Nemene La Ka Troa Xatua Së Troa Cile Huti Ngöne La Lapaun?
1 Qaane lo easë a nyiqaane lö hnine la organizasio i Iehova, easë a madrine qa ngöne laka, easë a hane kökötre ngöne la götrane la ua! Eje hi laka, loi e troa ‘nyi wane, me xupe draië, me acatrene ngöne la lapaun’ la mele së, nge nyipi ewekë tro pala hi së a kökötre ngöne la götrane la ua. (Kol. 2:6, 7) Maine ala nyimu la itre atr ka kökötre lolo ngöne la götrane la ua, ngo ame pë hë itre xane ke, hna ufe enyi angatr, pine laka, thaa hna “cile huti kö ngöne la lapaun.” (1 Kor. 16:13) Atreine hi tro sa hmekëne lai. Troa tune kaa?
2 Troa Catre Huliwa i Akötresie: Loi e tro së a majemine eköthe la mele së ngöne la götrane la ua, jëne la organizasio i Iehova. Eje a troa eatrëne hnyawa la itre hne së hna ajane ngöne la götrane la ua. Tro la itre icasikeu ne la ekalesia, me itre asabele, me itre Kovasio, a akökötrene la mele së, me acatrene la lapaune së; ngo troa hetre thangane itre eje koi së, e hne së hna catre sine itre ej. (Heb. 10:24, 25) Maine tro mina fe së a hane catre e lapaane la Tusi Hmitrötr, me itre zonal, La Tour de Garde me Réveillez-vous ! memine la itre itusi ka hamëne la xeni thatraqane la itre ka tru, haawe, tro ha cia lolo hnyawa la itre iwaane së ngöne la götrane la ua, me catre catr. (Heb. 5:14) Qa ngöne lai, maine tro së a isa eköthe la itre aja së ngöne la götrane la ua, me huliwa thenge itre ej, haawe, tro hë së a kapa la itre manathithi ka epine palua.—Fil. 3:16.
3 Ixatua Qaathene La Itre Trejine Ka Macaj: Thele jë troa hane porotrike memine la itre trejine ka macaje ngöne la götrane la ua, e hnine la ekalesia. Loi e troa atre la itre qatre thup, ke angatre hi la itre ka ijije troa pane hamë ithuecatre koi së. (1 Thes. 2:11, 12) Kapa ju la nöjei eamo, maine itre mekune nyine ixatua hnei angatre hna hamën. (Efe. 4:11-16) Itre drikona mina fe a ajane troa acatrene la lapaune ne la itre xan, haawe, wai angatre ju matre troa hamë ixatua koi së.
4 Hapeu, easë a aja ixatua göi huliwa ne cainöj? Wange ju la itre qatre thup, nge sipo ixatua jë koi angatr. Maine jë, tro ha hane ami së ngöne lo porogarame hna hnëkëne kowe lo itre Pionie göi troa hamë ixatua koi itre xan. Hapeu, hna xötrei bapataiso së? Maine tro së a e la itus Notre ministère, me trongëne hnyawa la itre ini ka eje e hnin, tro ha xatua së troa macaje ngöne la götrane la ua. Hapeue së itre keme me thin? Catre pi së troa acatrene la lapaune ne la itre nekö së.—Efe. 6:4.
5 Maine tro së a kökötre me cile huti ngöne la lapaun, tro hë së a madrine la elolone la aqane imelekeu së me Iehova, nge troa keukawa hnine la aqane ce mele së memine la itre trejine me easë. Kola aijijë së mina fe troa thipetrije la itre aqane icilekeu i Satana, nge kola acatrene la mejiune së kowe la mele ka epine palua ngöne la itre drai elany.—1 Pet. 5:9, 10.