Troa Xome La Ita Ne Thup Celë e 07 Febuare Me Wiike Cili
Nyima 96 Me 98
“Enehila La Ijine Kapa”
“Hana wang, enehila la ijine kapa, nge hana wang, enehila la drai ne mel!”—2 KOR. 6:2.
1. Pine nemene matre nyipi ewekë tro sa atrehmekune la nyine troa kuca ngöne la ketre ijine hna sa?
“HETE pui ne la nöjei ewekë asë, nge hete ijine la nöjei huliwa asë fene la hnengödrai.” (Ate cai. 3:1) Hnei Solomona hna cinyihane la enyipiewekëne la troa atrehmekune la ijine ka ijij troa kuca la ketre huliwa ka hetre thangane ka loi, ene la troa eëny, maine ngenu maine thele mani, maine porotrike pena memine la itre xan. Ngo nyipi ewekë mina fe tro sa atrehmekune la huliwa ka sisitria catr, nge nyine tro sa kuca ngöne la ketre ijine hna sa. Nyipi ewekë troa mama hnyawa koi së la itre ewekë nyine tro sa amë panën.
2. Nemene la ka amamane laka, ame ngöne la Iesu a cainöj, tre, atrehmekune hnyawa hi nyidrë la enyipiewekëne la hneijine hnei nyidrëti hna melën?
2 Ame ngöne lo Iesu e celë fen, atrehmekune hnyawa hi nyidrë la enyipiewekëne la hneijine hnei nyidrëti hna melën, memine la huliwa nyine tro nyidrëti a kuca. Pine laka mama cile hnyawa koi nyidrë la nyine tro nyidrëti a kuca panën, atre hi nyidrë laka easenyi catre hë matre eatre jë la itre hna perofetan göi Mesia, lo hna treqene ekö hnene la itre atr. (1 Pet. 1:11; Hna ama. 19:10) Hetrenyi la ketre huliwa nyine tro nyidrëti a kuca matre tro la itre atr a atrehmekune laka, nyidrëti hi lo Mesia hna thingehnaean ekö. Tro nyidrëti a cainöjëne la nyipici göne la Baselaia, me icasinekeune la itre ka troa ce musi me nyidrë ngöne la Baselaia. Nge tro mina fe nyidrëti a nyiqaane eköthe la ekalesia i Keresiano, ene lo ekalesia ka troa eatrëne la huliwa ne cainöje me inine la itre atr uti hë la itre cane la fene hnengödrai asë.—Mar. 1:15.
3. Ame la Iesu a atrehmekune hnyawa la enyimenyimene la itre drai, nemene hë la thangane lai koi nyidrë?
3 Hnene laka atrehmekune hnyawa hi Iesu la enyimenyimene la itre drai, ene pe ketre ewekë lai ka upi nyidrë troa catre kuca la aja ne la Tretretro i nyidrë. Hnei nyidrëti hna qaja kowe la itretre drei nyidrë, ka hape: “Atraqate la meledrai, ngo xalaithe hi la angete huliwa; qa ngöne lai thithijë nyipunie kowe la Joxu ne la meledrai, mate tro nyidëti a upe la angete troa huliwane la meledrai i nyidë.” (Luka 10:2; Mal. 4:5, 6) Hnei Iesu hna pane iëne la ala truelof, thupene lai ala 70 qa ngöne la itretre drei nyidrë, me hamëne koi angatre la itre ithuemacanyi ka ijij, me upi angatre troa cainöjëne la maca ka catrehnine catr, kola hape: “Eashenyi hë la baselaia ne hnengödrai.” Tune la hna kuca hnei Iesu, easa e ka hape: “Azeti hë [nyidrë] ahnithe kowe la angete dei nyidë ka ala luako, nyidëti a [tro jë qaa] lai troa ini me cainöje ngöne la ite lapa i angat.”—Mat. 10:5-7; 11:1; Luka 10:1.
