Kola Sa La Itre Hnyinge i Nyipunie
◼ Nemene la aqane troa trotrohnine la huliwa ne pionie ka ixatua?
Loi e troa xome la huliwa ne pionie, ceitune me ketre götraneqa maine ketre hnëqa katru. Ngöne la nöjei treu ke hna e la itre thauzane lao atre cainöje ka pionie ka ixatua, nge itre xane a xome hutin’ej. Easë a olene kowe la itretre cainöje ka catre trofë la Maca ka Loi, hnene laka angatre a isine troa kuca la 60 lao hawa ne cainöje ngöne lai treu ne huliwa. Tro la itretre thupe me itre xaa atrene la Ekalesia a xatuane la itretre cainöje ka nyialiene la pepa ne sipon, matre wangatrehmekune me trongëne hnyawa lai aja, nge matre tha tro kö a wangacon’ej.
Tune mina fe lo huliwa ne pionie hut, nyipi ewekë tro la itre ka mekune troa pionie ka ixatua, ngöne la casi maine nyimu treu pena, a pane e la thupen (Luka 14:28). Loi e tro angatr’a mekune hnyawa ka hape ijiji angatre kö troa kuca la itre hawa hna amekötiin, nge kuca fe itre xaa hnëqa ne la keresiano. Qëmekene la troa xome la huliwa ne pionie ka ixatua, loi e troa isa hnyingëne me wange la aqane mele së ngöne la thith. Tha tro kö a canga mekune ju hi troa pionie, hnene laka itre xane a nyialiene lai pepa ne sipon. Ohea, loi e troa pane mekune hnyawa thenge lo porogarame hna hnëkëne hë me cinyihan, nyine troa anyipicine laka tro ha eje la hna mekune kow. Nyipi ewekë troa e hnyawa la pepa ne sipon, me isa mekune hnyawa ekuhu hni së ka hape easë kö a xötrethenge asë la itre hna amekötin.
Eje hi laka troa hetre nyipi ajane atraqatre troa huliwa ne pionie ka ixatua. Ngöne la itre xaa treu ne la macatre ke hna “xome catrë” së hnene la Maca ka Loi (Itre Hul. 18:5), maine Drai ne Amekunën, e treu maaci me eiperem, memine lo itre treu ne iwai trootro i atre thupëne la sirkoskripsio. Alanyimu la itretre cainöje ka catre xötrethenge la ca porogarame ngacama ka tha hmaloi kö matre atreine troa cainöje trootro ngöne la itre ijine huliwa ka ketre pengöne kö, atrehmekune laka tro ha kepe thangane atraqatre ngöne lai (2 Kor. 9:6). Nyimutre la itretre cainöje ka isine troa pionie ngöne la ijine mano me ngöne fe la itre treu ka faifi lao mecixeni me sabath. Ngo ame la angatre a nyialiene la pepa ne sipon, angatre a trotrohnine hnyawa la kepine matre troa xötrethenge la ixatua ‘Loi la ewekë i nyipunie troa eje hi, eje hi’ hnene la troa catre huliwa matre atreine troa eatrëne la 60 lao hawa ne cainöje ngöne la rapor e pune la treu ne huliwa. — Mat. 5:37.
Maine tha itre xane pena kö a pionie, hapeu matre ixatua ju pena hnene la troa ce cainöje maine isapui memine la itre ka pionie ka ixatua. Maine ijij, ke, tupathe ju pena troa cainöje aqeanyi lai ijine cili. Hna wangatrehmekune laka, madrine la itre pionie troa ce cainöje me angatr’e hmakanyi catr, e hnaipajö hej, maine hejilapa pena. Ketre madrine fe angatre troa ce tro troa iwai hmaca maine troa ce nyiqane pena la itre ini Tusi Hmitrötr. Eje hi laka maine hne së hna hnime xatuane la itre pionie, ke, tro hë së a öhne me kapa la manathithi hnene la ham. — Itre Hul. 20:35.
Madrine atraqatre së la trenge catre ne la nöjei pionie. Eje hi laka tro hë la itre ka mekune troa hane huliwa ne pionie, a a kepe manathithi qangöne lai (Itre Edomë 10:4). Eue la ijine tro epuni a hane pionie ka ixatua, matre isa öhne hnei epuni la itre madrine qangöne lai huliwa cili?