Xatuane Jë La Itre Fami Troa Hane Kapa La Mele Ka Epine Palua
1 Hna qaja hnene la ketre trahmanyi ka trene pepa ka hape, “Hetre thangane ka loi la meciun,” nge öni angeice fe, ka hape: “Ijije hi tro epuni a meciun, nge nyine loi lai koi epun.” Celë hi aqane sajuëne me adraiëne hnene la fen, la troa isa thele ajane nge trije ju pë hë itre xan, a kösë ketre jëne troa nyitrepene la mele ne la ketre atr ngöne la itre drai elany. Ngo itria catre kö lai memine la ini hna hamëne hnei Iesu kowe la keresiano, laka, tro angeice a “xele angeice kö . . . ke nemene la thangane kowe la ate, e tro nyën’a hetrenyi la fene hnengödrai asë, nge ngazo pe la mele i nyën?” (Mata. 16:24-26) Maine ketre atr a thele loi thatraqane la mele i angeice elany, nyipi ewekë tro angeice a nue la mele i angeice ka pexeje troa kuca la aja i Akötresie—celë hi aja lai ka sisitria hna troa thele hnene la itre fami enehila. (Sal. 143:10; 1 Tim. 4:8) Hna hamëne la maca celë ngöne la mekene ka nyipune la itus Le secret du bonheur familial. Kola troa xatuane la itre atr hnene la itusi ka hnyipixe celë, troa wange hnyawa la itre mekune ka nyipi ewekë catre ngöne la mel, memine la aqane tro angatre a ujë kowe la fami i angatr, matre hetre thangane ka loi thatraqane la itre fami i angatr. Pine laka, easë pala hi a cainöjëne la maca ka loi ngöne la nöjei götran, haawe, nemene la nyine tro së a qaja ka troa xatuane la itre hne së hna troa iöhnyi memin, matre tro fe angatre a hane e la itus Bonheur familial? Hanawange la itre xaa mekun:
2 Maine epuni a iöhnyi memine la itre atr ngöne la itre hnalapa trootro, maine itre gojeny, tupathe ju troa amamane la tarak “Une vie de famille heureuse” matre nyine nyiqaane ithahnata. Hnyinge ju ka hape:
◼ “Pine laka, tru la nöjei pengöne jole ka xulu qa ngöne la aqane mele enehila, hapeue la mekuna i epun, atreine kö troa mele madrine hnene la fami? [Nue pi troa sa.] Kola amamane hnyawa koi së hnene la tarake celë laka, ijije hi troa aejëne lai. Ajane fe kö epuni troa hane e ej?” Maine hna kapa la tarak, qaja jë ka hape: “Pine laka, epuni a pi hane atrepengöne la topike celë, atreine fe tro epuni a kapa madrine la itusi celë ka hamëne la itre eamo ka nyimutre ngöne la aqane troa hetrenyi la manathithi e hnine la fami.” Amamane jë la itre aliene nyine troa ce ithahnatane ngöne la itus Bonheur familial. Köjane ju la itre xaa taan ka troa ahlëne la aja ne la atr. Fe jë kowe la götrane 10, nge e jë la hnaewekë hnapin ne la paragarafe 17 uti hë la pune la paragarafe 18. Hamëne ju la itus me qaja ka hape, hetre nyine tro pala kö epuni a qeje pengön, nge isapui ju matre troa iwai hmaca.
3 Atreine hi tro epuni a sisedrëne lo porotrike i epuni ngöne lo mele ne fami ka madrin, öni epuni jë hi:
◼ “Eni a ajane troa pane amamane koi epuni la ketre ewekë ka troa amadrinë epun, hnine lo lai itusi hnenge hna hamë epun. Kola qaja atrune ngöne la mekene hnapine ne la itus, la sipu jëne madrine kowe la fami. [E jë la paragarafe 2 ngöne götrane 183.] Epuni a öhne laka, ame la kii ke, ene la troa kuca asë hnene la fami la aja i Akötresie. Eahuni a xatuane la itre fami tro angatre a ce inine la Tusi Hmitrötr, matre troa atre la aja i Akötresie memine la aqane troa trongëne eje e hnine la hnalapa. Eahuni a ajane troa inine la Tusi Hmitrötre memine la itre atr, pëkö thupen, ketre, thaa qea kö la itre hnepe treu ne troa etid, nge fenesi fe hë. Maine ajane epun, tro hë ni a pane amamane koi epuni la aqane trongene ej.” Bëeke hmaca jë fë la boroshüre Nemene La Hnei Akötresieti Hna Thele The Së? maine itus Connaissance, wange ju la ka ijije e lu ej.
