Hapeu, Huliwa Catre Kö Së Troa Atrunyi Iehova?

¹ Ketre hnyinge lai jëne mel, nyine tro së a wangatrun. Nge pine laka easë a hni me xötre thenge la joxu së ene Iesu Keriso, nyipi ewekë tro së a metrotrëne la Akötresi së enehila, ene la troa qaja amamane la atresiwa i Nyidrë. Ketre hnëqa lai nyine tro së a goeënatrun, matre ijije së troa hetrenyi la manathithi qa thei Akötresie (Mar. 13:10; Luka 4:18; Itre Hu. 4:20; Heb. 13:15). Eje hi laka, ketre hnëqa lai ka sisitria hna nue koi së hnei Iehova, matre tro së a trofë palahi la Maca ka Loi kowe la nöjei “mamoe” ka patr, itre ka troa hane mele hnine la hna axö i Iehova! — Ioane 10:16.

² Hapeue fe epuni me itre neköi epun, göne la cainöje trotro, amamane kö epuni ka hape, epuni a atrunyi Iehova? Ngöne la fene hnengödrai ke, alanyimu la itre trejine ka xome la huliwa ne troa pionie. Ngöne la treu eiperem 1992 ke, hna e la 227 lao pionie e Kaledonia, pionie ka ixatua, pionie lapa, maine pionie ka cile hut. Hapeu, hane kö epuni mekune e kuhu itre hni epuni troa pionie? Tuneka, epuni kö a xatuane la itre neköi epuni troa trongëne la huliwa ka sisitria kowe la mele i angatr, ene la troa huliwa hut?

³ Hnauëne matre tha fe kö epuni la itre hni epuni thatraqane la huliwa ne pionie? Ngöne la ijine kola ithahnatane la ewekë cili, nemene la mekune ka eje thei epun? Hapeu, canga öni epuni ju hi ka hape, tha ijiji epuni fe kö troa hane pionie? Nyipici laka tha ijiji easë asë kö troa pionie, pine laka hnene la itre hnëqa ngöne la Ekalesia me itre xa jole pena (1 Tim. 5:⁠8). Ngo loi e tro së a isa hnyinge ka hape: hane kö ni pane thithi fë la mekune cili? Hapeu, hane kö epuni ce ithahnatane e kuhu hnalapa, me ce wange matre tro la ketre a xome la huliwa ne pionie? hnene la “Tour de Garde” ne lo 15 febuare 1983 qa thei Sasaiatri, hna hamëne la ketre mekune nyine ketr la hni së, kola hape ngöne la götrane 23: “Nyipici laka, loi e tro la nöjei hlue i Keriso a thelejëne ngöne la thithi ka hape: ijije hi maine tha ijije pena kö tro angeic’a hane pionie. Nge hnene la lue trefëne qa ngöne la götrane e Afrika, lue ka pionie thupene la fifitrine hë lao macatre, hna qaja ka hape: “Pine nemene laka nyiho a pionie? Hetre nyipi kepine kö nyine troa qaja koi Akötresie e tha xome kö nyiho la hnëqa cili?’ Eje hi laka, loi e tro la itre hlue i Iehova ka tha pionie kö, a isa hnyinge ka hape: ‘Maine tha ka hane kö ni pionie, ke, nemene la sipu kepine tro ni a qaja koi Akötresie?’ ”

⁴ Hna cinyihane ngöne la “Tour de Garde” ka ithahnatane palahi lai mekune ka casi cili ka hape: “Loi e tro së a nyipici. Nyipunie a qaja ka hape: ‘Ajane la hni ngo kucakuca la ngönetrei.’ Ngo hapeu, nyipici kö laka, ka ajane hnyawa la hni? Hawe, loi e tro së a lepe trije kö la hna majemine troa nyi petrengëne la kucakuca ne la ngönetrei.” — w78 15/11 p. 21.

