“Drenge Ju Me Nyi Xane La Inamacan”
1 Kola qaja hnene la tusi Ite Edomë la pengön la inamacan, kola hë ka hape: “Dengeju, ke tro ni a qaja la ite ewekë ka sisitia, nge tro la sesepeneqeng’ a qaja la ite ewekë ka meköt. Eje thenge la ate pengöne me inamacan. . . . Dei ni ju enehila; ke manathithi angat’ angete thupëne la ite gojeng. Ke ame la atr öhnyi ni, te, öhne fe hë la mel, me hete ihnimi qa thei Iehova.” (Ite edomë 8:6, 14, 32, 35) Itre trenge ewekë la ka qeje pengöne hnyawa la ini hne së hna troa kapa ngöne la ijine Kovasio ne Distrik, hna hape, “Itretre Inine La Wesi Ula i Akötresie”.
2 Hna atrepengöne hnyawa ha la itre ewekë hna ajan hnene la itre trejin e cailo fene asë, matre hna hnëkëne hnyawa la porogaram ne la kovasio thenge la itre aja cili. Kola troa hamën la ini ngöne la götrane la ua, me itre mekun ka lolo catr, matre ame la easë a trongëne itre ej, ene pe troa xatua së troa hetrenyi la madrin, me lolo la aqane imelekeu së me Iehova, nge ketre, thaa tro kö sa jea qa ngöne la gojenyi ne tro kowe la mel ka epine palua. Eje hi laka, hetre nyipi kepin tro së a “denge me nyi xane la inamacan.”—Ite edomë 1:5.
3 Qëmekene La Troa Nyiqaan: Maine easë a ajan troa kepe thangan la nöjei hna troa qaja, haawe, nyipi ewekë tro sa canga isa lapa göhnen, me hnëkë ngöne la kola nyiqaan la kovasio. Haawe, nyipi ewekë tro sa isa hnëkë hnyawa. Ame la ketre nyine troa kuca ka sisitria catr, ke, ene la troa canga hlë. Loi e troa canga meköl e itre jidr. Canga hlë jë e hmakany, matre troa isa hetre ijine ne la itre atren la hnalapa troa hnëkë, me iji trii. Loi e troa canga traqa fe ngöne la hna kovasio, matre ijij troa canga thele göhnë, me canga hnëkën la itre xaa ewekë qëmeken troa nyiqaane la kovasio. Troa fe la qëhnelö e 8 h e hmakany, nge troa nyiqaan ngöne la nöjei drai la porogaram e 9 h 30 .
4 Pine laka ame la sipu aja së ngöne la easë a icasikeu, ke ene la troa atrunyi Iehova “ngöne la ite icasikeu,” troa nyiqaane itre eje me kuca matre troa atrun la Akötresi së. (Sal. 26:12) Eje hi lai laka, kola sipon koi së asë troa isa lapa göhnen qëmeken la troa thing la nyima nyine nyiqaan. Kola ihmeku la ixatua celë memine la eamo hna hape: “Kuca alolone jë me amekötine la nöjei ewekë asë.” (1 Kor. 14:40) Nemene la aliene la eamo celë koi së? Ame ngöne la easë a öhne la kola lapa hnene la perezida ngöne la ijine kola elone la miuzik qëmekene troa nyiqaan la porogaram, haawe easë a canga nyimenyim troa isa lapa göhnen. Kola troa aijijë së tro sa ce thing la nyima ka troa xejë la itre icasikeu, me atrunyi Iehova.—Sal. 149:1.
5 Ngöne La Ijine Icasikeu: Hnei Ezera hna “hnëkëne la hni angeice troa thele la wathebo i Iehova me kuca ej.” (Ezera 7:10) Tune kaa la aqane tro së a hnëkën la itre hni së, matre troa kapa la ini qaathei Iehova? Ame ngöne la easë a ce wange hmaca la itre taan hna fejan ngöne la porogaram ne asabele hna isa hamë së, haawe, isa thele jë ka hape, ‘Nemene la hnei Iehova hna qaja koi ni jëne la porogarame celë? Tune kaa la aqane tro ni a xom la ithuemacany matre tro ni a kepe thangan memine la hnepe lapang?’ (Is. 30:21; Efe. 5:17) Catre pi troa lapa mekun la itre hnyinge celë ngöne la ijine kola kovasio. Fejane jë la itre mekun hnei nyipunie hna troa ce ithanatan. Thele ijine jë troa porotrikëne itre ej ngöne la pune la itre icasikeu. Ewekë lai ka troa xatua nyipunie troa lapa xome hnyawa la itre mekun, me trongëne itre ej.
