Loi e Tro Sa “Xöte Thenge La Ite Thupa Ca i Nyidë”
1. Tro hë sa maca tune kaa ngöne la huliwa ne cainöj?
1 Ngacama thaa hnei Iesu kö hna ini ngöne la itre uma ne ini hmi, ngo nyidrëti hi la Atre Cainöj ka tru ne la fene hnengödrai. Eloine pe, hetrenyi pala hi së la itre hna cinyihan, ka qeje pengöne la huliwa ne cainöj hna eatrëne hnei Iesu. Celë hi matre loi e tro sa “xöte thenge la ite thupa ca i nyidë” matre, itretre Anyipicine së ka maca ngöne la huliwa ne cainöj.—1 Pet. 2:21.
2. Nemene la ka troa xatua së matre caasi la aqane hnime së la itre atr me Iesu?
2 Loi e Tro Sa Amamane La Ihnimi Së Kowe La Itre Atr: Ihnimi lo ka upi Iesu troa cainöj kowe la itre atr. (Mar. 6:30-34) Ame ngöne la teritoare së, nyimutre la itre atr ka “thë” nge ka ajane troa atre la nyipici. (Rom. 8:22) Maine tro sa mekune hnyawa la aqane ngazo la mele ne la itre atr, memine la aqane hnimi angatr hnei Iehova, celë hi ka troa upi së lai troa catre cainöj. (2 Pet. 3:9) Ketre tro hë la itre atr a kapa hnyawa la maca hne së hna tro fë, e hnei angatre hna wanga atrehmekune laka easa hnehengazo angatr.
3. Nemene lo itre ijine hnei Iesu hna xome matre troa cainöje kowe la itre xan?
3 Loi e Tro Pala Hi Sa Cainöj Ngöne La Nöjei Ijin: Hnei Iesu pala hi hna thele la nöjei ijine troa tro fë la maca ka loi. (Mat. 4:23; 9:9; Ioane 4:7-10) Ame mina fe së enehila, tre, easa ajane troa hnëkë matre troa tro fë la maca ka loi o drai, ngöne la itre hne së hna tro. Ame itre xan, angatr a xome trongëne la Tusi Hmitrötr me itre xaa itus matre ijije tro angatr a cainöj ngöne la itre hna huliwa i maseta, me ngöne la hna ini, me e cahu hna ngenu, me ngöne la itre magazë, me ngöne itre xaa götrane ju kö.
4. Tro sa amamane tune kaa laka Baselaia i Akötresie la taan la cainöje së?
4 Loi e Troa Amë Panëne La Baselaia: Maca ka loi ne la Baselaia hi lo taan ne la huliwa ne cainöje i Iesu. (Luka 4:43) Ngacama thaa canga qeje pengöne kö së la Baselaia ngöne la easa nyiqaane ithanata, ngo tro sa lapaa mekune, ka hape, easa troa hane xatuane la atr troa nyipi ewekëne la Baselaia cili. Ketre, ame mina fe, la easa amexeje la itre jol e cailo fen ka amamane laka, easa melëne la itre drai hnapin, nyipi ewekë pala hi tro sa “amamane la evangelia ne la ite ewekë ka loi.”—Rom. 10:15.
5. Tro la Tusi Hmitrötr a xatua së tune kaa matre tro sa maca ngöne la huliwa ne cainöje së?
5 Loi e Tro Sa Mejiune Kowe La Wesi Ula i Akötresie: Ame ngöne lo Iesu a cainöje trootro, hnei nyidrëti pala hi hna xome la Tusi Hmitrötr matre troa sajuëne la itre hnei nyidrëti hna qaja. Thaa itre sipu mekuna i nyidrëti kö lo hnei nyidrëti hna inin. (Ioane 7:16, 18) Hnei nyidrëti pe hna kapa la göxeni ngöne la ua qa hnine la Tusi Hmitrötr, me ketre sipu trongëne itre eje ngöne la nyidrëti a qëmeke kowe la itre itupathe i Satana. (Mat. 4:1-4) Nyipi ewekë tro sa e la Tusi Hmitrötr o drai, me isa trongëne la itre hne së hna e matre tro sa maca ngöne la easa inine la itre atr. (Rom. 2:21) Ame la easa sa la itre hnyinge ne la itre atr ngöne la easa cainöj, loi e troa mama, ka hape, ame la itre hne së hna qaja, tre, qa hnine la Tusi Hmitrötr, nge maine ijij, loi tro sa hane e mekötine koi angatr la itre xötr. Easa ajane tro la atr a atrehmekune laka, ame la hne së hna qaja, tre, thaa qaathe së kö, ngo easë pe a qaja la itre mekuna i Akötresie.