4 Ngöne la kola ithahnata memine la itre sine ce ini maine itre thöthi pena ngöne la teritoar, atreine hi tro epuni a sa la hnyinge celë:
◼ “Hapeu, nyipi ewekë kö kowe la itre keme me thine memine la itre nekö i angatre troa catre ifekeune la itre mekun? [Nue pi troa sa.] Goeëne ju la hna qaja hnene la sine itusi celë ngöne la mele ne fami, kola ithahnatane la ‘mekune hna hape ‘Inyipicikeu ju nge ifekeune hnyawa jë la itre mekun.’ [E asë jë la paragarafe 4 memine la pane hnaewekë ne la paragarafe 5 ne la götrane 65 ne la itus Bonheur familial.] Kola hamëne hnene la itre paragarafe thupen, la itre ixatua ka lolo ngöne la aqane troa ifekeune hnyawa la itre mekune e hnine la fami. Hna ati ëjene la itusi cili, ka hape, Le secret du bonheur familial. Eahuni a hamëne la itusi celë koi 150 F la thupen.” Qaja ju fe ka hape, tro hmaca epuni a bëeke troa ce ithahnatane la itre mekune hnei angeice hna troa e hnine la itus.
5 Ijije hi tro epuni a eköthe lo mekune hnei epuni hna ithahnatane memine la ketre thöth, ngöne la aqane troa ifekeune la itre mekune hnei keme me thine me ha kuku, öni epuni jë:
◼ “Eni a madrine laka, epuni fe a hane wangatrune la enyipiewekëne la troa ifekeune la itre mekune e hnine la fami i epun. Hapeu, nemene jë fe koi epuni la topike ka nyipi ewekë nyine troa ce ithahnatane hnene la itre keme me thine memine la itre neköi angatr?” Nue pi troa sa. Thupene lai, fe jë la itus Bonheur familial kowe la götrane 68, nge e jë la mekune ka sa lai hnying, ngöne la itre pane hnaewekë paragarafe 11. “Ame la ketre aqane troa kuca ka sisitria matre troa kapa la ini qa thei Akötresie, ke, ene la troa inine la Tusi Hmitrötre ngöne la nöjei wiik.” Amamane ju la boroshüre Nemene La Hnei Akötresieti Hna Thele The Së? Qaja jë ka hape, kola hamëne hnyawa hnene la 16 lao ini e hnine ej, la mekune ka tru ka nyitrepene la maca ne la Tusi Hmitrötr. E jë la itre mekune ka nyiqaane la itus götrane 2, nge ce ithahnatane ju la pane ini ne la boroshür.
6 Maine epuni a iöhnyi memine la ketre keme maine thine ngöne la hna cainöje ngöne itre hnalapa trootro, maine ngöne park, maine ngöne ketre hna elo, epuni a ahlëne la aja i angeic, me hape:
◼ “Xecie koi ni laka, troa ceitune la mekune so, ngöne la etrune la ejolene enehila la troa hetrune la itre nekönatr. Nemene la ka ijije troa thupëne la fami i epuni qa ngöne la iajojezi ne la ngazo? [Nue pi troa sa.] Hetrenyi e celë la itre ixatua ka sisitria hnenge hna kapa.” Qeje pengöne jë la iatr ngöne paragarafe 1 nge e jë la paragarafe 2 götrane 90 ne la itus Bonheur familial. Qaja jë la aqane tro eje a hamëne la itre hna amekötine hna tuluthe hnyawa, ka troa thupëne la itre fami qa ngöne la iangazo. Hamëne ju la itus, nge thele jë troa sa hnyawa la itre hnying.
7 Ngöne la kola wange hmaca la ketre keme maine thine ka kapa la itus, “Bonheur familial,” epuni a sisedrëne jë la porotrike me hape:
◼ “Ame ngöne lo nyiso a xötrei iöhny, hnenge hna öhne laka, hetre ajane thei epuni troa hetrune hnyawa la itre nekö i epun, nge epuni a thele troa kuca asë la hnei epuni hna atreine troa thupë angatre qa ngöne la itre iajojezi. Ma thaa ase pala kö epuni e, ngo hetrenyi la ketre mekune ka nyipiewekë hna cinyihane hnine lo itusi hnenge hna hamë epun, ketre mekune nyine tro epuni a hane goeën. [E jë la paragarafe 19 ngöne götrane 59.] Maine easë a ajane troa hane lolo la aqane imelekeu së me Akötresie, ke, nyipi ewekë tro së a hane atre Nyidrë jëne la Wesiula i Nyidrë, ene la Tusi Hmitrötr. Hapeu, ajane fe kö epuni tro ni a pane amamane koi epuni la aqane trongene la ini Tusi Hmitrötre memine la fami?”
8 Pine laka, thatreine kö la itre atr ka hamë eamo troa amamane la aqane troa kapa la manathith, haawe, kola hace la itre fami, nge pë hë mejiune i angatre koi atr. Catre pi troa tro fë trongëne la itus Bonheur familial kowe la nöjei atr asë, matre troa hane xatua angatre hnene la Wesiula i Akötresie, troa hane mejiune kowe la mele ka epine palua.—1 Tim. 6:19.