4. Tune kaa la aqane nyitipu Iesu Keriso hnei Paulo?
4 Iesu la ketre tulu ka pexej, ene la troa hetrenyi la aja atraqatr, me nue la mele i nyidrë thatraqane la itretre drei nyidrëti asë. Celë hi la hnei Paulo aposetolo hna qaja atrun ngöne la angeic a xatuane la itre trejine me angeic, ka hape: “Nyitupu ni jë nyipunie, tunge koi Keriso.” (1 Kor. 11:1) Tune kaa la aqane nyitipu Keriso hnei Paulo? Ame la hnapan, hnei angeice hna kuca la hnei angeice hna atrein matre troa cainöjëne la maca ka loi. Ame hnine la itre tus hnei Paulo hna cinyihane kowe la itre ekalesia, easa öhne trongëne la itre hnëewekë celë, “the witi kö ngöne la huliwa,” “nyi hluenejë la Joxu,” “catejë troa huliwa i Joxu pala hi,” nge “ame la nöjei ewekë hnei nyipunie hna kuca, kuca hnine ju kösë koi Joxu.” (Rom. 12:11; 1 Kor. 15:58; Kol. 3:23) Thaa hnei Paulo kö hna thëthëhmine la aqane mama Iesu Keriso Joxu koi angeic ngöne la gojenyi ne tro Damaseko, memine la trenge ewekë hnei Iesu hna qaja kowe la atre drei nyidrë, ene Anania, ka hape: “Hna ië angeice nyine inegenge troa kapa trongëne la ëjenge kowe la nöjei ethen, me nöjei joxu, me ite nekö i Isaraela.”—Ite hu. 9:15; Rom. 1:1, 5; Gal. 1:16.
“Ijine Kapa”
5. Nemene la ka upi Paulo troa catre cainöj?
5 Ame la easa e la tusi Ite Huliwa, easa öhne hnyawa la aqane catre me aja atraqatre ka eje thei Paulo ngöne la angeic a cainöje trootro. (Ite hu. 13:9, 10; 17:16, 17; 18:5) Atrehmekune hnyawa hi Paulo la enyipiewekëne la hneijine hnei angeice hna melën. Öni angeice, ka hape: “Hana wang, enehila la ijine kapa, nge hana wang, enehila la drai ne mel.” (2 Kor. 6:2) Ame lo macatre 537 M.P.K., tre, celë hi lo ijine ka ijije kowe la itre ka po e Babulona troa bëeke hmaca kowe la nöje i angatr. (Is. 49:8, 9) Ngo nemene la hnei Paulo hna mekune ngöne la angeic a qaja lai hnëewekë cili? Tro la itre xaa xötr ne la Tusi Hmitrötr a xatua së troa atrehmekune la mekuna i angeic.
6, 7. Nemene la manathithi ka tru hna hamëne koi Paulo me itre Keresiano hna iën, ngöne lo hneijine i angeic me enehila mina fe, nge drei la ka ce huliwa memine la itre hna iën enehila?
6 Ame ngöne la qaane la tusi Paulo, hnei angeice hna qaja la ketre manathith ka tru hna hamën koi angeic, me kowe la itre trejine me angeice hna iën. (E jë la 2 Korinito 5:18-20.) Angeic a qeje pengöne laka hna hë angatr hnei Akötresie thatraqane la ketre huliwa ka ketre pengön, ene la troa eatrëne la “huliwa ne iloi,” me ielene la itre atr troa “iloi me Akötesie.” Kolo lai a hape troa eköthe hmaca la ketre aqane imelekeu ka lolo me Akötresie.
7 Qaane lo icilekeu e Edena, nanyi asë hë la itre atr qaathei Iehova. (Rom. 3:10, 23) Qa ngöne lai, thatre Nyidrëti hë me aja i Nyidrë hnene la nöjei atr asë, nge ame la pune koi angatr, tre, akötre me mec. Kola cinyihane hnei Paulo, ka hape: “Ate hë shë laka, kola awe, me thë la ite ewekë hna xup’ asë uti hë enehila.” (Rom. 8:22) Ngo hetrenyi la itre ewekë hnei Akötresie hna kuca matre troa “ielen,” la itre atr troa bëeke hmaca, maine troa iloi hmaca me Nyidrë. Celë hi lai huliwa hna ahnithe koi Paulo me itre trejine me angeic hna iën, ngöne lo hneijine i angatr. Ame lo la “ijine kapa cili,” tre, tro hë ej a ketre “drai ne mel” kowe la itre atr ka lapaune koi Iesu. Kola ce huliwa asë hnene la itre Keresiano hna iën memine la itre sine tronge i angatr, ene la “ite xa mamoe,” me catre könëne la itre atr troa hane kepe thangane la “ijine kapa.”—Ioane 10:16.
