Troa Xome La Ita Ne Thup Celë e 31 Januare Me Wiike Cili
Nyima 101 Me 97
Loi e Eje Thei Epuni La Aja Atraqatr Kowe La Nyipi Hmi
“Atraqate la meledrai, nge xalaithe hi la angete troa menue.”—MAT. 9:37.
1. Tro epuni a qeje pengöne tune kaa la hna hape, “ka nyimenyim”?
HETRENYI thei epuni la ketre pepa ka sisitria nyine tro la ketre atr a goeëne qëmekene troa nyipune la drai. Nemene la hnei epuni hna kuca? Epuni a sija ka hape, “KA NYIMENYIM!” Hnei epuni hna isa pui memine la ketre atr, nge epuni a öhne laka, kolo ha troa sasaithe la hawa hna sa. Nemene la hnei epuni hna troa kuca? Epuni a tro nyimenyim!” Nyipici laka, ame la kola ahnithe koi epun la ketre huliwa nyine troa canga kuca, nge easenyi hë la traeme ne troa afenesin, eje hi lai laka, thaa tro kö a lapa hnyawa la mekune i epun, ke, epuni a hnehengazone la ewekë cili. Kola hlohlo la hni epun, nge epuni a thele troa catre me nyimenyime kuca la huliwa. Thaa tro kö a hmitr!
2. Nemene la hnëqa ka sisitria hna ahnithe kowe la itre nyipi Keresiano enehila?
2 Ame kowe la itre nyipi Keresiano, pëkö ketre ewekë ka sisitria catre hune la troa cainöjëne la maca ka loi ne la Baselaia, me inine la nöjei nöj asë. (Mat. 24:14; 28:19, 20) Tui Iesu, hnei Mareko ketre atre dreng, hna cinyihane ka hape, nyipi ewekë troa “pane” kuca la huliwa cili qëmekene troa traqa la pun. (Mar. 13:10) Celë hi la huliwa nyine tro sa kuca. Hnei Iesu hna qaja, ka hape: “Atraqate la meledrai, nge xalaithe hi la angetre troa menue.” Thaa ka itreqe kö la meledrai; haawe, nyipi ewekë tro sa canga menue, e ijine pala kö.—Mat. 9:37.
3. Nemene la itre ewekë hna kuca hnene la itre atr ka nyimutre matre troa eatrëne la hnëqa ka sisitria celë, ene la troa cainöj?
3 Pine laka sisitria catre koi së la huliwa ne cainöj, ene pe easa nue asë la traeme së, me trenge catre së, memine la mekuna së thatraqane la huliwa cili. Nyimutre la itre trejine trahmanyi me föe ka ujë tune lai. Hetrenyi la itre xan ka ahmaloeëne la mele i angatr, matre troa cainöje ngöne la drai ka pexej, tune la itre pionie, maine itre mesinare, maine pena itre ka huliwa hnine la itre Bethela e cailo fen asë. Thaa mano kö angatre huliwa. Nyimutre la itre ewekë hnei angatre hna nu, nge ketre nyimutre fe la itre jol hnei angatre hna cile kow. Ngo atraqatre kö la itre manathithi hnei angatre hna kapa qaathei Iehova. Easa madrine koi angatr. (E jë la Luka 18:28-30.) Ngacama thatreine kö tro la itre xan a hane cainöj ngöne la drai ka pexej, ngo angatre pe a catre xome la huliwa ne iamele cili, tune la troa xatuane la itre nekö i angatr troa hane hetrenyi la mele elany.—Deu. 6:6, 7.
4. Pine nemene matre kola paatre thene la itre xaa atr la enyipiewekëne me enyimenyimen la itre drai?
4 Tune lo hne së hna ce wange hë, ame la kola qaja, ka hape, ketre ewekë ka nyimenyim, ke, hnene laka hna sa la traeme ne troa kuca, hna sa drain, nge ka hetre pun. Easa melëne la hneijine ne la pun, nge nyimutre la itre ewekë qa hnine la Tusi Hmitrötr, me aqane trongene la mele ne la atr, ka anyipicine lai. (Mat. 24:3, 33; 2 Tim. 3:1-5) Ngo pëkö atr ka atre la ijine troa traqa la pun. Ame ngöne la Iesu a hamëne la itre ithuemacany göne la “hatene . . . la [pune la fen],” tre, öni nyidrëti ka hape: “Ame la drai memine la haua cili, te, pëkö ate ate, kete tha ’te kö la ite angela e hnengödrai, memine la Nekön, ngo Kakati hmekuje hi.” (Mat. 24:36) Haawe, nango jole koi itre xan troa mekune pala hi la enyipiewekëne me enyimenyimene la itre drai, ke, ekö hë angatre itreqe. (Ite edomë 13:12) Hapeu e itre xaa ijin, nyipunieti fe kö a hane mekune tune lai? Nemene la ka troa xatua së troa mekune pala hi la enyipiewekëne me enyimenyimene la itre drai, ngöne la easa xome la hnëqa hnei Iehova Akötresie me Iesu Keriso hna thele tro sa kuca enehila?
