Maine Epuni a Ajane Troa Canga Kapa La Itre Itusi Së Hna Ujën Ngöne La Itre Xaa Qene Hlapa Kö
Ame itre xaa ijin, easa ixelë memine la itre atr ka ajane troa e la itre itusi së ngöne la ketre qene hlapa kö ngo pë pe e hnine la ekalesia së. Atre fe hi epuni laka maine hetre Ëternet me masin nyine feja pepa thei epun, tre, ijije hi tro epuni a fejane la itre itusi së hna ujëne ngöne la 400 lao qene hlapa? Hanawange la aqane troa kuca:
• Tro jë ngöne , ene la aderesi ne Ëternet ne la Sasaiatri.
• Hna amë wengëne ngöne la götrane maca la itre xaa qene hlapa. Maine epuni a ajane troa amamane la nöjei qene hlapa asë, huje ju ngöne la iatr ne la fene hnengödrai.
• Huje ju me iëne jë la qene hlapa hnei epuni hna ajan. Thupene lai, troa mama la itre itus hnei epuni hna ajane troa fejan, tune la itre tarak me itre boroshür, me itre hna cinyihan. Pine laka hna ujëne la itre mekun ngöne la qene hlapa hnei epuni hna iën, the sesëkötre kö laka, thaa trotrohnine kö epun la taan la itre itus.
• Huje ju me iëne jë la ketre itus. Tro hë eje a mama ngöne ordinatör, nge ase hë lai, ijije hë tro epuni a fejane ej.
Xalaithe hi la itre itus ngöne Ëternet; ngo hetrenyi la itre xan e hnine la ekalesia. Maine hnei epuni hë hna sajuëne la aja ka eje thene la atr, haawe, loi e tro epuni a sipo itus thene la atrekë hnëqane la itre itusi së e hnine la ekalesia.