⁵ Itre keme me thine ka ajane tro la itre neköi angatre a manathith: Kola anyipicine hnei Itre Edomë 15:20 ka hape: “Atre amadri keme la kuku ka inamacan.” Madrin’atraqatre la itre keme me thine ka qoue Akötresie, e tro la itre neköi angatr’a nyi hlue i Iehova ngöne la mele i angatr. Ngo eje hi laka, thatreine kö tro la itre neköne a kapa ju hi lai mekune cili, pine laka catre la itre aja ne la fen. Celë hi matre, loi e tro nyipunie itre keme me thine a amamai tulu, me köjane palahi la gojenyi ka loi koi angatr. Ithahnataane jë me angatre la itre eloine la troa huliwa hut, nge maine hnei epuni hna xatuane la itre neköi epuni troa ce tro memine la itre pionie, nge ketre mina, maine xecie hnyawa ha e kuhu itre hni epuni laka, ame la huliwa huti ke sipu huliwa hi lai ka sisitria nyine tro angatr’a xom, eje hi laka, aqane tro hi lai a amamai gojenyi kowe la itre neköi epun. Xatua angatre jë troa trotrohnine hnyawa laka, nyipi ewekë troa hlemu loi koi Iehova, hune la troa hlemu koi atr.

⁶ Thöthi fe, Itre Edomë 22:1 a amë qëmeke i ö la nyine tro eö a iën, kola hape: “loi e troa ajane la hlemu loi, hune la itre mo ka nyimutre, memine la ihnimi hune la sileva me gol.” Nemene pengöne ëje la hnei epuni hna troa iën? Mekune ju la itre trahmanyi me itre föe hna qaja hnei Tusi Hmitrötr, itre ka hlemu koi Akötresie hnene laka, hnei angatre hna nyi hlue i Iehova utihë la mec: Tui Luka, lo droketre hnimina, maine Enoka atre ce tro me Akötresie. Hnei Samuela hna kapa la itre hna ini ka sisitria, pine laka ngöne la angeic’a thöthi ke hna huliwa hnine la ene i Iehova. Hapeu, ietrane kö angatre la aqane ujë cili? Nemene kepin matre tha ietrane kö angatr? Pine laka atraqatre la madrine i angatre troa huliwa tune lai. Qa ngöne lai, ase hë Iehova amanathithi angatre epine palua! — Sal. 110:3; 148:​12, 13; Itre Edomë 20:29a; 1 Tim. 4:8b.

⁷ Kola madrin’atraqatre la itre keme me thin, pine laka, loi la melene la itre neköi angatr. Hna nyi june la huliwa i angatre pine laka, hnei angatre hna inin, me hajin, me xatuane la “Edrö qa thei Iehova” (Sal. 127:3). Ketre ewekë ka sisitria kowe la itre keme me thin, e tro la ketre neköi angatre trahmany, maine jajiny, a atrunyi Iehova me huliwa koi Nyidrë. Ngöne la hne drai së, ke, alanyimu catre la itre thöthi ka xötrethenge la itre thupaca i Luka, me Enoka, me Samuela, tune la aqane amama i së ngöne la ketre tusi celë kola hape: “16 petre hi lao macatreng. Nge eni fe hë a pionie lapa ... nge eni a wange enehila laka, qaane lo ijine eni a xomi bapataiso, kösë naene hë lao treu, nge hnei Iehova palahi a amanathithi ni. Eje hi laka, ame fe la troa pionie ke, ketre ixatua atraqatre koi itre ka ini. Ame lo xötrei, ke, kolo palahi a hnyimasai ni hnene la itre sine ining, hnene laka, atre nyi hlue i Iehova ni. Ngo hnene laka catre ni ini Tusi Hmitrötr, enehila atreine hë ni ‘sa kowe la atre qaja angazo ni.’ ”

