Hapeu Tro Hmaca Kö Së a Kuca?—Kola Ihë Hmaca Troa Pionie Ka Ixatua
1 Nemene la hna troa kuca hmaca? Tro kö së a hane pionie ka ixatua ngöne la hneijine qëmekene la Drai ne Amekunën? Hna hule la itre lue meke së hnene la taane mekune hna cinyihane atrune ngöne sinecetrone la Huliwa ne Baselaia ne Febuare 1997, hna hape: “Kola Aja—190 Lao Pionie Ka Ixatua.” Eahuni a mejiune laka, tro epuni a xemine la ihë cili. Drei la madrine huni ngöne la kola wange la hna huliwa ngöne la treu maac, 1997, laka, 249 lao trejine ka xome la huliwa ne pionie ka ixatua! Maine tro fe a hane ce e memine lo 48 lao pionie lapa, memine lo 6 lao pionie hut, haawe, kola öhne laka, kola easenyi kowe la 20 koi 100 lao ka cainöje ka xome la huliwa ne pionie. Hapeu, tro hmaca kö së a kuca lai ngöne la hneijine ne la drai ne Amekunën?
2 Loi e troa qaja aloine lo itre trejine asë ka catre thele troa akökötrene la huliwa ne cainöje i angatr, ngöne lo macatre ka ase hë. Kola mama hnyawa laka, epuni asë hi a amamane la ihnimi gufa i epuni koi Iehova Akötresie, me kowe fe la itre atr ka lapa ezi epun. (Luka 10:27; 2 Pet. 1:5-8) Hna thele hnene la itretre cainöje la aqane tro angatre a kuca matre troa pionie ka ixatua, ngacama isa pengöne la itre jole ka eje thei angatr. Ngöne la itre xaa ekalesia, hna e la 30 lao trejine ka ce pionie ka ixatua ngöne la treu, itre qatre thupe fe me itre drikona.
3 Hna hane wangatrune fe la itre thöthi ngöne la macatre ka ase hë. Hna lapa treqene hnene la ketre ka cainöje ka 13 la macatren, la ijine tro angeice a xome la bapataiso, nyine amamane la ajane i angeice troa nyihlue i Akötresie. Thupene la hnei angeice hna xome la bapataiso ngöne la treu febuare, hnei angeice hna amamane la ajane i angeice troa pionie ka ixatua ngöne la treu maac: “Ngöne laka, pëkö ka ajolë ni enehila, haawe, eni a canga nyialiene ju la pepa ne sipo. . . . Maine thaa hne huni ju hna kapa la ihë i epuni ngöne la ihnim, troa pionie, thatreine jë kö tro huni a hane hetrenyi la itre madrine ka lolo, wene ne la huliwa cili. Eni a olene atraqatre koi Iehova, la hnei Nyidrëti hna hane aijijë ni troa hane ce thawa la hnëqa cili memine lo itre trejine ka nangëne la ihë cili.” Angeice a mekune troa xome hmaca la huliwa ne pionie.
4 Maine jë epuni fe e hnine lai ala 249 ka pionie ka ixatua ngöne lo treu maaci hnapan, maine ngöne lo ala 190 ne lo treu eiperem, maine thene lo ala 208 lao trejine ka pionie ka ixatua lo mei. Hapeu, epuni hmaca kö a troa pionie ngöne la macatre celë? Maine thaa ijije ju kö tro epuni a hane pionie ngöne lo macatre hnapan, tuneka pena ngöne la macatre celë? Atreine kö tro së a sasaithe la 249 lao pionie, etrune lo itre ka pionie ka ixatua ngöne lo treu maac 1997? Celë hi etrune lai ka draië ngöne la itre treu ne ihë troa pionie e Kaledonia.
