“Hne Së Hna Anyimua Kuca La Teritoare Së!”

¹ Pine laka hnei nyipunieti hna anyimua kuca ha la teritoare i nyipunie, hapeu, maine jë nyipunieti ha mekune ka hape, pë hë atr ka hetre hni ne mamoe ngön? Maine jë, hnei nyipunieti hna hane mekune ka hape: ‘Atre hi ni la aqane tro la itre atr a sa koi ni. Pine nemene matre nyipi ewekë tro hmaca së a bëeke kowe la itre ka pëkö ajane troa drei së?’ Nyipici laka, nyimutre la itre teritoare së hna kuca lapaane hë. Ngo ame pe, ke, loi e troa loi la aqane waiewekë së. Pine nemene lai? Pane mekune ju cahu foa lao kepin.

² Hna Kapa La Itre Thithi Së: Hnei Iesu hna qaja ka hape: “Atraqate la meledrai, ngo xalaithe hi la angete huliwa; qa ngöne lai thithijë nyipunie kowe la Joxu ne la meledrai, mate tro nyidëti a upe la angete troa huliwane la meledrai i nyidë.” (Luka 10:2) Ngöne la itre macatre ka ase hë, hne së hna catre sipo Iehova troa hamë ixatua. Ngöne la itre götrane ka nyimutre, ke, kola alanyimu trootro la itre ka cainöj, matre kösë coco hë la itre teritoar, canga nyimenyime hi kuca itre ej. Hapeu, thaa ketre hatrene kö la, laka hnei Iehova hna kapa la itre thithi së matre kola amadrinë së?

³ Troa Hetre Wene Ka Loi Qa Ngöne La Hna Cile Hut: Ame mina fe ngöne la itre teritoare hna kuca lapaan, ke, kola kapa la maca ne la Baselaia hnene la itre atr, me hane kapa la atrehmekune ne la nyipici. Qa ngöne lai, loi e tro sa wange lapaane la itre atr, me hetrenyi the së la ajane troa thele la itre atr ka hni ka meköt. (Is. 6:8-11) Tune la hna kuca hnene lo itretre pane drei Iesu ekö, loi e tro pala hi nyipunieti a “tro” kowe la itre atr ne la teritoare i nyipunie, me catre ahlëne la aja thei angatre kowe la Baselaia i Akötresie.—Mat. 10:6, 7.

⁴ Ame e Portugal, ke, nyimutre la itre ekalesia ka kuca la teritoare i angatre e nöjei wiik, ngo hetre atr pala hi hna aceitunëne me mamoe hnei angatre hna öhn. Hnene la ketre söre hna hetrenyi la aqane waiewekë ka loi. Öni angeice ka hape: “Qëmekene troa cainöje e nöjei hmakany, eni a thithi koi Iehova troa xatua ni matre troa öhne la ketre atr ka ajane troa inine la Tusi Hmitrötr.” Ame la ketre drai, ke, hnei angeice hna isapui troa etid, memine la itre ka huliwa ngöne la ketre hnë xötre ihe. Ngo thupene lai, caasi hi la atr ka sine la etid. Kola qaja hnene lai atr ka hape: “Thaa ajane kö la itre xane troa etid, ngo ame ni, ke, eni a ajan.” Ngöne la treu, ke, lue etid hnei angeice hna ketre sipu öhn. Thaa qea ju kö, nge angeice a xome la bapataiso, nge thupene lai kola hane pionie!

⁵ Hna Eatrëne La Huliwa: Hna cainöjëne la maca ka loi, tune la hna qaja hë ekö hnei Iesu. (Mat. 24:14) Ame mina fe ngöne la itre götrane laka “tha ‘teine kö . . . troa drei [së],” hnene la itre atr, ngo ame pe, ke, hna hane thuemacanyi angatre hë jëne la huliwa ne cainöj. Haawe, thaa sesëkötre kö së laka, thaa kepe së kö hnene la itre xan, maine hna icilekeu pena memine la nyipici. Ngo, loi e troa atre hnene la itre atr cili laka, calemi hë la drai ne iameköti Iehova.—Ezek. 2:4, 5; 3:7, 8, 19.