⁸ Ini ka ijije fe göi Huliwa ne Baselaia: Loi e tro fe së enehila a wai pengöne fe la ini mus. Troa hetre wangatrehmekune ngöne la götrane cili. Ngöne la “Tour de Garde” ne waane nofeba 1992, ke hna cinyihane la “aliene la ini”. Hna qaja ngöne la ketre meken: “Ini ka ijij” ka hape: “Tro la itre keresiano a atreine troa, isa xeni qa ngöne la isa wenezihnu ngacama angatr’a pionie, ene la kola cainöje trootro ngöne la drai asë (2 Thes. 3:10-12). Troa hmaca eka la hna ini hnene la keresiano thöthi matre, tro angeic’a kuca la hnëqa i angeice thenge la hna amekötine i Tusi Hmitrötr? (...) Kola hapeu la kola hape: ‘salaire correct’ (...) [kowe] la itre ka ajane troa nyihluëne hutine la Maca ka Loi? Hawe, tro la itre keresiano cili a, hetre hnepe huliwa, matre tha tro kö a ‘thue enefe ka hace’ kowe la itre trejine, maine itre lapa i angatr (1 Thes. 2:9).”

⁹ Ame kowe la itre ka mekune troa pionie me ajane troa huliwa hut, ke, loi e tro angatr’a sisedrëne la itre ini angatr, celëhi matre, “Tour de Garde” ne waane nofeba 1992 a xatua angatre me hape: “Maine tro la keresiano thöthi a sisedrëne la itre ini angeic, ke, loi e tro angeic’a lapa kö thei keme me thine i angeic, maine ijij. Celë hi matre, ijiji angeice troa lapafë palahi la itre thina ne la atr ka hmi, maine ngöne la kola ini tusi cas, maine icasikeu, maine cainöje trootro.”

¹⁰ Tro së a ce wange la aqane ujëne la ketre thöthi qa “Afrique”. 22 lao macatre i angeic, kolo petre kö a ini, ngo hni hë kowe la huliwa ne pionie. Ngöne la ijine angeice petre kö a ini, ke, angeice fe hë a xome la huliwa ne pionie ka ixatua. Nge kola hnyimasai angeice hnene la itre sine ini angeic. Angatr’a qaja ka hape, tro angeic’a atriane la itre itupathi angeic. Ngo angeic’a sa palahi koi angatre ka hape: “Pane thele jë pe la Baselaia i Akötresie, me thina ka meköti Anganyidrë.” Nge ngöne laka, catre la aja i angeice troa hun, angeic’a canga hlë palahi e hmakanyi sine jidr, troa kuca la itre qa i angeice ngöne la lue hawa. Ame e hnaipajö hej, thupene la ini, angeic’a tro troa cainöje trootro. Celë hi matre, sesëkötre ju hi la “uma ne ini asë” laka naba 3 angeice ngöne la ketre itupathi hna hnëkëne, kowe la köni nekönatre ka huliwa hnyawa matre troa hetrenyi “la ixatua qathei mus”. Ame lai naba 2 ke ketre thöthi hi hna inine hnene lai pionie. Nge ame lai naba 1 ke ketre thöthi atre catre nyi hlue i Iehova.

¹¹ Hetre ixatua fe qathene lo itretre thup: Hna xatuane palahi la itre pionie, hnene la itre qatre ka madrine la, hna huliwa catre hnene lai itre hlue cili. Angatr’a tune lai, pine laka, atre hi angatre laka ame la itre pionie ka huliwa catre kowe la Baselaia, ke, ketre ixatua me manathithi lai kowe la ekalesia. Thupene la hna huliwa ngöne la ca macatre, ke, tro hë la itre pionie lapa, a hane sine la ketre ini ka ketre pengöne kö thatraqai itre pionie. Ketre hna hnëkëne lai ka sisitria, matre atreine huliwa hnyawa la itre pionie. Tha hnene kö laka, itre ka cilë mekene angatre la huliwa, ke tha aja ixatua hmaca fe kö angatr. Ohea. Tune la nöjei atre cainöje asë, hetre aja së asë hi troa hetre ixatua. Celë hi matre tro la itre qatr’a ce wange lai. — 1 Pet. 5:​1-3.

