Loi e “Troa Eatrene La Wesi Ula i Akötesie”
1 Ame ngöne la easë a olen la kola hamë së la ketre ewekë ka lolo, hapeu thaa tro kö së a amamane la ole së hnene la aqane ujë së memin la itre hne së hna troa kuca? Eje hi, aqane tro së lai a ujë! Hanawang la aqane ujë i Paulo aposetolo, kowe la ihnimi Iehova kowe la itre atr. Hnei nyidrëti hna qaja ka hape: “Ole koi Akötesieti la ahnahna i anganyidë hna tha ’teine qaja asë”! Kola hapeue lai hna hape, “ahnahna [“hna hamën gufan,” MN]”? Ame la “ihnimi gufa i Akötesie ka nyipi atraqate” hnei Nyidrëti hna amaman koi së, tre, ene laka, hnei Nyidrëti hna hamën la Nekö i Nyidrëti ka caas nyine thupene mel koi së itre atr ka ngazo.—2 Kor. 9:14, 15; Ioane 3:16.
2 Hapeue la aqane ole i Paulo, kola mama hmekuje hi qa ngöne la hna qaja? Ohea! Nyimu aqane amaman angeic la etrun la ole i angeic. Hnei angeic hna hnehengazon la mele ne la itre trejin me angeic Keresiano ngöne la götran la ua, nge hnei angeic mina fe hna kuca la hnei angeic hna atrein matre troa xatua angatr troa hane kepe thangan hnyawa la ihnimi gufa i Akötesie. Hnei Paulo hna qaja göne la itre atr cili, ka hape: “hne huni hna hnime atrunyi nyipunie, mate loi koi huni troa hamëne koi nyipunie, tha maca ka loi Akötesie hmekune hi, ngo ite mele huni fe, ke hna hnimi nyipunie hne hun.” (1 Thes. 2:8) Thaa hnei Paulo hmekuje kö hna xatuan la itre trejin e hnine la ekalesia matre tro angatr a cile hut ngöne la mejiun kowe la iamele, ngo hnei angeice fe hna catre tro fë pala hi la maca ka loi, me trongën la itre gojeny gaa nany, hune ihnadro, me e cahu hnagejë, matre troa thele la itre atr “hna hnëkëne kowe la mele ka tha ase palua kö.” (Ite Huliwa 13:48) Pine laka atraqatr la ole i Paulo kowe la itre ewekë asë hnei Iehova hna hamë angeic, haawe, kola kökötre la ajan thei angeic troa “eatrëne la wesi ula i Akötesie.”—Kol. 1:25.
3 Tune kaa fe la ole së kowe la itre ewekë asë hnei Iehova hna hamën koi së eje kö a hane upi së troa xatuan ngöne la götran la ua la itre atr ka aja ixatua hnine la ekalesia së? (Gal. 6:10) Nge tune kaa, kolo kö a hane upi së hnene la ole së troa hane catre cainöjën la maca ka loi ne la Baselaia ngöne la itre götran hne së hna mele ngön?—Mat. 24:14.
4 Ketre Ijin Ka Ijij Tro Sa Amaman La Ole Së: Ame ngöne la nöjei macatre, kola aijijë së hnene la Drai Ne Amekunëne la meci Keriso troa amaman koi Iehova me Iesu la ole së, qa ngöne la itre ewekë hnei nyidroti hna kuca koi së. Thaa ketre icasikeu kö ka tune lo itre xaa icasikeu, maine ketre ijin kola amekunën pena la ketre ewekë menu. Hnei Iesu hna qaja ka hape: “Kucajë la nyine mekune koi ni.” (Luka 22:19) Ame la Drai Ne Amekunën la meci Iesu Keriso, tre, celë hi ketre ijine ka aijijë së troa pane mekune hnyawa la pengö i Iesu. Celë hi ketre ijine tro sa wangatrehmekun laka ka mele nyidrë, nge ka huliwa nyidrë enehila, ene laka, hna hamë nyidrë la lolo memin la mus, pine laka hnei nyidrëti hna mele nyipici me hujën la mele i nyidrë koi së. Ketre ijin mina fe lai ka aijijë së troa amaman la ipië së kowe la mus i Iesu, ngöne laka, nyidrëti la ka tro xom la itre ewekë memine la itre huliwa ne la ekalesia i Keresiano. (Kol. 1:17-20) Loi e tro asë hi la nöje i Akötresie a metrötrën la Drai Ne Amekunën la meci Keriso, me sin la Drai cili. Troa atrun la Drai cili e 28 Maac 2002, thupen la kola lö la jö.
