Loi e Troa Ikep!
1. Eue la ijine tro sa pane amamane la pengöne la nyipi hmi, nge pine nemen?
1 Ame la easa troa atrune la Drai Ne Amekunën, tre ijine tro hi së lai a amamane la pengöne la nyipi hmi. Loi e tro sa lapa mekune hnyawa, ka hape, ame ngöne la macatre celë, ma tro ha sasaithe la 10 milio lao atr ka troa hane sine la Drai Ne Amekunën, me hane atre la lue hatrene ihnimi ka mama jëne la thupene mel. (Ioane 3:16; 15:13) Tro angatr a hane atre la itre manathithi ka xulu qa ngöne la ahnahna cili hna hamëne hnei Iehova. (Is. 65:21-23) Ame ngöne la ijine cili, tha hnëqane casi kö la atre cile fë cainöje la troa amamane la pengöne la nyipi hmi. Qan asë hi la iatrene la icasikeu troa kapa la itre ka hnyipi traqa, matre amamane la pengöne la nyipi hmi.—Rom. 15:7.
2. Tro sa kapa tune kaa la itre ka hnyipi traqa?
2 Epi the tro kö sa traqa troa canga lapa, me lapa thaup treqene troa nyiqaane la icasikeu. Loi e tro pe sa tro kowe la itre ka hnyipi traqa me porotrike me angatr, ke ma xou i angatr, nge thatre kö angatre la aqane trongene la icasikeu. Epi troa madrine la qëmeke së koi angatr, nge tro fe sa kepe angatre hnyawa, matre tha tro kö angatr a lapa xou. Maine easa ajane troa atre ka hape, drei la hna könën, tro sa hnyingëne koi ketre ka hape, ‘ase hë angeice hane sine la itre xa Drai Ne Amekunën?,’ maine ‘hetre hnei angeice pena hna hane atre e hnine la ekalesia?’ Maine jë, tro sa hë angeic troa ce lapa me easë, matre tro sa hane fe Tusi Hmitrötr koi angeic, me ce nyima me angeic. Maine easa icasikeu ngöne la uma ne baselaia, tro sa hë angeic me nango ihamë sai angeic. Ame hë la kola ase la icasikeu, qaja jë koi angeic ka hape, maine hetre hnyinge i angeic, tre ijije hi tro sa sa. Maine easa troa canga mejë, göi troa nue hnen la ketre ekalesia pena troa icasikeu, qaja jë koi angeic ka hape: “Eni a pi atre la hnei ’ö hna hane mekune göne la icasikeu celë. Ijije kö tro hmaca kö nyiso a iöhny?” Nge xome jë la itre ithuemacany göi angeic, matre hmaloi e tro hmaca a iöhnyi me angeic. Ame ngöne lai ijine cili, tro la itre qatre thup a goeëne ka hape, hetre itre ka nanazije kö ka traqa, matre troa hamë ithuecatre koi angatr.
3. Pine nemene matre nyipi ewekë catr troa kapa hnyawa la itre hna könëne troa sine la Drai Ne Amekunën?
3 Ame koi itre xa hna könën, tre ma angatre petre hi lai a öhne laka, itre atr ka madrin, me ka thele tingeting, nge ka casi la itre hlue i Iehova. (Sal. 29:11; Is. 11:6-9; 65:13, 14) Nemene la mekuna i angatr thupene la icasikeu, ngöne la angatr hmaca ha lö koi hnalapa? Thatre kö së, ngo tro lai a hetre thangan, qa ngöne la aqane ikepe së.