Ewekë Nyine Troa Amë Panën, Ene La Troa Sine Pala Hi La Itre Icasikeu
1 Ame la itre hnepe lapa Keresiano tre huliwa ka tro pa, la troa sine la itre icasikeu ne la ekalesia. Ngo qa ngöne laka tru la itre ewekë nyine troa kuca ngöne la mel, haawe kösë kola ajolë së enehila troa sine pala hi la itre icasikeu. Hapeue la itre hna kuca hnene la hnepe lapa, ene la huliwa i maseta, maine ini pena, itre eje kö a thapa la traeme hne së hna amë matre troa hmi koi Iehova? Maine tro sa xome la itre ewekë thenge la aqane waiewekë i Iehova, haawe, tro ha xatua së troa amë panën pala hi la itre ewekë hne së hna mekune troa tro pa.—1 Sam. 24:6; 26:11.
2 Thaa hnene kö la ketre atr ne Isaraela hna wangatrun la aqane waiewekë i Iehova, matre hnei angeic hna nyi sinöe ngöne la drai sabath. Maine jë hnei angeice hna mekune ka hape, angeice a kuca lai thatraqane la hnepe lapa i angeic, maine pena ke kola mekune ka hape thaa ewekë ka ngazo catre kö. Ngo kola mama ngöne la aqane ameköti angeic hnei Iehova laka, ame la troa kuca la itre ewekë ne la ngönetrei ngöne la itre traeme hna amë thatraqane la hmi, tre celë hi ketre ewekë lai ka ngazo catr.—Num. 15:32-36.
3 Aqane Troa Cile Kowe La Jole Cili: Ame kowe la itre trejine ka nyimutre, tre kösë angatr a isine matre thaa tro kö la huliwa i angatr a sewe angatr troa sine la itre icasikeu. Ame itre xan, tre angatr a cile kowe la jole cili ngöne la angatr a sipone kowe la maseta i angatr troa isaze memine la ketre sine ce huliwa i angatr, maine troa thele huliwa ka loi thatraqane la itre icasikeu, maine troa ahmaloeëne pena la aqane mele i angatr. Eje hi lai laka, ame lai aqane nue angatr la mele i angatr troa kuca lai itre ewekë cili thatraqane la hmi, tre itre ewekë hi lai ka nyipi amadrinë Akötresie.—Heb. 13:16.
4 Ketre tune mina fe la kuci qa göi ini, laka ketre jole mina fe. Hna qaja hnene la itre thöth ka hape: “Eni a kuca la itre xaa qang qëmekene la itre icasikeu, nge ame pë hë la munën, tre eni a kuca ngöne la eni a bëeke hmaca qa hna icasikeu.” Maine thaa hna kuca asë ju kö la qa thupene lai jidri ne icasikeu, ame la itre xaa keme me thin tre, hnei angatr hna qejepengöne kowe la itre ka inin la itre nekö i angatr laka, ame kowe la fami i angatr, tre, hna tro pane pala hi la itre icasikeu ne la Keresiano.
5 Hetrenyi la lue ewekë ka lolo catr kowe la hnepe lapa, matre tro angatr a kuca la itre huliwa hnine la hnalapa me sine la itre icasikeu ngöne la traeme hna sa; kola qaja la troa ixatuanekeun la itre ewekë, me troa hnëkë hnyawa. (Ite edomë 20:18) Ijije fe troa inine la itre nekönatr ka co troa heetr, me canga tro qëmekene troa nyiqaane la icasikeu. Jëne la tulu hna hamën hnene la itre keme me thin, ijije hi tro angatr a eköth e kuhu hni ne la itre nekö i angatr la enyipiewekën la itre icasikeu.—Ite edomë 20:7.
6 Pine laka catrehnine catr nge kola elë la itre jol enehila ngöne la fene celë, haawe nyipi ewekë catr nge celë jëne mel la troa sine pala hi la itre icasikeu ne la ekalesia. Epi tro pala hi së a catre xome la aqane waiewekë i Iehova, me amë panën la troa sine pala hi la itre icasikeu.—Heb. 10:24, 25.