8. Nemene la ka asisitriane la aqane iloi Akötresie memine la itre atr?
8 Ame la ka asisitriane la aqane iloi Akötresie memine la itre atr, tre, ngacama itre atr la qaane la icilekeu e Edena, ngo Akötresieti hmaca kö la ka thele nyin la jole cili. (1 Ioane 4:10, 19) Nemene la hnei Nyidrëti hna kuca? Paulo a sa, ka hape: “Thei Keriso Akötesie ate ailoine la fene hnengödrai me anganyidë, tha kolo kö a amë la ite ngazo i angate koi angate kö, nge hna hamë huni la wesi ula ne iloi.”—2 Kor. 5:19; Is. 55:6.
9. Hnei Paulo hna amamane tune kaa la hni ne ole i angeice kowe la ihnimi ipitö i Akötresie?
9 Jëne la thupene mel, ijije hë tro Iehova a nue la ngazo ne la itre atr ka lapaune kowe ej, me aijijë angatre troa eköthe hmaca la ketre aqane imelekeu ka lolo me Nyidrë. Ketre, hnei Iehova hna upe la itre atre i Nyidrë matre troa xatuane la itre atr e cailo fen troa iloi hmaca me Nyidrë e ijine petre kö. (E jë la 1 Timoteo 2:3-6.) Hnene laka trotrohnine hnyawa hi Paulo la aja i Akötresie, nge atrehmekune fe angeice la enyipiewekëne la hneijine hnei angeice hna melën, ene pe thaa mano kö angeic troa catre ngöne la “huliwa ne iloi.” Thaa saze kö la aja i Iehova. Aja i Nyidrëti pala kö tro la nöjei atr ka ngazo a iloi hmaca me Nyidrë. Ka eje pala hi la trenge ewekë i Paulo, lo hna hape “enehila la ijine kapa,” nge “enehila la drai ne mel.” Drei la ketre Akötresie ka utipin me ka ihnimi ipitö, ene Iehova!—Eso. 34:6, 7.
The “Kapa Gufane Hnei Nyipunie La Ihnimi Gufa i Akötesie”
10. Nemene la aliene la “drai ne mel” kowe la itre Keresiano hna iën, ngöne lo hneijine ekö me enehila?
10 Ame la itre atr ka pane kepe thangane la hna iloi hmaca me Nyidrë, tre, ene lo itre “ate . . . thei Keriso.” (2 Kor. 5:17, 18) Ame koi angatr, hna nyiqaane la “drai ne mel” lo Penetekos 33 M.K. Qaane ju hi lai, hna ahnithe koi angatre la hnëqa celë, ene la troa qaja “la wesi ula ne iloi.” Ame enehila, kolo pala hi a eatrëne la “huliwa ne iloi” hnene la thelene la itre hna iën. Angatre a atrehmekune laka ame lo foa lao angela hna meköle goeëne hnei Ioane, tre, angatr a “xome la ek’ enyi ne la fene hnengödrai, mate tha tro kö a hnahna la enyi kowe la fen.” Haawe, ame enehila, tre, kolo petre kö lo “drai ne mel” me “ijine kapa.” (Hna ama. 7:1-3) Celë hi kepin matre thupene lo itre macatre 1900, kola catre xome la “huliwa ne iloi” e cailo fen asë hnene la thelene la itre hna iën.
11, 12. Tune kaa la aqane amamane la itre Keresiano hna iën laka, atrehmekune hnyawa hi angatre la enyipiewekëne la hneijine hnei angatre hna melën? (Wange ju la iatr ngöne la götrane 15.)
11 Drei la ketre ceitun, tune la hna qaja ngöne la itus Les Témoins de Jéhovah : Prédicateurs du Royaume de Dieu, thupene la itre macatre 1900, “ka xecie koi Russel me itre sine huliwa i angeic, laka angatre a melëne la hneijine menu, nge nyipi ewekë tro la itre atr a drenge la nyipici ka troa nue amacanyi angatr.” Nemene la hnei angatre hna kuca? Atrehmekune hnyawa hi la itre trejine cili laka, angatre a melëne la hneijine menu, nge “ijine kapa” hi lai. Thaa hnei angatre hmekuje kö hna könëne la itre atr troa hane ce hmi me angatr. Ewekë lai hna kuca ha hnene la itre hene ne hmi ka uune, ka hape, itre Keresiano angatr. Hnene pe lai itre Keresiano hna iëne hna nyiqaane xome la itre xaa jëne troa cainöjëne la maca ka loi. Hnei angatre mina fe hna huliwan inamacanëne la itre jia ne huliwa ka hnyipixe matre troa akökötrene la huliwa i angatr.
