Ini Thatraqane La Cainöj—Qëhnelö Ka Isaisa Nyine Fe Gojenyi Kowe La Huliwa Ne Cainöj
1 Hnei Iehova hna ahnith jëne Ieremia perofeta ka hape: “Tro ni a acile hui angate [nöjeng] la itete thupë mamoe troa thu a i angat, nge tha tro hmaca kö angat’ a qou, me iëz, me pate.” (Iere. 23:4) Hna xome enehila la huliwa cili, ene la troa thupëne la itre atr ka xulu qa ngöne la nöjei nöje asë. Kola xome la hnëqa cili hnene la itre qatre thup hnine la itre ekalesia, itre thauzane la etrun. Kola nyixanyi angatr hnene la itre thöth trahmany, kola aceitunëne la etru i angatr me itre wene lepanyi ne hmakany, angatr a nue la mele i angatr troa nyihlue i Iehova. (Sal. 110:3) Drei la ketre manathith kowe la itre ekalesia ne la nöje i Akötresie, laka hetrenyi la itre thöthi trahmanyi cili ka ipië! Pine laka kola catre iacasinekeune pala hi ngöne la götrane la ua la itre atr, haawe, kola aja trahmanyi ka ijije troa nyihluene la itre trejin me angatr.
2 Hetrenyi la ketre hna hnëkëne ka lolo matre troa inine la itre qatre thup memine la itre drikona ka pë föen, matre tro angatr a akökötren la itre hnëqa nyine tro angatr a xome hnine la ekalesia; ame la hna hnëkëne cili tre hna hëne ka hape Ini Thatraqane La Cainöj. Kola e la 22 000 nge sin lao hnainin qa ngöne la 144 lao filial, ka kapa la ini cili jëne la 999 lao ini hna kuca ha qaane lo kola xötrei acile la ini cili ngöne lo macatre 1987. Ame kowe la itre trejine cili, tre hna amamane hnyawa hnene la ini laka celë hi “qëhnelö ka ishaisha [“nyine fe gojenyi kowe la huliwa,” MN].”—1 Kor. 16:9.
3 Kepin La Ini: Ame la alien matre kola kuca la Ini Thatraqane La Huliwa Ne Cainöj, tre, nyine troa inine la itre trahmanyi me hnëkë angatr troa xome la itre hnëqa ngöne la itre götrane kola aja ixatua hnene la organizasio i Iehova. Kola akökötren hnene la ini la atreine i angatr matre troa elemekene la huliwa ne cainöje trootro, me thupëne la hna axö mamoe, me hamë ini hnine la ekalesia. Thupene la hna ini angatr, troa upe la itre xan troa pionie hut, maine troa itre qatre thup ka iwai trootro ngöne la itre nöje hnei angatr hna mele ngön, maine ketre nöje pena. Ame itre xan, tre kola acili angatr troa xome la itre xaa hnëqa hnine la ekalesia i angatr, maine ngöne pena la ketre teritoar gaa aja ixatua nge hna elemeken hnene la filial.
4 Ame ngöne lai eitr lao wiik ne ini, kola inine hnyawa hnene la itre hnainin la Tusi Hmitrötr. Angatr a wang la itre ini ka nyimutre e hnine la Tusi Hmitrötr, tune la aqane troa xome la itre hnëqa ne troa thupë mamoe, memine la itre aqane troa cile kowe la itre jol hna qëmeke kow hnene la itre Keresiano. Angatre mina fe a kapa la ini hna hamën hnei Tusi Hmitrötr göi aqane troa elemekene la huliwa, me iameköti, me aqane troa eköth la itre huliwa hnine la ekalesia. Angatre mina fe a kapa la ketre ini ka ketre pengön ngöne la aqane troa ithanata kowe la itre atr ka ala nyim, nge kola isa hamën koi angatr isa ala caas la ixatua matre troa akökötren nyimenyimën la atreine i angatr ngöne la götrane la ua.
