“Inine Jë . . . La Nöjei Ewekë Asëjëihë Lo Hnenge Hna Ahnithe Koi Nyipunie”
1 Troa itretre drenge la itre atr, e hna ini angatr. Qëmekene la tro la ketre atr a hane atre drei Keriso ke, loi e tro angeic’a pane inine troa “trongëne la nöjei ewekë” hnei Iesu hna ahnith (Mat. 28:19, 20). Nyipi ewekë troa kuca tune lai ngöne la troa ini Tusi Hmitrötre ngöne la ketre hnalapa.
2 Eje hi laka tha hmaloi kö troa nyiqaane troa ini Tusi Hmitrötr. Maine nango jole koi epuni troa hetre hna inin, ke the kucakuca kö. Ngo loi e troa aja atraqatre me saaqe troa amamane la nyipici kowe la nöjei atr, matre nyiqaane pe troa inine la Tusi Hmitrötr. — Gal. 6:9.
3 Loi e kökötre lai aja: Eje hi laka, coco petre kö la ajaane la atr ngöne la xötrei ithahnata. Qanyine kö lai itre ewekë hne së hna hamë angeic; maine tarak, maine boroshür, maine itre zonale pena. Atreine hi troa huliwaane itr’ej, matre nyiqaane pe troa inine la Tusi Hmitrötr. E öhne së laka hetre aja palahi troa drenge lo ithuemacany, ke amamane ju pe ketre itusi ka ijij, ngöne la epuni hmaca a bëeke troa iwai.
4 Troa tro loi lai, e hne së hna hnëkë hnyawa. Hnauëne laka tha pane wange hnyawa kö lai ketre mekene tus, ngöne lai tarak, maine boroshür, maine zonal, me xome troa ithahnataane la epuni a bëeke troa iwai hmaca? Celë hi matre kola xome fe la itre xa mekune qa hnine lai itusi me ce ithahnataan. E jë fe la cas, maine lue paragarafe qa hnine lai itus.
5 Ma öni epuni jë hi:
◼ “Eahuni a troa ithahnataane la itre hnepe mekune ngöne lo hna perofetaane ka traqa koi së enehila.” E jë hë la Mataio 24:3, nge ce wange ju la itre mekune ngöne la götrane 24 ne la boroshür “Voici”. Maine epuni a troa amamane lo tarak “Le monde actuel survivra-t-il?” ke ceitune hi la aqane troa kuca.
6 Loi e canga xatuane palahi hne së la aja ne la itre atr ka drei së. Tupathe jë troa bëeke ju fe kö ngöne lai wiike cili, matre traqa easë nge, tha thëthëmine kö angeice lo lai hne së hna ithahnataan. Mekune kö troa ce wange hnyawa palahi la ketre hnepe paragarafe qa hnine la itusi hnei epuni hna amë pe, thupene lai ke, ngöne la ketre ijine ka ijij, amamane jë fe lai itus “Vivre éternellement”, me xötrethenge jë lo lai aqane troa amamane me qeje pengön.
7 Ame enehila ke tru catre pala kö la huliwa, ene la troa menuën, tune la aqane qaja hnei Iesu (Mat. 9:37, 38). Eje hi laka maine ajane palahi së troa ini Tusi Hmitrötre kowe la nöjei atr asë, ke tro së a hetrenyi la mejiun, laka tro Iesu a xatua së pine laka, Nyidrëti a ceme easë ngöne la nöjei drai asëjëihë, utihë la pune la fene hnengödrai.