Catre Pi Së Troa Tro Fë La Itre Ithuemacany Ne La Baselaia Na. 35
1 Troa sisitria catre la treu okotropa, me treu nofeba koi së asë. Ngöne la 11 lao pane drai ne la treu okotropa, easë a troa tro fë la itre zonal, La Tour de Garde, me Réveillez-vous! Ame hë ngöne la sabathi drai 12 ne la treu cili, uti hë la sabathi drai 16 ne treu Nofeba, easë a troa ce tro fë memine la itre trejine ne la fene hnengödrai asë, la Itre Ithuemacanyi Ne La Baselaia Na. 35. Qä së troa tro fë kowe la nöjei atrene la nöje së, la maca ka sisitria celë. Eje a sa la hnyinge hna hape, “Hapeu Tro Kö a Eje La Ihnimikeu Thene La Itretre Lapa Iasenyi?” Ngöne la ijine cainöje cili, ketre ijine ka ketrepengöne kö, easë a troa tro fë trongëne la Itre Ithuemacanyi Ne La Baselaia Na. 35 ngöne la itre drai ne la wiik. Ame ngöne la mecixeni me sabath, thaa Itre Ithuemacanyi Ne La Baselaia hmekuje kö la nyine troa tro fë, ngo itre zonale fe.
2 Drei La Ka Ijije Troa Tro Fë Lai Tarak Cili? Tune la hna majemin, tro pala hi la itre qatre thupe a cilëmekene la huliwa. Tro asë hi së isa ala caasi a madrine troa tro fë la Itre Ithuemacanyi Ne La Baselaia, nge ma troa ala nyimu catre la itre trejine ka troa xome la huliwa ne pionie ka ixatua ngöne lai caasi maine lue treu ne huliwa. Ame koi itre ka thaa tro kö a hane pionie, ma aja i angatre pe troa akökötrene la itre hawa ne cainöje i angatr, maine jë troa nango sasaithe lo itre hawa hna majemine kuca ngöne la huliwa ne cainöj.
3 Hapeu, epuni a hane etidi kowe la ketre atr ka wangatrune hnyawa la ini hnei epuni hna hamëne jëne la itus, Connaissance, nge ka easenyi hë troa hane nyiqaane cainöje trootro? Maine jë, ijije fe hë tro angeice a ketre atre cainöje hna thaa bapataisone petre kö, matre troa hane tro fë la Itre Ithuemacanyi Ne La Baselaia. E kola ajane troa hamëne lai tarak, the nyiejolene kö la aqane troa nyiqaane ithahnata. Maine jë troa qaja ka hape: “Pine laka, nyipi ewekë catre la maca celë, haawe, kola troa tro fë trongëne eje ngöne la treu celë kowe la fene hnengödrai asë; pëkö ejolene tro la nöjei atr a trotrohnine ej, pine laka, hna ujëne eje kowe la 169 lao qene hlapa. Eni ajane troa hane hamë nyipëti la ketre.” Ijije fe tro la itre nekönatre a hane xome la huliwa ka sisitria celë.
4 Loi e troa xatuane hnene la itretre elemekene la itre Ini Tusi ne la ekalesia, la itre atrene la itre Ini Tusi cili, troa isa catre tro fë la Itre Ithuemacanyi Ne La Baselaia Na. 35. Hetrenyi mina fe la itretre cainöje ka nanazije matre thaa hane hmaca kö angatre cainöj, ngo jëne la itre xaa hnepe ixatua hna hamëne koi angatr, haawe, angatre hmaca ha a hane xome la huliwa ne cainöj. Loi e tro la itre qatre thupe a pane wai angatre isa ala caas, me hamëne la ixatua ka ijije matre tro fe angatre a hane ce tro fë la Itre ithuemacanyi Ne La Baselaia memine la itre trejine ka macaje ngöne la huliwa ne cainöje trootro.
