Bëeke Jë Së Troa Xatuane La Itre Ka Ajane Troa Ithahnataane La Tusi Hmitrötr
1 Ngöne la kola cainöje trotro, easë a iöhnyi memine la itre xaa atr ka ajane la Maca ka Loi, ngo pëkö traeme ne tro angatr’a hane ithahnata me easë. Hapeu, akötrehnine kö së troa bëeke hmaca matre ce kapa me angatre la ithuemacanyi ne la Baselaia? Maine ka hetre thangane la porotrike së memine la ketre atr, ngo tha ajane kö angeice troa xomi itus, haawe, tro kö së a bëeke hmaca troa ithahnataane la Nyipici me angeic?
2 Nyipi ewekë catre troa huliwaane hnyawane la itre götrane me nöje së me xötrethenge la aja hne së hna öhne thene la itre atr. Ngo hapeu, tro kö a wange hmekuje hi la itre ka xome la itre itus, maine itre zonal? Maine eje hi, ke, thëthëhmine hë easë lo itre xaa ka ajan. Tha tro kö së a mekuhnine la ketre atr ka hape tha ijiji angeice kö troa hane kapa la itre ewekë ne ua, pine laka tha kapa kö la itre itusi me itre zonal (wange ju Rom. 14:4). ke ma easë pe hi a tro, nge angeic’a pane mekune hmaca lo hne së hna qaja, maine haine pena la trenge aja së troa xatua angeic. Nge tro hë angeic’a kepe së me drei së ngöne la easë a troa iwai hmaca.
3 Ngöne la easë a bëeke troa wange hmaca la ketre atr ka tha drei së e cili lo, pine laka hetre hnepe jole i angeic, ke, qaja jë ka hape:
◼ “Eni a madrine troa iöhnyi hmaca me nyipë. Pë ju kö ijine tro nyiso a ithahnata lo ketre ijin, ke, hetre jole i nyipë. Eni a öhne laka, nyipëti la ketre atr ka tru jolen, celë hi matre tha tro kö ni a aqean. Tune la itre atr asë, tha ajane kö easë troa hetre mec, ketre tune fe la itre atr hne së hna hnim. Hapeu, atre fe kö nyipë laka, hnei Akötresie hna thingehnaeane ka hape tro Nyidrëti a apatrene la itre mec? Tuneka, la elolone lai ithuemacanyi cili? [Nue pi troa sa.] Goeëne ju la ketre mekune ngöne la paragarafe 4 ne lo boroshür “Voici, je fais toutes choses nouvelles”. Maine ijije la traem, ke, e jë lai paragaraf, nge thupene lai, amamane ju la ketre mekene tusi e kuhu fen, götrane 4, kola qeje pengöne la mele ka troa eje ngöne la fene hnengödrai ka hnyipixe. Maine kola drei së hnene lai atr, ke, nyiqaane jë troa inine la Tusi Hmitrötre me angeic.
4 Ketre, maine epuni a troa wange hmaca la ketre atr ka xome la ketre tarak, ke, qaja ju hi epuni ka hape:
◼ “Ame lo nyiso a iöhnyi e cili lo, ke, hnei nyipëti hna xome la ketre tarake ka tune la: Qui domine vraiment le monde? Hapeu, madrine kö nyipë tro satana a musinëne la fene celë? [Nue pi troa sa.] Wange ju la pane paragarafe ne la götrane 6.” E jë, nge hnyingëne ju ka hape: “Hnauëne laka satana a ajane troa amenu së?” Troa sa hnene lai atr, nge ce wange ju la hna foa ne paragarafe götrane 3. Tro epuni a sisedrëne lai ithahnata jëne la ca tarak, maine amamane ju pena lai boroshür: Dieu se soucie-t-il vraiment de nous? Nge thupene lai cewange ju la paragarafe 8 götrane 13.
5 Hetre sipu kepine matre troa mejiune troa xatuane hnyawa la aja hne së hna öhne ngöne la huliwa ne cainöje trootro, ngacama hnepe kaco hi lai aja. Nyipi ewekë troa wai angatre me ajane troa xatua angatre troa atre la nyipici. Organizasio i Iehova a hamëne la itre itus, me itre xaa aqane ithahnata matre tro së a xatuane la itre atr troa wangatrehmekune laka nyipi mo ka tru thatraqai angatre la itre ewekë ne la ua. — Mat. 5:3.
6 Maine hetre thangane la ithahnata i epuni memine la ketre atr ka hmala hnin, ke, the wangacone kö lai, ngo bëeke hmaca jë troa xatuane lai aja, ke, ma jëne tro angeice lai a ini Tusi Hmitrötre me xötrëne la gojenyi ne mel. Loi e tro asë hi së a catre ixatua hnyawa ngöne la huliwa ne cainöje trootro; celë hi huliwa ne iamele. — 1 Tim. 4:8.