Loi e Tro Sa Wanga Atrune La Tulu Së, Ene Iesu
5. Hnei Iesu hna amamane tune kaa la enyipiewekëne koi nyidrë troa xome la huliwa ne cainöj?
5 Ame thene la nöjei atr asë ka amamane la enyipiewekëne la huliwa i angatr koi Akötresie, tre, Iesu Keriso hi la tulu ka lolo ngöne la götrane cili. Ame la ketre kepin matre ka sisitria catre koi nyidrë la huliwa cili, tre, ene laka atraqatre la huliwa nyine tro nyidrëti a kuca ngöne hi la köni macatre nge sin. Ngo atraqatre kö la huliwa hna kuca hnei Iesu thatraqane la nyipi hmi hune la ketre atr. Hnei nyidrëti hna ahlemune la ëje ne la Tretretro i nyidrë memine la aja i Nyidrë, me cainöjëne la maca ka loi ne la Baselaia, me qaja amamane la itre huliwa me itre ini ka thoi hna hamëne hnene la itre hene ne hmi, me sajuëne la musi cile i Iehova uti hë la mec. Ame ngöne la nyidrëti a trongëne la nöj, hnei nyidrëti hna nue la trenge catre i nyidrë, matre troa inine me xatuane me aloine la itre meci ne la itre atr. (Mat. 9:35) Pëkö ketre atr ka nue la trenge catre i angeice ngöne la itre götrane cili tune la aqane kuca i Iesu ngöne la ijine ka xoxopatre hi. Hnei Iesu pala hi hna catre huliwa.—Ioane 18:37.
6. Nemene la ewekë hnei Iesu hna amë panën ngöne la mele i nyidrë?
6 Nemene la ka upi Iesu troa catre xome pala hi la huliwa ne cainöj? Jëne la hna perofetane hnei Daniela, atre hnyawa hi Iesu la hnepe ijine tro nyidrëti a xome la huliwa cili, thenge la idrai Iehova. (Dan. 9:27) Haawe, tune lo hna qaja ha, tro ha nyipune la huliwa ne cainöje i nyidrë “ngöne la wike ka cas, nge ngöne la nyipine la wik,” maine pena thupene la köni macatre nge sin. Thaa qea ju kö, thupene la Iesu a lö e Ierusalema ngöne lo hneijine cia dröne la itre isinöe, lo macatre 33 M.K., nyidrëti a qaja, ka hape: “Traqa ha la ijine atrune la Nekö i ate.” (Ioane 12:23) Ngacama atre hnyawa hi Iesu laka, calemi hë la ijine tro nyidrëti a mec, ngo thaa celë kö la mekune ka tru hnei nyidrëti hna amë panën, ene la sipu kepine matre nyidrëti a catre huliwa. Nyidrëti pe a wanga atrune la nöjei ijine ka ijij matre troa kuca la aja ne la Tretretro i nyidrë, me amamane la ihnimi nyidrë kowe la nöjei atr asë. Celë hi lai ihnim ka upi nyidrë troa icasinekeune me inine la itretre dreng, me upi angatre troa cainöj. Iesu a ujë tune lai, ke, tro pë hë angatr a sisedrëne la huliwa hnei nyidrëti hna nyiqaane hë, nge atraqatre catre kö la itre ewekë hnei angatre hna troa kuca.—E jë la Ioane 14:12.
7, 8. Tune kaa la aqane ujë ne la itretre dreng ngöne lo Iesu a ahmitrötrëne la ēnē, nge pine nemen matre hnei Iesu hna ujë tune lai?