5 Catre Pi e Eiperem Me Mei: Ame ngöne la macatre celë, troa atrune la Drai ne Amekunën, e mecixeni ne 11 eiperem; qa ngöne lai, ame e eiperem, ijine tro hi së lai a pane akökötrene la huliwa ne cainöje së. (2 Kor. 5:14, 15) Ame ngöne la itre pane drai ne la treu, 11 la etrun, tro së a thele me hëne asë la nöjei atr ka hni ka ajan, troa hane sine la Drai ne Amekunën. Maine epuni a mekune troa hane pionie ka ixatua, loi e tro epuni a canga hamëne la pepa ne sipo i epun, qëmekene la ijine tro epuni a nyiqaane la huliwa.—1 Kor. 14:40.
6 Pine laka, faifi lao mecixeni me sabathi ngöne la treu mei, haawe, tro ha nango hmaloi fe kowe la itre ka ini, me itre ka huliwa i maseta, drai ka pexej, troa hane pionie ka ixatua ngöne la treu cili. Maine troa kuca la isa trene lao hawa ngöne lai faifi lao mecixeni me sabath, haawe, tro pe hi a nyixane hnene la trene lao hawa ngöne la itre xaa drai, matre weje pi lo lai 60 lao hawa hna sa.
7 Ame ngöne la itre treu eipereme me mei, easë a troa tro fë la itre zonal, La Tour de Garde me Réveillez-vous! nge lue eje la nyine abonene ngöne la treu cili. Celë hi ka troa xatua së lai matre troa ala nyimu catre la itre ka troa pionie. Pine nemene matre easë a qaja tune la? Hmaloi troa tro fë la itre zonal, nyipi madrine e troa huliwane itre eje ngöne la hna cainöje trootro. Thaa jole kö troa tro fë itre eje ngöne la nöjei götrane ne la huliwa ne cainöj—ngöne itre hnalapa trootro me ngöne itre magazë, ketre tune mina fe ngöne la itre gojeny, ngöne itre hna acili loto, me ngöne itre park, me itre xaa götrane ju kö. Nyipi ewekë catre la lue zonal, La Tour de Garde me Réveillez-vous!, ke lue eje a cilëgöline la trenge nyipici ne la Baselaia. Itre eje fe a amamane kowe la itre atr la aqane eatre la itre ewekë hna perofetane hnine la Tusi Hmitrötr, kola anyipicine ka hape, cile hë la Baselaia i Akötresie. Kola ketr fe la mele ne la itre atr ka e la itre zonale cili, me upi angatre troa trotrohnine la itre aja ka nyipi loi kowe la itre atr. Maine tro së a mekune la aqane ketr la itre hni së hnene la itre zonale ka sisitria cili, haawe, tro hë së a hane thele troa ce thawa me catre tro fë itre eje ngöne la treu eipereme me mei.
8 Ame ngöne la easë a hnëkë troa tro fë trongëne la itre zonal, loi e tro së a wange hmaca la itre xaa hna cinyihane matre troa hetre thangane la huliwa së; troa xome la: “La Tour de Garde me Réveillez-vous!—Nyipici Ngöne La Ijine Ka Ijij” (1 januare 1994, La Tour de Garde), “Huliwaane Hnyawaane Jë La Itre Zonale Së” (Huliwa ne Baselaia Semitrepa 1995), nge “Isa Hnëkëne Jë La Aqane Troa Tro Fë Zonal” (Huliwa ne Baselaia ne okotropa 1996).
9 Kola Cilëmekene Hnene La Itre Qatre Thup: Hnene la itre qatre thupe ne la ketre ekalesia ne Etazini hna hamë ixatua kowe la itre trejine ka pionie ngöne lo treu maaci hnapan; hnei angatre hna sa la ketre drai ne cainöje ka ketre pengöne kö thatraqane la ekalesia asë, hna xome la caa mecixeni ne la treu. Hnei angatre hna amekötine matre troa icasikeu ngöne la itre hawa ka isa pengöne kö ngöne la drai; qa ngöne lai, kola aijijëne la itre trejine asë ngöne la ekalesia, troa tupathe la nöjei aqane troa cainöj. Maine troa cainöje ngöne la itre biero, ngöne la itre gojeny, ngöne la itre hnalapa trootro, maine troa iwai hmaca, maine troa cinyanyi tus, maine troa cainöje jëne telefon. Sisitria la thangane la huliwa cili, pine laka, hnene lai ala 117 lao ka cainöje ka anyipicine ngöne la drai, hna kuca la 521 lao hawa, me hamëne la 617 lao zonal, me boroshüre me itus! Hetre thangane pi hë la hna huliwa ngöne lai mecixen, pine laka, ame hë lai sabath, kola sasaithe la etrune la itre atr ka sine la icasikeu thatraqane la ka ala nyim, memine la Ini ne La Tour de Garde.
