Ketre Huliwa Ka Ketre Pengöne 16 Okotropa Koi 12 Nofeba!
1 “Calemi Catre Hë La Pune La Itre Hmi Ka Thoi!” Celë hi taan la Itre Ithuemacanyi Ne La Baselaia Na. 37, hna nyiqaane troa tro fë e cailo fen, e treu ka troa xulu. Ame ngöne la qaane uti hë e nyipine treu Okotropa, tro sa tro fë la itre zonal La Tour de Garde me Réveillez-vous ! Qaane e thupene hmi 16 Okotropa, uti hë sabath 12 Nofeba, tro sa hane catre thawa trongën la Itre Ithuemacanyi Ne La Baselaia Na. 37. Ame ngöne la itre mecixeni me sabath, tro sa ce hamëne itre ej memine la itre zonal hna xötrei kapa.
2 Drei La Itre Ka Troa Sin: Loi e tro asë hi la nöjei ka cainöj, a catre tro fë la maca ka loi. Ijije hi tro itre xan a hane pionie ka ixatua. Hapeu, hetre nekö i nyipunieti kö maine itre hnainine pena ka kökötr ngöne la götrane la ua? Xatua angatre jë troa ithanata memine la itre qatre thup matre troa atre maine ijiji angatre fe hë troa itre ka hane cainöj thaa hna bapataisone petre kö. Loi e tro la itre qatre thup a thele troa ithanata memine la itretre cainöje ka nango nanazij, matre troa ithuecatre koi nyudren troa hane xome hmaca la huliwa ne cainöj, maine jë troa ce huliwa memine la itretre cainöje ka maca ngöne la huliwa.
3 Troa iupi fë la Itre Ithuemacanyi Ne La Baselaia Na. 37 kowe la nöjei ekalesia asë, nge loi e troa ijije kowe la itretre cainöj me itre pionie troa isa xome la 40-50. Tro fe a hane kapa hnene la itre hnainin ka thaa cainöje petre kö, la isa faif, matre troa hane tro fë kowe la itre atren la fami me itre sinee. Loi e tro asë hi la itretre cainöj me itre pionie a e la etrune la itre hnei angatr hna tro fë trongën, me fejane lai e hutröne la itre rapor ne cainöje i angatr ngöne la pune la treu Okotropa me Nofeba. Tro la seketere a fejane wengën la etrune asë la itre pepa hna tro fë, me iupi fë kowe la Bethela ngöne la pune la lue treu. Ame pë hë la Itre Ithuemacanyi Ne La Baselaia ka lapa pe thupene la hna huliwa ngöne lo lai lue treu, troa tro fë itre ej ngöne la nöjei götrane ne la huliwa ne cainöje së.
4 Nyine Troa Qaja: Thaa tro kö a aqeane menune la aqane troa nyiqaane ithanata, matre troa aijijë së troa hane thawa fe kowe la itre atr ka ala nyimu la maca. Qaja jë ka hape: “Eni a ce thawa memine la itre atr e cailo fen la ketre maca ka nyipi ewekë catr, ceitune me ketre huliwa ka hetre thangane ka loi kowe la itre atr. Hane fe la pepa i epun. Eni a sipone matre tro nyipunieti a hane e.” Thaa nyipi ewekë kö troa xometrongë watreng ngöne la kola cainöj ngöne itre hnalapa trootro. Loi e troa xecie hnyawa koi së troa cinyihane la ëjene la itre atr ka drei së.
5 Troa Kuca Tune Kaa La Teritoare i Nyipunie: Thaa tro hmekuje kö a tro fë trongëne la Itre Ithuemacanyi Ne La Baselaia e cahu gojeny, ngo ka loi mina fe troa tro fë itre ej ngöne la hna cainöje ngöne itre hnalapa trootro me ngöne la itre hnë salem. Xome hnyawa ju la itre hnalapa ka pë atren, nge tupathe jë troa wange itre ej ngöne la itre traem ka isapengön maine ngöne la ketre drai ne la wiik. Qaane e thupene hmi 6 Nofeba, troa amë la isa caa pepa ngöne la itre hnalapa ka pë atren. Ngo maine tru hnei teritoare ne la ketre ekalesia nge co pë hë la traeme ne troa kuca itre ej, haawe, maine jë tro la itre qatre thup a thele matre troa amë la Itre Ithuemacanyi Ne La Baselaia ngöne la itre hnalapa ka pë atren, ngöne lo hneijin ne troa tro fë itre ej.
6 Easenyi catre hë troa apaatrenyi “Babulona Atraqatr.” Nyipi ewekë tro la itre atr a canga lö pi qa hnin, qëmekene troa apaatrene ej palua. (Hna ama. 14:8; 18:8) Canga hnëkëne jë enehila troa sine hnyawa lai huliwa cili e cailo fen, matre troa atre asë hnene la nöjei atr laka, calemi catre hë la pune la itre hmi ka thoi!