7 Hetrenyi la ketre ewekë ngöne la mele i Iesu ka amamane laka, eje thei nyidrë la aja atraqatr. Kolo ijine Iesu petre hi a nyiqaane la huliwa ne cainöje i nyidrë, ngöne lo hneijine ne la Paseka ne lo macatre 30 M.K. Kola lö e Ierusalema hnei Iesu memine la itretre drei nyidrë, ame hnei angatre hna öhne hnine la ēnē “la nöjei ate kola itö bolok, me mamoe, me piny; me nöjei ate itö mani kola ilapany.” Nemene la aqane ujë i Iesu, nge nemene la thangane lai thene la itretre drei nyidrë?—E jë la Ioane 2:13-17.
8 Ame la hna kuca me qaja hnei Iesu ngöne la ijine cili, tre, kola amekunëne la itretre drenge lo trenge ewekë hna perofetan hnei Davita ngöne la ketre salamo, kola hape: “Ase hë ulumi ni hnene la aja atraqate kowe la ēnē.” (Sal. 69:9) Pine nemene lai? Pine laka Iesu a troa icilekeu memine la itretre huuj, me itretre cinyihan, me itre xane ju kö, ene lo itre ka upe la itre atr troa salem e hnine la ēnē. Ame la Iesu a qaja amamane me nyi ejolene la itre mekune i angatr, tre, nyidrëti hi lai a thipetrije la aqane hmi angatr ekö. Ka meköti la aqane mekune ne la itretre dreng, nge mama hnyawa hi laka eje thei nyidrë la “aja atraqate kowe la ēnē” maine pena kowe la nyipi hmi. Ngo nemene la aja atraqatr? Hapeu, isapengöne kö lai memine la troa kuca la ketre huliwa ka nyimenyim?
Kola Aceitunëne La Enyimenyimen La Ketre Ewekë Memine La Aja Atraqatr
9. Troa qeje pengöne tune kaa la aja atraqatr?
9 Ka ihmeku hnyawa la hnëewekë, hna hape “aja atraqat” memine la aqane xome Iesu la huliwa ne cainöje i nyidrë. Haawe, thaa sesëkötre kö së laka, hnene la itretre dreng hna mekune hmaca lo trenge ewekë i Davita, ngöne la angatr a goeëne la aqane ujë i Iesu e hnine la ēnē. Ngo nemene la ka aciane thei Iesu la aja atraqatr, ene pe upi nyidrëti jë hi troa ujë tune lai?
10. Nemene la “aja atraqate” hna xome e hnine la Tusi Hmitrötr?
10 Ame la hnëewekë “aja atraqat” hna qaja hnei Davita, tre, ej a xulu qa ngöne la ketre hnëewekë qene Heberu. Sisitria la aliene la hnëewekë cili ngöne la eje a mama ngöne la itre xötre ka nyimutre ne la Tusi Hmitrötr. (E jë la Esodo 20:5; 34:14; Iosua 24:19.) Kolo fe a qeje pengöne la hnëewekë cili ngöne la ketre diksioner, ka hape: “Hna xome e itre xaa ijin la hnëewekë cili ngöne la faipoipo . . . Kola tune la aqane isaxolo ne la lue trefën, laka, meköti e tro la ketre a saxolo ketre, haawe, tui Akötresie, laka, meköti e tro Nyidrëti a thele thene la itre atre i Nyidrë troa thili koi Nyidrë.” Haawe, ame la aja atraqatr hna qaja e hnine la Tusi Hmitrötr, tre, thaa ene kö la trenge aja së kowe la ketre ewekë; ka tune la aja ne la itre atr ka hni kowe la ketre elo. Ame la aja atraqatre i Davita, tre, ceitu me angeic a saxolone la ëje ka lolo wanga adrone jë maine jelengazone jë pena.
11. Nemene la ka upi Iesu troa kuca la hnei nyidrëti hna atrein cememine la aja atraqatr?
11 Nyipici, thaa tria ju kö la aqane iothekeune hnene la itretre dreng, la itre hnëewekë cili memine la aqane ujë i Iesu hnine la ēnē, ke, itre ej a eatrëne lo trenge ewekë i Davita. Thaa hnei Iesu kö hna kuca la hnei nyidrëti hna atrein, hnene laka hetrenyi la ketre drai hna sa thatraqane la huliwa i nyidrë, ngo hnene pe laka, atraqatre la aja i nyidrë maine pena nyidrëti a wesitre pine la ëje ne la Tretretro i nyidrë memine la hmi ka wië. Ame la nyidrëti a öhne laka kola adrone me jele ngazone la ëje i Akötresie, tre, atraqatre la aja i nyidrë troa canga amekötine lai. Ame la Iesu a öhne la aqane axösisine me qana angazone la itre atr ka hni ka ipië hnene la itre hene hmi, tre, hnene la aja atraqatr ka eje thei nyidrë hna upi nyidrë troa akeukawane la hni angatr, me qaja amamane la aqane iaxösisi ne la itre hene hmi cili.—Mat. 9:36; 23:2, 4, 27, 28, 33.