5 Eu La Ijine Troa Traqa Itronyi Troa Cainöj? Loi e troa hnëkëne me sa la itre ijine ka ijije nge ka hmaloi kowe la itretre cainöje ka troa xome la huliwa cili. Maine ijij, loi e troa hetre icasikeu göi cainöje trootro ngöne la nöjei drai ne la wiik, me ngöne la nöjei mecixeni me sabath, memine fe e heji lapa. Itre drai la hna hnëkëne ka troa aijijëne la itretre cainöj, me itre pionie troa catre cainöje ngöne la ijine cili. Hna sa traemene fe la itre xaa icasikeu göi cainöje trootro e hejihej, matre thatraqane la itre ka fenesi qa hna ini, me itre ka ase huliwa, me itre xane ju kö. Loi e troa xecie kowe la atre thupëne la huliwa ne cainöje laka, troa munë la teritoar, itre hnalapa me itre magazë hna troa cainöje trootro ngön; ketre, matre atreine tro së isa ala caasi a akökötrene hnyawa la huliwa së. Maine easë a traqa itronyi ngöne la ketre teritoar, nge easë a öhne laka, ala nyimu catre së, loi e tro pala hi së a thupëne matre troa tro aconyi ngöne la kola isa thewe götrane teritoar.
6 Tuneka Koi Itre Hnalapa Ka Pë Atren? Ame la aja së ke, ene la troa nyimutre catre la itre atr hne së hna sipu ithahnata memin; qa ngöne lai, atreine hi tro së a qeje pengöne hnyawa koi angatre la kepine matre, loi e tro fe angatre a hane e la Itre Ithuemacanyi Ne La Baselaia Na. 35. Haawe, maine pëkö atrene la hnalapa ngöne la epuni a hë, cinyihane ju la aderesi angeic, nge bëeke hmaca jë ngöne la itre hawa ka isapengöne ngöne la drai. Maine kolo ha troa afenesine la huliwa ne tro fë ithuemacany, nge paatre pala hi lai atr, haawe, ma loi e troa amë pe la caa Ithuemacanyi Ne La Baselaia ngöne la qeneqëhnelö ne la uma, ngo thaa tro kö a amë amamane ej, wanga öhne jë hnene la itre atr ka tro. Loi e tro fe së a hnëkë hnyawa ngöne la easë a cainöje ngöne la itre götrane gaa tru hnënge uma, pine laka, tro së a ixelë memine la itre atr ngöne la itre gojeny, nge loi e troa hane hamë Ithuemacanyi Ne La Baselaia koi angatr. Maine kola cainöje e tröne la itre tribu, nge nyimu kepine ka thungijë së troa anyimua kuca la itre götrane cili ngöne lo lai hneijine tro fë tarak, haawe, atreine hi troa amë pe ngöne la kola xötrei cainöj, la isa caa Itre Ithuemacanyi Ne La Baselaia ngöne la itre hnalapa ka pë atren.
7 Nemene La Nyine Tro Së a Kuca? Loi e tro la itre ekalesia a catre hamëne asë ngöne la teritoare i angatre la Itre Ithuemacanyi Ne La Baselaia, qëmekene troa fenesi la huliwa cili e treu Nofeba drai 16. Maine tru catre la teritoare hnei epuni hna troa kuca, nge epuni a öhne laka, ngazo e tro epuni a kuca caasin, loi e tro epuni a thele sine cetro i epun. Qa ngöne lai, atreine hi tro epuni a wange la itre hnalapa ka nyimutre me hane tro fë kowe la itre atrene la maca ka loi. (Mat. 10:11) Maine jë, nango loi e troa xome trongëne la itre xaa tarak, me liine hnine la poosi ne trauzizi epuni la Tusi Hmitrötr, maine hnine sine watrenge pena; ka lolo kö lai hune la troa tro fë watrenge ka tru. Loi e tro fe së a xome hnyawa pala hi la aderesi ne la itre atr hne së hna iöhnyi memin, nge ka drei së.
8 Hapeu, Ijije Hë Tro Epuni a Nyiqaan? Loi e troa canga komadëne la itre xaa zonale thenge la etrune hna ajane hnene la ekalesia. Thaa nyipi ewekë kö troa komadëne la Itre Ithuemacanyi Ne La Baselaia Na. 35, pine laka, ase hë iupi fë mekötine itre eje kowe la itre ekalesia asë. Troa isa hamëne la 250 lao tarak kowe la itre pionie hut, me itre pionie lapa, me itre pionie ka ixatua, nge isa 50 pë hë kowe la munëne pe. Hna hnëkëne thatraqai së la huliwa celë. Hapeu, hetrenyi kö thei epuni la madrine troa xome la huliwa ka sisistria cili? Nyipici, easë asë hi a lapa treqene la ijine cili. Haawe, catre pi së troa tro fë trongëne la Itre Ithuemacanyi Ne La Baselaia Na. 35, ene lo maca ka nyipi ewekë hna xomi trepene qa hnine la Tusi Hmitrötr!