12 Hnene laka eje thene la itretre cainöje ka ala xalaithe hi la aja atraqatre troa cainöjëne la Baselaia, ene pe hnei angatre hna fejane la itre tarak, me itre boroshür, me itre zonal, me itre itus, ngacama itre atr ka thatreine angatr, nge thaa maca hnyawa kö ngöne la huliwa cili. Hnei angatre fe hna cinyihane la itre cainöj me itre tus; hna fejane itre ej hnine la itre zonal ka nyimutre, nge thupene lai kola isa thawa itre ej kowe la nöjei atr. Hnei angatre fe hna hane ce thawa la itre mekune cili jëne la itre ipoos ka ithuemacanyi kowe la nöj me e cailo fene mina fe. Ngacama thaa traqa pala kö lo sinema, ngo kolo fe ha kuca hnei sasaiatri lo lai ketre ewekë hna hape peleihaus, laka itre iatr a mama trootro nge kola qejepengöne trongëne itre ej. Nemene la thangane lai aja atraqatre cili? Ame enehila, kola e la sevene milio lao atr ka kapa la maca ka loi me hane cainöjën: “Troa iloi me Akötesie.” Eje hi laka, ame la itre pane hlue i Iehova cili, tre itre tulu lai koi së ka amamane la aja atraqatre ka eje thei angatr, ngacama thaa ala nyimu kö angatr nge thaa maca hnyawa kö.
13. Nemene la aja i Akötresie nyine tro sa wanga atrun?
13 Ka eje pala hi la hnaewekë i Paulo, lo hna hape “enehila la ijine kapa.” Hne së hna kepe thangane la ihnimi gufa i Iehova, nge atraqatre la hni ne ole së laka hna aijijë së troa drenge me kapa la maca ne iloi. Thaa tro kö sa mekune laka ka lolo hi la mele së, ngo tro pe sa wanga atrune la trenge ewekë i Paulo, kola hape: “Eëhuni angete ce huliwa me nyidë a iele nyipunie wanga kapa gufane hnei nyipunie la ihnimi gufa i Akötesie.” (2 Kor. 6:1) Ame la aja i Akötresie, tre ene la troa ‘ailoine la fene hnengödrai me anganyidë’ jëne Keriso.—2 Kor. 5:19.
14. Nemene la hna aijijë së troa kuca ngöne la itre nöj ka nyimutre?
14 Ala nyimu pala kö la itre atr hna atimekëne hnei Satana; ka iananyi petre kö angatr me Akötresie, nge thatre fe kö angatr la aja i Nyidrë. (2 Kor. 4:3, 4; 1 Ioane 5:19) Ngo hnene laka tro ngazo catre la mele e celë fen, ene pe nyimutre la itre atr ka trotrohnine laka, ame la kola akötr me iangazo la itre atr, tre, hnene la hnei angatr hna iananyi me Akötresie. Ame mina fe ekö ngöne la itre xaa nöj, tre, nyimutre la itre atr ka thaa semesine së ngöne la easa cainöje trootro, ngo ame hë enehila, ala nyimu hë la itre ka kapa la maca ka loi me catre iloi hmaca me Akötresie. Haawe, hapeu trotrohnine hi së laka, ijine hi la koi së troa catre qaja me ielene la itre atr, “troa iloi me Akötesie”?
15. Maine nyipici laka easa cainöje matre tro la itre a hane ahmaloeëne la mele i angatr, ngo nemene la hne së hna ajan catrën tro angatr a hane atre hnyawa?
15 Ame la hnëqa së, tre, thaa ene hmekuje kö la troa qaja kowe la itre atr, ka hape, maine tro angatr a thele ixatua thei Akötresie, tre, tro Nyidrëti a xatua angatr ngöne la nöjei jole ka eje thei angatr, nge tro ha lolo la mele i angatr. Ala nyimu la itre ka thele lai ngöne la angatr a tro kowe la uma ne hmi, nge itre hmi a thele troa eatrëne la aja i angatr ngöne la götrane la ngönetrei matre troa huli angatre kowe la itre uma ne hmi angatr. (2 Tim. 4:3, 4) Ngo thaa celë kö la aliene la huliwa ne cainöje së. Ame la maca ka loi hne së hna tro fë, tre, celë hi hatrene la ihnimi Iehova lai, nge kola amamane hnyawa la aja ka eje thei Nyidrë troa nuetrije la itre ngazo së jëne Keriso. Haawe, ijije hi kowe la itre atr troa easenyi koi Akötresie me iloi hmaca me Nyidrë. (Rom. 5:10; 8:32) Ngo easenyi catre hë matre nyipune pi “la ijine kapa.”
