Hamëne Jë La Itre Zonal Ka Anyipicine La Nyipici

1. Nemene la huliwa ne la lue zonal La Tour de Garde me Réveillez-vous ! ?

¹ Ame la lue zonal La Tour de Garde annonce le Royaume de Jéhovah memine la Réveillez-vous ! sinetrongene ej, tre, celë hi ketre götrane ka tru ne la huliwa ne cainöjëne la Baselaia memine la huliwa ne troa inine la itre atr. (Mat. 24:14; 28:19, 20) Easa madrine troa tro fë pala hi itre ej, isa luetre ngöne la easa sine la nöjei götranene la huliwa ne cainöj.

2. Nemene la itre ewekë hna saze göne la lue zonal, La Tour de Garde me Réveillez-vous !, nge pine nemen?

² Ngöne la itre macatre ka ase hë, hne së hna öhne la kola saze la etrun me aliene la itre zonal, ketre tune mina fe la itre aqane troa tro fë itre ej. Kola saze la itre ewekë cili göi troa nyipi lolo me hetre thangan, ene pe troa ketr hnene la maca ne Baselaia la hni ne la nöjei atr asë; nge tro hë angatr ‘a hane kapa la atrehmekun ne la nyipici, me mejiune troa hane mel.’—1 Tim. 2:4.

3. Nemene la aqane troa huliwane la itre zonale ngöne la huliwa ne cainöje trootro?

³ Qaane e Januare 2006, tro hë së a maca hnyawa troa xome la itre aqane nyiqaane ithanata ka isapengön thatraqane hi la caa zonal Réveillez-vous ! ngöne la treu. Ame enehila easë a troa xome fe la itre aqane nyiqaane ithanata ka isapengön matre troa hamëne hmekuje la caas ngöne lo lue zonal La Tour de Garde annonce le Royaume de Jéhovah ngöne hna cainöje trootro. Hetrenyi la itre aqane nyiqaane ithanata ka hmaloi hna hamëne ngöne la pune la Huliwa Ne Baselaia isa thatraqane la lue zonal. Itre eje a qaja atrune la caas ngöne la itre hna cinyihane ngöne la qaane la zonal, ngo ame itre xaa ijin, tre, kola amamane fe la itre xaa hna cinyihane ka qaja la itre ewekë hna nyipiine hnene la itre atr. Ijije hi tro sa huliwane hnyawa la itre aqane nyiqaane ithanata cili, e hne së hna pane hnëkëne me e la itre hna cinyihane hna troa ithanatan, me qaja la aqane nyiqaane ithanata thenge la itre sipu trenge ewekë së matre troa ihmeku memine la teritoare së.

4. Pine nemene matre ka hetre thangane la troa xome la ketre aqane nyiqaane ithanata, xane lo lue hna hamëne hë e hnine la Huliwa Ne Baselaia?

⁴ Maine nyipici laka kola hamëne hnine la Huliwa Ne Baselaia la lue aqane nyiqaane ithanata thatraqane la isa caa zonal, ngo ame pe, tre, ijije fe hi tro sa thele ketre aqane tro sa nyiqaane ithanata. Ame la kepine matre easa huliwa tune lai, tre, hnene laka, maine jë troa ketr la itre atr ngöne la teritoare së hnene pena ha la ketre hna cinyihane hnine lo lai zonal. Maine pena, epuni a öhne laka, ijije hi tro epuni a kuca le ketre aqane nyiqaane ithanata ka lolo ka ihmeku memine la ketre hna cinyihane ka ketri epuni hnyawa.

5. Qëmekene troa hnëkëne la ketre aqane nyiqaane ithanata thatraqane la ketre zonale hna troa tro fë, nemene la nyine tro epuni a kuca?

⁵ Tune Kaa La Aqane Troa Hnëkëne La Aqane Nyiqaane Ithanata: Ame la hnapan, tre, nyipi ewekë tro sa e me atrepengöne hnyawa la hna cinyihane hne së hna iëne troa ithanatan. Eje hi lai laka, maine jë thatreine jë kö së troa majemi kowe la nöjei hna cinyihane e hnine la zonale hne së hna troa tro fë ngöne la ijine easa cainöje ngöne itre hnalapa trootro. Ngo nyipi ewekë tro pe sa amamane la madrine së memine la hni ka menyike së ngöne la easa ithanatane la itre hna cinyihane hne së hna iëne troa tro fë. Tro sa atreine kuca tune lai, e atre hnyawa së la itre ithuemacanyi hne së hna troa ce thawa memine la itre atr.