10 Loi e tro la ekalesia a amekunëne la itre trejine ngöne la nöjei icasikeu thatraqane la huliwa ne cainöj, la ijine me hnë troa icasikeu göi cainöje trootro ngöne la wiike ka troa xulu; nyipi ewekë catre troa ithuemacany, maine hetrenyi la itre xaa hna hnëkën, nyixane kö lo itre hna lapaa majemine kuca. Loi e tro la itre pionie lapa memine la itre xaa ka cainöje ju kö ka thaa hane kö xome la huliwa ne pionie ka ixatua, a hane sajuëne la itre hna amekötin, thenge la hnei angatre hna atrein.
11 Loi e tro la atre thupëne la huliwa ne cainöje a ce wange memine la trejine ka hnëkëne la itre teritoar, matre troa huliwane la itre hna thaa kuca lapaan. Troa pane ce wange hnyawa la aqane troa kuca la itre hnalapa ka pë atren, memine la aqane troa cainöje e cahu itre gojeny, me ngöne itre magazë trootro. Loi e tro fe a amexeje la enyipiewekëne la troa cainöje e hej. Loi e troa canga komadëne la itre zonale thenge la etrune la huliwa hna troa kuca ngöne lai itre treu eipereme me mei.
12 Ijije Hi Kowe La Itretre Cainöje Troa Atreine Anyipicin: Ame ngöne la pane hnëewekë ne la pepa ne sipo göi pionie ka ixatua, hna qaja ka hape: “Pine laka, atraqatre la ihniminge koi Iehova, memine la ajane i eni troa xatuane la itre xaa atr troa atre Nyidrë me itre aja i Nyidrë jëne manathithi koi së, haawe, eni a thele troa akökötrene la aqane cainöje i eni; celë hi matre eni a xome jë la huliwa ne pionie ka ixatua.” Ame la troa hni koi Iehova, memine la troa thele troa xatuane la itre xaa atr ngöne la ua, celë hi lue trepene la aja ka eje the së troa nyihluei Nyidrë. (1 Tim. 4:8, 10) Loi e troa ketre atr hna bapataisone hë la ka mekune troa pionie ka ixatua, ketre, troa thiina ne ka ijij, me atreine troa kuca la 60 lao hawa ngöne la treu. Pine laka, easë asë hi a troa waipengöne la aqane mele së, hapeu, matre hane fe la itre xane the së ka thaa hane petre kö pionie, xome la huliwa cili ngöne la treu eipereme me mei?
13 Nyimutre catre la itre trejine hnine la ekalesia, angatre a wangatrehmekune laka, ijiji angatre fe troa hane pionie, pine laka, itre xane fe ka mele tui angatre a hane xome la huliwa cili. Hetre thangane ka lolo la hna pionie ka ixatua hnene la itre nekönatre ka ini, me itre qatre trahmanyi me föe, me itre ka huliwa maseta ngöne la drai ka pexej, cememine fe la itre qatre thup, me itre drikona, me itre xane ju kö. Hnene la ketre ifëkuku trene lue nekönatr, nge ka huliwa ngöne la drai ka pexej, hna kuca la 60 lao hawa, me hamëne la 108 lao zonal, me nyiqaane la köni etid ngöne la caa treu ne pionie ka ixatua. Tune ka la aqane kuca eahlo lai? Ame ngöne la itre hnepe ijine mano, eahlo a cainöje ngöne la teritoare ka easenyine la hnei eahlo hna huliwa; ketre, eahlo a cinyany, me cainöje ngöne la itre hna acili loto, me itre gojenyi trootro. Eahlo fe a xome la itre drai ne mano i eahlo, matre troa ce cainöje trootro memine la itre atrene la ekalesia. Öni eahlo pena kö ngöne lo xötrei ka hape, thatreine jë kö eahlo troa eatrëne la huliwa ne pionie ka ixatua, ngo qa ngöne la ithuecatrene la itre xan, memine la ketre porogarame ka lolo, ene pe eahlo a cile ju kowe la itre jol.