5 Qa ngöne laka hna catre huliwa ngöne lo macatre hnapan hnene la itre trejin e Kaledonia qëmeken troa atrun la Drai Ne Amekunën, haawe, hna elë la etrun la itre atr ka sin la icasikeu, kola e la 4 373 la etrun; 1 052 e Tas; nge 344 e Walis me Futuna. Troa ijetre ngöne la macatre celë? Qanyine kö la aqane “huliwa, me cat” së, ngöne la easë a xatuan la itre atr troa hane sin la Drai cili.—1 Tim. 4:10.
6 Madrine ka tru tro sa hane sin la Jidri Ne Pui Ne Xeni Ne La Joxu, ketre, maine jë ijije tro së a hane akökötren la huliwa ne cainöje së. Eje hi laka, troa itre thauzan la itre trejin trahmany me föe ka troa pionie ka ixatua, ngöne la caas maine ngöne la nyimu treu. Hna elë pala hi la etrun la itre pionie ka ixatua, ngöne la itre macatre, matre ngöne la nöjei macatre ne la theri lao macatre ka ase hë, hna e la 141 lao pionie ka ixatua ngöne la hneijin ne la Drai Ne Amekunën, Maac koi Mei, e Kaledonia, 19 e Tas, nge 7 e Walis me Futuna. Hapeu, ijije kö tro epuni a kuca matre tro fe epuni a hane pionie ka ixatua ngöne la macatre celë? Celë hi ketre ewekë lai ka lolo nyine tro sa kuca, matre troa amaman la ole së kowe la ihnimi Akötresie, ngöne laka hnei Nyidrë hna amekötin troa hujën hnei Keriso la mele i nyidrë thatraqai së. Loi e xecie koi së laka, tro Iehova a amanathithi së, tune cahu itre hna melën hna hamëne koi së.
7 Hnene la ketre sör ka huliwa i maseta ngöne la drai ka pexej, hna cinyihan la aqane pionie ka ixatua nyidro ngöne lo maac ne la macatre ka ase hë, öni nyiidro ka hape: “Hna xatua së isa ala caas hnene la Huliwa Ne Baselaia ne Febuare 2001, laka, ame la ka ijij troa hane pionie ka ixatua ngöne la hneijin ne la Drai Ne Amekunën, tre, loi e troa xom la huliwa cili. Pine laka faifi lao mecixen ngöne lo lai treu Maac, haawe, kösë ijijinge fe hi troa hane pionie ka ixatua. Celë hi matre hnenge hna mekune ju troa nyialien la pepa ne sipo troa pionie.” Ame la eahlo a nyiqaan xejë la huliwa, hnei eahlo hna pane mekun laka, loi e troa nyiqaane inin la Tusi Hmitrötr memin la ketre atr. Hapeu, hnei eahlo kö hna eatrën lai aja i eahlo? Eje hi, kola e la 52 lao hawa hnei eahlo hna kuca ngöne la treu cili! Nemene hë la hna qaja hnei eahlo? Öni eahlo, “Nyipi lolo la itre manathith hne së hna kapa, e hne së hna hane nue la trenge catre së kowe la huliwa i Akötresie.”
8 Tune kaa fe la itre manathith hna kapa hnene la ketre fami ka ce xom la huliwa ne pionie? Hna mekun pala hi la treu Eiperem ne lo macatre ka ase hë hnene ketre fami ka foa lao nekönatr, nge ka hane pionie ngöne la treu cili. Hna qaja hnene la thin ka hape: “Drei la elolon la troa melën la nöjei drai, qa ngöne laka, caasi eahun ngöne la huliwa ne cainöj! Lolo catr la itre ijine xeni hun, pine laka, eahuni a porotrikën la aqane isa cainöje hun ngöne la drai.” Hna qaja hnene la nekön ka hape: “Atraqatr la madrineng troa ce cainöj me kaka ngöne la wiik, ke hnei nyidrëti hna pane xomi drai thei maseta, matre troa ce cainöj me eni.” Hna qaja mina fe hnene la kem ka hape: “Tru catr la madrineng hen ne fami, tre, eni a atre laka eahuni a ce xom la huliwa ka sisitria catre kö hune la nöjei huliwa ngöne la hneijine së enehila.” Hapeu, tro kö la fami epun a hane ce pionie ka ixatua? Haawe, tune kaa matre ce ithanatane fe nyipunie me fami nyipunie, me hane wang maine ijije jë fe kö tro epuni asë itre atren la hnepe lapa, a hane pionie ka ixatua ngöne la hneijin ne la Drai Ne Amekunën?