6. Tune kaa la aqane tro sa hnëkëne la itre sipu aqane tro sa nyiqaane ithanata?

⁶ Ame la ketre nyine troa kuca, tre, ene la troa thupëne la aqane troa eköthe la itre nyine troa pane qaja matre ihmeku memine la aja i angatr. Maine jë troa pane xome la ketre hnyinge ka troa ahlëne la aja ne la atr ka ihmeku memine la hna cinyihan, matre troa nyiqaane la porotrik. Loi e tro pala hi sa mejiune kowe la emenene la Wesi Ula i Akötresie, matre troa ketr la hni ne la itre atr. (Heb. 4:12) Iëne jë la ketre xötr ne la Tusi Hmitrötr ka ijij ka ihmeku memine la topik ka nyitrepene la porotrik; ma ka loi troa xome la ketre xötr ne la Tusi Hmitrötr hna hamëne hë maine hna cinyihane hë hnine la hna cinyihane hne së hna troa tro fë. Wange ju la aqane iothekeune la xötr memine la hna cinyihan.

7. Tune kaa la aqane tro sa eköthe aloine la itre aqane tro sa nyiqaane ithanata?

⁷ Ngöne La Nöjei Ijin: Maine easa ajane troa hetre thangane ka loi la ketre aqane nyiqaane ithanata, nyipi ewekë troa huliwane ej. Ce cainöje jë memine la ekalesia me tro fë la itre zonal e Mecixen. Tro fë jë la itre zonale kowe la itre atr ka kapa ha la ketre itus. Loi e tro pala hi a hamëne la itre zonal kowe la itre hnainin me kowe la itre atr hnei epuni hna öhne ngöne la epuni a iwai hmaca. Maine ijije hi tro epuni a hamëne la itre zonale kowe la itre atr hnei epuni hna ithanata memin ngöne la epuni a tro kowe la itre magazë, maine ngöne la kola ti loto, maine ngöne la kola treqe droketre. Loi e tro sa eköthe aloine hnyawa la itre aqane nyiqaane ithanata ngöne la easa xome itre ej ngöne la treu.

8. Ngöne nemene la kola qaja ka hape ka ketrepengöne kö la lue zonal La Tour de Garde me Réveillez-vous ! ?

⁸ Ka ketrepengöne kö la itre zonal La Tour de Garde me Réveillez-vous ! Itre eje a atrunyi Iehova, lo Kapucatin asë e cailo fen me e koho hnengödrai. (Ite hu. 4:24) Itre eje a akeukawane la hni ne la itre atr hnene la maca ka loi ne la Baselaia i Akötresie, me ithuecatre troa lapaune koi Iesu Keriso. (Mat. 24:14; Ite hu. 10:43) Ketre, itre eje a amamane la itre ewekë ka traqa ngöne la fen, a kola eatrëne lo itre hna perofetane hë hnei Tusi Hmitrötr. (Mat. 25:13) Xatuane jë la itre atr ngöne la teritoare së matre tro angatr a hane kepe thangane ka loi qa ngöne la itre zonale cili; ngo eje hi lai laka, loi e tro pala hi sa hnëkë troa hamëne itre eje ngöne la nöjei ijine ka ijij!

9. Tune kaa la aqane tro sa nyitrepene la ketre iwai hmaca?

⁹ Ame ngöne la easa hamëne la ketre zonal, maine porotrikëne pena la Tusi Hmitrötr memine la ketre atr, loi e troa hnëkëne la ketre hnying maine ketre mekune ka lolo pena ka troa fe gojenyi matre troa iwai hmaca elany me sisedrëne la porotrike së. Maine tro sa catre troa trane la itre itine feja, ene la nyipici, haawe, tro ha xecie hnyawa koi së laka, tro Iehova a fe la itre hni ne la itre atr ka hetre hni ne ajane troa atre Nyidrë me hane nyihlue i Nyidrë.—1 Kor. 3:6.