Inine Jë La Itre Nekö i Nyipunie Troa Itretre Cainöj
1. Thenge la hna qaja ngöne Salamo 148:12, 13, nemene la nyine troa kuca hnene la itre keme me thin?
1 Iehova a upe la itre thöthi troa atrunyi Nyidrë. (Sal. 148:12, 13) Haawe, thaa tro hmekuje kö la itre keme me thin a ini nyudreni la itre nyipici qa hnine la Tusi Hmitrötr me itre trepene meköti Akötresie. Nyipi ewekë mina fe tro angatr a ini nyudren troa itretre hlue ne la maca ka loi. Tune kaa la aqane troa mama trootro lai?
2. Tro la tulu ka lolo hna amë hnene la keme me thin a hetre thangane tune kaa kowe la mele ne la itre nekö i nyidro?
2 Troa Amamai Tulu Ka Lolo: Hnei Gideona lo atre amekötin, hna qaja kowe lo ala 300 lao atre i angeic, ka hape: “Goeë ni hi, me kuca tun.” (A. ame. 7:17) Pengöi itre nekönatr la troa goeëne me nyitipune la itre keme thine i nyudren. Kola huliwa jidr la ketre kem, nge ame la nyidrëti a lö kowe la hnalapa i nyidrë e mecixen e hmakany, tre, ngacama tru la trenge pi meköle i nyidrë me kucakuca, ngo nyidrëti a ce tro me itre neköi nyidrë matre troa cainöje trootro. Ngacama pëkö hnei nyidrëti hna qaja, ngo nyidrëti hi lai a ini nyudren, laka, ka nyipi ewekë catre kö la huliwa ne cainöj hune la itre xaa ewekë. (Mat. 6:33) Hapeue la itre nekö i epun, nyudreni kö a goeë epuni a xome cememine la madrin la nöjei pengöne huliwa thatraqane la hmi, tune la troa thith me e la Tusi Hmitrötr, me qeje mekun ngöne la itre icasikeu, me cainöj? Eje hi laka, thaa tro jë kö a pexej la tulu hnei epuni hna troa amaman. Ngo canga tro hi la itre nekö i epuni a drengethenge la itre ini hnei epuni hna hamën göne la aqane troa hmi koi Iehova, e hnei nyudreni hna öhne la aqane catre i epuni troa nyihlue i Nyidrë.—Deu. 6:6, 7; Rom. 2:21, 22.
3. Nemene la itre aja ngöne la götrane la ua nyine tro la itre keme me thine a xatuane la itre nekö i angatr, troa eköthe me eatrën?
3 Eköthe Trongëne Jë La Itre Aja Nyine Troa Eatrën: Kola catre hnene la itre keme me thin troa inine la itre nekö i angatr, matre atreine nyudren troa tro me ithanata me heetr, me kuca la itre xaa ewekë kö. Hnene laka kola tru trootro la itre nekönatr, ene pe hetrenyi la itre aja ka hnyipixe nyine tro nyudreni a thele troa eatrën. Maine lue Keresiano la keme me thin, haawe, ijije hi tro nyidroti a xatuane la itre nekö i nyidro troa eköth amë me thele troa eatrëne la itre aja ngöne la götrane la ua ka ihmeku hnyawa memine la macatre i nyudren me hna atreine hnei nyudren. (1 Kor. 9:26) Hapeu, epone kö a inine la itre nekö i epon troa isa qeje mekun thenge la itre sipu trenge ewekë i nyudren, me hnëkëne la itre hnëqa i nyudren thatraqane la Ini Ne Cainöj Qaathei Akötresie? (Sal. 35:18) Hapeu, epone kö a ini nyudren troa xome la nöjei pengöne aqane cainöj? Hapeu, epone kö a xatua nyudren troa eköthe amë la itre aja celë nyine eatrën, ene la troa bapataiso me xome la huliwa ne cainöj ngöne la drai ka pexej? Hapeu, epone kö a ithuecatre koi nyudren troa ce tro memine la itretre cainöj ka hni ne madrin nge ka troa hamë trenge catre koi nyudren?—Ite edomë 13:20.
4. Troa kepe thangane tune kaa hnene la itre nekönatr qa ngöne la hna nyiqaane ini nyudren hnene la itre keme me thin, troa cainöj nge co petre kö nyudren?
4 Kola qaja hnene la atre cinyihane la salamo, ka hape: “Akötesieti fe, hnei cilieti hna ini ni qan’ e thupëtesiji ni; nge hnenge hna amamane uti hë enehila la ite huliwa i cilie nyine hain.” (Sal. 71:17) Nyiqaane inine jë la itre nekö i epuni ngöne la nyudreni petre kö a co, matre troa itretre cainöjëne la maca ka loi. Maine tro epuni a xatuane la itre nekö i epun troa acatrene hnyawa la mele i nyudren ngöne la götrane la ua, eje hi lai laka, tro hë nyudreni a kepe thangane ka loi elany ngöne la nyudreni a tru!—Ite edomë 22:6.