Inine Jë La Itre Nekö i Epun Troa Atrunyi Iehova
1. Ijije kö troa hane atrunyi Iehova hnene la itre nekönatr?
1 Kola ithuecatre hnene la Tusi Salamo 148:12, 13 kowe la itre nekö trahmany me itre jajiny, troa “atrune la atesiwa i Iehova.” Eje e hnine la Tusi Hmitrötr la itre nekönatr ka nyimutre ka ujë tune lai, hna xomi angatre hi lai nyine tulu. Hanawang la ketre e angatr, “kola nyihlue la nekönate Samuela xajawa i Iehova.” (1 Sam. 2:18) Hnene la ketre “jajinyi ka co” hna qaja kowe la föi Namana laka, ijije hi troa nyinyin la lepera i Namana hnene la ketre perofeta i Iehova e Isaraela. (2 ite jo. 5:1-3) Ame ngöne lo Iesu a lö hnine la ēnē me kuca la itre iamamanyikeu, ene pe kola sue la “ite nekönate” ka hape: “Hosana kowe la Hupuna i Davita!” (Mat. 21:15) Nemene la aqane troa inine hnene la itre keme me thin la itre nekö i angatr matre tro nyudreni a hane atrunyi Iehova?
2. Pine nemen matre nyipi ewekë catre kowe la itre keme me thin troa amamai tulu ka loi kowe la itre nekö i angatr?
2 Drei La Ketre Ceitun: Qëmekene troa inine la nyipici ngöne la itre hni ne la itre nekönatr, loi e tro la itre kem ne Isaraela a pane inine troa hnimi Iehova me amë la itre trenge wathebo i Nyidrë e kuhu itre sipu hni angatr. (Deu. 6:5-9) Maine tro sa qaja la itre mekune ka loi göne la huliwa ne cainöj me amamane ngöne la nöjei wiik laka ka sisitria la huliwa cili, haawe, tro hë la itre nekö së a atrehmekune hnyawa laka, ka nyipi ewekë catr la troa cainöje trootro nge celë hi ketre huliwa ka lolo catr ka hamë madrine koi së.
3. Tune kaa la aqane kepe thangane ka loi la ketre trejine föe la tulu ne la keme me thine i eahlo?
3 Kola mekune hmaca me qaja hnene la ketre trejine föe, ka hape: “Ame ngöne la eni a co uti hë la tru trootro, ketre huliwa hna kuca lapaane hnene la fami e nöjei mecixeni me sabath, la troa cainöje trootro. Eni a öhne la madrine ka eje thei kaka me nenë troa cainöje trootro. Hne huni hna tru trootro me öhne laka, ketre ewekë ka lolo catre la troa xome la huliwa ne cainöj.” Ame lo eahlo a co nge kola sevene lao macatre i eahlo, ene pe eahlo hi a hane nyiqaane cainöj, nge ame hë enehila tre 33 hë lao macatre ne cainöj eahlo ngöne la drai ka pexej.
4. Nemene la aliene la hna qaja ka hape troa inine la itre nekönatr troa kökötre trootro?
4 Ini Ka Kökötre Trootro: Ce tro jë memine la itre nekö i epuni, nge thue huliwai nyëne jë ngöne la epuni a cainöje trootro. Maine jë tro angatr a fenafena la qëhnelö, me liine la ketre tarak kowe la ketre atr, maine e pena la ketre xötr ne la Tusi Hmitrötr. Celë hi nyine ithuemadrine i nyudreni lai nge ka troa xatua nyudreni troa xecie hnyawa koi nyudreni laka, atreine hi tro nyudreni a hane tro fë la maca ne Baselaia. Ame hë la angatr a trutru trootro, ketre kolo mina fe a kökötre la aqane tro angatr a cainöje trootro. Qa ngöne lai, xatua angatre jë troa kökötre trootro, me aciane thei angatr la ajan troa eköthe la itre aja ngöne la götrane la ua.
5. Nemene la ka nyipi ewekë kowe la nekönatr matre ijiji jë fe koi nyën troa ketre ka cainöj thaa hna bapataisone petre kö?
5 Canga ithanatane jë memine la itre qatre thup ngöne la epuni a öhne laka, ijiji fe hë tro la itre nekö i epuni a nyiqaane cainöj, nge kola mama laka celë hi aja i angatre lai. Ame hë la angatr a hane cainöj, tre, jëne tro hi angatre lai a hane atrehmekune hnyawa la hnëqa ka eje thei angatr, ene la troa hane atrunyi Iehova. Loi e troa mekune hnyawa fe laka, thaa nyipi ewekë kö tro la nekönatr a hetrenyi la atreine tune la ketre thupëtresij ka xome hë la bapataiso, matre ijiji angeice jë fe troa hane nyiqaane cainöj. Hapeu, trotrohnine kö la nekö i epuni la itre trepene ini qa hnine la Tusi Hmitrötr? Angeice kö a trongëne hnyawa la itre hna amekötine hnei Tusi Hmitrötr göi thiina? Aja i angeice kö troa hane xome la huliwa ne cainöje trootro, me troa hane qeje angeic ka hape, ketre Atre Anyipici Iehova? Maine celë hi hnei angeice lai hna kuca, haawe, tro la itre qatre thup a atrehmekune laka ijiji angeice fe hë troa ketre ka cainöj hna thaa bapataisone petre kö.—Wange ju la itus Organisés pour faire la volonté de Jéhovah, g. 79-82.
6. Pine nemen matre thaa ka gufa kö kowe la itre keme me thin troa inine la itre nekö i angatr?
6 Thaa ketre huliwa ka hmaloi kö la troa inine la itre nekönatr troa atrunyi Iehova. Ngo co hi la itre ewekë ka troa amadrinëne la itre keme me thin, nge tru catre kö la madrine i angatr ngöne la angatr a öhne la itre nekö i angatr e kökötr ngöne la götrane la ua. Ame la ka nyipi ewekë, tre, atraqatre la madrine i Iehova ngöne la kola hane qaja hnene la itre nekönatr la itre huliwa i Nyidrë ka lolo.