Iëne Jë La Itre Hna Cinyihane Matre Troa Hamëne Thenge La Ajane La Itre Atr
1 Ame la atre pehna, angeice a atë hnyawa la pehna i angeic; tune hi la itre trejine ka nyimutre ngöne la itre ekalesia, itretre cainöj, me itre pionie, angatre a hetre madrine qa ngöne la aqane iëne hnyawane angatre la itre mekune qa hnine la lue zonal, La Tour de Garde, me Réveillez-vous! matre troa hamëne hnyawa itre ej, hmekune la aja ne la itre atr ngöne la teritoar. Atreine angatre wangatrehmekune la itre atr ka ala nyim, itre ka ajane troa e la itre xaa mekune e hnine la itre zonal. Nemene la aqane kuca angatre lai?
2 Ame la hnapan, angatre a pane e asë la zonal. Thupene lai, angatre a pane isa hnyinge ka hape, drei jë la atr hna troa ketr hnene la itre hna cinyihane hna e hë? Tro pë hë a thele troa wange la itre atr ka hetrenyi la ajane troa e la itre mekune cili e hnine la zonal. Ame la angatre a mekune laka, troa nyimutre la itre atr ka troa kapa hnyawa ngöne la teritoare i angatre la mekune ka caasi qa hnine la zonal, haawe, angatre a xome atrune ju la itre zonal.
3 Hna Wangatrune Hnyawa La Itre Zonale Së: Hna qaja göi Réveillez-vous!, hnene la ketre atr ka huliwa kowe la ketre zonal hna salemëne e cailo fen, nge hna e catrëne e Nizeria, ka hape: “Atraqatre la madrine huni koi epun, pine la zonale ka sisitria celë, thatraqane fe la nöjei atr asë.” Önine la ketre atr ka e pala hi la itre zonale së ka hape: “Drei la ketre trengamo ka tru alameken, nge ka tiqa hnei inamacan! Hetrenyi asë hi la itre tane mekune hnenge hna ajane troa e, hnine la itre zonale cili.”
4 Kola ithahnatane hnene la itre zonale la itre topike ka nyimutre, memine fe la Tusi Hmitrötr, me itre ewekë ka traqa ngöne la fen, itre jole hna cile kow hnene la itre fami, itre jole ngöne la nöj, ngöne la mele ne la atr, ngöne la science, itre öni, me itre feja, maine tro hi a qaja la itre hnepe götrane cili. Eje hi laka, hetre ajane la ketre atr troa e la ketre itus, e ka ihmeku la itre mekunen, memine la itre hnei angeice hna ajan, me aqane mele i angeic, me huliwa i angeic. Pine laka, easë a troa ithahnata memine la itre atr ka isa pengön, a ka isa hna ajane kö, me isa hetre jole hna cile kow, haawe, troa hetre thangane la cainöje së, e hne së hna iëne la itre hna cinyihane ka ijije troa ketr la itre atr cili.
5 Hanawange la ewekë ka traqa kowe la lue Temoë ngöne la nyidroti a hamëne la Réveillez-vous! ne 8 semitrepa 1996, kowe la ketre atr ka cinyanyi ngöne la ketre zonal. Hnei nyidrë hna cinyihane ka hape: “Qëmekene tro ni a qaja ka hape, thaa pi tro kö ni a drei nyidro, hna canga qaja hnene la ketre ka hape: ‘Hetrenyi la ketre hna cinyihane göne la itre Idië ka lapane e Amerika. Atre hi huni ka hape, tru catre la itre mekune hnei nyipë hna cinyihane göi angatr.’ ” Hnei nyidrëti hna xome la zonal, nge ngöne la ijine kola iji tri, nyidrëti a e la itre hna cinyihane göi itre Idië; öni nyidrëti pë hë thupen, ka hape, “sisitria catre la zonal” nge “pexeje me meköti la aqane cinyihan.”
6 Nemene La Hna Ajane Hnene La Itre Atr Ngöne La Teritoar? Nemene la itre zonale hnei epuni hna öhne ngöne lo itre treu ka ase hë, a hna pi ajane troa e hnene lo itre ka thupë magazë, me itre ka salem ngöne la teritoare i epun, maine itretre lapa ezi epun, me itre sine huliwa i epun, me itre sine ce ini me epun? Nemene jë fe la hna ajane hnene la itre avocats, me itre ka ini, memine la fami, me itre ka hamë eamo ngöne la hna ini, me itre ka hamë ixatua kowe la itre thöth, me itretre ixatua göi aqane troa imelekeu, me itre droketre? Maine tro së a mekune hnyawa la itre atr asë hne së hna troa cainöje kow ngöne la easë a waipengöne la itre zonale së, haawe, tro hë hetre ewekë ka sisitria nyine troa qaja, matre troa hamëne la wesi ula ne la nyipici.
7 Maine tro epuni a öhne la ketre atr ka ajane la ketre zonal, La Tour de Garde maine Réveillez-vous! nge ka kapa lai zonal, epuni a qaja jë ka hape: “E öhnë jë ni elanyi hnine la ketre zonale la ketre mekune hnei epuni hna pi e, haawe, troa atraqatre la madrinenge troa traqa fë koi epun.” Maine jë ketre atr hë lai, nyine tro epuni a lapa hamë zonale kow. Troa kuca tune fe kowe lo itre atr hne së hna wange hmaca, a ka ajane troa e la itre xaa hnepe mekune qa hnine la itre zonale së.
8 Loi e Troa Hetre Hna Ajane Troa Kuca Ngöne La Ua: Ngöne lo itre hnepe macatre ka ase hë, hnene la ketre atr ka mele hmekuje hi kowe la huliwa i angeic, hna kapa la caa Réveillez-vous! ketre zonale ka qatrenge la ketre mekune hna ajane troa e hnei nyidrë. Ngo hna xome fe hnene la atr cili ka hmi catr, la zonal, La Tour de Garde, nge hetrenyi e hnin, la hna cinyihane ka upi angeice troa waipengöne hnyawa la ini göi Trinité hnei nyidrë hna lapa fë pala hi. Ame hë thupene la sikisi lao treu, nyidrëti a hane xome la bapataiso! Qa ngöne lai, thaa tro pi kö së a luelue troa amejëne la ajane la itre ka e la itre zonale së, troa hane ithahnatane la itre mekune ngöne la ua. Ijije fe tro epuni a hamëne la boroshüre Nemene La Hnei Akötresie Hna Thele The Së? Ithahnatane jë ngöne la itre hnepe menetre la caa ini ngöne la nöjei epuni a troa iwai hmaca, nge the thëthëhmine kö troa traqa fë pala hi la itre zonale ka hnyipixe.
9 Loi e tro pala hi a atrehmekune hnyawa la itre atr hnei epuni hna troa wange hmaca, me itre ka salem, ka ajane troa kapa la itre zonal, La Tour de Garde me Réveillez-vous! Thupene lai, thele jë troa ithahnata me angatr. Catre pi troa tro kowe la itre atr, me hamë angatre la itre zonale celë ka sisitria. Nge the thëthëhmine kö laka, ame la easë a thele troa xatuane pala hi la itre atr ka ala nyimu troa e la itre zonale së, haawe, easë hi lai a ‘kuiëne la areto së kowe la hneopegejë.’ Maine tro së a kuca tune lai enehila, atreine hi tro fe la itre xaa atr elanyi a hane itretre drei Iesu.—Ate cai. 11:1, 6.