Pine Nemene Matre Nyipiewekë Catre Troa Fejane La Itre Hnalapa Ka Pë Atren?

¹ Hnene la lue temoë, lue trefëne hna canga nyiqaane la huliwa ne cainöje i nyidro e hmahmakany. Nge, ngöne ju fe kö la drai cili, ke, hnei nyidroti hna bëeke kowe lo itre hnalapa ka pë atren. Hnene la ketre trahmanyi hna kepe nyidro, me drei nyidro hnyawa. Hnei nyidrëti hna xome la itusi Vivre éternellement, me hnyingëne ka hape tro hmaca kö nyidroti a bëek. Tha ase kö nyidrëti hane porotrike ekö me itre temoë i Iehova, celë hi matre nyimutre la itre hnyinge hnei nyidrë hna ajane troa atrepengöne hnyawaan; nge nyiqaane ju fe kö nyidro inine la Tusi Hmitrötre me nyidrë. Atraqatre pi hë la madrine ne la lue trefëne hnene laka, hnei nyidroti hna öhne la ketre atr hna aceitunëne me mamoe. Hapeu, ajane kö epuni troa hane trothenge la tulu celë? E tro së a fejane hnyawaane la itre hnalapa ka pë atren, me canga bëeke hmaca troa wang’itr’ej, ke, ijije tro fe së a hane öhnyi thangane ka loi.

² Hna amekunë së palahi la enyipiewëkëne la troa fejane la itre hnalapa ka pë atren, me canga bëeke hmaca troa wang. Tune la hna amamane ngöne la tulu ne lo lue trefën, ijije troa hetre thangane ka loi qa ngöne la ketre iwaihmaca hna kuca ju kö ngöne la drai. Maine jë easë a huliwan’apexejene la teritoare hna athipe koi së, ngo tha fejane kö së la itre hnalapa ka pë atren. Itre xan’a qaja ka hape: ‘Hna cainöje palahi ngöne la teritoare e thupene lue wiike maine könitre; tha nyipiewëkë kö troa fejane la itre hnalapa ka pë atren, pine laka easë hi la, matre kuca hmaca jë së la teritoare celë.’ Ngo, kolo hi lai a amamane koi së laka loi e tro së a xomi not. Kola upi së jëne la itre teritoare hna huliwaane lapaan, troa wange hnyawane hmaca la itre hnalapa ka pëkö atren, matre thele hnyawa la itre atr ka ijije troa drei së. Kola hapeu lai?

³ Ngöne la itre nöje ka kösau, ke, 50  nge sin koi ala 100 lao atr, ka tha lapa kö ngöne la itre hnalapa i angatre ngöne la drai. Ejehi laka, easë a atrune la teritoare së, e hne së hna nyipiine me wang’atrune la itre hnalapa ka pë atren. Ngacama itre teritoare tha hna huliwaane lapaane kö, ngo ame pe, ke, ijije troa hetre thangane ka loi hnene la hne së hna catre troa thele la nöjei atr ne la teritoare qëmekene la troa hamën’ej.

⁴ Loi e tro së a ami ijine matre bëeke troa wange ngöne la ketre drai, e ijije hi, ke, loi e troa wange ngöne la wiik. Alanyimu la itre ka öhne laka loi e troa bëeke ngöne la ketre drai, ngo ngöne pe la ketre hawa. Maine jë epuni a iëne troa ami ijine e mecixeni me sabathi troa wange lo itre hnalapa ka pë atrene hna fejane ngöne la wiik. Ame fe la ketre ijine ka ijij, ke, hna wangatrehmekune hnene la itre ekalesia ka nyimutre laka hetre thangane ka loi troa cainöje e hej. Ejehi laka, nyimutre la itre atr hnei angatre hna öhne ngöne la ijine cili.

⁵ Loi e tro epuni a fejane la itre nyine troa wange hmaca ngöne la itusi ne xomi note i epun. E maine tha ijiji epuni kö troa bëeke hmaca kowe la itre hnalapa ka pë atren, ke, loi e tro epuni a hamëne la pepa hnei epuni hna fejane kowe la trejine ka elemekene la gurup, matre tro pena la itre xaa trejin’a huliwaan’eje ngöne la angatr’a troa cainöje ngöne la teritoar.

⁶ E tro së a nyipiine la götrane ne la huliwa ne cainöje celë, ke, ijije troa kökötre me atraqatre la thangane la huliwa së, nge tro fe a tru la madrine së. Ketre, lapa hnyawa la itre hni së ke atre hnyawa së laka easë a sine thel, me xatuane la itre atr hna aceitunëne me mamoe.​—⁠Ezek. 34:​11-14.