Troa Atrune La Thupene Mele Cememine La Hni Ne Ole
1, 2. Nemene la itre kepine ka upi së troa mekune pala hi la thupene mele cememine la hni ne ole?
1 Easa drengethenge la hna ahnithe hnei Iesu laka, itre Keresiano e cailo fen a troa itronyi thupene la kola lö la jö e drai 22 Maac, 2008, göi troa atrune la meci Iesu Keriso. (Luka 22:19; 1 Kor. 11:23-26) Kola upi së troa kuca lai hnene laka, atraqatre la hni ne ole së kowe la nöjei hna eatrëne ngöne lai ijine cili a 1 975 lao macatre hë enehila. Hnene laka hnei Iesu hna mele nyipici, nge ka pexeje nyidrë, uti hë la meci ngöne la akötr hune la satauro, ene la isinöe ne iaxösisi, ene pe hnei nyidrëti hna ahmitrötrëne la ëje ne la Tretretro i nyidrë, me sa kowe la itre sili ithanata i Satana.—Iobu 1:11; Ite edomë 27:11.
2 Hna anyipicine la isisinyikeu ka hnyipixe hnene la madra i Iesu, ene pe kola aijijëne la itre atr ka thaa pexeje kö troa hane kepe angatre hnei Akötresie ceitu me itre nekö i Nyidrë, me mejiune troa hane musi me Keriso ngöne la Baselaia i nyidrë e hnengödrai. (Iere. 31:31-34; Mar. 14:24) Ketre, kola mama hnyawa la ejuine la ihnimi Nyidrë kowe la nöjei atr, ngöne la Nyidrëti a nue la nekö hnimina i Nyidrë troa huujëne la mele i nyën, tune la aqane qeje pengöne Iesu koi Nikodemo.—Ioane 3:16.
3. Nemene la eloine hna troa kapa hnene la itre ka sine la Drai Ne Amekunën?
3 Könëne Jë La Itre Atr: Hna xatua së hnene lo Huliwa Ne Baselaia ne Januare troa cinyihane wengëne la itre ëjene la itre atr hne së hna atre, me könë angatre isa ala caas. Hane kö epuni nyiqaane könëne la itre atr cili? Hane kö epuni thele troa akökötrene la aqane cainöje i epun ngöne lai ijine huliwa ne ihë ka troa nyiqaane e drai 1 Maac, matre troa könën la itre atr kowe la Drai Ne Amekunën? Ame la itre ka troa sin, me drenge la itre ithuemacanyi qa hnine la Tusi Hmitrötr, tre troa eköthe la lapaune i angatre kowe la thupene mel, qa ngöne lai tro ha eatrongë angatre kowe la mele ka pë pun.—Rom. 10:17.
4. Pine nemene matre loi e tro sa canga traqa kowe la icasikeu ne la Drai Ne Amekunën?
4 Loi e tro asë hi sa mekune troa canga traqa matre troa ikep, ene lo itre ka kapa lo ihë së. Nyipi ewekë catre koi së troa wange hnyawa la itre atrene lai ijine cili, ene la Drai Ne Amekunën, ke, ala nyimu catre la itre atr ka hane sine ej, memine fe lo itre xane ju kö ka traqa e itre xaa ijin ngöne la itre icasikeu së.
5. Tro epuni a hnëkëne tune kaa la hni nyipunie kowe la ijine cili?
5 Hnëkëne Jë La Hni Nyipunie: Hetrenyi lo porogaram ne e Tusi Hmitrötr thatraqane la Drai Ne Amekunën ka eje hnine la topik ne la drai hna hape, Examinons les Écritures chaque jour — 2008 me ngöne la idrai ene lo Calendrier 2008, kola nyiqaane e drai 17 Maac. Maine tro epuni a wange hmaca la itre ewekë ka tru ka traqa ngöne la itre drai tixenuë ne mele i Iesu e celë fen, tre, tro lai a xatua nyipunie troa hnëkëne la hni nyipunie kowe la ijine ne atrune la Drai Ne Amekunën. (Ezera 7:10) Maine tro nyipunie a mekune thele jëne la thith, la itre hna edromëne celë hnei Tusi Hmitrötr, tre, tro ha akökötrene la hni ne ole i epuni kowe la ihnimi Iehova me Hupuna i Nyidrë hnene la hna hamëne la thupene mel.—Sal. 143:5.
6. Nemene la thangane the së e tro sa eköthe la hni ne ole së kowe la thupene mel?
6 Ame ngöne la kola easenyi trootro kowe la Drai Ne Amekunën, tre loi e tro sa isa hnëkë së hnyawa, me itre xane fe kowe la ijine cili ka sisitria. Maine tro sa mekune hmaca la thupene mel cememine la hni ne ole, tre, tro lai a acatrene hnyawa la aqane imelekeu së me Iehova memine la Hupuna i Nyidrë. (2 Kor. 5:14, 15) Tro fe ha upi së troa xome la tulu i Nyidro, ene la troa huujëne la mele së kowe la itre xan pine la ihnim.—1 Ioane 4:11.