Ame La Icasikeu Ne Cainöje Trootro, Ke, Kola Hnëkë Së Thatraqane La Nöjei Huliwa Ka Loi Asëjëihë
1 Ame la aliene la icasikeu ne cainöje trootro, ke, kola troa hnëkë së troa catre cainöje trootro, me inine la angetre drenge (2 Tim. 3:17). Ngo maine tha hnëkë hnyawa kö së kowe la icasikeu, nge tha mekune kö së troa trongëne la hna ini së, hawe ejehi laka ketre tro fe hi a co la thangane koi së.
2 Nyipici laka ame la troa pane hnëkë, ke, kola xatua së troa xöleuthe hnyawane la itre hna ini. Xomejë la itre itusi hna troa ithahnataan, nge traqafë pi kowe la hna icasikeu, matre troa ketre e thaupune ngöne la kola ce wange itr’ej, celëhi aqane tro së a cememine la hna ce ithahnataane ngöne la icasikeu. Loi e tro së a itre atr ka qatixenyë, nge loi fe tro së a makëne la itre mekune thatraqane la itre drai ka troa xulu.
3 Loi e tro la qatre thup perezida a wange hnyawane la itre hnëqa hna athipe thatraqane la reinio. Nge qanyine la itre qatre thupe, me drikona ka atreine troa hnëkëne itr’ej. (om p. 70) Maine xalaithe hi la itre qatrethupe me drikona ngöne la ekalesia, ke, troa thue qane fe la itre trejine ka atreine matre troa ixatua. Nge loi e tro la trene hnëqa a hnëkë hnyawa, me trongëne thenge la aqan’amekötin, nge ketre, tha tro kö a sasaithe la traeme hna athip.
4 Hna pune majemine nyiqaane la icasikeu hnene la itre ithuemacany. Loi tro la trejine hna könëne thatraqane la huliwa cili, a pane hatrengëne la qatre thupe perezida, matre troa ce wange la itre nyine troa qaja. Celëhi matre easë a drenge la kola e la itre tusi Sasaiatri, maine kola amekunëne la itre huliwa göi cainöje trootro, maine itre hna kuië mani ngöne la treu. Ketre , ijije mina fe tro së a atre la itre trejine ka kucakuca nyine wang, maine atrepengöne la itre xaa hnepe huliwa ne la ekalesia ngöne la itre drai ka troa xulu. Loi e tro së a drenge hnyawane matre tro së isa alacasi a atre la isa hnepe ka ijiji së troa kuca.
5 Maine kola kuca la ketre cainöje nyine troa ce ithahnataan, ke, troa isa hnëkë, ene la troa pane e lai cainöj, me wange la itre xötre qahnine la Tusi Hmitrötr. Mekune jë la aqane tro epuni a trongëne la itre hna qaja, me aqane tro epuni a qeje mekune nyine xatuane la itre xan. Loi mina fe e tro epuni a amexeje la ketre ceitune, maine ketre ewekë ka traqa koi epun, matre nyine troa anyipicine la ini hnei epuni hna kapa.
6 E hetre iamacany, ke, mekune ju ka hape, epuni hi e hnine la iamacanyi cili, nge thele jë la aqane tro epuni ithahnata. Makëne ju la itre mekune hna amamane nyine jia i epun, me aqane troa huliwaane itr’ej. Maine ase hë epuni ixelë memine la ketre ijine ka tune lai, ke, tupathe jë troa mekune hmaca lo itre hnei epuni hna qaja, nge wange jë la aqane tro la iamacanyi celë a xatua epuni troa atrune la inamacane i epuni ngöne la itre drai ka troa xulu.
7 Loi e tro la itre trene qa ngöne la iamacany, maine itre trejine hna hnyingë pengöne la aqane mele i angatre ngöne la nyipici, a pane amacaane hnyawane la itre qa i angatr. Nge loi e tro angatr’a isa atre la hnei angatre hna troa qaja me kuca e koho hune iesetarad. Kola öhne laka tha nyipi ixatua kö la itre qa cili pini laka tha hna amacaane kö. Celëhi matre hnene la itre xane hna amacaane la itre qa i angatr, thupene lo ini ne La Tour de Garde, matre majemi angatre e koho hune iesetarad, nge ketre ijije fe kowe la itre trejine ka kuci mikoro, troa hnëkëne la itre nyine troa kuca.
8 Hetrenyi e itre xaa ijine ngöne la porogaram, lo cainöje hna hnëkëne mekötine thatraqane la itre kucakucane la ekalesia, maine pena, lo cainöje hna xome qa hnine La Tour de Garde. Loi e tro së a drenge hnyawan, me amë la itre ihaji e kuhu hni së, me tupathe troa trongën.
9 Madrine së la kola “hnëkë kowe la nöjei huliwa ka loi asëjëihë.” (2 Tim. 2:21) Ame la icasikeu ne cainöje trootro, ketre kemeji lai hna hnëkëne hnei Iehova nyine xatua së troa kuca la huliwa cili. Nge e tro së a catre troa sine palahi la icasikeu cili, nge e tro fe së a catre troa trongëne la itre hna ini së, ke, nyipici laka hetre ixatua koi së troa “kuca asë la qâ së.” — 2 Tim. 4:5.