Aqane Troa Una Ielene La Itre Atr
1 Kola hlemu hnei Paulo aposetolo, ceitune memine la ketre atre cainöje ka una ielene la itre atr. (Ite Huliwa 19:26) Hna hane qaja fe koi angeice hnene la Joxu Ageripa, ka hape: “Tro eö a ahmalanyi ni troa Kerisiano hnene la hnepe ka co.” (Ite Huliwa 26:28) Nemene la ewekë hna kuca hnei Paulo, matre angeice a atreine troa una ielene la itre atr? Hnei angeice hna qeje pengöne me thele mekune qa hnine la Tusi Hmitrötr, me qaja la itre mekune ka ihmeku memine la itre ewekë hna atre hnene la itre ka drei angeic.—Ite Huliwa 28:23.
2 Loi e tro sa xome la tulu i Paulo, ene la troa ketre atr ka atreine troa una ielene la itre atr ngöne la hna cainöj. Troa tune kaa? Loi e troa atreine atrehmekune la itre ewekë hna lapa mekune hnene la itre atr ngöne la easë a porotrike me angatre me drei angatr. (Ite edomë 16:23) Köni mekune ka tru, ka troa xatua së, matre tro sa eatrëne lai.
3 Loi e Troa Atreine Drenge Hnyawa: Maine ketre atr a ithahnata, ke, drei angeice hnyawa ju, matre atreine tro nyipunie a ithahnatane thenge la itre mekune hnei angeice hna hamën. Maine kola qaja la ketre mekune ka isazikeu memine la mekuna i Iehova, ke, tupathe jë troa thele la qaane la mekune cili. Tro lai a xatua nyipunie troa atrepengöne hnyawa la hnei angeice hna lapaune kow, memine la kepine matre angeice a lapaune kow, nge nemene la ka upi angeice troa catre fë la mekune cili. (Ite edomë 18:13) Thele jëne jë la aqane troa upi angeic, troa hamëne la itre ithuemacany.
4 Loi e Troa Hnying: Maine ketre atr a qaja amamane la lapaune i angeice kowe la Tirinite, ke, hnyinge ju koi angeice ka hape: “Ka hekö hë la lapaune i nyipë kowe la Tirinite?” Nge sisedrëne jë ka hape: “Hnei nyipëti kö hna pane inine la Tusi Hmitrötr, matre wange la hnene eje hna qaja göne la mekune cili?” Nge nyipunieti a hnyinge jë fe ka hape: “Maine nyipici laka, Akötresie la ketre atrene la tirinite, hapeu, thaa tro kö a jole troa qeje pengöne hnyawa lai hnei Tusi Hmitrötr?” Tro la itre mekune hnei nyipunie hna kapa, a xatua nyipunie troa ce wange me angeice la mekuna i Akötresie, qa hnine la Tusi Hmitrötr.
5 Hamëne Jë La Ketre Aqane Thele Mekune Ka Catr: Hna hnyinge hnene la ketre Temoë kowe la ketre föe ka lapaune laka, Iesu lae Akötresie; öni nyidroti ka hape: ‘Maine tro nyipoti a amamane laka ka caasi hi la pengöne la lue atr, nemene la ceitune hnei nyipoti hna troa xom e hnine la fami?’ Eahlo a sa ka hape: “Ijije tro ni a xome la ceitunene la lue trejin.” Nge angeice a qaja jë fe ka hape: “Maine pena fe la lue fini, ke, ceitune hnyawa hi lue ej. Ngo ame la kola ini së hnei Iesu troa xomi Akötresie ceitune me Kem, nge nyidrëti a ketre sipu qeje nyidrë ka hape, Hupuna nyidrë, haawe, nemene la ithuemacanyi hnei Iesu hna ajane troa hamëne koi së?” Haawe, kola trotrohnine hnene la föe laka, caa ka tru e nyidro, nge ka draië kö la musi angeic. (Mat. 20:23; Ioane 14:28; 20:17) Hna ketr la mekune memine la hni ne lai föe, hnene la aqane atreine una iele nyidroti hnene la trejine föe.
6 Eje hi laka, thaa tro kö a kapa la nyipici hnene la nöjei atr asë, ngacama ka eje ju hë me meköti la aqane tro fë së la wesi ula. (Ioane 10:4) Ngo, loi e tro sa xome la tulu i Paulo, ene la troa catre thele la itre atr ka hetre hni ne ajan, me una iele angatre troa kapa la maca ne Baselaia.—Ite Huliwa 19:8.