¹² Nemene la aqane tro la itre qatr’a kuca matre amë qëmeke së la huliwa ne pionie? Loi e troa nyiqaane elemekëne la itre atr ka ajane me thele troa pionie. Tro la itretre thup a ithahnatane memine la itretre cainöje ka ijiji troa pionie; itre ka lapa pionie ka ixatua, itre “ka fenesi hë hna huliwa”, itre föe ka tha huliwa kö me itre thöthi ka ini. Ngo tha tro kö a mekune hnene la ketre ka hape kola uku angeic, loi pe, ijije troa hamëne la itre hnepe ixatua, matre tro la itre ka mekune troa pionie, ngo nango luelue pala kö, a trotrohnine hnyawa laka ijiji angatre fe troa hane xome lai huliwa cili.

¹³ Ketre, tro lai itretre thupe ka hamë ixatua a mekune palahi laka, tha nyipi ewekë troa nyimu treune la pionie ka ixatua, matre traqa pi kowe la pionie lapa (km 9/86, sine trongene, par. 24-26). Ngo eje hi laka, loi e tro la itretre thupe a atrehmekune hnyawa laka, atreine kö lai atr ka sipone troa kuca la itre hawa hna amekötin.

¹⁴ Troa ce ithahnatane hnene la kometre ne huliwa, lai sipo, nge tro fe la seketere a wange hnyawa ej, me goeëne ka hape hna sa asë kö la itre hnying, thupene lai, troa canga iupifë koi Sasaiatri.

¹⁵ Tro la seketere a thuemacane la itre xaa qatr, la nöjei ewekë ka ajolëne la itre pionie. Nyipi ewekë catre lai, ngöne la itre ekalesia ka nyimu pionie. Tro la seketere a goeëne la hna huliwa hnene la itre pionie e pune macatre, tune la aqane amekötine la rapore ne goeëne la hna huliwa hnei Ekalesia (S-10); ketre tro angeic’a icasikeu e mekene treu maaci memine la atre thupëne la huliwa ne cainöje trotro, matre troa ce wange la huliwa ne la itre ka nango hetre jole ngöne hawa, nge ka aja ixatua. (Wange ju lo Huliwa ne Baselaia ne febuare 1993, Itre hna Amekötiin). Maine hna canga ixatua palahi hnene la itretre thup, ke, tro la itre pionie a madrine troa afenesine hnyawa la macatre ne huliwa i angatr.

¹⁶ Nyimutre la itre ka pionie ngöne la angatr’a thöthi petre kö, me xötrei hane bapataiso. Madrin’atraqatre së, troa wange la aja i angatre troa nyi hlue i Iehova. Ngo nyipici laka, loi e tro së a ini angatre me xatua angatre troa atreine troa trofë hnyawane la Maca ka Loi ngöne la itre hnalapa, pine laka tha itre ka hekö petre kö angatr. Maine pëkö ixatua hna hamën, ke, tro angatr’a kucakuca ngöne la pune la macatre, tha umuthe ju kö lai huliwa, hawe pëkö thangan. Hnene la itretre thupe hna, wangatrehmekune e itre xaa ijine la itre hnepe jol, maine kolo pena nango uti la hna huliwa. Ngo maine hnei angatre hna canga akötrehnine troa, xatuane lai pionie troa ngaane la itre hnepe akötre thei angeic, tro hë angeic’a hetre madrine, nge tro fe a hetre thangane la huliwa i angeice ngöne la itre macatre ka nyimutre.

