Ketre Drai Ka Ketre Pengöne Göi Troa Nyiqaane Inine La Tusi Hmitrötr Memine La Itre Atr
1 Qaane e Januare, tro la nöjei ekalesia asë a eköth amë la ketre mecixen maine ketre sabath ngöne la nöjei treu, maine jë lo pane mecixeni me sabathe ne la treu, nyine troa thele troa nyiqaane la itre etid. Thenge la itre aja ne la teritoar, maine jë troa kuca lai e Mecixen maine Sabathi pena. Ame ngöne lai drai cili, maine kola thipetrije hnene la atr troa nyiqaane la ketre etid, haawe, ijije tro pala hi sa hamëne la itus Ini Tusi Hmitrötr maine itre zonale pena hna hnyipi kapa. Loi e tro la nöjei qatre thupe me drikona asë a kuca la hnei angatre hna atrein matre troa catre eatrëne la huliwa cili, me xatuane fe la itre ka cainöj troa nyiqaane inine la Tusi Hmitrötr memine la itre atr.
2 Tro la Kometr Ne Huliwa Ne La Ekalesia a axeciëne la mecixeni maine sabath ka ijij matre troa nyiqaane la itre etid. Ame la itre xaa ijin, troa hamëne la itre nyine amekunën matre troa hnëkë hnene la itre ka cainöj me thele troa nyiqaane inine la Tusi Hmitrötr memine la itre atr ngöne itre hnalapa trootro, me ngöne la kola wange hmaca la itre ka hetre hni ne ajan.
3 Aqane Troa Hnëkë: Ijije tro sa xome la itre mekune nyine ixatua göne la troa nyiqaane la itre etid, ngöne la sinecetrone la Huliwa Ne Baselaia ne Januare 2006, me ngöne la itus Comment raisonner, götrane 12. Ijije tro la itre xan a xome la ketre tarak, tune la ketre hna hape, Ajane Kö Nyipunieti Troa Atre La Nyipici? Ketre, kola hamëne mina fe ngöne la Huliwa Ne Baselaia ne Ogas 2007, götrane 3 la itre mekune nyine ixatua, matre troa nyiqaane la itre etid memine la itre atr ka kapa ha la itre zonale së. Loi e troa hnëkëne la ketre porogaram matre tro la itre qatre thup me itre drikona a xomiujine la icasikeu göi cainöj maine 10 koi 15 lao menetr. Troa ce ithanatane e cili la caasi maine lue mekune nyine ixatua göi troa nyiqaane inine la Tusi Hmitrötr memine la itre atr, maine troa amacane pena.
4 Nyipici laka, thaa tro jë kö la itre atr asë a kapa troa etid maine troa sisedrëne pena la etid i angatr. Ngo loi e thaa tro kö lai a ahmacanyi së troa thele troa nyiqaane ini Tusi Hmitrötr memine la itre atr, ke, Iehova la ka troa hule la itre atr ceitu me itre mamoe, kowe la organizasio i Nyidrë. (Ioane 6:44) Ame la hnëqa së, tre, thaa ene hmekuje kö la troa jumejume la itre itine nyipici ngo ene mina fe la troa eënyine me fi la itre itine ka cia, nge kola qaja mina fe la troa inine la Tusi Hmitrötr memine la itre atr ka hni ka meköt. Maine tro sa ujë tune lai, haawe, easa kuca la hnëqa së ene la troa ce huliwa tro me Akötresie.—1 Kor. 3:9.