“Catejë La Hni”
16. Nemene la ka xatua Paulo troa catre me hetrenyi thei angeice la aja atraqatr?
16 Nemene la nyine tro sa kuca matre troa akökötrene pala hi the së la aja atraqatre kowe la hmi ka wië? Ame itre xaa atr, tre, ka lapa pe hi angatr nge jole koi angatr troa fe amamane la aliene hni angatr. Ngo thaa tro pi kö sa thëthëhmine laka, ame la aja atraqatr, tre, thaa kolo hmekuje kö a qaja la itre aliene hni së, me madrine së troa xome la huliwa; ketre, thaa easë kö a catr hnene laka pengö së kö eje kö ngöne la thiina ne la ketre atr. Hnei Paulo hna qaja atrune la aqane troa eatrëne lai, ngöne la angeic a ithuecatre kowe la itre trejine me angeic Keresiano, ka hape: “Catejë la hni.” (Rom. 12:11) Hnene la mene ne la ua i Iehova, ene pe kola catre cainöj me cile huti hnei ange aposetolo ngöne la huliwa ne cainöj. Qaane la kola mama hnei Iesu koi Paulo uti hë la ijine akalabusi angeic me meci e Roma, laka, 30 lao macatre la eqean, tre, thaa hna nanazije pi kö la aja atraqatr thei angeic. Hnei angeice pala hi hna mejiune koi Akötresie lo Atre hamë angeice la trenge catre ka ijije jëne la ua. Öni angeice, ka hape: “Ateine ni troa kuca la nöjei ewekë asëjëihë hnei nyidëti ate aegöcatenyi ni.” (Fil. 4:13) Drei la ketre manathithi hne së hna troa kapa, e hne së hna thele troa atrepengöne hnyawa la tulu i angeic!
17. Nemene la nyine tro sa kuca matre “catejë la hni” së?
17 Ame la hnëewekë qene Heleni hna xome hnei Paulo ngöne Roma 12:11, tre, kola hape, “boel.” Maine easa ajane tro pala hi a idreuthi la timi hne së hna boelëne hë, tre nyipi ewekë troa ipicone lapaan la eë. Ketre tune mina fe, maine easa ajane tro pala hi a “cate la hni” së, tre, nyipi ewekë tro pala hi a hetre thangane koi së la ua i Akötresie. Ame la ketre jëne troa kapa la ua, tre, ene la troa eatrëne la itre hna amekötine hnei Iehova matre troa acatrenyi së ngöne la ua. Kolo lai a hape, loi e tro sa wanga atrune la hmi së e hnine la hnepe lapa me e hnine la ekalesia, ene la troa catre isa ini tus, me ini tusi fe memine la hnepe lapa, me thith, me icasikeu memine la itre trejine me easë, itre Keresiano. Tro la itre hna amekötine cili a xatua së tro pala hi sa “cat,” tune la eë hna ipicone matre tro pala hi a boele la tim.—E jë la Ite Huliwa 4:20; 18:5.
18. Ame easë itre Keresiano ka sa xepu hë, nemene la aja nyine tro sa thele troa eatrën?
18 Ame la atr ka sa xepu hë, tre, casi hi la aja hnei angeice hna thele troa traqa kow, nge pëkö ewekë ka troa canga ajeanyi angeic qa ngön, maine ajolë angeice pena troa eatrën. Ame la aja së, easë itre Keresiano ka sa xepu hë nge ka nue hë la mele së koi Iehova, tre, ene la troa kuca asë la hnei Iehova hna ajan tro sa kuca, tune lo hna kuca ha ekö hnei Iesu. (Heb. 10:7) Ame enehila, aja i Iehova tro la itre atr ka ala nyimu a iloi hmaca me Nyidrë. Qa ngöne lai, loi e tro sa tui Iesu me Paulo, ene la troa nyimenyim me catre eatrëne la hnëqa ka sisitria celë ngöne la hneijine së enehila.
Mekune Pala Kö Nyipunie?
• Nemene lo “huliwa ne iloi” hna ahnithe koi Paulo memine lo itre xaa Keresiano hna iën?
• Tune kaa la aqane huliwane hnyawane la “ijine kapa” hnene la thelene la itre hna iën?
• Nemene la nyine tro la itre Keresiano a kuca matre “catejë la hni” angatr?