Ihnimi a Upi Së Troa Cainöj
1 Kola atre hnyawa hnene la itre atr la pengö së Itretre Anyipici Iehova, qa ngöne laka, itretre catre cainöjëne së la maca ne Baselaia. (Mat. 24:14) Kola e la sikisi milio la etrune asë e cailo fen, nge kolo pala hi a nyiqaane hane cainöje hnene la itre xan. Kola hane e angatre fe hnene laka, angatre a hane sine pala hi la huliwa ne cainöj.
2 Nemene la ka troa upi së troa hane xome la hnëqa ka tru cili? Thaa hna musinë së kö, maine uku së pena hnene la pi hetre mo, maine göi troa atrunyi së pena. Ame ngöne la easë a xötrei cainöj, easë a nango xou pine laka, easë mekune ka hape, thatreine kö së troa sa la hnyinge ne la itre atr, nge ketre thaa ajane kö itre xane troa drei së. (Mat. 24:9) Ame la itre xane ke, thaa trotrohnine kö angare la itre mekune ka upi së troa cainöj. Celë hi kepine lai ka upi së troa catre cainöj.
3 Emenene La Ihnim: Hnei Iesu hna qaja amamane la trenge wathebo ka sisitria catr, öni nyidrëti ka hape, ‘qâ së troa aja Iehova hnene la hni së ka pexej, me mekune së ka pexej, me trenge catre së ka pexej.’ (Mareko 12:30) Hna nyitrepene la ihnimi së koi Iehova, hnene la etrune la itre aliene hni së, kola amamane la aqane wangatrune së la ëje i Nyidrë, memine la pengöi Nyidrë, ngöne laka, Joxu ka Pucatine asë, Atre xupe la nöjei ewekë asë, matre Nyidrëti ‘hmekuje la ka troa kapa la nyine atrun, me nyine adraiën, me men.’ (Hna ama. 4:11) Pëkö sa i Nyidrë e celë fen, me e koho hnengödrai.—Eso. 34:6, 7.
4 Qa ngöne laka, easë a atre Iehova me hnimi Nyidrë, haawe, kola upi së troa ahudrumene la lai së kowe la itre atr. (Mat. 5:16) Kola hudrume la lai së ngöne la easë a atrunyi Nyidrë qëmekene la itre atr, me qaja la itre huliwa i Nyidrë ka mingöming, me tro fë la maca ne Baselaia i Nyidrë. Tune lo angela e caha e nyipine la hnagejë, hetrenyi mina fe së “la maca ka loi ka tha ase palua kö troa cainöjëne koi . . . nöjei nöj’ asëjëihë, me nöjei tribu, me ite qene hlapa, me nöjei atr.” (Hna ama. 14:6) Pine laka atraqatre la ihnimi së, haawe, kola haöthe la fene hnengödrai hnene la maca ka loi.
5 Ame kowe la fen, ke “qene hmo” la troa cainöj, nge thaa tro kö a wangatrun. (1 Kor. 1:18) Nyimutre la itre ewekë hna kuca matre troa sewe së troa kuca la huliwa së. Ngo kola upi së hnene la ihnimi nyipici së, troa qaja tui Paulo, ka hape: “Tha ’teine kö nyiho troa tha qaja la nöjei ewekë hnei nyiho hna goeëne me deng. . . . Ijiji huni troa denge thenge Akötesie hune la at.” (Ite Huliwa 4:20; 5:29) Celë hi matre ngacama kola icilekeu hnene la itre atr, ngo kolo pala hi a haöthe la ihnadro hnene la huliwa ne cainöj.
6 Ceitune la ihnimi së koi Iehova memine la eë ka mel, kola upi së troa qaja kowe la itre trehnyiwa la itre thiina ka loi Nyidrë. (Iere. 20:9; 1 Pet. 2:9) Haawe, catre pi së troa atrunyi Iehova, nge “amamanejë thene la ite nöje la ite huliwa i nyidë . . . ke hnei nyidëti hna kuca la ite ewekë ka sisitria”!—Is. 12:4, 5.