
Ame la hneijine menu, tre, tru catre la huliwa, matre enije ju hi së qaane lo kola nyiqaan uti hë la kola fenesi menuëne la hlapa