Kola Sa La Itre Hnyinge i Nyipunie
◼ Ije treu ne troa ini tusi memine la ketre atr, jëne la itus Connaissance?
Iehova a amanathithine la organizasio i Nyidrë enehila. Kola mama lai, ngöne la etrune la itre atr ka xötrei kapa la nyipici ngöne la nöjei macatre, itre thauzane pala hi. Kola öhne fe laka, ketre jiane huliwa ka hetre thangane catr la itus Connaissance thatraqane la huliwa cili. Hna qaja ngöne La Tour de Garde ne 15 Januare 1996, ka hape, hna hnëkëne la itusi cili, matre troa xatuane la atr ka ini Tusi Hmitrötre troa canga kökötre ngöne la ua, nge ma troa xome la bapataiso thupene la itre treu ka xalaithe hi.
Celë hi kepine matre, önine la ixatua hna hamëne hnene La Tour de Garde cili, ngöne la götrane 17, ka hape: “Maine ase hë afenesine la etid ne la ketre atr, jëne la itus Connaissance nge hnei angeice fe hë hna xome la bapataiso, thaa nyipiewekë hmaca kö troa xome la hnaluene itus matre troa sisedrëne la ini tus.”
Nge tuneka kö la atr ka thaa xomi bapataiso, ngo ase hë afenesine la etid ngöne lai itus Connaissance? Hna amexeje nyine amekunë së hnene la Huliwa ne Baselaia ne treu Juun 1996, götrane 6, paragarafe 23, lo mekune ka eje e hnine La Tour de Garde, laka, thaa tro kö a xome hmaca la itre xaa itus matre troa sisedrëne la etid, e ase hë afenesine la itus Connaissance. Hapeu, kolo lai a hape, pë hë ixatua nyine tro së a hamëne e traqa ha së ngöne la pune lai itus? Ohe. Easë a ajane tro la itre atr a kapa la atrehmekune ka ijij ngöne la nyipici. Ngo kola mekune laka, ngöne hi la itre hnepe ijine ka xoxopatr, ijije hi tro la ketre trejine ka hamë ini, troa xatuane la ketre atr ka hni ka menyik, troa kapa la atrehmekune ka aijijë angeice troa ketre mekune troa nyihlue i Iehova. Troa nyimutre la i
tre xaa hna inine ka ajane troa anyimua etid ngöne la wiik, hnene laka, pëkö ka sewe angatr.
Eje hi laka, troa jole koi itre xane troa canga xome me trotrohnine la atrehmekun. Ngo maine qea catre menu pala ha la hna etidi ngöne la itus Connaissance, nge thaa ase pala kö mekune hnene la hna inine laka, aja i angeice troa hane lö hnine la ekalesia, loi e tro la atre cainöje a ce ithahnatane la ewekë cili memine la ketre e itre qatre thup, ka hane sine lo comite ne huliwa ne cainöje ne la ekalesia. Maine kola cile kowe la itre xaa ewekë ka jole catre hnene la hna inin, atreine hi troa hamëne koi angeice la itre xaa hnepe ixatua. Ka ihmeku la mekune cili memine la trepene meköti hna cinyihane ngöne la paragarafe 11 me 12 götrane 17 ne La Tour de Garde ne 15 Januare 1996.
Maine hetre madrinene la hna inine troa kapa la nyipici, ngacama hnepe atrehmekune petre kö la ka eje thei angeic, tro hë lai itre hnei angeice hna inine a upi angeice troa hane sine la itre icasikeu i keresiano. Jëne tro la hna inine lai, a amamane la itre xaa hatrene la aja i angeice troa nyihlue i Iehova. Maine thaa mama kö la aja cili, nge qea catre hë la hna etid ngöne lai itus Connaissance, ma loi e troa amë lai ini tus.