Aqane Troa Hnëkë Thatraqane La Icasikeu Ne La Huliwa
1. Nemene la kepin matre kola eköthe la Icasikeu Ne La Huliwa nge tune kaa la aqane tro sa kepe thangane ka loi qa ngön?
1 Hna eköthe la Icasikeu Ne La Huliwa matre tro sa hnëkë troa xome la huliwa ne cainöj. Ame la itre taane mekun ka sisitria hna ithanatan ngöne la Icasikeu Ne La Huliwa, tre, ene la huliwa ne troa cainöjëne la maca ka loi me inine la itre atr, me ithuemacanyi laka calemi la iameköti Akötresie. (Mat. 28:20; Mar. 13:10; 2 Pet. 3:7) Tro hë sa kepe thangane ka loi qa ngöne la icasikeu cili ka sisitria, e hne së hna hnëkë hnyawa, me catre troa qeje mekun.
2. Tro nyipunieti a hnëkë tune kaa, matre troa drenge la ketre cainöj?
2 Cainöj: Hna amë la itre mekune nyine troa xom göne la cainöj, ngöne la itre hna amekötine thatraqane la atre cile fë la cainöj. Maine jë tro nyipunieti a wange hmaca la itre mekune cili tune la itre xötr nyine troa xom, me thele la aqane tro nyipunieti a trongëne la itre mekune cili ngöne la hna cainöj.
3. Nemene la ka ijij tro nyipunieti a kuca, matre troa hnëkë kowe la hnëqa hna hape, troa ce ithanatan?
3 Troa Ce Ithanatan: Troa xomiujine la hnëqa celë ceitu memine la kola xomiujine la Ini ne la Ita Ne Thup, laka, troa nyiqaane me nyipune hnene la itre xaa hnepe mekun. Nyihatrene ju la itre mekune ka sisitria nyine troa wanga atrun ngöne la itre paragaraf, nge hnëkë jë troa hamëne la itre hnepe mekune ka troa acatrene la itre mekune ka sisitria.
4. Tro nyipunieti a hnëkë tune kaa, matre troa hane qeje mekun?
4 Troa Qeje Mekun: Troa kuca la hnëqa celë ceitu me ketre cainöj, ngo tro la atre cile fë la hnëqa a hane sipone kowe la itre xaa atrene la icasikeu troa qeje mekun. Maine tro nyipunieti a nyihatrene la itre mekun ka sisitria nyine troa wanga atrun, me xome la itre xötr hna amë ngöne la itre paragaraf, haawe, ijije hë tro nyipunieti a hane qeje mekun ngöne la kola hnying. Tro la trejine ka cile fë la hnëqa celë a catre xatuane la itre atrene la icasikeu troa hamëne la itre mekun ka sisitria.
5. Nemene la ka troa xatua nyipunie troa kepe thangane ka loi qa ngöne la itre iamacany?
5 Itre Iamacany: Hetrenyi la itre iamacany nyine troa hnëkëne matre troa amamane la aqane troa huliwane ngöne la teritoare së la itre ithuemacany hna ithanatan. Troa sipone kowe la itre qatre thup, maine itre trejine ka macaj maine ka pionie pena matre troa kuca la itre iamacany cili. Ame la aqane tro nyipunieti a hnëkëne la götrane celë ne la icasikeu, tre, ene la troa pane mekune la aqane tro la itre trejine ka hnëkë a kuca la iamacany. Ame la kola iamacanyine la ketre aqane nyiqaane ithanata, mekune jë la aqane tro nyipunie a ketre sipu qaja lai, thenge la hnei nyipunieti hna trotrohnin, me thenge la itre pengöne atr hna troa cainöje kow. Loi e troa xeci e kuhu hni nyipunie, laka, hnei nyipunieti hë hna xome la itre itus maine zonal pena hna troa iamacanyine ngöne la hna icasikeu. Ame ngöne la heji ne Hmi ne la Hnepe Lapa i nyipunie, tre, ijije tro nyipunie a kepe thangane ka loi qa ngöne la hna xome la itre xaa aqane nyiqaane ithanata cili.
6. Nemene la itre xaa kepin matre loi e tro sa hnëkë thatraqane la Icasikeu Ne La Huliwa?
6 Tro ha tru la madrine së troa sine la Icasikeu Ne La Huliwa hnene la hna hnëkë hnyawa me catre troa mekune la itre ini ka lolo hna troa hamën, qëmekene troa sine la icasikeu. Maine tro sa trongëne la itre mekun celë göne la aqane troa hnëkëne la Icasikeu Ne La Huliwa, haawe, tro hë sa ce akeukawanyi së memine la itre trejine me easë. (Rom. 1:11, 12) Nyipici, maine tro sa xomi ijin troa hnëkë hnyawa thatraqane la Icasikeu Ne La Huliwa, haawe, ijije hë tro sa kuca la hnëqa së.—2 Tim. 3:17.