Xatuane Jë La Itre Xaa Atr Troa Kapa La Atrehmekune Ka Ithuejë Kowe La Mel
1 Hnei Paulo aposetolo hna qaja ka hape ‘Akötresie a ajane tro la nöjei ate asëjëihë a mele me wangate hmekune la nyipici.’ (1 Tim. 2:4) Tro së a xatuane tuneka la itre xane troa hetrenyi la atrehmekune cili? Ame la ketre aqane kuca, ke, ene la troa wange hmaca la itre atr ka hetre aja kowe lo itus, nge hna xomexatuane la aja cili jëne la itus La connaissance qui mène à la vie éternelle. Kola amamane hnyawa hnene la itusi la nyipici qa hnine la Tusi Hmitrötre hnene la itus celë, tha jole kö troa trotrohnin, nge hna iëne hnyawa la itre hnepe hnëewekë. Maine tro la nöjei atr asë ka kösau a inine ej, ke, tro hë eje a jëne mele koi angatr. Nemene la nyine tro së a qaja matre troa upe la itre xane troa ini Tusi Hmitrötre me easë?
2 Ame kowe la itre ka amamane la madrine i angatre kowe la Tusi Hmitrötre kösë ketre tulu ka loi, ke, ngöne la epuni a bëek, hnyingëne ju ka hape ajane kö angeice troa etid, qaja ju ka hape:
◼ “Ame ngöne lo ketre traqa ni, ke, hne so hna ithahnatane la kepine matre loi e tro së a mejiune kowe la Tusi Hmitrötre kösë ketre tulu ka loi koi së me iuji së. Eje hi laka, Tusi Hmitrötre la nyipi jëne keukawa, me mejiune, hnene laka mekuana i Akötresie hna cinyihan, celë hi hna anyipicine hnene la ketre aposetolo i Keriso. [E jë la Roma 15:4.] Ngöne la pune lo porotrike so, ke, hnenge hna qaja la ketre hnyinge ka hape, Nemene la itre eloine hne së hna isa sipu kapa qa ngöne la atrehmekune ka ej hnine la Tusi Hmitrötr?” E jë la paragarafe 18 ngöne la götrane 11 ne la itus Connaissance. Qaja ju laka faifi milio lao atr e celë fene hnengödrai ka inine la Tusi Hmitrötre memine la itre Temoë i Iehova, nge ngöne la nöjei götrane ke, kola xatuane la itre atr troa hetrenyi la atrehmekune ka ithuejë kowe la mele ka pë pun. Amamane jë la aqane trongene la etid, tha tro pe a aqean, nge ce ithahnatane jë lai faifi lao pane paragarafe hnapane ngöne la mekene 1.
3 Maine hnei epuni hna ithahnatane la thithi memine la atr ngöne la xötrei iöhny, ke, tupathe ju la aqane tro fë celë, nge thele jë troa nyiqaane inine la Tusi Hmitrötr:
◼ “Eni a mejiune laka, hnei nyipëti hna madrine lo itre mekune ka qaja la thithi hne so hna ce e qa hnine lo itus La connaissance qui mène à la vie éternelle. Hnenge hna qaja koi nyipë ka hape tro hmaca ni a bëeke troa ce wange me nyipë la aqane tro la itre ka thithi koi Akötresie a hane drei Nyidrëti fe. Pane goeëne ju la hna qaja ngöne la götrane 158. [E jë la paragarafe 18.] Qa ngöne lai, easë a drenge la hnei Akötresie hna qaja koi së ngöne la easë a inine la Tusi Hmitrötr. Maine tro së a trongëne lai, ke, tro së a easenyi catre koi Nyidrë, nge tro Nyidrëti a xatua së troa cile kowe la itre jole hne së hna thithi fë. Atraqatre la madrinenge troa inine la Tusi Hmitrötre me nyipë.” Maine ajane hi lai atr, ke, nyiqaane jë la mekene waane lai itus Connaissance.
4 Maine hnei epuni hna xome la aqane tro fë ka nyiqaane mekötine la ini Tusi Hmitrötr, ke, sisedrëne jë lo porotrike i epuni hnapan:
◼ “Atraqatre la madrinenge troa bëeke hmaca pine laka eni a ajane troa qejepengön hnyawa koi nyipë la porogarame ne ini Tusi Hmitrötr, nge pëkö thupen. Hnenge hna amë pe lo itus, La connaissance qui mène à la vie éternelle, ke, eahuni a inine la Tusi Hmitrötre kowe la itre atr jëne la itusi cili. Pane goeëne ju la aqane xatua së hnene ej troa wangatrune la Wesiula i Akötresie. [E jë la paragarafe 23 ngöne la götrane 22.] Maine ijije tro nyipë a xome lo itus, matre tro hmaca nyiso a ce sisedrëne la etid qaane lo mekune hne së hna hmaca ngön lo ketre ijin.” Maine tha hna nyiqaane inine kö la Tusi Hmitrötre ngöne kola xötrei iöhny, ke, qaja ju ka hape: “Ma ijine hi la tro ni amamane la aqane inine huni la Tusi Hmitrötr.” Ce wange ju matre troa sa drai göi troa bëeke hmaca thatraqane la ketre etid.
5 Maine hne së hna huliwane hnyawane la itus Connaissance, ke, atreine hi së troa jume kösë itine feja lo atrehmekun, ene lo jëne manathithi ne la itre xaa atr. (Ite Edo. 15:7) Ame kowe la itre ka hni ka meköt, ke, tro lai a hamë madrin, me ithuecatre koi angatre troa mele thenge la emeköti i Iehova, me eatrongë angatre kowe la mele ka tha ase palua kö.