6. Nemene la hnei Iesu hna kuca matre troa ketr la itre hni ne la itre ka drei nyidrë?
6 Loi e Troa Ketre La Hni Ne La Itre Hna Inin: “Pëkö ate ewekë tune lai.” (Ioane 7:46) Celë hi aqane qeje Iesu lai hnene lo itre tane isi, ngöne lo kola hnyingë angatr hnene lo itre hene ne hmi me itre faresaio, la kepine matre thaa othi Iesu kö hnei angatr. Eje hi laka, thaa hnei Iesu hmekuje kö hna hamë mekune kowe la itre atr, ngo hnei nyidrëti pe hna thele jëne troa ini angatr matre troa ketr la itre hni angatr. (Luka 24:32) Hnei Iesu hna xome la itre ceitune ka lolo qa ngöne la aqane mele ne la itre atr nyine xatua angatr troa trotrohnine la itre trenge ewekë i nyidrë. (Mat. 13:34) Thaa hnei Iesu kö hna qaja atrune pala ha la itre ithuemacany ngöne lo nyidrëti a cainöj kowe la itre ka drei nyidrë. (Ioane 16:12) Ketre, thaa hnei nyidrëti kö hna thele troa pi mama, ngo loi pe troa atrunyi Iehova. Ijije hi tro sa itre ka atreine hamë ini tui Iesu, e hne së hna wange hnyawa ‘la aqane ini së.’—1 Tim. 4:16.
7. Pine nemen matre hnei Iesu hna catre cainöjëne la maca ka loi?
7 Loi e Troa Catre Cainöj Ngacama Xele La Itre Atr Troa Dreng, Nge Itretre Icilekeu: Ngacama hnei Iesu hna kuca la itre iamamanyikeu, nyimutre la itre atr ka thaa drei nyidrëti kö. (Luka 10:13) Hna mekune hnene la hnepe lapa i Iesu, ka hape “Hmo hë nyidrë.” (Mar. 3:21) Ngo eje hi laka hnei Iesu pala hi hna catr. Hnei nyidrëti hna thele troa hetrenyi la aqane ujë ka lolo pine laka ka xeci hnyawa e kuhu hni nyidrë ka hape, thei nyidrëti la nyipici ka troa nue amacane la itre atr. (Ioane 8:32) Jëne la ixatua i Iehova, eje mina fe e kuhu hni së la ajane troa catre cainöj, nge thaa tro kö a kucakuca.—2 Kor. 4:1.
8, 9. Tune kaa la aqane tro sa nyitipu Iesu ngöne la troa kuca asë la hne së hna atrein, matre troa cainöjëne la maca ka loi?
8 Loi e Troa Kuca La Hna Atreine Matre Troa Catre Cainöjëne La Maca Ka Loi: Hnei Iesu hna nue la itre aqane mele ka lolo catr ngöne la götrane la ngönetrei, matre troa kuca la huliwa ne cainöj. (Mat. 8:20) Ame ngöne la itre xaa ijin, hnei nyidrëti hna cainöje ngöne la drai ka pexej, uti hë la kola hejihej. (Mar. 6:35, 36) Atrehmekune hi Iesu, laka xoxopatre pe hi la itre drai ne cainöje i nyidrë. Haawe, hnene laka “xoxopate pe hi la ijin,” nyipi ewekë fe tro sa nue la traeme së, me trenge catre së, memine fe la itre mo së, matre troa nyitipu Iesu ngöne la aqane cainöj.—1 Kor. 7:29-31.
9 Ame ngöne lo hneijine i Iesu, hetre thangane catre la huliwa ne cainöj ne lo itre keresiano pine laka hna ini angatre hnei Iesu. (Ite Hu. 4:13) Haawe, ijije fe tro sa catre kuca asë la huliwa ne cainöj e hne së hna nyitipune lo Atre Cainöje Ka Tru ne la fene hnengödrai asë.—2 Tim. 4:5.