Loi e Tro Sa Hamën La Itre Itus Hmekun La Qene Hlapa Ne La Itre Atr
1. Pine nemen matre nyimutre la itre ekalesia ka ajan troa hetre itus hna ujën ngöne la itre xaa qene hlapa kö?
1 Ame ngöne la itre götran ka nyimutre, hetrenyi la itre atr ka traqa qa ngöne la itre xaa nöj ka ketre qene hlapa kö, kolo fe a troa hane cainöje koi angatr. Ala nyimu thei angatr la itre ka canga atre me trotrohnine hnyawa la nyipici, qa ngöne laka hna ini angatr ngöne la sipu qene hlapa i angatr. Nemen la itre hna amekötin matre troa hamën kowe la itre atr ka kapa la nyipici, la itre itus ka qejepengöne hnyawa la Tusi Hmitrötr ngöne la qene hlapa i angatr nge ka hmaloi koi angatr troa trotrohnin?
2. Nemen la aqane troa ce huliwa hnene la itre ekalesia ka isa qene hlapa kö, nge ka kuca la teritoar ka caas?
2 Eu La Troa Hamën La Itre Itus: Maine kola ce kuca la teritoar ka caas hnene la luetre maine nyimu ekalesia ka ithanatan la ite qene hlapa ka isapengön, tro la itre collège ne la itre qatre thup a ce huliwa memine la itretre thupën la huliwa ne cainöj matre troa eköth la itre nyine troa kuca thenge la ka loi kowe la isa ekalesia; haawe tro hë la itre gurup ka ithanatan la itre xaa qene hlapa a hane cainöj ngöne la itre qene hlapa cili. Ame ngöne la easë a cainöje ngöne itre hnalapa trootro, eje hi laka thaa ijije kö tro sa hamën kowe la itre atr la itre itus hna ujën ngöne la qene hlapa ne la ketre ekalesia. Ngo maine kola cainöj ngöne la nöjei ijin, maine e cahu hna tro, ijije hi tro sa hamën la itre itus ngöne la qene hlapa hna ithanatan hnene la itre atr hne së hna iöhnyi memin.—Wange ju la Huliwa Ne Baselaia ne Okotropa 1990, ngöne lo hna cinyihan hna hape, Kola Sa La Itre Hnyinge i Nyipunie.
3. Eu la tro la ekalesia a xeen la itre itus hna ujën ngöne la ketre qene hlapa?
3 Eu La Troa Xeen La Itre Itus: Nemen la nyine troa kuca maine tru la itre atr ka ithanatan la ketre qene hlapa, ngo pëkö ekalesia ka ithanatan la qene hlapa cili? Loi e tro la itre ekalesia a xeen la itre hnepe itus ngöne la qene hlapa cili, ene la itre tarak, memine la boroshür Thele me Ce Sinee Me Akötresie me itus Atrehmekune. Loi e tro la itretre cainöj a hamën la itre itusi cili, ngöne la angatr a iöhnyi memine la itre atr ka e ngöne la qene hlapa cili.
4. Tune kaa la aqane troa kapa la itre itus ngöne la kete qene hlapa, a ka pëkö e hnine la ekalesia?
4 Tune Kaa La Aqane Troa Sipone La Itre Itus: Maine kola ajan hnene la ketre atr la ketre itus hna ujën ngöne la ketre qene hlapa, nge pëkö e hnine la ekalesia, Tune kaa la aqane troa kapa la itusi cili? Loi e tro la atre cainöj a ce wange memine la atre cilën la hna hamë itus, matre troa goeën la itre itus hna ujëne hë ngöne la qene hlapa ka ijij troa kapa, nge hna troa sipon elanyi ngöne la kola troa komadën la itre itus hnene la ekalesia.
5. Nemen la nyine troa kuca maine kola canga ajan troa kapa la itre itus, ngo thaa ijine tro petre kö a sipo itus hnene la ekalesia?
5 Maine kola canga ajan hnene la atre cainöj troa kapa la itre itus, loi e troa wange la ketre atren la Kometr Ne Huliwa Ne La Ekalesia matre troa sipone itre ej qëmekene tro la ekalesia a komadën la itre itus tune lo hna majemin. Maine ka loi hi, tro la trejin ka cilën la itre itus maine ketre pena hnei angeic hna iën, a sipone koi filial la itre itus hna jëne telefon.
6. Nemen la hne së hna ajan ngöne la easë a thele troa hetrenyi la itre itusi së itre Keresiano?
6 Epi tro sa huliwane hnyawa la itre itusi së itre Keresiano, matre troa xatuan “la nöjei ate asëjëihë,” thenge la qene hlapa hnei angatr hna ithanatan, matre tro angatr a hane ‘wangatrehmekune la nyipici me mel.’—1 Tim. 2:3, 4.