9 Ijije Kö Tro Sa Kuca Matre Troa Sisitria La Huliwa Së Ngöne La Treu Maac? Ame ngöne lo kola xejë la macatre 2000, hna hnying hnene la Huliwa Ne Baselaia ka hape: “Ijije Kö Troa Hane Sisitria Koi Së La Treu Eipereme 2000?” Tune kaa la aqane xemin hnene la itre trejin? Kola elë la etrun la itre ka pionie ngöne la nöjei götran. Kola e la 323 lao pionie ka ixatua e Kaledonia, nge 11 e Walis me Futuna; thaa hna öhne kö lai ngöne la itre xaa macatr ka ase hë! Ala 41 fe e Tas. Ketre, kola sasaithe mina fe la etrun la itre hawa, me itre zonal me itre zonal hna hamën, me itre iwai hmaca ngöne la itre xaa götran. Hapeu, mekune hi epuni lo madrin ka eje hnine la ekalesia, qa ngöne laka, tru catr la etrun la huliwa ngöne la götrane la ua ngöne la treu cili ka ketre pengöne kö? Hapeu, ijije kö tro sa kuca tune hmaca lai, maine troa sasaith la etrun la hne së hna kuca ekö ngöne la treu celë? Maine tro sa catre ce huliwa, eje hi lai laka, tro la treu Maac 2002, a “Ketre Treu Ka Sisitria Koi Së.” Pine nemen la treu Maac?
10 Luetre la lue kepin matre troa ketre pengöne kö la huliwa ngöne la treu Maac. Ame la hnapan, tre, kola troa atrun la Drai Ne Amekunën ngöne la pun la treu Maac, matre kola aijijë së troa nyiqaane hën la itre atr troa hane sin la drai cili, ngöne la kola xejë la treu. Ame la hnaaluen, tre, faifi lao mecixen me sabath ngöne la treu Maac 2002, matre nango hmaloi fe hi tro la itre ka huliwa i maseta me itre ka ini a hane xom la huliwa ne pionie. Tune kaa matre pane lapa ju nyipunie me hnëkëne amë la nyine tro nyipunie a kuca, me nyialien la ketre tulu ne huliwa hna hnëkën ngöne cahu sine trongene la Huliwa Ne Baselaia? Thaa ka jole menu kö la troa eatrën la huliwa ne pionie ka ixatua. Hanawang la ketre ceitun, maine tro së a kuca la 8 lao hawa ngöne la nöjei mecixeni me sabath, laka, faifi lo lai ngöne la treu, eje hi lai laka, tro pe hi a 10 lao hawa munëne pe matre traqa pi kowe la 50 lao hawa.
11 Nemen la nyine troa kuca hnene la itre qatre thup matre troa xatuan la itre trejine asë hnin la ekalesia, troa “eatrëne la wesi ula i Akötesie”? Loi e troa eköth la madrin ne la itre trejin, jën la itre icasikeu memine fe la aqane ce porotrik. Loi e tro la itretre xomiujin la itre Ini Tus Ne La Ekalesia, itretre thup me itre drikona ka ce huliwa me angatr, a thel troa ithanata memin la itre atren la gurup, me hamën koi angatr isa ala caas la ixatua ka ijij. Maine jë ame la ka nyipi ewekë koi angatr, tre, ene la itre hnepe hnëewekë nyine ixatua ka xalaith, maine itre mekun nyine ixatua ka troa hetre thangan kowe la mele i angatr. (Ite edomë 25:11) Nyimutre la itre ka öhn laka, ame la angatr a nango saze la itre xaa götran ne la porogarame i angatr, ijiji angatr fe troa hane xom la huliwa ne pionie ka ixatua. Ame ngöne la itre ekalesia ka nyimutre, kola amamai tulu hnene la itre qatre thup, memin la itre drikona me itre föe i angatr, ene laka, angatr a pionie ka ixatua ngöne la hneijin ne la Drai Ne Amekunën. Celë hi ka xatuan la itretre cainöje lai, matre angatr a hane xom la huliwa ne pionie. Pine laka, thaa ijije kö kowe la itre xaa trejin troa hane pionie, qa ngöne laka, ka wezipo, maine hnene pena la itre xaa ewekë, ngo hna ithuecatr koi angatr troa hane amaman la ole i angatr, ene la troa kuca la hnei angatr hna atrein troa cainöj memin la munën la ekalesia.
