“The Tro Kö Eö a Qou”
1. Tui Ieremia, nemene la itre jol hne së hna troa cile kow?
1 Ame ngöne lo kola xötrei kapa hnei Ieremia la hnëqa, ene la troa perofeta, tre, angeic a mekune laka, thaa ijiji angeice kö troa eatrën ej. Ngo hnei Iehova hna akeukawane la hni angeic, ka hape: “The tro kö eö a qoue,” nge hnei Nyidrëti hna thiina ka menyik, me hamë trenge catre koi angeic matre troa eatrëne hnyawa la hnëqa i angeic. (Iere. 1:6-10) Ame ngöne la hnedrai së, maine xou së troa ithanata maine easë pena a nango cile hnö, tro lai a hetre ethan kowe la aqane cainöje së. Maine easa xouene la aqane troa ujë koi së hnene la itre atr, maine aqane goeë së pena hnei angatr, tro lai a sewe së troa cainöj e itre xaa ijin. Tro sa elë hune tune kaa la xoue cili, nge nemene la itre manathithi hne së hna troa kapa?
2. Troa xatua së tune kaa hnene la hna canga hnëkë, matre troa nango cokötre la xou së troa cainöj?
2 Loi e Troa Canga Hnëkë: Tro ha nango cokötr la xou the së, e hne së hna canga hnëkë. Drei la ketre ceitun, maine tro sa canga ce wange hmaca la itre mekun ne la itre atr ka ajolëne la maca ka loi, tro hë sa atreine sa hnyawa la itre mekune cili. (Ite edomë 15:28) Tune kaa matre troa xomi ijine ngöne la Hmi Ne La Hnepe Lapa, matre troa hnëkëne la aqane troa cile kowe la itre jole ka isa pengön ka eje ngöne la hna ini, me ngöne la hna cainöj?—1 Pet. 3:15.
3. Kola xatua së tune kaa hnene la mejiune së koi Iehova troa elë hune la xou?
3 Loi e Troa Mejiune Koi Iehova: Ame la nyin ka sisitria catr thatraqane la xou, tre, ene la troa mejiune kowe la Akötresi së. Hnei Iehova hna ahnithe amë hë laka, tro Nyidrëti a xatua së. (Is. 41:10-13) Drei la elolone la aqane thupë së hnei Nyidrë! Ketre, hnei Iesu hna akeukawane la hni së, laka, ngacama nyimutre ju hë la itre jole hne së hna cile kow, ngo tro la uati hmitrötre i Akötresie a xatua së troa anyipicine hnyawa la maca ka loi. (Mar. 13:11) Haawe, catre pi së troa sipo Iehova la uati hmitrötre i Nyidrë.—Luka 11:13.
4. Nemene la itre manathithi hna kapa qa ngöne la hna catre cainöj ngacama easa cile kowe la itre jol?
4 Itre Manathith: Ame ngöne la easa catre cainöj, ngacama easa cile kowe la itre jol, kolo fe a acatrenyi së troa cile kowe la itre xaa jol ka troa traqa elany. Easa akökötrene e kuhu hni së la hni ka catr, ene la ketre thiina hna eën hnene lo itre atr ka nue la uati hmitrötr troa eatrongë angatr. (Ite hu. 4:31) Ketre, ame ngöne la easa elë hune la itre xou së hnene la ixatua i Iehova, easë hi lai a acatrene la lapaune së me mejiune së kowe la lue ime i Nyidrë ka iamele. (Is. 33:2) Hetrenyi the së la madrin, ke atre hnyawa hi së laka easa amadrinëne la hni ne la Tretretro së e koho hnengödrai. (1 Pet. 4:13, 14) Haawe, the tro pi kö sa xou troa catre tro fë la maca ne la Baselaia, ngo catre pi pe së troa mejiune kowe la ixatua qaathei Iehova!