Loi e Tro Sa Huliwane Inamacanën La Itre Itusi Së Hna Eköthe Hune La Tusi Hmitrötr
1, 2. Nemene la mekunene la itre atr göne la itre itusi së, nge nemene la nyine tro sa hnyingëne thel?
1 “Ka hekö hë ni e la itre itusi epun, qaane loi 1965. Hnenge pala hi hna xome la Tusi Hmitrötr ngöne la eni a e itre ej, nge ka ihmeku hnyawa la itre hna qaja memine la Wesi Ula i Akötresie. Hnenge pala hi hna thele troa atre la nyipici göi Akötresieti me Iesu, nge ijije hë tro ni a qaja enehila ka hape, öhne hë ni jëne la itre itusi epun memine la Tusi Hmitrötr la itre mekune ka sa hnyawa la itre hnyinge i eni.” Celë hi hna cinyihane la hnene la ketre trahmanyi kowe la iwahutine la Itretre Anyipici Iehova. Ame fe hnine lai tus, hnei nyidrë hna sipone troa etid.
2 Nyimutre la itre atr e cailo fen ka tune la trahmanyi celë. Angatr a hane olene la ixatua hna hamën hnene la “hlue ka nyipici me ka inamacan” göi troa inine la Tusi Hmitrötr. (Mat. 24:45) Ame ngöne la nöjei macatre, nyimutre la itre itusi hna kuca matre troa xatuan la itre atr ka hni ka menyik, troa hane “wangate hmekune la nyipici.” (1 Tim. 2:4) Tro sa huliwane inamacanëne tune kaa la itre itusi së?
3. Tro sa thupëne tune kaa matre thaa tro kö a luuzi la itre itusi së?
3 Thaa Tro Kö a Aluuzin: Thatreine kö tro sa tro fë asë la itre itusi së ngöne la ketre hnepe ijin ka xoxopatr. Nemene la nyine tro sa kuca matre thaa tro kö a luuz la itre itusi së? Nyipi ewekë troa atreine waiewekë ngöne la easë a xome la itre itusi së troa cainöje fë. Thaa nyipi ewekë kö troa xome nyimutren la caa pengöne itus matre troa cainöje fë; ma ka loi hi troa xome la caas maine luetre, nge thupene lai kola bëeke hmaca troa xome la itre xan. Celë hi aqane tro lai a kuca matre thaa tro kö a meköle menu la itre itusi së. Ketre, maine tru catre pala kö hnei zonale ka meköle menu pe, ma loi e troa nango acone la komaade së.
4. Nemene la nyine troa kuca maine tru hnei itusi hna xeen hnine la ekalesia?
4 Itre Itusi Ka Meköl: Maine kola meköle la itre xaa itus hnine la ekalesia, tro la ka cilën la itre itus a wange la itre xaa ekalesia ezi angatr maine angatre fe a ajane troa xome la itre itusi ka meköle pe. Ijije hi troa tro fë hnene la itre trejin la itre itusi ka hekö hë kowe la itre atrene la lapa i angatr ka thaa hmi kö, maine koi itre hnainin me itre xane ju kö. Maine jë troa hane madrine la itre ka xötrei hane sin la ekalesia, troa kapa lai itre itusi ka hekö cili nyine thatraqane la hna ami tusi angatr.
5. Tune kaa la aqane tro sa amamane la hni ne ole së kowe la itre itusi së?
5 Ame la aja së tre, ene la troa hetre thangane ka loi la itre itusi së, laka troa xatuan la itre atr ka hni ka menyik troa atrepengöne hnyawa la itre aja i Iehova ka lolo catr. Easë fe a hane tui Iesu, laka, thaa hnei nyidrëti kö hna aluuzin lo itre munëne falawa thupene la hnei nyidrë hna ithuan la ka ala nyim. Haawe, loi e tro mina fe së a thele troa huliwane hnyawa la itre itusi së. (Ioane 6:11-13) Thatreine jë kö tro la maca ne iamele ka eje hnine la itre itusi së a ketr la hni ne la itre atr ka meköt, e hne së hna ami uman me watrengëne itre ej. Qa ngöne lai, loi e tro sa atreine waiewekë ngöne la easë a xome la itre itusi së troa cainöje fë me huliwane inamacanëne itre ej matre troa kepe thangane fe hnene la itre xan.—Fil. 4:5.