12 Troa tro loi la ijine huliwa cili, e hna hnëkëne hnyawa hnene la itre qatre thup. Loi e troa athipi hawan hnyawa la itre icasikeu göi cainöje trootro ngöne la wiik. Maine ijij, tro la atre thupën la huliwa ne cainöj a canga iën la itre trejin ka maca, matre troa xomiujin la itre icasikeu asë thatraqan la huliwa ne cainöj. Loi e troa hnëkë hnyawa matre thaa tro kö a sasaith la 10 koi 15 lao menetr ne icasikeu, hna ce e fe hë ngöne la itre menetre cili, la hna ameköti sine ce tro me, me athipi teritoar, memine la thith. (Wange ju la itre mekun, hna hape, Kola Sa La Itre Hnyinge i Nyipunie ngöne la Huliwa Ne Baselaia ne Semitrepa 2001.) Loi e tro fe a qejepengöne hnyawa kowe la ekalesia la porogaram göi huliwa ne cainöj ngöne la treu, me afedren ej ngöne la hna athipi pepa ne la Uma Ne Baselaia.
13 Loi e troa hnëkën hnyawa fe la itre teritoar. Tro la atre thupën la huliwa ne cainöj, a ce wang memin la trejin atrekë hnëqan la itre teritoar, matre troa cainöj ngöne lo itre teritoar hna thaa kuca lapaane kö. Troa qaja mina fe la enyipiewekën la troa kuca lo itre hnalapa ka pë atren, me cainöj e cahu gojeny, me ngöne la itre setroa, me cainöje fe e heji lapa. Maine loi koi itre xan troa kapa la ketre ixatua ngöne la aqane troa cainöj jëne telefon.
14 Xatua Angatre Jë Troa Cainöje Hmaca: Hetrenyi kö hnine la teritoar ne la ekalesia i epun, la itre xaa trejin ka qea ha la hna thaa cainöj? Itre atrene pala kö angatr la ekalesia, nge angatr a aja ixatua. (Sal. 119:176) Pine laka, easenyi hë la pun la fene celë, nge cahmijë hë la fen ka hnyipixe, haawe, hetre nyipi kepin matre easë a kuca asë la hne së hna atrein troa xatuan la itre trejin ka thaa cainöje hmaca kö. (Rom. 13:11, 12) Ngöne la faifi lao macatre ka ase hë, hna e la 26 500 nge hetre munën lao atr ka kapa hnyawa la ixatua nge ka xejë hmaca la huliwa ne cainöj. Nemen la nyine tro së a kuca matre troa xatuan la itre trejin ka nyimutre, matre troa hetrenyi hmaca e kuhu hni angatr la ihnim memin la mejiun, lue thiina ka eje ekö ngöne lo angatr a nyiqaane cainöj?—Heb. 3:12-14.
15 Loi e troa thel troa ithanatan hnene la collège ne la itre qatre thup, la aqane tro angatr a xatuan la itre ka thaa cainöje hmaca kö ngöne itre hnepe macatre ka ase hë. (Mat. 18:12-14) Loi e tro la seketere a wange hmaca la itre pepa ne huliwa së me xom la ëje ne la nöjei ka thaa cainöje hmaca kö. Loi e troa pane catre thel troa waipengön la ewekë cili hnene la itre qatre thup, matre troa hamë ixatua. Maine jë tro la ketre qatre thup a tro meköt troa wang la ketre trejin, pine laka, atre angeice hi hnene la ka aja ixatua nge lue ka imajemikeu nyidro, maine pena kola sipone la ketre trejin matre troa xatuan la ketre. Maine jë hnei angatr ekö hna etid memin la ketre laka thaa cainöje hmaca kö enehila, nge ketre ijine la ka ijij troa pane iwai matre troa hamën ka ketre ixatua ka ketre pengöne kö. Eloine pe, kola troa upe la itre trejine ka nyimutre ka thaa cainöje hmaca kö, matre tro hmaca angatr a hane cainöjën la wesi ula i Akötresie. Maine ijij hmaca ha tro angatr a hane xejë la huliwa, haawe, ijine tro hi lai a nyiqaan ngöne la hneijin ne Drai Ne Amekunën!—Wange ju la itre mekun hna eköhagen hna hape, Kola Sa La Itre Hnyinge i Nyipunie, hnine la Huliwa Ne Baselaia ne Nofeba 2000, matre troa qejepengöne atrun.