14 Öni Iesu kowe la itretre nyidrë ka hape: “Uqa la nyine isilekeung, nge maloe la ehnefeng.” (Mat. 11:30) Celë hi tane la ketre hna cinyihane ka ithuecatre ngöne la zonal, La Tour de Garde ne 15 ogas, 1995. Kola qaja la ketre trejine föe ka huliwa i maseta ngöne la drai ka pexej, nge tru la ejolene ej. Hapeu, hnei nyidroti kö hna mekune ka hape, thaa koi nyidroti fe kö la huliwa ne pionie ka ixatua? Ohe. Hnei nyidroti hna pionie ka ixatua ngöne la nöjei treu. Pine nemene lai? Pine laka, nyidroti a öhne ka hape, hetre ixatua hna kapa qa ngöne la huliwa cili; atreine hë nyidroti tuluthe la aqane troa mel. Atraqatre la madrine i nyidroti ngacama tru hnei jole i nyidro, ke nyidroti a xatuane la itre atr troa atre la nyipici hnine la Tusi Hmitrötr, nge kola goeëne la aqane saze la mele i angatre matre troa hane kepe angatre hnei Akötresie.—Ite edomë 10:22.
15 Tro kö a sisitria catre la itre manathithi hna troa kapa hnene la atr ka thele troa xomehnöthe me saze la aqane mele i angeic göi troa pionie. Hna cinyihane hnene la ketre trejine föe ka xome la huliwa ne pionie ka ixatua ka hape: “Hna xatua ni hnene la huliwa cili troa caa hna mekun, nge troa wangatrune hnyawa la ixatua nyine troa hamëne kowe la itre xaa atr. . . . Maine ijij, the luelue kö troa xome la huliwa cili.”
16 Loi e Troa Hetrenyi La Ketre Porogarame Ka Lolo: Ame ngöne la pune la sine trongene Huliwa ne Baselaia celë, hne huni hna xome hmaca lo itre porogarame ka thaa jole kö hna amamane hë ngöne la Huliwa ne Baselaia ne febuare 1997. Maine jë ka ihmeku hi lai ketre koi epun. Ame ngöne la epuni goeëne itre ej, wange ju fe la aqane cainöje i epuni ngöne la nöjei treu. Nemene la itre nyine troa canga wange ngöne la hnalapa, maine nyine tro pena a pane amë pe, qëmekene troa xome la huliwa ne pionie? Hapeu, ijije kö tro epuni a cainöje ngöne la itre drai hnei epuni hna majemine xome troa kuca la itre nyine madrin, maine itre drai ne mano pena? The goeëne atrune kö la 60 lao hawa nyine troa kuca, ngo hnëkëne jë pe la porogarame i epuni ngöne la drai, maine ngöne la wiik. Ijije hi troa eatrëne la huliwa ne pionie ka ixatua, e hna kuca la lue hawa ngöne la drai, maine 15 lao hawa ngöne la wiik. Goeëne ju la porogarame ka hmaloi koi epun, nge xome jë la peen, me goeëne la aqane tro epuni a eköthe hnyawa la porogarame ne cainöje i epun; ketre matre troa hetre thangane ka lolo catre koi epuni me fami i epun.
17 Kola mama hnyawa la eloine la aqane xemine me aqane catre cainöje ne la ekalesia ngöne la macatre hnapan, jëne la hna cinyihane hnene la ketre pionie lapa, öni angeice ka hape: “Eni a olene atraqatre la ithuecatre hnei epuni hna hamën, göi troa pane thele troa hane xome la huliwa ne pionie ka ixatua. . . . Hetre ixatua hna kapa hnene la itre trejine ka thaa hane kö ekö pionie, angatre a atrehmekune la itre porogarame hna hnëkën, ka ijije koi angatre troa kuca thenge. . . . Eni a madrine troa ketre atrene la organizasio i Iehova, me xötrethenge la aqane elemekene hnyawa la huliwa hnene la hlue ka nyipici me ka inamacan.”
