Tro Sa Xatuane Tune Kaa La Itre Ka Sine La Drai Ne Amekunën?
1. Nemene la nyine anyipicin ka sisitria hna troa hamën e 22 Maac, 2008?
1 Ame e 22 Maac 2008, itre milio lao atr e cailo fen a troa kapa la ketre nyine anyipicin ka sisitria. Ame la itre ka troa sine la Drai Ne Amekunën, tro angatr a drenge la ihnimi atraqatre i Iehova, ngöne la Nyidrëti a hamëne la thupene mel thatraqane la nöjei atr. (Ioane 3:16) Tro angatr a atrepengöne la Baselaia, me aqane tro Iehova a xom eje matre troa eatrëne la aja i Nyidrë kowe la fen asë. (Mat. 6:9, 10) Tro hë angatr a ketre sipu öhne la ihnim me caas ne la nöje i Akötresie, me öhne la ekeukawane la aqane melëne së la ihnimi trehnyiwa.—Sal. 133:1.
2. Tro sa xatuane tune kaa la itre hnainin ka sine la Drai Ne Amekunën?
2 Itre Hnainin: Maine jë ame itre xan e hnine la icasikeu, tre, itre ka xötrei inine la Tusi Hmitrötr me easë. Tro sai angatre jë troa hane ibozu memine la itre xaa trejine trahmanyi me föe. Qeje pengöne jë koi angatr la aqane trongene la itre icasikeu ngöne la wiik, me hane ihamë hnine la Uma Ne Baselaia. Ame ngöne la kola cainöj, tro la ka cile fë a xatuane la itre atr cili tro pala hi a kökötre ngöne la götrane la ua. Loi e ijije koi nyipunie troa xome la itre mekune i nyidrë nyine eköthe la ixatua hnei epuni hna hamën kowe la itre hnei epuni hna hamë ini kow.
3. Nemene la nyine troa kuca matre troa xatuane la itre ka thaa cainöje hmaca kö, nge ka sine la Drai Ne Amekunën?
3 Itre Trejine Ka Thaa Cainöje Hmaca Kö: Ame itre xaa ka troa sin, tre, itre trejine ka thaa cainöje hmaca kö. Thele jë matre hetrenyi e kuhu hni së la ajan troa kapa madri angatr. The amejëne kö la itre hnyinge ka ketri angatr, maine itre mekune ka nango ajolë angatr troa sa. Thaa hmiitre kö thupene la Drai Ne Amekunën, loi e tro la itre qatre thup a wange matre troa vizitëne la itre trejine cili ka hane sine la ijine cili, me qaja aloinyi angatr pine la hnei angatre catre troa hane sine lai, me könë angatre kowe la icasikeu ka troa xulu ngöne la ekalesia.
4. Tune kaa la aqane tro së isa ala caas, a xatuane la itre hna könën?
4 Itre Hna Könën: Maine jë ame itre xaa ka sin, tre itre, hnei epuni hna atre, maine itre atrene la fami hnei epuni hna könën. Ame itre xan, hna könë angatre ngöne lo ijine huliwa ne cainöje ka ketre pengön. Maine epuni a öhne la itre atr hnei epuni hna thatre, thele jë matre troa atre epuni hnei angatr, me kepe angatre hnyawa. Maine jë angatre petre hi a hane sine la ketre icasikeu së. Ame la epuni a porotrike me angatr, tro hë epuni a atre la aqane troa iöhnyi hmaca me angatr. Thaa hmiitre kö thupene la Drai Ne Amekunën, loi e troa iwai hmaca, maine hë angatre pena ngöne telefon, me xatua angatr troa hetre hni ne ajane troa akökötrene la atrehmekune i angatr, me hnyingë angatre maine angatre ajane troa etid.
5. Nemene la nyine tro sa qaja matre troa nyiqaane la etid?
5 Ijije hi troa xome la itre mekune la cainöje göi Drai Ne Amekunën matre troa amamane la itus Ini Tusi Hmitrötr ngöne la kola iwaihmaca. Drei la ketre ceitun, tro la ka cile fë la cainöje a e la Isaia 65:21-23. Ame la kola iwaihmaca, ijije hi tro epuni a amexeje hmaca lo cainöj, me qaja ka hape, “Eni a pi amamane koi nyipë la itre xaa manathithi hna troa kapa, nge hna aijijëne hnene la thupene mel.” Thupene lai, ce wange jë la götrane 4-5 ne la itus Ini Tusi Hmitrötr. Maine pena, qaja jë ka hape, “Ala nyimu la itre ka thele ka hape tro sa melëne eue la hna perofetane hnei Isaia.” Thupene lai, ce wange jë la paragarafe 1-3 ngöne la mekene 9. Ame la ketre aqane kuca, tre, troa thawa la itre mekune hna cile fë hnene la ka cainöj, me amamane la itus Ini Tusi Hmitrötr, me amacane la aqane trongene la etid.
6. Nemene la itre ewekë hna aijijë së troa kuca ngöne la easa drengethenge la hna amekötine hnei Iesu, ene la troa amekunëne la mec i nyidrë?
6 Loi e tro sa hmekëne la itre ijine ka ijij matre troa xatuane la itre hnainin, me itre trejine ka thaa cainöje hmaca kö, me itre atr ka troa sine la Drai Ne Amekunën. (Luka 22:19) Thaa luelue kö së laka, tro Iehova a amanathithine la aqane akökötrene së la huliwa ne cainöjëne la Baselaia.