16 Hapeu La Itre Xan, Ijiji Angatre Kö Troa Hane Cainöj? Iehova pala hi a amanathithin la nöje i Nyidrë, ngöne laka, Nyidrëti a atraqan la “nöjei ewekë lo hna ajane hnei nöjei nöj’ asë.” (Hag. 2:7) Ame ngöne la nöjei macatre, kola e pala hi la itre atr, itre thauzan ka nyiqaan cainöj nge thaa hna bapataisone pala kö. Drei e angatr? Kola e ngöne la itre atr cili la itre nekön la Itretre Anyipici Iehova ka kökötr ngöne la etid i angatr. Tro sa atre tune kaa ka hape, ijiji angatre fe hë troa hane cainöjën la maca ka loi?
17 Itre Nekön La Itretre Anyipici Iehova: Nyimutre la itre nekönatr ka ce tro memin la itre keme me thine i angatr troa cainöj ngöne itre hnalapa trootro ngöne la itre macatre ka nyimutre, ngo thaa itretre cainöj petre kö angatr hna thaa bapataison. Ketre ijin ka lolo koi angatr la treu Maac, maine angatr a ajan troa hane nyiqaane cainöj. Nemen la aqane tro epuni a atre ka hape, ijije fe hë la nekö i epuni ka co, troa hane cainöj? Ame ngöne la itus Organisés pour bien remplir notre ministère, götrane 100, kola qaja ka hape “ngöne la kola öhne laka, ka lolo la thiina ne la nekönatr, nge hetre aja e kuhu hni nyën troa hane amaman la lapaune i nyën jën la huliwa ne cainöj, ngöne laka, angatr a hane qaja la maca ka loi koi itre xan.” Maine epuni a mekun ka hape, ijije fe hë kowe la nekö i epun troa cainöj, ce ithanatane jë lai memine la ketre qatre thup qa ngöne la Komite Ne Cainöje Trootro Ne La Ekalesia.
18 Itre Hnainin Ka Ijij Troa Cainöj: E hetrenyi hë la hnainin la atrehmekun, nge ka hane sine pala hi angeic la itre icasikeu, maine jë tro hë angeic a hane ajan troa ketre atre cainöjën la Baselaia. Maine nyipunie la ka etid kowe la hnainin cili, pane goeëne ju cahu itre hnying: Hapeu, mama kö ka hape, ka kökötr angeic ngöne la ua, thenge la macatre memin la hnei angeic hna atrein? Hane kö angeic hane qaja amaman la lapaune i angeic kowe la itre xaa atr? Angeice kö a hane xetrën la “at ka hnyipixe”? (Kol. 3:10) Angeice kö a hane trongën lo itre hna amekötin kowe la itre hnainin ka thaa bapataiso petre kö; itre hna amekötin ka eje hnine la itus, Notre ministère, götrane 97-9? Maine celë hi hna kuca lai hnene la hnainin, loi e troa wang la Komite ne cainöje trootro ne la ekalesia, matre tro la lue qatre thup a ce ithanatane lai me epun memine la hnainin. Maine ka loi hi, haawe tro la lue qatre thup a thuemacanyi angeic, laka, ijiji angeice fe hë troa hane nyiqaane cainöje trootro.