18 Kola qaja koi së ngöne Ite Edomë 21:5 ka hape: “Ame la ite mekune ne la ate cate huliwa, te, kola atena mon.” Kola ithuecatre fe koi së ngöne Ite Edomë 16:3 ka hape: “Nue pi la nöjei huliwa i’ö koi Iehova; nge troa acatene la nöjei mekune i’ö.” Eje hi laka, maine tro sa sipo Iehova ngöne la thith, troa eatrongë së, me catre mejiune kowe la ixatua hnei Nyidrëti hna troa hamëne nyine loi koi së, haawe, atreine hi troa xecie koi së laka, troa hetre thangane ka lolo la aja së troa pionie ka ixatua. Maine troa mama e thupene ka hape, lolo la porogarame hnei epuni hna kuca thatraqane la caa treu maine lue treu ne pionie ka ixatua, haawe, atreine hi troa siji hatrene lo götrane hna hnëkëne koi itre pionie ka ajane troa sisedrëne la huliwa ngöne la itre xaa treu; kolo hna hape: “Nyihatrene ju e celë, maine epuni a mekune troa sisedrëne la huliwa ne pionie ka ixatua.” Maine thatreine jë pena kö, ijije hi troa nyiqaane mekune troa pionie ka ixatua e treu ogas, ke, faifi mina lao mecixeni me sabathi ngöne la treu cili. Pine laka, easë a troa nyipune la huliwa ne cainöje ngöne la macatre e treu ogas, haawe, loi e troa isa catre hne së, isa alacaas, troa cainöje trootro.
19 Hna perofetane hnei Iesu ka hape: “Ame la ate lapaune koi ni, tro angeic’a kuca fe la nöjei huliwa hnenge hna kuca; nge tro angeic’a kuca la ite huliwa ataqate hune lai.” (Ioane 14:12) Atraqatre la madrine troa nyihluei Akötresie, koi së angetre huliwa koi Nyidrë, nge kola eatrëne hyawa lai hna perofetane hë ekö. Ijine tro hi la a catre cainöjëne la maca ka loi, qa ngöne lai, thele jë la nöjei ijine troa kuca la huliwa cili. (1 Kor. 3:9; Kol. 4:5) Ame la easë a thele ijine troa hane xome la huliwa ne pionie ka ixatua, celë hi ketre jëne ka sisistria lai, nyine amamane ka hape, easë a hane kuca la hnëqa së, ene la troa cainöjëne la Baselaia. Easë a lapa treqene la aqane troa mexeme draië elanyi la nyima ne atrun, ngöne la hneijine Drai ne Amekunën; celë hi nine nyima ne la itre pionie ka ixatua. (Sal. 27:6) Ame la easë a mekune lo thangane la hna huliwa lo macatre ka ase hë, easë a isa hnyinge ka hape, ‘Tro hmaca kö ni a pionie?’ Easë a lapaune laka, tro ha eje la aja së!
[Hna eköhagen götran 3]
Hapeu, Tro Kö Epuni a Pionie Ka Ixatua?
“Ngacama isa pengöne kö la aqane mele së, ngo maine ase hë së bapataiso, nge lolo fe the së la thiina ka ijij, haawe, atreine hi tro epuni a eatrëne la huliwa ne pionie ka ixatua, ene la 60 lao hawa ne cainöje trootro; nge maine xecie koi epuni laka, ijije hi tro epuni a xome la caas, maine nyimu treu pena troa pionie, haawe, tro ha madrine hnene la itre qatre thupe ne la ekalesia troa ce wange hnyawa la sipo i epuni troa xome la huliwa ka sisitria cili.”—Organisés pour bien remplir notre ministère, götrane 114.
[Hna eköhagen götran 6]
Itre Porogarame Koi Pionie Ka Ixatua
(Wange ju la itus)