⁶ Thaa Fenesi Pala Kö La Huliwa Së: Thaa qa së kö troa axeciëne la ijine troa afenesine la huliwa ne cainöj. Atre hnyawa kö Iehova la ijine troa nyipune ej. Atre kö Nyidrë maine hetre atr pala kö ka troa kapa la maca ka loi ngöne la teritoare së. Ame enehila, kola qaja hnene la itre xaa atr ka hape thaa ajane kö angatre troa drei së, ngo itre akötre a traqa ngöne la mele i angatr—hna upi angatre qa ngöne hna huliwa, maine ketre meci pena, maine kola meci hnene la ketre atr hnei angatre hna hnime pena—kösë kola saze la aqane waiewekë i angatr, ene pe angatre a hane drei së. Pine laka tru la itre ethanyine la mel, maine tru la jole i angatr, haawe thaa nyipi drenge kö hnene la itre atr ka ala nyimu la maca hne së hna cainöjën. Maine tro sa catre wai angatre cememine la hni ka menyik, ke, maine jë troa ketri angatre me upi angatre troa drenge la maca ka loi.

⁷ Ame la itre xane ke, angatre a tru trootro, me faipoipo, nge hetre haa neköi angatre hë, haawe angatre hë a hane wangatrune la mel, nge angatre a isa hnying, me thele la aliene la mel, ngo Wesi Ula i Akötresieti hmekuje hi la ka atreine troa sa la itre hnyinge i angatr. Hnene la ketre thine hna könëne la lue söre ngöne la hnalapa i angeic, nge angeice a qaja ka hape: “Ame la eni a nekö jajiny, ke, thaa trotrohnine kö ni la kepine matre kola helëne la itre Temoë hnene la thine i eni, me qaja koi angatre ka hape, thaa ajane kö eahlo, ngo angatre hi a pi qeje Tusi Hmitrötre koi eahlo. Qaane ju hi lai, eni pë hë a mekune ju ka hape, e tru hë ni elany, nge ikötresai hë ni, nge ketre hetre sipu hnalapa i eni hë, ke, tro ni a sipone kowe la itre Temoë i Iehova troa wai ni me qeje pengöne la Tusi Hmitrötre koi ni.” Celë hi ewekë lai hnei angeice hna kuca, ketre atraqatre fe la madrine ne la itre Temoë troa wai angeic.

⁸ Ijije Kö Troa Hetre Thangane La Huliwa i Nyipunie? Maine jë thaa hnene hmekuje kö la aqane ujë ne la itre atr hne së hna wang, lo ka ajolë së troa huliwaane lapaane la teritoar. Ame itre xaa ijin, ke, isa easë kö la ka thele jol. Hapeu, hne së kö hna nyiqaane la huliwa ne cainöj, cememine la itre mekune ka thaa ithuecatre kö? Atreine tro la itre mekune cili troa ajojezine la aqane waiewekë së, nge tro fe a mama ngöne la nine ithahnata së, me iqëmeke së. Loi e troa hetrenyi the së la aqane waiewekë ka loi, nge troa mama laka, hetre madrine the së. Tupathe jë la ketre aqane nyiqaane ithahnata ka hnyipixe. Saze jë la aqane tro fë nyipunieti la maca ka loi, nge catre jë troa aloine ej. Maine jë, atreine tro nyipunie a saze la hnyinge i nyipunie ngöne la qaane ithahnata, maine ce ithahnatane pena la ketre mekene tusi ka ketre pengöne kö ngöne la kola porotrik. Hnyingëne jë kowe la itre xaa trejin, trahmanyi me föe la itre thangane ka loi, hnei angatre hna kapa ngöne la angatre a huliwaane la teritoar. Ce cainöje jë memine la nöjei ka cainöj, me itre pionie, nge pane mekune ju la itre ewekë ka xatua angatre matre hetre thangane la hnei angatre hna cainöj.

⁹ Iehova a kapa me amanathithine la huliwa ne cainöjëne la Baselaia, nge maine easë a sine la huliwa cili, ke, easë lai a amamane la ihnimi së koi Nyidrë me kowe la itre xaa atr. (Mat. 22:37-39) Haawe, loi e tro sa xome me thele troa eatrëne hnyawa la huliwa së uti hë la pun, nge thaa tro kö a kucakuca troa huliwaane lapaane la itre götrane hna athipe koi së.