Troa Huliwane Tune Kaa La Itus “Ihnimi Akötesie” Matre Troa Xomiujine La Itre Etid
1. Nemene la aliene la itus “Ihnimi Akötesie”?
1 Drei la madrine së troa kapa la ketre itus ka hnyipixe, hna hape, “Thupë Nyipunieti Ju Kö Ngöne La Ihnimi Akötesie” ngöne lo ijine Asabele Ne Distrik hna hën ka hape, “Hna Eatrongëne Hnene La Uati Hmitrötre i Akötresie”! Tune lo hna amekötine hë, hna kuca la itusi celë matre troa xatua së troa atre me ajane la itre trepene meköti Iehova ngöne la aqane troa ujë, ngo thaa eje kö a inine la itre trepene ini ne la Tusi Hmitrötr. Thaa tro pi kö sa tro fë lai itusi cili ngöne la kola cainöje ngöne itre hnalapa trootro.
2. Troa huliwane tune kaa la itusi celë, nge thatraqai drei?
2 Ame la kola inine la Tusi Hmitrötr me itre atr, tre, troa huliwane la itusi celë nyine hnaaluene itus, thupene la itus Ini Tusi Hmitrötr. Loi e troa lapa mekune laka, isapengöne kö la aqane kökötre la itre atr ngöne la ua. Loi e troa ihmeku la aqane xomiujine së la etid memine la hna atreine trotrohnine hnene la hnainin. Nyipi ewekë troa xecie kuhu hni së laka, trotrohnine hnyawa hi angeice la aliene la itus. Thaa tro kö a xome la itusi celë troa nyiqaane la ini Tusi Hmitrötr memine la itre atr ka etid hë ekö, ngo ka thaa hane sine pala kö la itre icasikeu, maine pena thaa ajane kö troa mele thenge la itre hna inin.
3. Nemene la nyine tro epuni a kuca, maine epuni enehila a xomiujine la ketre etid ngöne la itus Thili Jë Kowe La Akötresie?
3 Maine epuni a xomiujine la ketre etid ngöne la itus Thili Jë Kowe La Akötresie, nge itre hnepe mekene pe hi matre nyipune pi la itus, haawe, ijije hi tro epuni a afenesine lai itusi cili me ithuecatre kowe la hnainin troa e caasine pë hë la itus “Ihnimi Akötesie.” Ngo maine nyimu mekene pala kö nyine troa wang, loi e troa xome lai itus ka hnyipixe. Ketre, ceitune mina fe kowe la itus Ini Tusi Hmitrötr, laka, thaa ka nyipi ewekë kö troa ce ithanatane lo itre xaa mekun.
4. Nemene la nyine tro sa kuca, e thaa hna afenesine pala kö lo lue itus hna hape, Ini Tusi Hmitrötr me “Ihnimi Akötesie” hnene la ketre hnainin ka xome hë la bapataiso?
4 Maine ase hë xome la bapataiso hnene la ketre hnainin, nge thaa hna afenesine pala kö lo lue itus, haawe, loi e troa sisedrëne la etid uti hë la pun la itus “Ihnimi Akötesie.” Ngacama hna bapataisone hë la hnainin, ngo ijije tro epuni a e la hawa, me iwai hmaca me etid. Ijije tro mina fe a e la hawa hnene la trejine ka ce tro me epuni me ka hane qeje mekun ngöne la kola ini tus.
5. Tune kaa la aqane tro sa huliwane la itus “Ihnimi Akötesie,” matre troa xatuane la itre trejine ka thaa cainöje hmaca kö?
5 Maine hna ië epuni hnene la ketre atrene la Kometr Ne Huliwa Ne La Ekalesia, troa xomiujine la etid ne la ketre trejine ka thaa cainöje hmaca kö, haawe, ijije troa sipo epuni troa ce wange me angeice la itre xaa mekene hna iëne hë, ngöne la itus “Ihnimi Akötesie.” Thaa nyipi ewekë kö troa aqeane la itre etid cili. Drei la ketre hna amekötin ka lolo catr hne së hna kapa ngöne la itusi cili ka hnyipixe, laka, hna fejane matre troa xatua së troa thupë së pala hi “ngöne la ihnimi Akötesie”!—Iuda 21.