Troa Hnëkëne La Itre Drai Ka Troa Traqa—Göi Nemen?
1 Hetrenyi asë hi së la itre aja hne së hna isa mekune troa eatrën. Ame la itre ka mejiune kowe la mele e celë fen, ke, angatre a mekune la itre ewekë ka troa traqa, me hnëkë troa mele palua ngöne la fene i Akötresie, ka hnyipixe me ka meköt. Ngo, atreine hi tro la itre iajojezi ne la fen a xome qa the së la mejiune cili. Qa ngöne lai, nyipi ewekë tro sa isa catr, matre tro pala hi së a eköthe la mele së hune la itre huliwa ne la Baselaia, nge thaa tro pi kö së a nue la itre aja ne la ngönetrei, troa xome la göhnene la itre huliwa cili.—1 Ioane 2:15-17.
2 Thatreine kö troa trotrohnine hnene la fen, la itre aja ne la itre atr ngöne la ua. (1 Kor. 2:14) Kola catre la itre atr troa kuca la hnei angatre hna atrein, matre troa eatrëne la itre aja i angatr, ene la troa hlemu, maine troa mus, maine tro pena a wangatrune pala ha la egöcatre ngöne la ngönetrei, ngo ame së, ke, hetrenyi kö la itre ewekë hne së hna catre thel, ene la itre trenga mo ngöne la ua. (Mat. 6:19-21) Maine hne së hna thele troa caasi la aqane mekune së memine la aqane mekune ne la fene göi itre drai elany, hapeu atreine kö së troa eatrëne lo itre aja së ngöne la götrane la ua? Atreine hi troa canga ajojezine la itre hni së hnene la itre ewekë ne fen. Haawe, tune kaa la aqane tro së a hmekëne la ewekë celë?
3 “Xetëneju Nyipunie La Joxu Iesu Keriso”: Ame la ketre aqane troa atrehmekune maine easë a eköthe la mele së elanyi hune la itre huliwa ne Baselaia, ke, ene la troa waipengöne la aliene la itre porotrike së. Hapeu, easë pala hi a ithahnatane la itre ewekë ne ngönetrei, me itre aja ne fen? Maine eje hi, ke, nyipi ewekë tro së a canga wange maine kolo jë hë a nango nanazije the së la itre ewekë ne la ua. (1 Kor. 2:14) Maine jë, nyipi ewekë catre tro sa wangatrune la aqane troa ‘xetëne la Joxu Iesu Keriso hune la troa hnëkëne thatraqane la ngönetei troa aeatene la ite ajan’ ej.’—Rom. 13:14.
4 Ijije fe tro la itre thöthi a ‘xetë Keriso’ ngöne la angatre a hnëkë, göne la ijine tro angatre a xome la huliwa ne cainöje ngöne la drai ka pexej. Hna hiane la ketre thöthi ka ajane troa pionie lapa, ngöne la ketre nöj, kola mekune la itre atrene laka, ame la ka tru koi angatr, ke, loi e tro la itre nekö trahmanyi a atreine ketre mele me hetre huliwa ka loi. Haawe, angeice a kuca asë la hnei angeice hna atreine troa huliwa me thele mani, uti hë la angeice a drenge laka, thaa pexeje hmaca kö la hni angeice ngöne la kola sine la itre icasikeu me cainöje trootro. Ame la angeice a trotrohnine la itre trenge ewekë i Iesu hna e ngöne Mataio 6:33, ke, angeice a nue pi la aqane mele i angeice ekö, laka pëkö madrine hna kapa qa ngön, nge angeice a xome jë la huliwa ne cainöje ngöne la drai ka pexej. Ame enehila, ke, ka meköti la mekuthetheue i angeic, nge angeice a nyihluei Iehova ‘cememine la atreine i angeice ka pexej.’
5 Tusi Hmitrötre a qaja ka hape, trene inamacane la atr ka hnëkë kowe la itre drai ka troa traqa. (Ite edomë 21:5) Epi tro pala hi së asë a hnëkë tune lai, me lapa mekune pala hi la ewekë ka sisitria kowe la mele së, ene la troa kuca la aja i Akötresie.—Efe. 5:15-17.