Loi e Eje Thei Epuni La Aja Atraqatr Kowe La Nyipi Hmi
12, 13. Nemene la itre ewekë hna kuca enehila hnene la itre hene ne hmi ka uune, ka hape, itre keresiano angatr göne (a) la ëje i Akötresie? (b) me Baselaia i Akötresie?
12 Ceitune hi la itre aqane ujë me itre huliwa ne la itre hene ne hmi enehila memine lo itre hene ne hmi ne lo hneijine i Iesu; ngo jole catre kö ngöne la hneijine së. Drei la ketre ceitun, mekune hi së lo laka, ame la pane ewekë hnei Iesu hna inine la itretre drei nyidrë troa thithi fë, tre, ene la ëje i Akötresie; öni nyidrëti, ka hape: “Jiniati e hmitöte la atesiwa i enëtilai.” (Mat. 6:9) Hapeu, hne së fe kö hna öhne la itre hene ne hmi, ene hi lo itre ka uune fë, ka hape, itre Keresiano angatr, a hane inine la itre atr troa atre Akötresie jëne la ëje i Nyidrë, me hane ahmitrötrëne ej, maine atrune eje pena? Ohea, hnei angatre pe hna sili trenga thoi Akötresie hna jëne la itre ini ka thoi, tune la Trinité memine la hna hape, thaa ka meci kö la u, nge hetre ifereno; itre ini lai ka jele ngazo Akötresie, ene pe nyimutre la itre ka mekune, ka hape, ka iaxösisi Nyidrë nge ka madrine Nyidrë troa akötrëne la itre atr. Kolo mina fe a jele ngazo Akötresie hnene la aqane ujë ka sis me aqane hmi thoi ne la itre hene ne hmi cili. (E jë la Roma 2:21-24.) Ketre, hnei angatre hna kuca la nöjei ewekë matre troa köletrije la sipu ëje i Akötresie, maine saze pena ngöne la itre Tusi Hmitrötre i angatr. Qa ngöne lai, hnei angatre hna sawa la itre atr ka nyimutre troa easenyi catre koi Akötresie, me hane eköthe la ketre aqane imelekeu ka lolo me Nyidrë.—Iako. 4:7.
13 Hnei Iesu mina fe hna inine la itretre drei nyidrë troa thithi thatraqane la Baselaia i Akötresie, kola hape: “Jiniati e hlepëtipi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai.” (Mat. 6:10) Ngacama kola amexeje pala hi la thithi celë hnene la itre hene la itre hmi ka thoi, ngo ame ngöne la ketre götran, angatre a ithuecatre kowe la itre atr troa sajuëne la kuci politik memine la itre xaa musi atr. Ketre, angatr a thaipiëne la itre atr ka catre cainöj me ka anyipicine la Baselaia cili. Ame la pune lai, ame thene la itre atr ka uune fë, ka hape, itre Keresiano angatr, tre, methi angatre troa ithanatane la Baselaia i Akötresie, me lapaune kowe ej.
14. Hnene la itre hene ne hmi hna wangacone tune kaa la Wesi Ula i Akötresie?
14 Hnei Iesu hna qaja hnyawa ngöne la nyidrëti a thithi koi Akötresie, ka hape: “Wesi Ula i cilie la nyipici.” (Ioane 17:17) Qëmekene tro nyidrëti a elë hnengödrai eë, hnei Iesu hna qaja, ka hape, tro nyidrëti a acile la ketre “hlue ka nyipici me ka inamacan” matre troa hamëne kowe la nöje i Nyidrë la göxeni ne la ua. (Mat. 24:45) Ngacama kolo pala hi a uune fë hnene la itre hene la itre hmi ka thoi, laka, angatre a inine la itre atr la Wesi Ula i Akötresie, ngo hapeu, angatre kö a eatrëne hnyawa la huliwa hna ahnithe koi angatre hnene la Maseta? Ohea. Angatre pe a qaja, ka hape, ame la itre hna cinyihane hnine la Tusi Hmitrötr, tre, itre ifejicatre. Thaa angatre kö a thawa la göxeni ne la ua kowe la itre mamoe, me thue keukawa me madrine koi nyudren, ngo kolo pe a atiqane la itre mekune i angatr hnene la itre ini hna eköthe hnei atr. Ketre, hnei angatre hna wangacone la itre trepene meköti Akötresie me nyihnane itre ej hnene la itre sipu trepene meköti angatre kö.—2 Tim. 4:3, 4.