6 Ketre itupathi ka tru la troa drei cainöj ngöne la itre hawa ka nyimutre. Nemene la ka troa xatua së troa cil kowe la jol, ene la troa nue menu la mekun nge thaa drenge hnyawa pe la hna qaja? Kepe thangane jë la emenen la lue meke së. Kola mama hnyawa ka hape, ame la hna goeën hnene la lue meke së, celë hi la hne së lai hna troa mekune kow. (Mat. 6:22) Qa ngöne lai, xelene jë la ajan troa xei kowe la ketre ewekë ka malil maine ka nyinyap. Loi e troa goeën hnyawa pala hi la ka cile fë la cainöj. Xome jë ngöne la sipu Tusi Hmitrötre së la itre xötr hna troa e, nge fe jë la Tusi Hmitrötr ngöne la kola ce ithanatan lai xötr.
7 Tro la ihnimi Keresiano a upi së troa lapa hnyawa, nge thaa tro kö a nyi mejen wanga troa sawa la itre xan troa drenge hnyawa la itre hna qaja. (1 Kor. 13:5) Hetre “ijine lapa thaup” me ijine troa dreng. (Ate Cai. 3:7) Qa ngöne lai, thaa loi kö e troa porotrik me tro agö pena ngöne la itre ijine icasikeu. Loi e troa canga tro koi kabine, qëmekene la kola nyiqaan la asabele. The tro kö a canga xeni me ij, ngo troa treqen la traeme hna sa, matre thaa tro kö a traqa la itre xaa jëne meci qa ngöne lai. Thaa loi kö e troa sawa la itre trejin troa drenge hnyawa ngöne la itre ijine asabele, hnene la itre trene mobilis, me itre kamera, me nyine xomi foto. Loi e tro la itre keme me thine a ce wang memine la itre nekö i angatr—itre thöthi fe—matre tro angatre a caa hnë lapa, nge ijije tro nyidro lue trefëne a goeën la itre nekö i nyidro.—Ite edomë 29:15.
8 Hna qaja lo macatre hnapan hnene la ketre qatre thup ka majemine sine hë la itre kovasio ngöne la itre macatre ka nyimutre, ka hape: “Hnenge hna mekune ka hape, ka nyipi ewekë catr la kovasio celë, qa ngöne la ketre kepin. Kola öhne laka, ala nyimu la itre ka xomi not, ketre tune fe la itre nekönatr ka co. Celë hi ketre madrin ka tru lai. Hna xome mina fe la Tusi Hmitrötr hnene la ka ala nyim, ngöne la kola goeën la itre xötr hna upi angatr troa xom hnene la ka cile fë la cainöj.” Kola hain me madrin la itre aqane ujë cili. Thaa easë hmekuje kö me itre sine ce asabele me easë a troa kepe thangan ka loi, ngo kolo fe a atrunyi Iehova Akötresie, Atre Ini ka Sisitria.—Isa. 30:20.
9 Tro la thiina së ka lolo, memine la aqane ujë së thenge la aja i Akötresie, a anyipicin la itre ini hne së itre Keresiano hna mejiune kow, me thue jën kowe la itre atr ka hetre hni ka menyik, troa atrehmekun la nyipici. Loi e thaa tro pi kö la hnaheetre së me ihnaihe së, maine aqane ujë së a angazon la icasikeu së ngöne la elolone ej ngöne la götrane la ua. (Fil. 1:10; 1 Tim. 2:9, 10) Qa ngöne lai, loi e tro së a amamai tulu ka loi ngöne la aqane tro së a dreng, me xatuan la itre xan troa “denge me nyi xane la inamacane” ngöne la kola sin la Kovasio ne Distrik, hna hape, “Itretre Inine La Wesi Ula i Akötresie”.—Rom. 13:3.