Hnei Epuni Kö Hna Traan’atrun?

¹ Kola qaja hnene la ketre edromë ka hape: “E tru la hna traan, ke, tro fe a tru la hna menuën.” Nge, ketre tune ka nyipici fe ngöne la hmi së. E tru la traeme me trenge catre hne së hna hamëne troa hnëkëne la itre icasikeu, me troa cainöjëne la maca ka loi, me amamane la ihnimi së kowe la itre trejine me easë, hawe tro fe së a tru me kökötre ngöne la ua. Ngo nyipici mina fe, ngöne la ketre götran. Celëhi matre, maine easë a hnöthe la mekuthethewe së, nge tha nu’apexejene kö së la itre hni së, ke, hapeu, tro kö së a mejiune la thangane ka loi?

² Hnei Paulo aposetolo hna acile hutine la tulu ne mekune ngöne 2 Korinito 9:6 kola hape: “Nge dei fe la, ame la ate tran’acon, co fe hi la hnei angeice hna menue; nge ame la ate tran’atrun, tru fe la hnei angeice hna menue.” Hapeu, hnei epuni kö hna tran’atrun?

³ Loi e troa isa inine la Tusi Hmitrötr: E maine ajane së troa itre hlue i Iehova ka xenyë, ke, ejehi laka, nyipiewekë troa pane traan’atrune ngöne la easë a ketre sipu inine la Tusi Hmitrötr. Loi e troa tru la aja së kowe la itre ewekë ne la ua. (Sal. 119:97, 105; Mata. 5:3) Hnene la itre jolejole o drai hna uku së troa akökötrene la atrehme­kune së ngöne la ua. Celëhi matre, tro së a “anyipi ewekëne la nöjei ijin.” (Efe. 5:16) Ame itre xan, ke, angatr’a canga hlë e hmakanyi matre troa sipu inine la Tusi Hmitrötr. Nge, itre xan’a amë la itre xaa hej, thatraqane lai. Nemene la aqane tro së a menuën’atrun? kola acatrene la lapaune me mejiune së, nge atraqatre fe la madrine së, nge loi pala pehi la itre mekune së. — Rom. 10:17; 15:4; 1 Pet. 1:13.

⁴ Itre icasikeu ne la ekalesia: Ame ngöne la tusi Salamo 122:1, ke, Davita a qaja ka hape: “Ini a madin’e angat’a qaja koi ni , ka hape, tro shë kowe la ēnē i Iehova.’ ” Hapeu, hane fe kö epuni mekune tune la? Tro së a traan’atrun, e hne së hna sine palahi lo faife lao icasikeu ne la wiik. Loi e tro së a axeciëne e kuhu hni së ka hape tha tro kö a ajolë së troa sine itr’eje hnene la ngazo drai. Ejehi laka, e tru la itre itupathe hne së hna cile kow, ke, tro fe së a kapa atrune la itre manathith.

⁵ Loi e tro së a canga traqa kowe la icasikeu, me lapalapa thupen, matre hetre ijine së troa hane ce porotrike memine la itre trejine me easë. Loi e tro së a hane easenyine lo itre hne së hna tha majemi kow. Hnëkëne hnyawane jë göi icasikeu ne la ini ne la La Tour de Garde me itre xaa icasikeu, matre ijije tro së a hane qejemekun, nge jëne tro epuni hi lai a traan’atrun. Easë hi lai a “fi” la itre xane ngöne la icasikeu, matre easë hmaca kö la hna “fi”. — Ite Edomë 11:25.

⁶ Huliwa ne cainöje trootro: Easë a öhne hnyawane la thangane lai tulu ne mekun, ene la troa traan’atrun, ngöne la huliwa ne cainöje trootro. E tru la hawa hne së hna huliwa, ke, tro fe a tru la itre atr ka ajane hne së hna troa öhn, me hetre wene ka loi ne la itre vizit, me troa nyiqaane inine la Tusi Hmitrötre me itre xan.

⁷ Ame la kola hape traan’atrun, ke, eje ngöne la etrune la aqane huliwaan, memine la eloine la hna huliwaan. Ame la ketre ixatua ka tru nyine aloine la aqane huliwa ne cainöje trootro së, ke, ene lo itus Comment raisonner. Ame ngöne la götrane 9 utihë 15, ke, kola hamë së la 40 lao aqane nyiqaane ithahnata ka troa qejepengöne la 18 lao topik, nyine xatua së troa ahlëne la aja ne la itre atr. Maine hetre aja ne la atr, ke, mekune hnyawane ju matre jëne tro së a bëeke me kepe thangane la hna traan. Ejehi laka, easë a ajane tro la itre trenge catre së a thuegoje­nyine la troa inine la Tusi Hmitrötr, me inine pena la ketre atr la aqane troa traan’atrun.

⁸ E hne së hna traan’atrun, ke, tro fe së a kapa atrune la itre manathithi qa thei Iehova. — Mal. 3:10.