15. Tune kaa la mekuna i epuni göne la nöjei ewekë hna kuca ngöne la ëje i Akötresie hnene la itre hene ne la itre hmi ka thoi?
15 Pine laka nyimutre la itre atr ka mekune laka, hna kuca la nöjei ewekë cili ngöne la ëje ne la Akötresieti ne la Tusi Hmitrötr, ene pe thaa pi hmi hë angatr, maine pena thaa lapaune hë angatr koi Akötresie me kowe la Tusi Hmitrötr. Kei hë angatr ngöne la hnö i Satana memine la fene i angeic ka ngazo. Nemene la mekuna i epun ngöne la epuni a goeëne me dreng la itre ewekë cili ka traqa ngöne la nöjei drai? Pine laka ketre hlue i Iehova epun, ame la epuni a öhne la kola adrone me sili thoi ne la ëje i Akötresie, hapeu, thaa kolo kö lai a upi epun troa canga pi qaja la trenge ka meköt? Ame la epuni a öhne la kola iaöne me thahluëne la itre atr ka hni ka meköt, tre, thaa kolo kö lai a uku epuni troa akeukawane la hni ne la itre atr cili ka akötr? Ame la Iesu a öhne la itre atr ne la hneijine i nyidrë, tre, “kucakuca ha angat, me isa ije hë, tune la nöjei mamoe ka pa ate thupën” thaa hnei nyidrëti hmekuje kö hna utipi angatr. Ngo hnei nyidrëti “hna qane troa ini angate la nöjei ewekë ka nyimute.” (Mat. 9:36; Mar. 6:34) Tui Iesu, nyimutre la itre kepin ka tru ka upi së troa eje e kuhu hni së la aja atraqatre kowe la nyipi hmi.
16, 17. (a) Nemene la ka upi së troa catre xome la huliwa ne cainöj? (b) Nemene la hne së hna troa ce wange ngöne la hna cinyihane ka troa xulu?
16 Ame la easa goeëne tune lai la huliwa ne cainöje së, tre, kola sisitria koi së la trenge ewekë i Paulo ngöne 1 Timoteo 2:3, 4. (E jë.) Thaa easë hmekuje kö a catre cainöj hnene laka easa melëne la itre drai tixenuë, ngo hnene laka atre hnyawa hi së laka, aja i Akötresie tro la nöjei atr asë a hetrenyi la nyipi atrehmekun, matre tro angatr a hmi me nyihluei Nyidrë, me hane kapa fe la itre manathithi ka tru. Thaa easë hmekuje kö a catre xome la huliwa ne cainöj hnene laka nyimenyime catre la itre drai, ngo hnene fe laka easa ajane troa atrune la atresiwa i Akötresie, me xatuane la itre atr troa atre la aja i Nyidrë. Eje the së la aja atraqatr kowe la nyipi hmi.—1 Tim. 4:16.
17 Pine laka itre atrene la nöje i Iehova së, haawe, hetrenyi hë së la manathithi ka tru troa atre la nyipici göne la aja i Akötresie kowe la nöjei atr asë me kowe la ihnadro. Eje the së la itre jia ne huliwa ka troa xatuane la itre atr troa hetrenyi la ketre mele ka lolo, me ketre mejiune ka catr thatraqane la itre drai elany. Loi e tro sa amamane koi angatr la aqane troa amele angatr elany, ngöne la kola troa lepe apaatrene la fene i Satana. (2 Thes. 1:7-9) Thaa tro kö sa wesitr, maine kucakuca pena hnene laka hmitre pala ha la drai Iehova, ngo loi pe tro sa madrin, ke, hetre ijine tro pala kö sa amamane la aja atraqatre the së kowe la nyipi hmi. (Mika 7:7; Hab. 2:3) Tro sa akökötrene tune kaa the së la aja atraqatre cili? Tro pë hë sa ce wange lai ngöne la hna cinyihane ka troa xulu.
Ijiji Nyipunieti Kö Troa Qeje Pengön?
• Nemene la ka upi Iesu troa catre xome pala hi la huliwa ne cainöj?
• Nemene la aliene la “aja atraqate” e hnine la Tusi Hmitrötr?
• Nemene la hne së hna öhne enehila nge ka upi së troa amamane la aja atraqatre the së kowe la nyipi hmi?