Kola Sa La Itre Hnyinge i Nyipunie
◼ Hapeu, ka loi kö troa xexe hnene la itre atrene la ekalesia ngöne la kola fenes la ketre hnëqa ne la Ini Ne Cainöj Qaathei Akötresie memine la Icasikeu Ne La Huliwa?
Ame ngöne la kola xupe la fene hnengödrai hnene la Atre xup, ene Iehova, tre, hna “ce nyima hnei ite wëtesiji hata lai, me ce hë madine la nöjei nekö i Akötesie asëjëihë.” (Iobu 38:7) Hnene la itre nekö i Akötresie cili, ene lo itre angela, hna ajane troa atrunyi Iehova pine la itre ewekë ka ketre pengöne hnei Nyidrëti hna xup, nge ka amamane la inamacan, me ihnim, memine la mene i Nyidrë.
Ketre ewekë ka loi la troa amamane la hni ne ole së kowe la itre trenge catre hna kuca hnene la itre trejine me easë, memine fe la aqane cile fë hnei angatr la ketre cainöj maine ketre iamacany pena. Drei la ketre ceitun, thaa sesëkötre kö së laka, hne së hna majemine xexe thupene la hna cile fë la ketre cainöj, maine ketre iamacany pena ngöne la itre ijine asabele me kovasio. Ame la itre trejine hna thue götrane qa, tre, itre traem me trenge catre lai hnei angatr hna nue matre troa hnëkëne la huliwa cili. Nge ame la easa xexe, tre, easë hi lai a amamane la hni ne ole së, thaa göne hmekuje kö kowe la aqane catre huliwa ne la atre cile fë la hnëqa, ngo göne mina fe la ini hnei Iehova hna hamëne jëne la Wesi Ula me organizasio i Nyidrë.—Is. 48:17; Mat. 24:45-47.
Ngo, hapeu kowe la Ini Ne Cainöj me Icasikeu Ne La Huliwa, tro kö sa hane xexe thupene la hna cile fë la ketre hnëqa? Maine kola xexe nyine amamai hni ne ole kowe la huliwa hna kuca, thaa hna wathebone kö, tune lo kola xexe kowe la ketre atre ini tus ka cile fë la pane qa i angeic ngöne la ini. Ngo ame la engazon, tre, maine jë, tro hë elany la itre trejine a kuca xanën, ngo thaa göne hmaca kö la troa amamai hni ne ole kowe la hnëqa hna cile fë; ene pe, tro ha paatre la sipu aliene matre easa xexe. Qa ngöne lai, thaa tro kö sa xexe ngöne la kola fenes la ketre xötreqa hna kuca hnene la ketre trejin.
Ngacama thaa easë kö a xexe thupene la hna kuca la itre götrane qa, ngo, hetre itre xaa jëne tro sa amamane la hni ne ole së pine la hna tro fë la itre hnëqa cili. Ijije tro sa amamane lai, jëne la easa lapa thaup me hane drenge hnyawa ngöne la angatr a cile fë la itre hnëqa. Nge thupene la icasikeu, ijije tro së, isa ala caas a tro kowe la atre kuca la hnëqa, me hane qaja la hni ne ole së kowe la itre trenge catre hnei angeic hna kuca.—Efe. 1:15, 16.