Manathithi La Atre Traan Atrun
1 Easë asë hi a treqen me mejiun laka, troa eatr la itre hna thingehnaean e hnine la Wesi Ula i Akötresie. Iehova fe enehila a aijijë së troa kapa la itre manathith ka nyimutre, nyine troa amadrinën la mele së. Ngo troa atraqatr la itre manathith hne së hna isa troa kapa, e tru catre mina fe la trenge catr hne së hna kuca. Celë hi hna qaja lai hnei Paulo, ngöne laka, “ame la ate tran’ atrun, tru fe la hnei angeic hna menue.” (2 Kor. 9:6) Tro sa ce wang la lue götran ka ijije koi së, troa trongën lai trepene meköti cili.
2 Huliwa Ne Cainöje Së: Maine ijije hi tro së a hane cainöjën la maca ka loi kowe la itre atr, eje hi lai, laka, troa nyimutre la itre manathith hne së hna kapa. (Ite edomë 3:27, 28) Ketre manathithi ka tru la kola traan atrun hnene la itre atr ka nyimutre, ngöne laka, angatr a catre xom la huliwa ne cainöj, me hane pionie ka ixatua, maine pionie lapaa. Ijiji së asë hi troa traan atrun, e hne së hna catre bëeke hmaca troa wang asë la itre atr ka hetre hni ne ajan, me hane nyiqaan etid me angatr. (Rom. 12:11) Maine tro sa isa thel troa kökötr ngöne la aqane cainöje cili, eje hi lai laka, tro ha ketre ithuecatr ka tru koi së, nge troa akökötrene mina fe la madrine së ngöne la huliwa ne cainöj.
3 Loi e Tro Sa Sajuën La Baselaia i Akötresie: Hnei Paulo hna hamë mekun ngöne la kola troa ‘hamën atrun,’ laka, caa pengöne hi lai mekune cili, memine la troa hamë ewekë. (2 Kor. 9:6, 7, 11, 13) Ame enehila, hetrenyi la itre nyine tro sa kuca matre troa sajuën la itre aja ne la Baselaia i Akötresie, hnene la trenge catre së maine itre ewekë së. Ijije hi tro sa hane ixatua ngöne la kola xupe la itre Uma Ne Baselaia. Atreine mina fe së troa hane nyihnyawan, la itre hnë tro sa hmi koi Iehova. Ketre, ijiji së fe tro sa ixatua troa nyithupen la itre ewekë thatraqan la ekalesia së, a memine fe la huliwa ne cainöjën la Baselaia e cailo fen, me inin la itre atr asë. Qa ngöne laka, easë asë hi a troa isa kuca la hne së hna atrein, drei kö la madrine së ngöne la easë a öhn la aqane amanathithine hnyawa Iehova, la huliwa hnei nyidrëti hna amekötine koi së!—Mal. 3:10; Luka 6:38.
4 Kola ithuecatre koi së hnene la Wesi Ula i Akötresie “troa kuca la loi, me mana ngöne la nöjei huliwa ka loi, me troa ham, me loi qanathan la ite ewekë i angat.” Maine tro sa tro thenge hnyawa la eamo cili, tro hë së a kapa enehila la itre manathith ka sisitria. Ame mina fe ngöne la ketre götran, tre, “troa amë thatraqai [së] la trepene ka loi nyine thatraqan’ epin, [me] nyipi mel,” itre ewekë lai ka troa traqa.—1 Tim. 6:18, 19.