Sisedrëne Jë La Aja Hna Öhn
1 Ame ngöne la easë a cainöje trootro, ke, hna xom’aconyi së hnene la traeme ne troa ce ithahnata memine la ketre atr ka ajan. Ame la huliwa ne ini, ke, hna nyiqaane kuca ngöne la kola iwaihmaca, nge thupene lai, troa inine la Tusi Hmitrötre kowe la itre atr. (Mata. 28:19, 20) E ajane së troa hetre thangane la hne së hna troa inin, ke, loi e tro së a wange hmaca lo hne së hna ce ithahnataane ngöne lo xötrei iöhny, nge thupene lai, troa hnëkëne hnyawaane kowe la iwaihmaca.
2 E maine epuni a ithahnataane la jole ka eje thene la itre fami, ke, ma ijije tro epuni a ce wange la itre mekune ngöne la mekene 29 ne lo itus “Vivre éternellement.” Ijije tro epuni a qaja ka hape:
◼ “Ame lo traqa hnapane ni, ke, hnei nyiso hna ithahnataane la inamacane qa ngöne la hna xötrethengene la itre eamo ne la Tusi Hmitrötre matre troa ce mele madrine la fami. Hapeue la mekune i epun, nemene la kii ka ijije matre troa caasi la itre fami enehila?” Nue pi troa sa. Fe jë kowe la götrane 247, paragarafe 27, nge e jë la Kolose 3:12-14. Qaja jë la itre mekune ka amamane la aqane tro la nyipi ihnim’a acaasine la itre fami. Qejepengöne jë la eloine e troa inine la itus Vivre éternellement a xatua angatre troa cile kowe la itre jol.
3 E maine hnei epuni hna ithahnataane la engazone la aqane mele ne la fene hnengödrai ngöne la xötrei iöhny, ke, ijije tro epuni a sisedrëne tune la:
◼ “Nyipici, ma tro jë hi a caasi la mekune së ka hape e ajane së troa mele tingetinge palua, ke, nyimutre catre la itre ewekë nyine troa kuca. Tusi Hmitrötr’a amamane ka hape Satana la pane qeqe ne la itre ka ajolë së. Alanyimu la itre ka isa hnyingëne ka hape pine nemene matre Akötresieti palahi a nue angeice qaan’ekö. Hapeue la mekune i epun?” Nue pi troa sa. Fe jë kowe la götrane 20, paragarafe 14, me 15, ngöne la itus Vivre éternellement, nge qejepengöne jë la kepine matre tha hna apaatrene triji Satana palakö. Nge thupene lai, e jë la Roma 16:20, kola amamane la hne së hna treqene ngöne la itre drai ka calemi.
4 E maine hnei epuni hna ithahnataane la itre manathithi ka troa xulu qa ngöne la musi ne la Baselaia, ke, ame ngöne la ijine iwaihmaca, ke, qaja ju ka hape:
◼ “Tro la Baselaia i Akötresieti a hamëne la itre manathithi ka sheminge kowe la fen, me kowe la nöjei atr. Hna amamane la itre manathithi celë ngöne la itre iatr ne la götrane 12, me 13. Nemene la ewekë e cahu hnine hnei epuni hna ajan? [Nue pi troa sa.] Pane mekune ju pe la mele ka troa hetrenyi ngöne la fene hnengödrai ka tune la.” E jë la paragarafe 12. E maine hetre aja hna amaman, ke, hamëne jë lo hnyinge hna cinyihane ngöne la paragarafe 13, nge ce ithahnataane jë. Amamane hnyawaane jë la aqane sa hnene la mekene celë la itre hnyinge ka kösau, ene lo itre manathithi ka troa eje qa ngöne la Baselaia, nge qaja jë ka hape hetre madrine i epuni troa bëeke hmaca troa ce ithahnataan’itrej.
5 Ijije tro epuni a nyiqaane inine la Tusi Hmitrötre kowe la ketre atr, hanawange la ketre aqane nyiqaan:
◼ “Hna wangatrehmekune hnene la ka alanyimu laka Tusi Hmitrötr’a sa la itre hnyinge i angatre ka kösau jëne la itusi celë.” Fe jë kowe lo götrane hna fejane lo itre meken, nge hnyingëne jë ka hape: “Nemene la taane mekune hnei nyipëti hna ajane troa atrepengöne hnyawa?” Nue pi troa sa, fe jë kowe la mekene hnei nyidrëti hna iën, nge e jë la pane paragaraf. Qejepengöne jë la aqane tro la itre hnyinge e kuhu fene la götran’a sa hmekune la itre mekune ka sisitria ngöne la itre paragaraf. Ce ithahnataane jë la caas, maine lue paragaraf, nge ce axeciëne jë kowe la ketre iwaihmaca.
6 E maine easë a sisedrëne la aja ngöne la itus Vivre éternellement, ke, easë lai a amamane la aja së troa kuca apexejene la huliwa së. (2 Tim. 4:5) Nge tro së a xatuane la itre ka drei së troa hane mejiune kowe la mele ka tha ase palua kö.—Ioane 17:3.