Itre Pepa Ne Ihë Göne La Drai Ne Amekunën Nyine Thawa e Cailo Fen!
1. Qëmekene la Drai Ne Amekunën, nemene la huliwa ka ketre pengön hna troa xom e cailo fen?
1 “Kucajë la nyine mekune koi ni.” (Luka 22:19) Kola drengethenge hnene la itre hlue i Iehova la hna ahnithe koi angatr hnei Iesu, ene la troa traqa itronyi memine la itre atr ka hni ka ajan e 30 Maac 2010, matre troa amekunëne la meci Iesu. Qaane e 13 Maac koi 30 Maac, kola troa xome la huliwa ne troa thawa e cailo fen la itre pepa ne ihë göne la Drai Ne Amekunën.
2. Tune kaa la aqane tro sa tro fë la pepa ne ihë?
2 Aqane Troa Tro Fë La Pepa Ne Ihë Cili: Amamane jë kowe lai atr la icetrön, nge hape jë: “Ame ngöne la jidri ne la drai 30 Maac, kola troa itronyi hnene la itre milio lao atr e cailo fen, matre troa amekunëne la meci Iesu. Ini a traqa enehila troa hamëne koi nyipë memine la hnepe lapa i nyipë la pepa ne ihë celë göi troa könë nyipunie troa hane sine la icasikeu cili. Ijije mina fe tro nyipëti a hane hëne la itre sinee i nyipë. Hanawange la hawa me hnë troa icasikeu.” Maine ijij, e jë la Luka 22:19 ngöne la Tusi Hmitrötr, matre troa amamane la hna amekötine cili qa hnine la Itre Hna Cinyihan. Ngo pine laka hna sa la itre drai ne troa haöthe la teritoar, haawe, thaa tro kö sa aqean.
3. Drei la itre atr hne së hna troa könën?
3 Maine atraqatre la teritoar ne la ekalesia i epun, haawe, tro la itre qatre thup a upi epuni troa amë la itre pepa ne ihë ngöne la itre hnalapa ka pë atren ngöne la kola xötrei traqa. Maine ijij, loi e troa ce hamëne la itre zonal memine la itre pepa ne ihë. Loi e xecie koi epuni laka, hnei epuni hna könën la itre atr hnei epuni hna wange lapaan, me itre hnainin me itre sine huliwa, me itre sine ce ini, me itre sinee, me itre atre lapa easenyi epun, me itre xaa atre kö.
4. Nemene la hna upi së troa kuca hnene la aqane wanga atrune së la ihnimi Iehova koi së jëne la thupene mel?
4 Hnëkë Jë Së Troa Catre Cainöj: Ketre ijine ka sisitria la hneijin ne la Drai Ne Amekunën, matre troa akökötrene la huliwa ne cainöje së. Hapeu, ijije kö tro epuni a eköthe la porogarame i epun, matre troa hane pionie ka ixatua? Hapeu, hetre nekö i epuni kö maine itre hnainin pena ka kökötre hnyawa ngöne la götrane la ua? Maine eje hi, haawe, xatua angatre jë troa ithanata memine la itre qatre thup matre troa atre maine ijiji angatre fe hë troa hane xome la huliwa ka ketrepengöne cili, ceitu me itretre cainöj thaa hna bapataisone petre kö. Maine easa trotrohnine hnyawa me wanga atrune la aqane hnimi së hnei Iehova jëne la thupene mel, haawe, tro hë lai a upi së troa sine la Drai Ne Amekunën, me catre troa könën la ka ala nyim matre troa ce traqa itronyi me easë ngöne la ijine cili.—Ioane 3:16.