19 Tune Kaa Koi Treu Eiperem Me Mei? Celë hi lue treu lai ka lolo catr, ijine tro sa a hane akökötren la aqane tro sa cainöj. Ame koi itre ka pionie ka ixatua ngöne la treu Maac, atreine hi tro angatr a hane xome fe la huliwa cili ngöne la treu Eiperem me/maine Mei. Ngöne la treu Eiperem me Mei, tro hë së a pane tro fë la itre zonal ngöne la hna cainöj, La Tour de Garde me Réveillez-vous ! Nemen la thangan itre ej kowe la mele ne la itre atr ka e itre ej! Hetre elolone catr la itre zonal cili, ngöne laka, hetre thangane itre ej, ngöne la aqane kökötr la itre atr ngone la ua e cailo fen. Qa ngöne lai, loi e tro sa catr tro fë la itre zonal ngöne la treu Eiperem me Mei me hamëne kowe la itre atr ka nyimutre. Nyiqaane mekune jë enehila la nyine troa kuca matre troa hane akökötren la aqane troa cainöj ngöne la itre treu cili.
20 Pine laka tru catr la nyine troa kuca ngöne la huliwa ne cainöj, haawe, aja i epuni fe kö troa hane akökötren la etrun la itre zonal hnei epun hna troa komaadën hnine la ekalesia? Ame ngöne la macatre ne huliwa, easë a tro fë la zonal, La Tour de Garde me Réveillez-vous ! ngöne la nöjei mecixen, ene lo Drai Ne Tro Fë Zonal. Nge pine laka, ala nyimu catre la itre trejin ka troa pionie ka ixatua nge ala nyimu the së la itre ka troa tro fë la itre zonal ngöne la lue treu ka pexej, haawe, ma loi e tro sa akökötren la komaad së hnine la ekalesia. Qa ngöne lai, kola sipon matre troa canga thuemacan la atre cilën la itre zonal hnine la ekalesia. Loi e tro mina fe la atre cilën la itre itus a goeën maine tru catre pala kö hnine la ekalesia la itre tarak, Aimeriez-vous en savoir plus sur la Bible ?
21 Nyimutre la itre trejin ka olen la itre hna cinyihan e hnin la Huliwa Ne Baselaia, hna hape, “Troa Qeje Nemen Gön La Itre Zonal.” Hane kö epuni kepe thangan la hna amekötine cili, ene la troa inin la itre xaa aqane troa nyiqaane ithanata? Tune kaa matre pane ce xome la ketre hnepe traeme ngöne la kola etid hnei fami ngöne la nöjei wiik matre troa ce amacane lo itre aqane nyiqaane ithanata hna hamën?
22 Thele Jë Troa Kepe Thangane Hnyawa La Hneijin Ne La Drai Ne Amekunën Celë: Tui Paulo aposetolo, amamane jë së koi Iehova la etrun la ole së kowe la “ahnahna,” hnene la troa catre sajuën la itre hna amekötine asë thatraqan la hneijin ne Drai Ne Amekunën. Kola qaja fe la (1) troa sin la ketre ijin ka sisitria ngöne la macatre, ene la troa hane traqa ngöne la ijine kola atrun la Jidr Ne Pui Ne Xeni Ne La Joxu, e drai menu 28 Maac 2002; (2) troa xatuan la itre trejin ka thaa cainöje hmaca kö, matre troa angatr a hane akökötrene hmaca la “aja i [angatr] hnapan” (Hna ama. 2:4; Rom. 12:11); (3) troa xatuan la itre nekö së memine la itre hnainin ka ijij matre tro angatr a hane itretre cainöj thaa hna bapataisone petre kö; nge (4) troa hane catre xom la huliwa ne cainöj, maine troa hane pionie ka ixatua ngöne la treu Maac me e thupen.—2 Tim. 4:5.
23 Easë a ce thithi matre tro asë hi së a ce catre cainöjën la maca ka loi ne la Baselaia ngöne la hneijin ne la Drai Ne Amekunën; easë hi lai a amaman la etrun la ole së kowe la nöjei ewekë asë hnei Iehova hna kuca thatraqai së.
[Hna eköhagen götrane 6]
Porogarame Ne Cainöje Së Göi Maac 2002
Sabath Thupene Hmi Drai Menu Drai Hnacian Drai Ka Co Drai Ka Tru Mecixe
1 2
Drai Zonal
3 4 5 6 7 8 9
Drai Zonal
10 11 12 13 14 15 16
Drai Zonal
17 18 19 20 21 22 23
Drai Zonal
24 25 26 27 28 29 30
DRAI NE Drai Zonal
AMEKUNËN
31 THUPEN LA KOLA LÖ LA JéÖ
Ijije epuni kö troa hnëkën matre troa eatrën la 50 lao hawa ne pionie ka ixatua e treu Maac?