5 Itre Hna Thele Thene La Itre Hnainin: Eje hi lai laka, thaa thatraqai nöjei atr menu kö la ini cili, hetrenyi la itre hna thele thene la itre ka ajan troa hane sin la ini. Kola aijijën troa sin la ini, la itre qatre thup me itre drikona ka lue macatre ne xome hë la itre hnëqa cili. Thaa ka faipoipo kö angatr, nge qaane la ka 23 lao macatre koi 50. Ketre thatraqane fe la itre ka atreine e, me cinyany, me qaja hnyawa la qene hlapa hna ithanatan ngöne la nöj hna hnen lai ini, nge thaa tro kö a hetre sine wezipo, nge ka pëkö ejolen göi xen. Canga tro hi a xome la itre trejine trahmanyi ka xome la huliwa ne pionie lapaa.
6 Ame koi itre ka ajan nge ka ijije troa nyihlue i Iehova ngöne la itre xaa götran, atreine hi troa upi angatr kowe la itre götrane gaa aja ixatua. Celë hi matre loi e troa eje thei angatr la aja ka eje ekö thei Isaia perofeta, laka hnei nyidrë hna ketre nue la mele i nyidrë troa kuca la ketre huliwa ka ketrepengöne kö, öni nyidrëti ka hape: “Inieti la, upengë nieti jë.” (Is. 6:8) Hnei nyidrëti mina fe hna hni ka ipië ngöne la mele i nyidrë. Ka eje e kuhu hni ne la itre trejine ka mekune troa hane sin la Ini Thatraqane La Cainöj, la ihnimi kowe la itre trejine me angatr, memine la ajane troa xatua angatr ngo thaa ene kö la troa pi mama fë la hnëqa hna cilën. Thupene la hna kapa la ini ka lolo cili, kola troa thele thene la itre hnainin, troa trongën la itre hnei angatr hna inin matre troa kepe thangane ka loi hnene la itre xan.—Luka 12:48.
7 Itre Thangane Ka Loi: Ame ngöne lai eitr lao wiik ne ini, troa “hiane ngöne la nöjei wesi ula ne la lapaun, memine la ini ka loi” la itre hnainin. (1 Tim. 4:6) Kolo lai a troa ini angatr matre troa xatuan me ithuecatr ngöne la itre ekalesia me itre sirkoskripsio hna upi angatr troa huliwa ngön. Ame ngöne la itre götrane ka nyimutre hna upe kow la itre hnainin, hna elë la huliwa ne cainöje trootro, hna ithuecatre fe kowe la itre thöth troa xome la huliwa ne pionie, nge kola wangatrune hnyawa la itre atr ka xötrei atre la nyipici nge ka ce memine la nöje i Akötresie.
8 Hapeu, ketre qatre thupe thöthi epun maine drikona pena akawane la lue macatre celë, 23 koi 50? Tune kaa matre hane fe epuni thele troa hane sin la Ini Thatraqane La Cainöj? Maine ketre trejine trahmanyi epun, hapeu epuni kö a hane mekune la itre ewekë hnei epuni hna ajan troa eatrën elanyi ngöne la huliwa i Iehova? Tune kaa matre ahmaloeën la mele i epun, me nue la itre madrin matre troa hane lö hnine la “qëhnelö ka ishaisha nyine fe gojenyi kowe la huliwa” (MN)? Troa atraqatre la madrin memine la manathithi hnei epuni hna troa kapa qa ngöne lai. Ketre, kola mama hnyawa ka hape, ame la Ini thatraqane La Cainöj, tre thaa itre hnainine hmekuje kö la ka kepe thangane ka loi la ini cili, ngo ene mina fe lo itre ekalesia ne la nöje i Akötresie e cailo fen.
[Hna eköhagen götran 3]
Aqane Kepe Thangane Angatr La Ini
“Hnene la ini hna akökötrene hnyawa la huliwa ne cainöjeng, memine la atreineng troa thupëne la hna axö mamoe cememine la inamacan ngöne la aqane troa xome la itre xötr ne la Tusi Hmitrötr.”
“Kola acatren hnene la ini la mejiuneng ngöne la aqane tro ni a xome la itre hnëqa ka isapengön e hnine la ekalesia.”
“Eje a saze la nöjei götrane la meleng, ngöne mina fe la mekuneng göne la itre hna amekötine hnei Akötresie memine la organizasio i Nyidrë.”
“Hna xatua ni hnene la ini troa atrehmekune hnyawa la enyipiewekëne la tro ni a ketre nue la meleng troa ixatua ngöne la itre götrane gaa aja ixatua.”