¹⁷ Hapeu, tro kö epuni a hane huliwa ngöne la itre götrane ga nany? Madrine së troa e la itre rapore ka traqa qa ngöne la itre xaa nöj, kola hape, tru catre la itre ka inine la Tusi Hmitrötre me itre pionie, me itretre cainöj. Atraqatre catre la madrine ne la itre pionie me itre mesinare ngöne la itre nöje cili (w92 1/9 p. 20 par. 15). Ceitune mina fe ngöne la nöje së. Easë a öhne laka kola, kökötre fe la thangane la hna huliwa, ngo loi fe e troa huliwaane hnyawane la itre xaa götran. Celë hi matre, maine tro la itre pionie trene mekuthetheu nge ka ijij, a jilapa ngöne la itre götrane ka ajane catre troa hetre ixatua göi troa cainöje trootro, ke, nyipi ewekë tro angatre fe a pane ce ithahnatane me filiale, qëmekene troa tro koi ketre götran.

¹⁸ Eje hi laka ame itre xane ke, angatr’a pionie pine laka celëhi gojenyi ka sisitria nyine trongën, ngo tha xeci kö koi angatre troa umuth. Hnei angatre hna cinyihane la pepa ne sipo, ngo tha pexeje kö lai mekun. Ngöne la xötrei, ke nango co hi la thangane la hna cainöje trotro. Ngo e qea ha, ke itre atr ka atreine hë. Nge angatr’a atrehmekune laka hnei Iehova hna amanathithine la huliwa. Celëhi matre angatr’a hune ngöne la madrine me lapaun. Ame koi itre xane ke ame la huliwa ne pionie ke ketre qëhnelö hna fe nyine saene koi Bethela, koi hna Ini e Gileada, koi huliwa ne mesinare, koi hna Inine Nyihlu, me koi huliwa ne nyi hlue trootro.

¹⁹ Maine tha wa atrunyi petre kö la nöje hna cainöjëne hnene la ekalesia i epun, ke ijiji epuni fe troa hane nue la itre ieötrei epuni ngöne la itre hneopegejë ka nany, ngo hna thupëne kö hnene la filiale i epun. Nge maine troa tro, ke, loi e troa hmekëne troa xome hnöthe la aqane melei epun. Ngo eje hi laka tro nyipunie a hetrenyi la manathithi ngöne la itre götrane ne la ua. — Mat. 6:19-21.

²⁰ Maine ijije koi epun, ke, ce huliwa jë memine la ketre ekalesia ka easenyi epun. Nge maine hetre aja me atreine thei epun, ke tro la atre thupëne la Sirkoskripsio i epuni a amamane la itre ekalesia ka aja pionie.

²¹ Nyimutre la itre pionie me itretre cainöje hna ajane ngöne la hnei angatre hna lapa, pine laka, atreine hi angatre ithahnatane la itre qene hlapa e cili. Hawe, tha tro kö angatr’a tro qa lai. Hapeu, mama kö koi epuni laka, hetrenyi ngöne la hnei epuni hna lapa la itre trehnyiwa? Celë hi matre, ame la itre ka atre la itre qene hlapa i angatr, ke, ijiji angatre troa huliwa hnyawa, matre troa trofë la Maca ka Loi kowe la nöjei atr ka kösau. Nyipici laka ketre huliwa katru lai, ngo eje mina fe laka jëne manathith. — 1 Tim. 2:4; Tito 2:11.

²² Maine tro epuni a nue la egöcatre i epuni troa atrunyi Iehova, ke, madrine jë la elolone la hnëqa cili. Maine drenge hi epuni laka ijije tro epuni a akökötrene la huliwa i epun, ke mekune kö troa thithi fë koi Iehova. Thele hnyawa jë la ewekë ka ijije hnei epuni hna atreine troa kuca. Fe amamane pi la itre aja i nyipunie kowe la, ketre atre thupe ka hnine pionie, maine kowe la atre thupëne la sirkoskripsio. Nge maine xeci hë la mekune i epun, thupene la thith, ke, canga huliwane jë lai mekune cili, ngo the thëthëhmine kö ka hape, ase hë Iehova thingehnaeane laka, tro Nyidrëti a ketre atrune la angetre atrunyi Nyidrë. — Heb. 13:5, 6; 1 Sam. 2:30.